2 Kings 25 - Ohiatonhseratokénti

Tsi Nontakaiátenhne Ne Jerusalem

¹ Ne Zedekiah wahonenróktaʼse ne Ronnontí꞉io Nebuchadnezzar né꞉ne Babyloniaró꞉non, tánon ká꞉ti ne Nebuchadnezzar ratikwé꞉kon tashakoiaténhawe ne rahonkwetaʼshón꞉ʼas ronterí꞉ios tánon iahatsiatónhti ne Jerusalem né꞉ne oierí꞉haton siʼwenhniseráte né oieríh꞉haton siʼwenhní꞉tare né tiotónhaton siʼioseráteʼkwe ne Zedekiah shiʼhonontí꞉ioʼkwe. Ástste nakanatáti nón꞉we nahonthathoseróhten, waʼthonkwahthá꞉sete waʼhontenhenrónhni né꞉ne tahatinatáʼnakʼte,

² tánon thó tehotinathánen tsi nióre né Zedekiah iakáhewe nénska iawénre niʼioseráke enhonontí꞉ioke.

³ Né tiotón꞉haton siʼwenhniserátekwe né kaieríhaton siʼwenhnitakéhaton né꞉ne siʼioseráteʼkwe, nathonkariákon thó nióre tsi wahekéntakwe nonkweʼshón꞉as kwáh iáh othènen tetsakoiénthakwe nahó꞉ten aié꞉ke,

⁴ né tsi watenhenró꞉te né tekanathanákton tsathonʼnótkaʼwe. Iáh othènen tetsiorá꞉kwen ne Babyloniaró꞉nons tsi tehotinathánenʼne, ratikwé꞉kon ne ronterí꞉io tsi niwaʼshón꞉tes shonatékwen. Eh ronathohétston ne kanontiʼiótsera ahohéthakon, iathonʼnót꞉kaʼwe ne tiotenhenrakáronʼte né tekákʼken ne tewaʼthenhénrakes, tánon thó nòkwah niahontekwáhsen tsi nieʼiawénon ne Jordan Ahonráhkwahkon.

⁵ Ók kíʼ ne Babyloniaró꞉nons ronterí꞉ios wahonwásere ne Ronnontí꞉io Zedekiah, iahonwanónterahne tsi tkaʼhenthakwénhrare ne Jericho, tánon ratikwé꞉kon ne rahonkwetaʼshón꞉as ne ronterí꞉ios wahonwaʼtewénhtheʼte.

⁶ Ne Zedekiah Ronontí꞉ioke Nebuchadnezzar niaʼhonwahiaténhawe, tsitkanatowaʼnénke nènhne ne Riblah nón꞉we ítreskwe, tánon thó nón꞉we ne Nebuchadnezzar taʼhoríhwenhte.

⁷ Tsi nikaʼríh꞉wes ne Zedekiah tehakánerahkwe, né roiénha wahonwanonwaríhkon; ethó꞉ne ne Nebuchadnezzar wahathénʼnane ne Zedekiah tahonwaʼkarahtháko, waʼonwaronkwahsánerenhke, tánon Babylon niahonwahiaténhawe.

Tsi Niʼiotkaronníʼon Ne Ononsatokentiʼkó꞉wa

⁸ Né tsatákaton niwenhniserakéhaton ne wískʼkhaton siʼwenhnitakéhaton né tiotón꞉haton siʼioseráteʼkwe siʼhonontí꞉ioʼkwe ne Nebuchadnezzar né Babylonia nón꞉we, né Nebuzaradan, rahón꞉ha ne ronnontí꞉io rotenikonráhwiskwe tánon rahón꞉a ne rahsennówanenhne kènʼne tsi nòkwah ne ronterí꞉ioskwe kentsókwah, iahatinátaraʼne Jerusalem.

⁹ Wahatenonkwatetʼte ne Ononsatokentikó꞉wa, ne tsi kanontiʼiotseráien, tánon ne tsi rotinonshótons ne thó natonkwetaʼtónhnions ne Jerusalem,

¹⁰ tánon ne rahonkweʼtaʼshón꞉as ronterí꞉ios wathatirihthánion ne tekanathaʼnákʼtons watenhénraien ne kanatowanénhke.

¹¹ Ethó꞉ne ne Nebuzaradan Babylonia niaʼsakohiaténhawe nonhkweʼshón꞉ʼas ne iatehonathaténhron ne kanatowanénhke, ó꞉ni ne iatehonathaténhron ne rotihiotenhserarenhnáʼons, tánon tsi niʼiákon ne Babyloniánoronhke nón꞉we ieiakonakeráhkwen.

