2 Kings 23 - Ohiatonhseratokénti

Né Josiah Èhren Wahahawitánion Ne Kaiatón꞉nis Tsi Ronwatisennaʼientákwah

¹ Né Ronnontí꞉io Josiah iashaʼkó꞉nonʼk kon ratikwé꞉kon ne sakotiʼhéntenhse ne Judah nón꞉we ó꞉ni ne Jerusalem,

² tánon skát꞉ke tsi niahónʼne Nononsatokentiʼkó꞉waʼne, rón꞉ne ne ratitsihénstaʼtsis ó꞉ni ne rotiʼtokenséhawe ó꞉ni kaʼnenhrakwé꞉kon nonkweʼshón꞉as, iakokwáhtse ó꞉ni ne iakó꞉ten kwáh kíʼ satèiot. Raotiʼhénton akwé꞉kon ne ronnontí꞉io ioraʼkaréni tsi wasakowenhnanó꞉thaʼse kwáh kaiatonhseraʼkwé꞉kon naterihwaseronhniátshera tsi kíʼ nikatʼtsénhrion nononsatokentiʼkó꞉waʼne.

³ Né Ronnontí꞉io ákta waʼthá꞉taʼne ne kanontiʼió꞉tshera tsi ronatenahwaháthoʼte tánon waʼiatsanerenhserónhni ne Roiá꞉ner né tsi enhowenhnaʼráhkwahke, tsi enhaʼtiénawasʼte ne raʼoianerén꞉sehras ó꞉ni ne raʼorihwathátsheras kwáh kíʼ raʼwehriasakwé꞉kon ó꞉ni raʼotonnhetsheraʼkwé꞉kon, tánon naʼaiótenste ne karihwaʼnontónhtsheras tsi naʼtekhá꞉ken naʼterihwaseronhniátshera, tsi kíʼ nikahiáton ne kaiatonhserákon. Tánon kwáh kíʼ onhkweʼtakwé꞉kon waʼonráhratsʼte tsi enhiontsénawasʼte naterihwaʼseronniátshera.

⁴ Eʼthó꞉ne ne Josiah waʼónahne ne ratsihenstowá꞉nen Hilkiah, ó꞉ni ne roiatanón꞉hne ratsihénstatsi, tánon ne ratinikónhrare ne tsi ieiontaʼwehiathákwah Nononsatokentiʼkó꞉waʼne nahontahatiʼiákenhwe akwé꞉kon tsi nahoténsons ne rónstha tsi akonwasén꞉naien ne Baal, né꞉ne kaní꞉io Asherah í꞉ken, tánon ó꞉ni notsistokwasónhas. Né ronnontí꞉io akwé꞉kon wahatsahathánion kíʼ tsi nihonstasónhasʼkwe náts꞉te nakaʼnatháti ákta ne Kidron ahonráʼkwakon tánon né wakenronthákwen Bethel né nón꞉we niahatíʼhaʼwe.

⁵ Sahshaʼkonashiónko ne ratitsihénstatsis nètho ronnontí꞉io ne Judah nón꞉we nisakorihwaʼniráhti nahonterihwatsʼterístake nahonteskóntʼthaʼke ne kaiatonnishónʼas aʼonákwenʼk ietsienharákwah né꞉ne tsi kanatowanénken ne Judah tánon né aktaʼtseʼshón꞉as kanataiéntonkwe ne Jerusalem—ratiʼkwé꞉kon ne ratiʼtsihénstatsis ne ronterihwatsterísthaʼkwe ne konwateskonthaníhakwe ne Baal, ne tsi karákwahre, nasontʼthenʼnékha karákwah, né ken nikaʼrahkwáhshas, ó꞉ni notsisthowahsónhas.

⁶ É꞉ren sahahawithánion nononsatokentiʼkó꞉waʼne ne tsi kaiatarón꞉nions ne kaní꞉io Asherah, waʼhaiákenhwe ne kanatowanénhke ahonrá꞉kwahkon ne Kidron niaháhawe, wahát꞉tsahate, okènhra iahón꞉ton, tánon thó nón꞉we iataʼré꞉niate nokénʼra tsi ionthatsathataʼhástha nónhkwe.

