2 Kings 22 - Ohiatonhseratokénti

Né Josiah Né꞉ne Ronnontí꞉ioʼkwe Ne Judah Nón꞉we

¹ Né Josiah shatékon satehahoseriʼiáʼkon sahatenontí꞉ioste ne Judah nón꞉we, tánon áhsen-niwásen énska niʼioseráke nikaríhweskwe rakó꞉rahkwe ne Jerusalem nón꞉we. Né ronisténha Jedidah iontátsiatsʼkwe, né꞉ne Adaiah sakoienkénʼen né꞉ne Bozkath nón꞉we nihanákerekwe.

² Né Josiah né꞉ne wahaterihwathéntiaʼte tsi nahó꞉ten rawerientiʼiosthákwah ne Roiá꞉ner; né꞉ne wahá꞉sehre tsi thontahotenienténste ne Rosotʼkénʼen Ronnontí꞉iokwe Táwit, iorihwahnirón tsi roʼtewenhnarákwen akwé꞉kon ne Rawenni꞉io raoianerénhseras.

Né Kaiatónsera Ne kaianerénhsera Ontétʼtshénhri

³ Né shatekonháton shiʼioserakehátse shiʼhonontí꞉iokwe, ne Ronnontí꞉io Josiah iahoténieʼte ne teieiatorethákwah sakoiatónhnis né꞉ne Shaphan, né꞉ne roienkénʼen ne Azaliah tánon né rosotʼkénʼen ne Meshullam, Ononsatokentiʼkó꞉waʼne niaháre rarihwenháwi:

⁴ “Ratsihenstowaʼnénke Hilkiah niaháse tánon iaʼsehrihwanónhton thó ní꞉kon nèthó ne ratsihénstatsi ne ranikonhrárahkwe ne tsi ieionthaweʼiatákwah Nononsatokentiʼkó꞉waʼne rohwistaróhron nonkwé꞉ne.

⁵ Sró꞉ri nahontaháwen ne rón꞉kwe ne roterihwatsʼteríston nahonsakasehrónhnike ononsatokentiʼkó꞉wa. Ónenk tsi enshakotiʼkáriaʼse

⁶ ne ratiswenhkaraʼkétas, ne ratiʼnonsónhni, ó꞉ni ne tehatitstenhrót꞉tha, tánon nahatiʼnínon noskwénhkaʼre ó꞉ni nonénias ne rónsta tsi enshatisehrón꞉ni.

⁷ Né ronnón꞉kwe ne ronateríhonte ne kahioténhsera kwáh í꞉ken tsi thonnonkwetaʼiéri, ká꞉ti iáh thaʼteiotonhontsóʼon nahonwatirihwanónhtonse nahatiʼkontsheraserónhni nowís꞉ta.”

⁸ Ne Shaphan iaháien ne Ronontí꞉io raoiatónhsera tsi thénteron ne Hilkiah, tánon kíʼ ne Hilkiah wahoʼró꞉ri ne Shaphan tsi waʼhatʼtsénhri ne kaiatónhsera ne Rawenni꞉io raoianerénhsera í꞉ken thó ononsatokentiʼkó꞉waʼne. Ne Hilkiah tahá꞉wen ne kaiatónhsera, tánon ne Shaphan waʼhawenhnaʼnóten.

⁹ Eʼthó꞉ne ronontí꞉ioke nionsá꞉re tánon waʼhát꞉rori: “Né sanhatsheraʼókons iehotíha nowístas nononsatokentiʼkó꞉wane kaiéntakwe tánon né thonwanáwi ne ronhnón꞉kwe né ronaterihwatsʼteríston tsi satinonsakwahthá꞉kwahs.”

¹⁰ Tánon eʼthó꞉ne waʼhénron, “Kénʼen í꞉khawe kaiatónhsera nètho Hilkiah tkakáwi.” Tánon iorakaʼréni tsi wahowenhnanóthase ne ronontí꞉io.