¹² Ók Judah nón꞉we nashakóteron ne kwáh tsiakó꞉ten nón꞉kwe, né꞉ne iáh othènen teiakoienthatseráien, tánon thó nón꞉we nashakohioténhseron nahotiʼióten ne tsi kanenharaientʼthóserons tánon kahentákes.

¹³ Né Babyloniaró꞉nons waʼthatirihthánion ne otsínekwar nikaristótens kanawahathótons tánon ne otsínekwar nikaristhó꞉tens ionhniáton watnekaráhkwah Nononsatokentiʼkówaʼne kaiénthakwe, skát꞉ke ne otsínekwar nikaristóthen kanakowáʼnen, tánon akwé꞉kon notsínekwar nikaristótens Babylon nón꞉we niahatíhawe.

¹⁴ Tánon ó꞉ni akwé꞉kon iahatíhawe ne iekareniá꞉thas ó꞉ni ne wathakenrahrákwah né ronsthákwahkwe né thenhonnotaro tsi ientsienharáhkwahke, né tsi niʼionstasónhas né waʼthaserothákwahke, ne katʼtsesónhas ne ronhtenekwensarakwáhtha nó꞉nen enhonteskón꞉ten, ne katʼtshesónhas ne ronhtsienkwahronhniathákwas, tánon akwé꞉kon nohiásons nahoténsons ne otsínekwar nikaristó꞉tens ne ronsthákwah nononsatokentiʼkó꞉waʼne nenhotiʼióten.

¹⁵ Akwé꞉kon iahatíhawe tsi nahoténsons nowistanó꞉ron khés ne kawistaráhken nahó꞉ten ionhniá꞉ton, thó ká꞉rahtse ne kenhnikhatsetásas ó꞉ni nontáksónhas ne ronsthákwah nahatíhawe ne ioswenthataríhen.

¹⁶ Né otsínekwar nahothénsons nètho Ronnontí꞉iokwe Solomon rahsenhénhni Nononsatokentiʼkó꞉wa—ne tekanawaʼhá꞉thakes, né watnekaráhkwahs, tánon ne kanakowáʼnen—sóh꞉tsi iókstesʼkwe nahatikontseriháren.

¹⁷ Né tekanawaʼhá꞉thakes kwáh né né sá꞉ka í꞉ken: né skatnawaʼhatátʼtsons 27 niwasítake nitiótʼteskwe, otsínekwar nikaristóten é꞉ken iehióhare, 4½ niwashítake ní꞉ions. Né tehiokwahtasé꞉ton ne é꞉neken otsínekwar nikaristóten tekaieronniháton tsi karahsesthánion né waʼiarón꞉nions notsínekwar nikaristótens wáts꞉ton.

Nonkweʼshón꞉as Ne Judah Nón꞉we Babylonianó꞉ronhke Niahonwaʼtiʼiaténhawe

¹⁸ Tsiesʼká꞉te, ne Nebuchadnezzar, né rasennowánen, iahoiaténhawe nahonóton ne Seraiah né꞉ne ratsihenstowáʼnen í꞉ken, né Zephaniah rahón꞉ʼa ne thó ísrahte né kwáh é꞉neken tót꞉te ratsihenstowáʼnen, tánon nasén꞉niháti nó꞉ia thó natʼtsénhnates ronaterihónton nononsatokentikóʼwaʼne.

¹⁹ Kanatowanénʼke iahoiaténhawe ne rasenhnowáʼnen ne roterihóntakwe tsi nòkwah ne ronhterí꞉ios kentsókwahien, né wísks niháti ne kwáh ronnontí꞉io ronwatenikonrasonteráhniskwe né shé꞉kon tsi kanatowanénhke ratiterón꞉takwe, ne rasennowánen roiatanónhnakwe, né꞉ne rahnikonhrá꞉rakwe ne naterihiósera kahiatonserasónhas, tánon shé꞉kon ó꞉ia ne iá-iak niwasennihátikwe ne thó natʼtsénhnates.

²⁰ Ne Nebuzaradan ronnontí꞉ioke ne Babyloniaró꞉nonke niasakoiaténhawe, ne rahón꞉a tsi kanatowanénke ne Riblah nón꞉we iéreskwe

²¹ né꞉ne tsi wathonwénhtsaien ne Hamath. Thó nón꞉we ne ronnontí꞉io wahathénnane nahonwatinonwenhseráhrio tánon nahonwatinonwariakónhnion. Ká꞉ti nonkweʼshón꞉as ne Judah nón꞉we éhren wahonwatiʼiatenháwite ne rahononhontsákes tánon wahonwenhnanakeráhkwahte.