⁷ Waʼharihwenhtʼthóseron ne tsi kontsienthákwakwe né iotiʼrihwaiathatónʼon thó Nononsatokentiʼkó꞉waʼne. (Thó nón꞉we ne konʼnónh꞉kwe nikontiʼníkʼkhonskwe natserón꞉niat ne rónsthaʼkwe nakonwasén꞉naien ne Asherah.)

⁸ Jerusalem nòn taʼsakoiaténhawe ne ratitsihénstatsis né꞉ne tsi kanatowanénʼke ne Judah nón꞉we rón꞉neskwe, tánon kwáh kanakeraserakwé꞉kon tsi wathentionsthánion ne ietsienharákwahs né ronterihwathenhtsátha nahonteskónten. Kwáh ó꞉ni waharihwenhthonháton ne ietsienharákwahs né꞉ne konwaʼtonhnará꞉ni ne kaiatáʼkeras ót꞉kon né nák꞉ta ne tsi iotenhenrakáronhte né꞉ne Joshua ró꞉son, né kanatowanénke rakó꞉raʼkwe, né꞉ne skanekwáhti nòkwah ne watenhenraʼkwení꞉ioke thót tsi ieiontaweiathákwah ne kanatowaʼnénhke.

⁹ Né꞉tho ratitsihénstaʼtsis iáh tehotiʼianerenhseraʼiénthakwe Nononsatokentiʼkó꞉waʼne ahotiʼióten, ók wáʼtonskwe kíʼ nahatinátarake ne iáh tewatʼthenkwáhton né꞉ne ronwaʼnáwi ne skát꞉ke ronaterihón꞉tons ne ratiʼtsihénstatsis.

¹⁰ Né Ronnontí꞉io Josiah kwáh ó꞉ni wathéntionste ne Topheth, né꞉ne tsi ratisén꞉naienskwe ne kaiatónhni né Hinnom ahonrákwahkon nón꞉we, né ká꞉ti ne tó꞉sa ahónton ne roiénha khés ne sakoiénha ahonwanateskóntʼthaʼse ne raní꞉io Molech.

¹¹ Kwáh ó꞉ni é꞉ren wahahawithánion ne koshátens nètho ne ronnontí꞉iokwe ne Judah nón꞉we nishakotonhnaʼráhni nahatisén꞉naien ne karáhkwah, tánon waʼhatʼtsahathánion notsónkwahs né ronátston kíʼ tsi ratisén꞉naien. ( Kí꞉kens ononsatokentiʼkowáne athenhénraʼkon nónhwe nikaiéntakwe, ákta tsi iotenhenrakáronhte tánon iáh aínon tekènhne ne tsi rahtienthákwah ne Nathan Melech, né꞉ne rasenhnowáʼnen.)

¹² Né ietsienhará꞉kwahs tsi nikáien ne ronnontí꞉iokwe ne Judah rahónhni ne tsi karonkweʼnáhere ne tsi kanontiʼiotseráien né꞉ne é꞉neken tsi renterónhthakwe ne Ronnontí꞉iokwe Ahaz, né Ronnontí꞉io Josiah thahásenhte, kenikwekonháʼtse ne ietsienharákwah né Ronnontí꞉io Manasseh rokétskwen ne tehiokwénrare natenhénrakons Nononsatokentiʼkó꞉waʼne; kénk níwas tsi waʼtewatʼthóko tánon ahonrákwahkon ne Kidron iathatesén꞉niate.

¹³ Né Josiah waʼthéntionste ne ietsienharákwahs neʼtho Ronnontí꞉iokwe Solomon roshaʼhánionkwe né nàkon nòkwah ne Jerusalem, né nentiéne nòkwah tsi ionónte ne Olives, né tsi konwaʼtisennaienthákwahkwe ne atehénseras kaiatonhnishón꞉ʼas—né꞉ne Astarte né kaní꞉iokwe ne Sidon, né Chemosh né kaní꞉iokwe ne Moab, tánon ne Molech né꞉ne kaní꞉iokwe ne Ammon.

