2 Kings 21 - Ohiatonhseratokénti

Né Manasseh Né꞉ne Ronnontí꞉iokwe Ne Judah Nón꞉we

¹ Né Manasseh tékeniʼiawénhre satehahoseriʼiákon sahatenontí꞉ioste ne Judah nón꞉we, tánon kaiéri-niwáhsen niʼioseráke rotʼkorástonhne ne Jerusalem. Né ronisténha né꞉ne Hephzibah iontátiatskwe.

² Né waʼhá꞉sere ne ioterihwaʼtéhas tsi niontséras ne onkweʼshón꞉as tsi nikáien ne Roiá꞉ner tesahkoiatinekénʼen ne tsi iohontsáien tsi niaʼhónhne ne raonkwetaʼshón꞉as, ne Manasseh wahaʼrihwánerake tsi nòkwah ne Roiá꞉ner.

³ Sahrón꞉niáʼnion ne tsi konwaʼtisennaientákwahs ne kaiatonniʼshón꞉ʼas né꞉ne ronikén꞉en Hezekiah rorihwaʼtón꞉ton; waʼrón꞉ni ne ietienharákwah né nahonwaʼsén꞉naien ne Baal tánon wahaiatonniserónʼni ne kaní꞉io Asherah, kwáh kíʼ tsi niʼoiéren ne Ronnontí꞉iokwe Ahab Nisraeʼró꞉nonke. Né Manasseh kwáh ó꞉ni shakosén꞉naiensʼkwe ne otsistokwahsónhas.

⁴ Waʼronniáʼnion ne kaiatonnishón꞉as aonáwenʼk ietienharákwahs nononsatokentiʼkówaʼne kanónskon, né꞉ne éhtho nón꞉we ne Roiá꞉ner ráwen nahonwaʼsennaienthákwahke.

⁵ Né tékeni iokwénhrare ne Ononsatokentiʼkówaʼne atenhénraʼkons waʼrón꞉ni ne ietienharáʼkwahs ne nahaʼtisennaiénsehke Notsistokwahsónhas.

⁶ Tánon roiénha waʼhoteskónten né iahót꞉kaʼwe tsi tahá꞉ieste. Né ken niehaʼiéraʼkwe niaharihwáken tánon natahennarátshera tánon shakorihwanontonhniónʼniskwe ne sakonathiathonhserátʼkense ó꞉ni ne ronhnenhéions. Kwáh í꞉ken tsi kowánen waharihwánerake tsi nòkwah ne Roiá꞉ner tánon wahonakón꞉ni.

⁷ Ononhsatokentiʼkó꞉waʼne iahá꞉ien ne tsi kaiaʼtáh꞉re ne kaní꞉io Asherah, né kwáh tsi nón꞉we ne Roiá꞉ner nihoró꞉ri ne Táwit tánon ne roiénʼa Solomon: “Kén꞉en Jerusalem nón꞉we, kén꞉en Ononhsatokentiʼkó꞉waʼne, nón꞉we niwaʼkeráhkwen né꞉ne tsi nihotinaʼkeráhseras ne tekeniʼiawénʼre nihotiʼtsiókwahkes Nisraeʼró꞉nons tsi nón꞉we nen iontsennaientáʼkwahke.

⁸ Tánon tó꞉ka nonkweʼshón꞉ʼas Nisraeʼró꞉nonke kwáh enhontewénnarahkwe akwé꞉kon nakerihwaʼtátʼtsheras tánon enhontiénawasʼte kaiaʼnerenserahkwé꞉kon nètho akenátshera Mahís tesahkó꞉wi, eʼthó꞉ne kíʼ iáh thaʼkatʼthóntate naʼonwatiʼiatínekenhwe ne raoʼnonhontsáke né꞉ne tekheiá꞉wi ne sakotiʼsotʼthonhkonkénʼen.”

⁹ Ók kíʼ nonkweʼshón꞉as ne Judah nón꞉we iáh né tehonwaʼwenhnaráhkwen ne Roiá꞉ner, tánon Manasseh waʼsahkosáhrihne né sénha iorihwatʼtsáni tsi ní꞉ioht tsi wahaʼtirihwá꞉nerahke tsi ní꞉ioht ne tsi nihá꞉ti nonkweʼshón꞉ás ne Roiá꞉ner sakó꞉iatiʼnekenʼen ne raʼonón꞉hontsakes né tsi nié꞉onenonh ne raonkweʼtaʼshón꞉ás.

¹⁰ Rononhá꞉ke ne raʼonhatsherashón꞉ʼas ne rotiʼtokenʼséhakwe ne Roiá꞉ner tsi rá꞉wen,

¹¹ “Né Ronnontí꞉io Manasseh thó nihoieráhnions kí꞉ken ioterihwatehaʼshón꞉as, sénha iorihwát꞉tsanis tsi nahoténsons ne Canaanró꞉nons tsi nihonatséren; tánon né꞉ne raʼoiátonnishónʼas wáʼratse tsi waʼsahkosárihne nonkweʼshón꞉ʼas ne Judah nón꞉we nahatiʼrihwá꞉nerake.

