2 Kings 7 - Ohiatonhseratokénti

¹ Ne Elisha watarihwaseráko, “Satahónsatat tsi nahó꞉ten rá꞉ton ne Roiá꞉ner! Kén nenhkaháwike nenió꞉renne enwáton nasnínon ne Samaria nón꞉we oié꞉ri tekakontseráke ne kwáh tkanatsí꞉io khés ne tewásen nikakontseráke teiotikonstónres.”

² Né kwáh raʼónha ne ronnontí꞉io thóh í꞉reskwe wahawénhase ne Elisha, “Iáh thaónton né naiáwenhne—iáh shé꞉kon tóh꞉ka ne kwáh raʼón꞉ha ne Roiá꞉ner aʼontahateʼnatsáʼnieʼte nó꞉nenk!” “Ensatkátho tsi thoʼneniáwenhne, ók iáh kíʼ thènen ní꞉se thá꞉seʼke ne ká꞉khwa,” ne Elisha wathariwaseráko.

Né Syriaró꞉nons Ronterí꞉ios Éhren Sahónhneʼte

³ Kaiéri nihá꞉ti né rotironiakénthakwe tsi rotisthá꞉wiskwe thóh nón꞉we niʼónhneskwe ástste nòkwati tsi iotenhenrakáronte ne Samaria, tánon waʼthontaténhase, “Nontséren tsi kénʼen aitewateráʼrahte tsi nió꞉re ientewénheʼie?

⁴ Iáh othènen thaʼkarihontháko ne kanáthakon niaʼítewe, tsioríhwa tsi thóh nón꞉we athonkariáʼkon enʼionkwarí꞉iote; ók tóh꞉ka kénʼen entewenterón꞉take, entewenhé꞉ie kíʼ nonʼné꞉e. Á꞉kíʼ thóh iétewe tsi thoʼnatatoʼseróte ne Syriaró꞉nons; né kwáh tewahétʼken tsi nenʼionkhiʼiéraʼse enʼionkhinonwariákon, ók tóh꞉ka nón꞉wa ehionkhinóns꞉thate tsi tsónnhe.”

⁵ Ká꞉ti, tsi nontaiokarahonhátie, tsi thóh nathathoseróte ne Syriaró꞉nons niaʼhónne, ók kíʼ shiaʼónnewe, iáh ónʼka thóh tèienskwe.

⁶ Né Roiá꞉ner né waʼrónhniate né Syriaró꞉nons ronhterí꞉ios tsi wahonatʼthóntene tsi ní꞉ioht ne tahotinenhríne rotiʼtsiokwatʼtsáni ronhterí꞉ios tahotisátenhtse tánon otsónkwah tahotihonwísere, ók né Syriaró꞉nons né꞉ne wahón꞉nere né ronnontí꞉io Nisraeʼró꞉nonke né wasakónaʼne ne Hitró꞉nons tánon ne Egyptró꞉nons rontinontí꞉ios ó꞉ni ne rahononkwetaʼshón꞉as ronterí꞉ios niaʼonwanatsatónhti.

⁷ Ká꞉ti thóh siʼiokarasné꞉ha né Syriaró꞉nons wahontèko nahatinónstate tsi ronónnhe, wahontewéntethe tsi ronatathoserótons, ó꞉ni ne rahothitsenenhókons kosáhtens, ó꞉ni ne tehonhóntes, tánon kwáh ehʼtshièhiot tsi wahontewénhtheʼte tsi ronathathoseróthaʼkwe.

⁸ Nó꞉nen ne kaiéri nihá꞉ti shiaʼhónhnewe ne tsi iehiótokʼte ne tsi wáʼthoseróton, athoserákon iahontáweiaʼte, wathontsʼkáon tánon wahatinekíra, waʼthónʼnekwe ne kawiatará꞉ken, nowistanórons, tánon natserónhnia ne wahatitsénri, tánon ionsahatíhawe tánon wahonsethánion; ethó꞉ne shé꞉kon thontahónne, né nón꞉wa nó꞉ia waʼthoʼseróte ionsahontáweiaʼte, tánon kwáh thóh nonsahatí꞉iere.

⁹ Ók ethóhʼne waʼthontaténhase, “Iáh thaʼteiotonhontsóʼon thóh kíʼ naitewáiere! Karihwí꞉io ionkwáhien, tánon iáh thaʼteiothonhontsóʼon ne otsionháhak khók aionkwahteriéntarake. Tóh꞉ka entewaterá꞉rate tsitʼoronhkéne aitewatʼróri, kwáh siʼiorihwí꞉io tsi entewatréwaʼte. Á꞉nion ó꞉nenk thóh iétewe tsi tewaroriána ne ronnontí꞉io rahonhátsera!”