¹⁴ Ne Ronnontí꞉io Josiah wathanawahatárihte nostén꞉ra kanawaʼhatonniáton, tahasentánion ne tsi kaiatarón꞉nions ne kaní꞉io Asherah, tánon ohontsáke tsi nón꞉we nikanawaʼhathó꞉taʼkwe ónhkwe akhostienshónʼa waharóhrokʼte.

¹⁵ Ne Josiah kwáh ó꞉ni saharihsónhko tsi nonʼwé꞉sons nihonterénhnaiensʼkwe ne Bethel nón꞉we, Né꞉ne Ronnontí꞉iokwe Jeroboam rosahánionkwe né꞉ne roienkénʼen ne Nebat, rahón꞉a iesakosaríhnon Nisraeʼró꞉nons ne karihwanerahakʼtsherákon. Ne Josiah waʼharihsónko ne ietsienharákwahs, kénʼk ní꞉wahs tsi watharihthánion, tánon okènra iahón꞉ton; kwáh ó꞉ni wahát꞉tsahate tsi kaiátare ne Asherah.

¹⁶ Eʼthó꞉ne ne Josiah waʼtatʼkatónhnionkwe tánon waʼhatkátho kanenhió꞉tons ne tsi ieiathatáʼrion thóh nononthó꞉harake; waʼhathénhnaʼne nahonhnethakwenháton nʼostsienshónʼas tánon ietsienharáhkwahke wahatʼtsahaʼthánion, thóh nahá꞉iere tsi kíʼ niehorihwáʼken ne rotokenséhakwe ne wahón꞉nise tkènʼne né꞉ne tsi nikaríhwes watenikonró꞉rihkwe né Ronnontí꞉iokwe Jeroboam ákta rátaʼkwe ne ietsienharákwahke. Né Ronnontí꞉io Josiah waʼtatʼkatónhnionkwe tánon waʼhatkátho ne tsi kaniénhiote ne rahotiatonkwákta ne rotokenséhaʼkwe né tsi niká꞉ien ne iohorihwáʼken kí꞉ken.

¹⁷ “Ónhka thí꞉ken akokʼtsatónkwah?” waʼharihwaʼnónton. Nonkweʼshón꞉as ne Bethel waʼthatirihwasehráko, “Né꞉ne rotokenséhaʼkwe rahotsatónkwah né꞉ne Judah nón꞉we nithawé꞉non tánon iaharihwáken kí꞉ken nahorihótens tsi nashʼieránion kí꞉ken ietsienharáhkwah.”

¹⁸ “Tó꞉sa kén niaʼsewáier thóh nihiotónhak,” ne Josiah tsi waʼsahkó꞉nahne. “Iáh tehiówenk nahioriáneronke ne raʼostsienshónʼas.” Ká꞉ti iáh kíʼ tehonoriánerion ne raʼotsienshónʼas, né nón꞉ne sá꞉ka ne rotiʼtokenséhakwe ne Samaria nón꞉we nithonénon né thó nón꞉we nihatiʼiathatáʼrion.

¹⁹ Tsi niaʼtekanátake Nisraeʼró꞉nonke ne Ronnontí꞉io Josiah waharihshiónko akwé꞉kons ne kaiatonhnishón꞉ʼas tsi niwé꞉sons nikonwatisennaienthákwahs né꞉ne rontinontí꞉ioskwe Nisraeʼró꞉nonke rononhniánion, ronónha waʼhatikétsko ne Roiá꞉ner raonakwáhtshera. Kwáh thóh nahaieránion nètho ietsienharákwah tsi kíʼ nihoieránions ne Bethel nón꞉we.

²⁰ Ietsienhará꞉kwahke nón꞉we ratiʼkwé꞉kon waʼsakononwariakónhnion ne ratitsihénstatsis ne kaiatonhnisónhas ratisén꞉naien tsi thóh nón꞉we nihonterihwatsʼterísthakwe, tánon kwáh tsi níkons ne ietsienharákwah kaiéntakwe thóh waʼhatsahathánion ne ónhkwe akostsiensónhas. Eʼthó꞉ne ónen Jerusalem nionhsá꞉re.