¹¹ Nó꞉nen ne ronontí꞉io sahotʼthónteʼne ne kaiatónhsera onʼtewenhnaʼnó꞉ten, waʼharatiónko ne raʼotsherón꞉niat tsi nontahanikónrenhne,

¹² tánon taʼhá꞉wen ne iononteraʼtsétaʼne kaiatónhsera ne Hilkiah né꞉ne ratsihenstowánen í꞉ken, í꞉se ne Ahikam iaiénha ne Shaphan, í꞉se ne Achbor né iaiénha ne Micaiah, í꞉se ne Asaiah, né ronontí꞉io tiaʼterihwatsʼterísthaʼse:

¹³ “Wáhs tánon iatserihwanón꞉tons ne Roiá꞉ner ní꞉i akerihwá꞉ke ó꞉ni nonkwetaʼkwé꞉kon ne Judah tsi nòkwah ne kaʼrihonnienhnítsera kí꞉ken kaiatónhsera. Né Roiá꞉ner shonkwahnákwahse tsiorí꞉wa ne ietishothonkonhkénʼen tsi iáh ètho tehotiʼiéren tsi niwá꞉ton kí꞉ken kaiatónhsera tsi ó꞉nenʼk ètho nahotiʼiérenhke.”

¹⁴ Né Hilkiah, ne Ahikam, né Achbor, ne Shaphan, ó꞉ni ne Asaiah iónkwe waʼkonwatʼkénsera né꞉ne Huldah konwaiáts꞉kwe, iotokenséhaʼkwe thó nón꞉we nikanákereʼkwe ne natenahtá꞉se í꞉ken ne Jerusalem. (Né tení꞉teron né꞉ne Shallum, né roienkénʼen ne Tikvah tánon né rosotʼkénʼen né꞉ne Harhas, né꞉ne ranikonhráraʼkwe ne Ononsatokentiʼkó꞉waʼne raonatʼtserónhniat.) Waʼkonwanikonraientháten tsi naháwenhne,

¹⁵ ók waʼakoró꞉ri ronontí꞉ioke nié꞉sne tánon thón꞉waʼion ne ronontí꞉io

¹⁶ ne iononterahtse aterihwaʼnotáhtshera tsi nitsawénon raʼónháke ne Roiá꞉ner: “Kwáh kheʼrehwátahʼne ne Jerusalem ó꞉ni ratikwé꞉kon naonhkwetaʼshón꞉as, tsi kí nikaiáton ne kaiatonserákon nètho ronnontí꞉io waʼawennanóten.

¹⁷ Onkʼkenronníʼon tánon kwáh iehonatʼkáwen nahonwaʼnateskóntʼthaʼse nakorénhsons niʼiohokónhas, tánon ká꞉ti waʼhonkenakónʼni né naʼkwé꞉kon taʼkakwé꞉te tsi niʼonatseráhnion. Nakenaʼkwáhtshera waʼkatsironni tsi nòkwah ne Jerusalem, tánon iáh tsataʼonsakenteróntaʼne.

¹⁸ Ók tsi nòkwah ne rahonhatsíwa ne ronnontí꞉io, kén kíʼ né nahó꞉ten Ní꞉i, ne Watiá꞉ner KeNí꞉io Nisraeʼró꞉nonke, ká꞉ton: Saʼtahón꞉satat tsi nahó꞉ten kaiatón꞉nions ne kaiatonserákon,

¹⁹ tánon tsi tsisahtatrewáʼton tánon ehtàke waʼsathatón꞉ni nakén꞉ton, sahratiónhkwen ne satierón꞉niat ó꞉ni tesahsént꞉thóʼon, ne nó꞉nen sahserihwáʼronhke tsi nikterón꞉kwahkwe tsi nenhkré꞉waʼte ne Jerusalem ó꞉ni naʼonkwetaʼshón꞉as. Kwáh né enkónhniaʼte ne iotʼteronhónwe tsi aiontkátho, né꞉ne watená꞉thaien nahosénhna nonkweʼshón꞉ʼas énionste naʼiontewenʼnák꞉sate. Ók kíʼ wakatʼthontéʼon ne saterénhnaient,

²⁰ tánon kíʼ ne kaʼrewathátshera tsi nenhtékhá꞉we nahonháke ne Jerusalem iáh taʼón꞉we tsi nióre ienshí꞉heʼie, Kwáh kíʼ enkonríh꞉on ne skénnonʼk tsi ashí꞉heie.” Né ronnón꞉kwe Ronnontí꞉ioke Josiah nionsahón꞉ʼne ratirihwenháwi.