2 Kings 6 - Ohiatonhseratokénti

Tsi Shotitsénhrion Nathóken

¹ Énska nènhneʼe tsi ratitsiókwahien ne rotitókense né꞉ne Elisha ranenhrakwení꞉io wahonwariwaʼkátatʼtse, “Tsi nónhwe nihiakwénhteron sóhtsi nikanaktáha!

² Takwahríhon ne Jordan iahiákwe tánon iahiakwahronhtsákon, né káti nahónton ahiakwahtenaktónhni tsi nónhwe nahiakwáhtsien.” “Aʼkiʼwáhi,” ne Elisha watharihwaseráko.

³ Saiáta wahotenekarónhkwen nahónhne; kíʼ wahrihwanónhweʼne,

⁴ tánon kíʼ skátke tsi niahónhne. Shiahónhnewe ne Jordan, tahonthásawen nahothihióten.

⁵ Saiáta tsi nihoronhtsakonhátse, thonthaiawénhstsi ne tsi iekanonhtsistó꞉hare ne rahothóken awènhke iahontenón꞉waien. “Onhkáti ná꞉tiere, sién꞉shion?” wahorihwanónhtonhse Elisha. “Hionhkathokenseraníhen!”

⁶ “Kaʼnónhwe iahonhtenónhwaien?” ne Elisha waʼharihwanónhton. Ne rónhkwe wahonatónhase tsi nónhwe iehiotenónhwaien, tánon ne Elisha wahakwíriaʼke, awènhke iahó꞉ti, tánon warónhnien nató꞉ken onónhtsi nahonsonhtháʼkeraʼkwe.

⁷ “Shashóko,” wahathénhnaʼne, kíʼ ne rónhkwe iathanénhsesthe tánon sharóhko.

Ne Syriaró꞉nons Ronhterí꞉ios Wahonwatisénhni

⁸ Ne ronhnonhtí꞉io ne Syriahne ronaterí꞉ioʼkwe Nisraerʼró꞉nons. Washakorihwanónhtonhse ne rahonkwetashón꞉ʼas tánon nahatiráko kakʼnónhwe nahonthatohseróthen.

⁹ Ók kíʼ ne Elisha iahoterihwaniéthen ne ronhnonhtí꞉io Nisraerʼró꞉nonke, roronhkathénhnis ne tó꞉sa ákta arèthe né nónhwe, tsioríhwa ne Syriaró꞉nons tsi thóh nónhwe naʼtehonanénhraien nahonwatinenhrénhthen.

¹⁰ Káti ne ronhnonhtí꞉io Nisraerʼró꞉nonke washakoronhkáthen nonhkweshón꞉ʼas né nónhwe nihatinákere, tánon kíʼ ronathateweienhnenhtháhon. Thóh kí꞉ken nahá꞉wenhne né꞉ne tó꞉ka niahónterasʼthe.

¹¹ Ne Syriaró꞉non ronhnonhtí꞉io kwáh í꞉ken tsi kowánen wathatatenikonhráren; iashakonónkʼkon ne rahonkwetashón꞉ʼas tánon washakorihwanónhthonhse, “Ónhka ne tsi nítson thóh nòkwahti ítrathe ne Nisraerʼró꞉non ronhnonhtí꞉io?”

¹² Saiáta watharihwaseráko, “Iáh ónhka, Sanonhtiio. Né rotó꞉kenhse Elisha ró꞉roris ne ronhnonhtí꞉io Nisraerʼró꞉nonke tsi nahó꞉ten ahénron né nó꞉nen iáh ónhka nakó꞉ren thóh tèiens ne tsi shanonwétstha.”

¹³ “Sewarihwísak kanónhwe níres,” ne ronhnonhtí꞉io washakónahne, “tánon kíʼ enhiʼiéna.” Nónen shahonwaró꞉ri nètho Elisha tsi Dothan nónhwe ítres,

¹⁴ roʼnatsiokowánen ronhterí꞉ios iashakothénieʼte né꞉ne koshá꞉thens tánon otsónkwahs wáhonsthe. Ónenh shiʼtsokaráhon shahónhnewe ne kanatowanénhke tánon kíʼ wathatinathánake.