Né Josiah Waʼhatenikonró꞉ri Ne Éʼneken Waʼtohetsthákwah

²¹ Ne Ronnontí꞉io Josiah waʼsahkó꞉nahne nonkweʼshón꞉as nahiontenikonró꞉ri ne éʼneken watohetsʼtákwah ne nahonwakwéʼnienste ne Roiá꞉ner Raotiní꞉io, tsi kíʼ nikahiáton ne kaiatonhserákon naʼterihwaseronhniátshera.

²² Iáh nonwénton tsi nihá꞉ti ne rontinontí꞉ioskwe ne Israerʼró꞉nonke khés ne Judah iáh nonwénton teonatenikonroríhʼon ne Éʼneken watohetsthákwah, kwáh tsi nikaríhweskwe ne ratirihwénhtas ronónha tesakotiniarotháronhne nonkweʼshón꞉as.

²³ Ó꞉nen kíʼ kwáh nón꞉wa, né shatekonháton iawénre niioserakehátse shiʼhonontí꞉io ne Josiah, ne e꞉kenʼken watohetstákwah wahontenikonró꞉ri ne Jerusalem nón꞉we.

Shé꞉kon Oiásons Nahorihoténsons Teshothatawíʼon Ne Josiah

²⁴ Nahiotón꞉ʼon nakonwashaststénseron ne kaianerénhseras tsi kíʼ nikaiatónhnions ne kaiatonhserákon nètho ratsihenstowánen Hilkiah rotʼtsénhrion Nononsatokentiʼkó꞉waʼne, Ne Ronnontí꞉io Josiah éh꞉ren waʼsakoiatenháwite ne Jerusalem ó꞉ni ne Judah ratikwé꞉kon ne tehatitháraʼkwe ne ronenhé꞉ionskwen ó꞉ni ne sakonatiatonserát꞉kenhse, tánon akwé꞉kon ne kanonskónsons kaiéntakwe niʼioʼokónhas, kaiatonhnisónhas, tánon akwé꞉kons tsi nahoténshonskwe ne rónsthakwe tsi konwatisén꞉naienskwe ne kaiatonhnishón꞉as.

²⁵ Kwáh iáh nonwénhton tehotinontiʼiotsheraiénthakwe né nahiotónhake tsi kíʼ né ní꞉ioht ne rahónha, né nahohiótenhse ne Roiá꞉ner kwáh raweriasakwékon, raʼonikonrakwé꞉kon, ó꞉ni raʼoshaststenserakwé꞉kon, rotewenhnarakwenhá꞉tie ne Mahís raʼoianerénsera; iáh ó꞉ni shé꞉kon nonwénhton nón꞉ka thóh ní꞉ioht tsi ahonsahonontí꞉ioke tsi ní꞉ioht ne rahón꞉a.

²⁶ Ók kíʼ ne Roiá꞉ner ne tehiotenonianíton raʼonakwáhtshera tsi ók kéts꞉ko tsi nòkwah ne Judah né tsi nihotieránionkwe ne Ronnontí꞉iokwe Manasseh, tánon shé꞉kon kíʼ nón꞉wa nikaháwi iáh arèko tsatetsoienhtáhon.

²⁷ Ne Roiá꞉ner wahénron, “Kwáh thóh nenhtiéraʼse ne Judah tsi kíʼ nitserá꞉se Israerʼró꞉nonke: Kwáh éh꞉ren enkheiatenháwite nonkweʼshón꞉as nakʼkénton ne Judah nón꞉we, tánon entʼkénron ne Jerusalem, né꞉ne kanatowanénhke ne wakerákwen, ó꞉ni noʼnonsatokentiʼkó꞉wa, né꞉ne thóh nón꞉we niwaʼtenátaien ne wá꞉ken thóh nón꞉we nenhiontsenhnaiénseʼke.”

Tsi Iahontókʼten Ne Josiah Tsi Ronontí꞉iokwe

²⁸ Orihwaʼkwé꞉kons tsi niʼotierá꞉nions ne Ronnontí꞉iokwe Josiah thó nón꞉we nikaʼiatón꞉nions Tsi Nihonwatikáratons ne Ronhtinontí꞉ios ne Judah Nónhwe.