¹⁰ Ká꞉ti éhren sahónhnete ne Syriaró꞉non tsi ronathatoseróte, Samaria nionhsahónʼne, tánon iahonwatínonhke ne ratinikónhraʼre ne tsi iotenhenrakarónhtons: “Iehiá꞉kweskwe tsi thonathatoʼserótons ne Syriaró꞉nons ók iáh ónhka tehiakhíken iáh ó꞉ni thènen tehionkwahtahonseniénhni nónʼka akénhake; né kosáhtens tánon ne tehonhóntes iáh tehonwanasáronhte, tánon nathó꞉seras thotʼtsèiot tsi éhren ronéton ne Syriaró꞉nons.”

¹¹ Né ratinikónhrares wahatirihó꞉wanate ne ó꞉rihwases, tánon onʼterihó꞉wanate ne kanón꞉tiiotserakon.

¹² Kwáh shé꞉kon shaʼtetsiókaras, ók kíʼ ne ronnontí꞉io wahatkétsko kíʼ tánon washakawénhase ne rahonkwetashón꞉as, “Enkwahʼró꞉ri ne Syriaró꞉nons tsi nihonatenikonronhniháties! Ronateriéntare tsi ní꞉ioht nathonkariákon né kén nón꞉we, ká꞉ti éhren wahónʼnete tsi ronatenátaien tánon wahonthasetána kahetakésons. Ronʼnéren tsi éhren éntewete ne kanatowanénke naʼtewatonhnisákʼkha, tánon ethó꞉ne ó꞉nen tsientiónnheke tsi enhionkhiʼiéna tánon enhatiʼiéna ne tsi kanatowánen.”

¹³ Saiáta ne rahonkwéta wahénron, “Nonkweshón꞉ʼas ne kénʼen kanatowanénke iakoiesá꞉hon kíʼ wáhi, kwáh tsi ní꞉ioht tsi niká꞉ien nó꞉nen ronenhéion. Ká꞉ti á꞉nion tohkàʼra niháti ronónkwe ieietiʼiaténiet wísk nikanás꞉kwahke kosá꞉tens iehonwatiʼiaténhaf né iatehonathaténhron, né ká꞉ti nahónton aitewarihwatʼtsénri onhniʼiawénhen.”

¹⁴ Tóh꞉kaʼra niháti wahonwatiʼiataráko, tánon ne ronnontí꞉io tekaseréthake otsónkwa tsi iashakoténieʼte né wasakorihónten niahónʼne tánon nahatirihwatʼtsénhri onʼnihotiʼiathawénhen ne Syriaró꞉nons ronterí꞉ios.

¹⁵ Né ronnón꞉kwe tsík nió꞉re ne Jordan niahónʼne, tánon kwáh tsi nihiohá꞉hes wahontkatóseron niatʼtserónhnias ó꞉ni tsi nihonsthasónhas ne Syriaró꞉nons ronatsakwahríshions tsi nihonatèkwen. Ethóhʼne thontahónʼne tánon sahonwaró꞉ri ne ronnontí꞉io.

¹⁶ Nonkwé꞉shonʼas ne Samaria nón꞉we wathotisteríhen iahatiʼiákenhne tánon wahatinenskwenháton ne Syriaró꞉nons tsi ronathatoserótons. Tánon kíʼ tsi niháwen ne Roiá꞉ner, oiéri nikakontseráke ne kwáh tkanatsí꞉io khés tewásen nikakontseráke teiotikonstón꞉res skawístat kawistaráke khók satenhké꞉naske.

¹⁷ Kwáh tahiothokéntane nètho ronnontí꞉io Nisraeʼró꞉nonke né꞉ne kwáh raʼónha rahonkwéta ne rasenhnowánen rorihóntakwe nahatenhnikónrare ne tsi iotenhenrakáronte ne kanatowanénke. Né rasenhnowánen thoné nonwe nonkwé꞉shonʼas nathonwaskwahserónhkwahte tánon warénheʼie, kwáh kíʼ tsi nihorihwatháton ne Elisha né ronnontí꞉io sahokén.

¹⁸ Né Elisha rohró꞉ri ne ronnontí꞉io kwáh thóh nenhkaháwike nó꞉ia entsórenhne oiéri nikakontseráke ne kwáh tkanatsí꞉io khés ne tewásen nikakontseráke teiotikonstón꞉res enwatkerónthake ne Samaria né skawístat kawistaráken satenkénaske,

¹⁹ Né tsi watharihwaseráko ne rasenhnowánen, “Iáh tahónton né naiáwenhne—iáh shé꞉kon ne Roiá꞉ner rahonhatsíwa ahontahathénieʼte nonátsa; né kwáh ó꞉nenk!” Tánon tsi natehorihwaserákwen ne Elisha, “Ensatkátho tsi thóh nenhiáwenhne, ók iáh kíʼ ní꞉se thènen thá꞉seke ne ká꞉khwa.”

²⁰ Tánon ká꞉ti né꞉ne kwáh thóh nahoiátawen ne rahónʼa—warénheʼie, tehonwaskwaseronhkwáhton nonkweshón꞉as tsi iotenhenraká꞉ronte ne kanatowanénke.