2 Kings 24 - Ohiatonhseratokénti

¹ Tsi nikaríhweskwe ne Jehoiakim ronontí꞉iokwe, ne Ronnontí꞉iokwe Nebuchadnezzar ne Babylonia nón꞉we waʼshakonenhrénhten ne Judah, tánon né꞉ne áhsen nihioserákeʼkwe waʼhón꞉ionhnien nahá꞉tewenhnarakwe ne raʼoianerenhsera; ethó꞉ne ó꞉nen thontahó꞉nakwen.

² Ne Roiá꞉ner iashakoténiete ne ronterí꞉ios raotiʼtsiókwas né꞉ne Babyloniaró꞉nons, Syriaró꞉nons, Moabró꞉nons, tánon ne Ammonró꞉nons niahonwatiatón꞉ni ne Jehoiakim né꞉ne ahatiʼrihwáthonte ne Judah, tsi kiʼniháwen ne Roiá꞉ner rahonháke ne raonhátshera rotokenséhakwe tsi thó kíʼ nenhá꞉iere.

³ Ki tsi nahá꞉wenhʼne ne tsi nihotenhnáʼon ne Roiá꞉ner, né nahón꞉ton né꞉ren ashakoiatenháwite nonkweʼshón꞉as ne Judah nón꞉we ne rahohénton tsorihwa né nó꞉rihwakwé꞉kon ne karihwanerahát꞉tsheras tsi nihotieránions ne Ronontí꞉io Manasseh,

⁴ tánon sén꞉ha ne aoríhwa tsi niʼiákon ne iáh othènen teiakoníkon tsi ionthatenonwariákon. Né Roiá꞉ner iáh tehothontháton nahonsahonikónrenhse ne Manasseh.

⁵ Orihwakwé꞉kon tsi nihotieránion ne tho Jehoiakim thóh nón꞉we nikaiatónhnions Tsi Nihonwatikáratons ne Ronhtinontí꞉ios ne Judah Nónhwe.

⁶ Ne Jehoiakim warénheʼie, tánon né꞉ne roiénha Jehoiachin tonhsahonaktákwen tsi sahatenontí꞉ioste.

⁷ Ne ronnontí꞉io ne Egypt tánon ne rahonkwetaʼshón꞉as ronterí꞉ios iáh shé꞉kon nonwénton teshotiʼiakénʼen ne Egypt, tsioríhwa ne ronnontí꞉io ne Babyloniaró꞉non ó꞉nen kanakeraserakwé꞉kon thoniarótaron né꞉ne Egypt ahowenhkénʼen, né꞉ne Euphrates Kaniataratátse tsotásawe tsi nióre ne tsit karistathátse ne othoréke nokwá꞉ti ne Egypt.

Né Jehoiachin Rahón꞉a Ne Ronontí꞉iokwe Ne Judah

⁸ Ne Jehoiachin shatékon satehahoseriʼiákon sahatenontí꞉ioste ne Judah nón꞉we, tánon rahón꞉a rakó꞉rakwe ne Jerusalem né꞉ne áhsen niwenhnítake nikaríhweskwe. Ne ronisténha né꞉ne Nehusta iontátsiatskwe, né sakoienkénʼen ne Elnathan né꞉ne Jerusalem nón꞉we nihanákerekwe.

⁹ Né rasérene tsi thontahotenientenstonhátse tsi nihaweienó꞉tenhne ne ronikénhen, ne Jehoiachin waharihwánerake tsi nòkwah ne Roiá꞉ner.

¹⁰ Tsi nikaríhwes ronontíʼiokwe nètho Babyloniaró꞉nons ronterí꞉ios, tsi nisakonáhon ne Ronnontí꞉io Nebuchadnezzar ne raʼonkwetaʼshón꞉ʼas, Jerusalem niahotinenríhne tánon iathatinathánake.