¹² Ká꞉ti Í꞉i, ne Watiá꞉ner ne KeʼNí꞉io Nisraeʼró꞉nons, kwáh enteʼká꞉we ne karihwaʼiesá꞉tseras ne Jerusalem ó꞉ni ne Judah nón꞉we kwáh tsi niʼiá꞉kon nenhierihwáronke kwáh kíʼ eniaʼkorihwaneráko.

¹³ Kwáh entʼré꞉wate ne Jerusalem tsi kíʼ niwaʼtié꞉ren ne Samaria nón꞉we, ó꞉ni tsi nihiʼiérase ne Ronnontí꞉io Ahab Nisraeʼró꞉nonke nón꞉we ó꞉ni tsi nihawatsirathátie. Kwáh enskeráhkewe ne Jerusalem tánon enshekeiathóhare naonkweʼtaʼshón꞉ʼas, kwáh thó nenshonatkweʼnienstón꞉haʼke tsi ní꞉ioht naké꞉rah ne katshoʼkéwen tánon katsahkaʼrátʼthon.

¹⁴ Kwáh enkehiatsakwahríhʼshi nonkweʼshón꞉ʼas niaʼtenonathátere, tánon thó ienkeiátʼkaʼwe ronón꞉hake ne teontát꞉tsons, roʼnón꞉ha nènhʼne enʼonwaʼtisénhni tánon enhonwaʼnonhontsanénsko.

¹⁵ Kwáh kíʼ thó nenhkeʼiérahse nakonkweʼtashón꞉ás tsoríh꞉wa tsi wahatirihwá꞉nerake tsi nòkwah ní꞉i tánon wahón꞉kenakonhni kwáh tsi nikahá꞉wi ne sakotisotʼthonkonhkénʼen tonhtahatiʼiákenʼne ne Egypt tánon kwáh shé꞉kon nón꞉wa wenhnisheráhte tsi ionkenakónhnis.”

¹⁶ Ne Manasseh tsi niʼiakotsokowánen sakononwariakónhnion ne iáh othènen teiakoníkon ne tsi tekanatokenhá꞉tons ne Jerusalem kwáh watneʼkwenhsíne; né kí꞉ken iahá꞉ieste tsi niesakosaríhnon nonkweʼshón꞉as ne Judah tsi nakonwatisénhnaien ne kaiatonhnisónhas, né wakarihón꞉ni wahatirihwánerake tsi nòkwah ne Roiá꞉ner.

¹⁷ Orihwakwé꞉kons tsi nihotieránions ne Manasseh, thó í꞉kaʼre ne raorihwanerahák꞉tsheras, thó nón꞉we nikaiatónhnions Tsi Nihonwatikáratons ne Ronhtinontí꞉ios ne Judah Nónhwe.

¹⁸ Ne Manasseh warénheʼie tánon kanontiʼiotsherákon kahé꞉takon nón꞉we nihonwaʼiatáʼten, né꞉ne Uzza raohé꞉thakon kènʼne, tánon né꞉ne roiénha Amon tonhsaonát꞉tákwen tsi sahatenontí꞉iosʼte.

Ne Amon Né꞉ne Ronnontí꞉ioʼkwe Ne Judah

¹⁹ Ne Amon tewásen-tékeni satehahoserihiákon sahatenontí꞉iosʼte ne Judah nón꞉we, tánon rahónʼa wahatkóraste ne Jerusalem nón꞉we né꞉ne teioseráke nikaríhwesʼkwe. Né ronisténha Meshullemeth ionthátsiatskwe, né꞉ne Haruz sakoienkénʼen né꞉ne Jotbah nón꞉we nihanákerekwe.

²⁰ Né Amon kwáh tsi nihiotón꞉ne ne ronikénhen Manasseh, waharihwánerake tsi nòkwah ne Roiá꞉ner;

²¹ Né thontahatenienténste tsi nihaweienótenhne ne ronikénhen, tánon kaiatón꞉ni wasakoʼsén꞉naien né꞉ne ronikénhen sakoʼsén꞉naienskwe.

²² Waʼhokénron ne Roiá꞉ner, né꞉ne raotiʼNí꞉io kènʼne ne sakoshothonkonkénʼen, tánon iáh teotewenhnaráhkwen ne Roiá꞉ner raorihwatátʼtsheras.

²³ Né Amon rahonkweʼtashón꞉as wahonwaterísthaien tánon thóh kanontiʼiotsherákon wahonwaʼrón꞉thaʼte.

²⁴ Nonkweʼshón꞉ʼas ne Judah nón꞉we wahonwatiʼnonwariákon ne Amon ronwarontháton tánon né꞉ne roiénha Josiah sahonwaʼnontiʼiotsherón꞉ni.

²⁵ Orihwaʼkwé꞉kon nètho Amon tsi nihotieránions thó nón꞉we nikaiatónhnions Tsi Nihonwatikáratons ne Ronhtinontí꞉ios ne Judah Nónhwe.

²⁶ Né Amon wahonwahiatháta thó atsathonkwáhkon ne kahéthakon né Uzza rahohethakénʼen, tánon né꞉ne roiénha Josiah thonsahonatʼthákwen tsi sahatenontí꞉iosʼte.