Ne Gedaliah, Né Rakórahkwe Kénʼne Ne Judah

²² Ne Ronnontí꞉iokwe Nebuchadnezzar ne Babyloniaró꞉nonke Gedaliah wahokórasthe, né꞉ne roienkénʼen ne Ahikam tánon ne rosotkénʼen ne Shaphan, ne rakórahkwe ne Judah nón꞉we, tánon rahónʼa wahorihónten nasakotenhnikonhráhren tsi nihá꞉ti ne iáh Babyloniaró꞉nonke tsehonwatiʼiaténha.

²³ Nó꞉nen ne Judahró꞉non ratisennowánens tánon ne ronterí꞉ios tsi nihá꞉ti ne iáh tehonaʼnentsakwahríhshion wahatirihwáronhke kí꞉ken, Gedaliah wahonwatsiáʼtarahse né Mizpah nón꞉we. Kí꞉ken ratisennówanenskwe thó raiá꞉tare ne Ishmael né꞉ne roienkénʼen ne Nethaniah, ne Johanan né꞉ne roienkénʼen ne Kareah, ne Seraiah né꞉ne roienkénʼen ne Tanhumeth né꞉ne tsi kanatowanénhke ne Netophah raná꞉kerekwe, tánon ne Jezaniah né꞉ne tsi kanatowanénke ne Maacah nón꞉we nihanákerekwe.

²⁴ Né Gedaliah washakawénhase, “Tkwá꞉wi nakewénhna tsi iáh tateiotonhwenhtsóʼon naietʼtsitsánike ne Babyloniaró꞉nons ratisennowánens. Kén kí꞉ken ionhontsáien sewenhterón꞉tat, né tsi sewahiótens ne Babyloniaró꞉non ronnontí꞉io, tánon akwé꞉kon tsienhioiánerenhne ne sewarihwáke.”

²⁵ Ók kíʼ ne tsatakhá꞉ton siʼwenhnitakéhaton né꞉ne siʼioseráteʼkwe, ne Ishmael né roienkénʼen ne Nethaniah tánon ne rosotkénʼen ne Elishama, né꞉ne kanontiʼiotserákon rawatsirathátie, Mizpah nón꞉we niaháre oiéri nihá꞉ti wahontenrósen, iahonwatsatónhti ne Gedaliah, tánon wahonwanonwariákon. Kwáh ó꞉ni washakononwariakónhnion ne Judahró꞉nons ó꞉ni ne Babyloniaró꞉nons ne ronatenrosenhtátieʼne.

²⁶ Ethó꞉ne ratikwé꞉kon Nisraeʼró꞉nons, ahotikwahtiéhake khés nahotiʼténtonhke, skát꞉ke ne ronterí꞉ios ratisennowánens, wahonténhti Egypt niahónne, tsioríhwa tsi sakotiʼtsániskwe ne Babyloniaró꞉nons.

Né Jehoiachin Sahonwanotónhko Tsi Ranó꞉tonhkwe

²⁷ Né꞉ne siʼioseráteʼkwe nètho Evilmerodach rahón꞉a sahatenontí꞉ioste ne Babyloniaró꞉nonke, tahaterihwaiéritste tsi nòkwah ne Ronnontí꞉io Jehoiachin ne Judahró꞉non né tsi sahonontónhko tsi ranó꞉tonhkwe. Né kí꞉ken ne tewásen-tsáta siʼwenhniserátekwe né tekeniʼiawénre siʼwenhnítarakwe né áhsen-niwásen tsáta siʼioserakéhaton siʼtsotohétston siʼhonwanó꞉ton ne Jehoiachin.

²⁸ Né Evilmerodach kwáh í꞉ken tsi tahoteweientónhase tánon wahoríhonte ne kwáh tkowánen ne kakweniensthátsera tahá꞉wen sénha tsi nahontasakówike ne ronátsakes ne ronwananahkerakwáhton rotinontí꞉ioskwe skát꞉ke ne rahónha ne Babyloniaró꞉nonke nón꞉we.

²⁹ Ká꞉ti ne Jehoiachin wahonwaríhon ne tahonsahathataʼkwénion tánon ronnontí꞉io rahotekwáhrahʼne tehatskahónsheʼke né꞉ne tsi nen ronnhéshonʼke.

³⁰ Iaʼtewenhniseráke, né꞉ne tsi nikaríwes enrón꞉nheke, kwáh enthonwawísheʼke tsi nahoténsons tahotonhontsoníhake.