²⁹ Tsi nikaʼríhwesʼkwe ne Josiah ronontí꞉iokwe, né Ronontí꞉iokwe Neco ne Egypt nón꞉we iahanenhríhsere tsit kaniatarathátse ne Euphrates nahosniénon ne Rakó꞉raʼkwe ne Assyria. Ne Ronnontí꞉iokwe Josiah waʼhateniénten ne thasakótaste ne Egyptró꞉nons ronterí꞉ios ne Megiddo nón꞉we ók tsi waʼterí꞉iokwe nón꞉we nahonwaʼnonwariákon.

³⁰ Né rahonkwetaʼshón꞉ʼas otsónkwahkon kaʼseré꞉takon sahonnètha ne raʼoierónhta tánon Jerusalem nionsahatíhaʼwe, thó nón꞉we nahonwaiatháta né꞉ne kanontiʼió꞉tshera tsi ronwatiʼiathatahástha. Nonkweʼshón꞉as ne Judah Josiah roʼiénha Joahaz sahonwaʼiataráhko tánon wahonwenʼienáro tsi waʼhonontí꞉ione.

Ne Joahaz Né Ronnontí꞉iokwe Ne Judah

³¹ Né Joahaz tewaʼsén-áhsen satehahoseriʼiákon sahonontí꞉ioʼne né Judah nón꞉we, tánon áhsen niwennítake nikaʼríhweskwe rakó꞉rah kén꞉ne ne Jerusalem. Né ronisténha Hamutal ionthátsiatskwe, né꞉ne Jeremiah sakoienkén꞉en né꞉ne tsit kanatowanén꞉ke ne Libnah nón꞉we nihanákerekwe.

³² Né rarihwaʼsehré꞉ne tsi nihatiweienótenhne ne sakhosoktonhkonkénʼen, waharihwáʼneraʼke tsi nòkwah ne Roiá꞉ner.

³³ Iahón꞉tsáks꞉tsi tsi ronontí꞉iokwe nó꞉nen ne Egyptró꞉non Ronnontí꞉iokwe Neco Riblah nón꞉we tsonthatenontónkwah niahohiaténhawe iahonóton, né꞉ne Hamath ahotonhontsáke, tánon waʼshakahónhnien ne Judah 7,500 nikakontsheráke kawistaráke tánon 75 nikakontsheráke owistanó꞉ron tsi enhatikáriakʼte.

³⁴ Ne Ronnontí꞉iokwe Neco né꞉ne Josiah roiénha Eliakim né꞉ne ronnontí꞉iokwe ne Judah nón꞉we né sahonontiʼiotsherónhni ne tahonsahonakʼthákwen ne Josiah, tánon waʼhosennaténi Jehoiakim sahonáthonkwe. Né Joahaz Egypt né niehonwaiaténha né꞉ne Ronnontí꞉io Neco etʼnihoiéren, tánon thó nón꞉we iarénheʼie.

Né Jehoiakim Ne Ronnontí꞉iokwe Ne Judah Nón꞉we.

³⁵ Né Ronnontí꞉io Jehoiakim waʼhawistaʼró꞉rohke nonkwé꞉ne né entewanónhton thóh nihotíkwahtse, né nahón꞉ton nahontsénite tsi ahonwaʼkáriakse tsi niharihwanóntons ne ronnontí꞉io ne Egypt nón꞉we.

³⁶ Né Jehoiakim tewásen-wísk satehaʼoserihiákon sahonontí꞉ioʼne ne Judah nón꞉we, tánon né꞉ne énska iawénre nihioseráke waʼtkóraste ne Jerusalem. Né ronisténha Zebidah iontátsiatskwe, né꞉ne Pedaiah sakoienkénʼen né꞉ne Rumah nón꞉we nihanákerekwe.

³⁷ Né raseré꞉ne tsi nihatiweienhnó꞉tenskwe ne sakosotʼkénʼen, ne Jehoiakim waʼharihwánerake tsi nòkwah ne Roiá꞉ner.