¹⁵ Oronhkéstsi nó꞉ia sahiórenhne ne Elisha rahonhátsera wahatkétsko, iahahiákenhne, tánon washakóken ne Syriaró꞉nons ronhterí꞉ios skát꞉ke ne rahotitsenenhó꞉kons tánon notsónhkwah rahotiseresónhas tehotinathánen tsi kanáthaien. Elisha sahorioriána, “Hionhkwehé꞉ion, sénʼshion! Onh nahitewáiere?”

¹⁶ “Tó꞉sa sáteronhk,” ne Elisha watharihwaseráko. “Sénha í꞉i nòkwah hionhkwenhtsokowánen tsi ní꞉ioht ne ronhnónha.”

¹⁷ Ethòne ó꞉nen wahaterénhnaien, “O Saiá꞉ner, tekskaʼkwahríhsi tánon tseríhon nahatkátho!” Né Roiá꞉ner watharihwaseráko ne rahoterénhnaient, tánon ne Elisha rahonhátsera wahatharakétsko tánon kíʼ wahatkátho ne tsi iononhthakárenhre né thiʼtsoróhron ne koshá꞉tens tánon notsónhkwahs ótsire í꞉ken akwékon ne tehokwahthaséton ne Elisha.

¹⁸ Nó꞉nen ne Syriaró꞉nons sonhthahonwanatsaʼthónhti, Elisha wahaterénhnaien, “O Saiá꞉ner, shé꞉ient kí꞉ken ronhnónhkwe ne tahatirónhweke!” Né Roiá꞉ner wathariwashé꞉rako ne rahoterénhnaient tánon washakóienthe ne tahatirónhweke.

¹⁹ Ethòne ó꞉nen ne Elisha thóh niaháre tánon wahénron, “Thí꞉hiohahá꞉the sewathahí꞉thake; iáh né kíʼ thé꞉ken ne kanatowánen ne sewésak. Thakwáhser, tánon í꞉i enkwahénhthenhse tsi ítres ne rón꞉kwe ne tsi sewaiaʼtisá꞉ks.” Tánon kíʼʼ Samaria nón꞉we niasakoiaténhaʼwe.

²⁰ Kwáh tsi niʼiostó꞉re iahatinátarane ne kanatowá꞉nenke, ne Elisha wahaterénnaien, “Tonsasekaʼkwahrí꞉si, Saiá꞉ner, tánon sheríhon naonsahatí꞉kenʼne.” Né Roiá꞉ner wathoriwaseráʼkwahse ne raoterénnaʼien; sahaʼkwahtáʼko ne ratikarakéson, tánon waóntʼthoʼke tsi kanátakon ne Samaria nón꞉we nihón꞉nes.

²¹ Nó꞉nen ne ronóntí꞉io ne Israerʼró꞉nonke wasakó꞉ken ne Syriaró꞉nons, wahoriwanóntonse ne Elisha, “Akhenonwariáʼkon kén, sién꞉shion? Akheʼnonwariáʼkon kén?”

²² “Iáh,” wataʼriwaseráko “Akwéʼkon iáh né ratishó꞉tar né ronwatiʼiénen tsi waterí꞉io thaʼsenonwariáʼkon. Knahó꞉tenk shèʼnonk tánon seʼné꞉kanont, tánon seʼrí꞉on tsi tenʼterón꞉ne ronwanontí꞉io niesón꞉ne.”

²³ Ká꞉ti ne ronontí꞉io ne Israerʼró꞉nonke tahát꞉kaʼwe ne kowánen tsi waonwatiʼkwahérase; tánon ne sahatikwéntaʼne tánon sahatinekiʼráshion, ionsashakoténieʼte tsi thénteron ne ronnontí꞉io ne Syrianʼhne. Thó tontáʼsawen ne Syriaró꞉nons waʼhóntkaʼwe tsi ratinenrénthaʼkwe ne tsi ionhontsá꞉ien ne Israerʼró꞉nonke.

