2 Kings 20 - Ohiatonhseratokénti

Ne Ronnontí꞉io Hezekiah Raʼonnonwatʼthéntseras Tánon Tsi Nishoiewenhtáʼon

¹ Kwáh tó꞉ka thóh kíʼ nikaháwi ne Hezekiah wahononhwákten tánon sehrèka ahawenhéionh. Né rotókenhse Isaiah né꞉ne roiénha ne Amoz thóh wáʼreʼte waʼhotkénsera tánon wahawénhase, “Né Roiá꞉ner iaróris kwáh orihwakwékons tsi sasherihwakwahtháko, Asèken iáh tahonshasatʼkwahtháko. Sahtateweienénhtan nasí꞉heie.”

² Né Hezekiah wahatarónhti asonhtáke niahatiérate tánon wahaterénhnaien:

³ “Takweʼhiárak nón꞉wa O Saiá꞉ner, wakonianiténten, tsi ní꞉ioht tsi tewakatekhahákwen ne sahénton iothokenskéʼonwe ó꞉ni kwáh akweʼriasakwékon, tánon thóh niwatiéren ne sahénton tsi nahó꞉ten ne ioiánere.” Tánon ne Hezekiah otsitó꞉wa tsi ní꞉ioht tsi wathashéntho.

⁴ Ethòne ne Isaiah hionshahaiákenʼne tsi nón꞉we nihenterónhtaʼkwe ne Ronnontí꞉io, ók nohénton iahonsahaiákenhne natenhénrakon tsi kanontiʼiotseráien ne Roiá꞉ner wahoró꞉ri

⁵ thóh iesréh tsi thénteron ne Hezekiah, ne shakokhóra ne Roiá꞉ner rahonkweʼtashón꞉as, tánon nahawénhaʼse, “Í꞉i ne Watiá꞉ner, ne Rí꞉ní꞉io ne iashotʼkénʼen Táwit, onhkatʼthónteʼne ne saterénhnaient tánon wahkatʼkátho ne saká꞉sehris. Kwáh kíʼ enskóntienhte, tánon nasénhaton nienhwenhniseraʼkéhaton kwáh Ononsatokentiʼkówaʼne nienhénse.

⁶ Kwáh kíʼ enkonríhon shé꞉kon wísk-iawénre niʼioseráke ensheʼsónnheke. Kwáh kíʼ enskonhniákente ó꞉ni ne kíʼ kénʼen kanatowanénke Jerusalem tsi nòkwah ne Assyriaró꞉non Rakó꞉ra. Kwáh kíʼ entʼké꞉ne kí꞉ken kanatowánen, nek ahoriwáke ne iatetiáti akerenhsarónhtiera tánon ne tsioríhwa tsi niʼihiararatsʼténhni nakenhátsera Táwit.”

⁷ Ethòne ne Isaiah washaʼkoróri ne ronnontí꞉io ronhwateriwatsʼterísthaʼse ne tsi rotkarothakwáhronhte nó꞉shera ratíren né꞉ne tsionionwarontonhakówa nahó꞉ten kasehronhniáton, tánon kíʼ ensatʼkwahtháko.

⁸ Ne Ronnontí꞉io Hezekiah waharihwanónton, “Nahó꞉ten tsi enkaieronhnisthákwen nakarihwanírate nètho Roiá꞉ner tsi enshakétsenʼte tánon nasénhaton nenhwenhniserakéhaton entkwéni Nononsatokentiʼkówaʼne niahonsáke?”

⁹ Ne Isaiah watharihwasehráko, “Ne Roiá꞉ner éntʼhion ne kaieronhnitstákwen nakarihwanírahte tsi kwáh thóh nenhá꞉iere tsi kíʼ nihorahrátston. Nón꞉wa, né kén ahontasheráhko ne tsi iotashá꞉tare tsi kanekotáhere oiéri nihiokháhake ohénton niáhwe khés noiéri nihiokháha: onàken ahonsáwete?”

¹⁰ Ne Hezekiah watharihwasehráko, “Waʼtséʼsen nén꞉ne ne tsi iothasátare noiéri nihiokháhaʼke ohénton niáwe! Tsi ní꞉ioht noiéri nihiokháhake nonàken ahonsáwete.”