¹¹ Tsi nikaríhwes tehotinathánen ne Nebuchadnezzar kwáh rahón꞉ʼa ó꞉ni Jerusalem niahá꞉re,

¹² tánon ne Jehoiachin, skát꞉ke ne ronisténha, ne raʼonkweʼtaʼshón꞉ʼas, ó꞉ni ne kanontiʼiotsherákon ronaterihóntons, wahontsakwahríhsi rononháke ne Babyloniaró꞉nons. Né shatekonháton siʼioserathátse ne Nebuchadnezzar shiʼhonontí꞉ioʼkwe iahoiaténhawe ne Jehoiachin wahonóton

¹³ tánon Babylonia akwé꞉kon niahatíhawe ne kanorón꞉sons ne Ononsatokentikó꞉waʼne ó꞉ni ne kanontiʼiotsherákon kaiéntaʼkwe. Tsi kíʼ nitotró꞉ri ne Roiá꞉ner nohénton, Ne Nebuchadnezzar akwé꞉kon waʼtharihthánion noʼwistá꞉rorons ionsthá꞉kwáh ne taionská꞉on né꞉ne Ronnontiʼiokénʼen Solomon rosahánion naʼiónstaʼke Nononsatokentiʼkó꞉wane.

¹⁴ Ne Nebuchadnezzar iasahkoiaténhawe naʼsakonóton nonkweʼshón꞉as ne Jerusalem ratinákereʼkwe, ratikwé꞉kon ne rotinontí꞉ios, ratikwé꞉kon ne ohénton iahonʼnéthonkwe, oiéri-tewenhniawehetsherásen nihá꞉ti ne tsokwét꞉kon. Ratikwé꞉kon ó꞉ni shasakoiatínekenwe ne ratihiotenserahweiénʼons, thóh natiʼiá꞉tare ne ratiristón꞉ni, nek iathosahonaʼtátere ne kwáh rotíten ne Judah nón꞉we.

¹⁵ Ne Nebuchadnezzar Babylonia niahoiaténhawe ne Jehoiachin né nahonóton, skát꞉ke ne ronisténha, ne ró꞉ne, ne rahonkwetaʼshón꞉ʼas, tánon ne ohénton iehonʼnétons ne Judah.

¹⁶ Ne Nebuchadnezzar ratikwé꞉kon Babylonia niasakoiaténhawe ne thonatʼtsenates, tsáta tewenhniawehetsherásen nihá꞉ti ne tiokwék꞉ton, tánon enskatewenhniawehetsherásen nihá꞉ti ne rotiʼhiotenserarenhnáʼons, thó ratiʼiátaʼre ne ratiristón꞉nis, kwáh ratikwé꞉kon iatekaiéri tsi nihonatakaríte nahonwatishotarónhni.

¹⁷ Ne Nebuchadnezzar né Jehoiachin rononwáʼha Mattaniah né sahonontí꞉ioste ne Judah tánon waʼhosennaténi Zedekiah sahoná꞉tonkwe.

Ne Zedekiah Ne Ronnontí꞉iokwe Ne Judah

¹⁸ Ne Zedekiah tewásen-énska satehahoseriʼiákon sahonontí꞉ione ne Judah, tánon énska iawénre niʼioserákekwe rakó꞉rakwe ne Jerusalem. Né ronisténha né꞉ne Hamutal, né꞉ne Jeremiah sakoienkénʼen né꞉ne tsitkanatowanénke ne Libnah nón꞉we nihanákerekwe.

¹⁹ Né Zedekiah waharihwánerake tsi nòkwah ne Roiá꞉ner, kwáh kíʼ tsi nihoiéren ne Ronnontiʼiokénʼen Jehoiakim.

²⁰ Né Roiá꞉ner tsi nióre tsi wahotenakwawénhratʼtse tsi nòkwah ne Jerusalemró꞉nons ó꞉ni ne Judahró꞉nons kwáh éhʼren washakoiatenháwite ne rahohénton.