Tsi Tekonwanatáhnen Ne Samaria

²⁴ Ostón꞉a onakènʼke ne Ronnontí꞉io Benhadad ne Syria wahonénʼriʼne ne raonkweʼtaʼsón꞉as ronterí꞉ios niasakotsatónti Israerʼró꞉nons tánon waʼtanatháʼnaʼke ne kanatowanénke ne Samaria.

²⁵ Ók tsi naháwenhne ne tsi tekonwanatánen tsi naʼtewatenón꞉ianiʼte wahotikwahnorónsten ne kanatowanénhke né tewahóntes onóntsi shatékon nikawistáhsen kawistaráken nikaʼnó꞉ronhkwe, tánon ne saʼtekakontseríhen nó꞉rite ó꞉tah wísk né nikaʼwístake nikaʼnó꞉ronkwe.

²⁶ Né ronnontí꞉io Israerʼró꞉nonke tehotekhahaʼkwenhátieskwe né tsi tekenstenró꞉te ne kanatowanénke nó꞉nen ne tsiotonwísen waʼtiohén꞉rete, “Taʼtiénawas, Sanontí꞉io!”

²⁷ Waʼthariwaserá꞉ko, “Tóh꞉ka ne Roiá꞉ner iáh teiaié꞉nawase, ónʼní꞉ioht ne kaienawasétsera aontakát꞉kaʼwe? Thé꞉nen kén aonkenatsaiéntaʼke khés ne otsítsa ahonkʼnekaiéntaʼke?

²⁸ Onʼnahó꞉ten tesanikónraʼre?” Tsi watʼkariwaseráʼko, “Ó꞉ias thetènre kí꞉ken iónkwe onterientatʼtshénri nashakeniwáraʼke riʼiénʼa, tánon nó꞉ia entsiórenʼne né nón꞉wa ne roiénʼa enseshakeniwáraʼke.

²⁹ Ká꞉ti washaʼkeniwarárihte ne riʼiénha tánon washakeniwárahʼke. Nó꞉ia saiórenʼne wahatró꞉ri tsi roiénha nón꞉wa enseʼsakeniwá꞉rahke, ók roʼiathaséhton nenné꞉e!”

³⁰ Tsi nahothónteʼne kí꞉ken, ne ronnontí꞉io waharatiónko ne rahotserónnia tsi nióre tsi tahaʼtón꞉neke, tánon nonʼkwesónʼas ne asonták꞉ta í꞉ienskwe watsesén tsi waʼontkátho tsi káʼiare ná꞉kon thótsʼton tsi rotierón꞉ni.

³¹ Waʼhén꞉ron, “Aiáwens ne Rawenni꞉io aháʼtiente akíheie tó꞉ka ne Elisha iáh tahonwanontsístsiaʼke nohénton aontenʼniserót꞉ten nón꞉wa wenniseráte!”

³² Tánon iasakoténieʼte ne ratirihwakaʼrénies nahonkwenʼnónksa ne Elisha. Éhthoh né náhe né Elisha raonóns꞉kon tenterón꞉taʼkwe tánon tó꞉ka nihá꞉ti ne roʼtikstenhokónha ronwanatharenáwikwe, Nohénton shiahón꞉newe ne ronnón꞉tí꞉io ronwaríhwakaʼreniénʼni, né Elisha wasaʼkawén꞉hase ne rotikstenhokónhas, “Nètho sakosé꞉tha ónkak tashakotéhiete naionkenonwariákon! Ká꞉ti nó꞉nen kénʼen énraʼwe, tesewanó꞉haien tánon tó꞉sa tsisewaríhon nahontaʼhatáweiaʼte. Né ronnonʼtí꞉io kwáh thokʼhenhorentónʼne.”

³³ Iak tshieʼhóson tsi nihatón꞉nionskwe, nó꞉nen ne ronnontí꞉io rahonkwé꞉ta wárahwe tánon wahénron, “Kwáseʼ Roiá꞉ner tasonkwahawíten kí꞉ken tekanikonraráh꞉tsera nontionháke! Onʼnontséren tsi shé꞉kon aonsakateráhrate né knaháiere?”