¹¹ Ne Isaiah iahaterénhnaien rahonhá꞉ke ne Roiá꞉ner, tánon ne Roiá꞉ner warónhnien ne tsi iothasátare oiéri nihiokháhake onàken sá꞉wete; né tsi kanekotháhere né꞉ne Ronnontí꞉iokwe Ahaz ronekóthoʼte

Né Ratirihwaʼkaréniens Né꞉ne Babylonia Nón꞉we Nithonénon

¹² Kwáh tó꞉ka thóh shiʼkaháwine ne ronnontí꞉ioʼkwe ne Babyloniaró꞉non, né꞉ne Merodach-baladan, né꞉ne roienkénʼen ne Baladan, waharihwáronhke nètho Ronnontí꞉io Hezekiah tsi roʼnonwákʼthani, sók kíʼ iahohiátonhse tánon athatawítsera iahoteniéthase.

¹³ Ne Hezekiah tsi nahatʼtsenhnónhni tsi washaʼkóken ne ratirihwakariénies tánon waʼshakonathonhniónhase tsi nihotsokówa—né rahowístas ne kawistarákens ó꞉ni nowistanórons, ne rathekhwakonhonsthákwahs tánon ne ratsiatakonhonsthákwahs, tánon akwékon ne tsi nihaterihiosthákwahs. Kwáh iáh thahótens ne tsi rateweienthónkwah khés naktéson nonwéson ne rahonontiʼiotserákon ne iáh thaʼsakonatónhni.

¹⁴ Ethòne ó꞉nen ne rotókenhse Isaiah tsi thénteron ne Ronnontí꞉io Hezekiah niaháre tánon wahorihwanóntonhse, “Kaʼnónhwe niʼthonénons kí꞉ken ronhnónkwe tánon nahó꞉ten wahesénhase?” Ne Hezekiah watarihwaseráko, “Kwáh ʼi꞉ken tsi aínon nióre tkanakerasehráien nithonénon, Babylonia nón꞉we.”

¹⁵ “Nahoténson wahontkathóseron ne kanontiʼiotserákon?” “Kwáh akwékon niahontʼkátho. Kwáh iáh thaʼhótens ne tsi tsenhthákwah ne iáh thakhenatónhni.”

¹⁶ Né Isaiah ethòne ó꞉nen wahoró꞉ri ne ronnontí꞉io, “Ne Roiá꞉ner ne Roshastsʼtenserowánen ratónnions nètho

¹⁷ tá꞉we ne tsi kawistáheks nó꞉nen kwáh orihwakwékons ne tsi sanontiʼiotseráien, orihwakwékons ne sheʼsotʼthonkonhkénʼens ronateweiéntonhkwe tsi nióre nónhwa wenhniseráte, kwáh kíʼ babylonia nón꞉we nienkáhake. Kwáh iáh othènen tsatahonsahiothaténhronhke.

¹⁸ Sewáʼtsakes ne kwáh thó nón꞉we niʼtisewatwatsiríhnon kwáh ienietsiʼiatén꞉haʼwe tánon ténʼietʼtsineniatáko né naisewatenaʼtserónhni né꞉ne raonnontiʼiotserákon ne Babyloniaró꞉non ronnontí꞉io.”

¹⁹ Né Ronnontí꞉io Hezekiah tsi wahonikonraiéntaʼne kí꞉ken tsi kwáh skénnonk thenkénhake tánon kwáh eniorihwí꞉ioʼke tsi nikaríhwes enrón꞉nheke, ká꞉ti tsi watarihwaseráko, “Naterihwanotátshera ne teská꞉wi tsi nitsawénon ne Roiá꞉ner kwáh í꞉ken tsi ioiánere.”

Tsi Iaontók꞉ten Ne Hezekiah Tsi Ronontí꞉iokwe

²⁰ Orihwaʼkwé꞉kon tsi niʼhotieráʼnions ne Ronnontí꞉iokwe Hezekiah, tsi niotinikonraktsanítons, tánon tsi ní꞉oht tsi raʼónhni ne watʼnekaientákwah tánon tehaontiákons naʼontahanekén꞉haʼwe ne kanatowanénke, akwé꞉kon thó nón꞉we nikaiatón꞉nions Tsi Nihonwatikáratons ne Ronhtinontí꞉ios ne Judah Nónhwe.

²¹ Né Hezekiah warénheʼie, tánon né꞉ne roiénha Manasseh tonhsaonakʼthákwen tsi sahatenontí꞉ioste.