2 Kings 2 - Ohiatonhseratokénti

Ne Elijah Karonhiáke Niahonwahiathénhaʼwe

¹ Nohénton ne Roiá꞉ner tsi iotsiskahiónhni tsi naʼtehiowerákwen karonhiáke niahohiathénhaʼwe ne Elijah. Né Elijah tánon ne Elisha Gilgal nónhwe niahá꞉ne,

² tsi niʼonahá꞉hes ne Elijah wahawénhase ne Elisha, “Ónenh kíʼ kénʼhen shé꞉sek; né Roiá꞉ner rakró꞉ri Bethel nónhwe niá꞉ke.” Ók ne Elisha watharihwaseráko; “Wakerihwanírathe tsi niwakerihwató꞉ken rahonháke ne ronnhehónwe Roiá꞉ner tánon ní꞉se tsi iáh takonhiatewénhtheʼte.” Káti tenitsáron Bethel niá꞉haʼne.

³ Rothiʼtsiókwahien ne rotitókense thóh nónhwe nihatinákerekwe Elisha tsi ítres niahónhne tánon wahonwarihwanónhtonhse, “Shaʼteriéntareke nètho Roiá꞉ner tsi ónhwa wenniseráte é꞉ren henhohiathenháwithe nisèke ne thiʼtsathenró꞉hon?” “Hén, wakateriénhthare,” ne Elisha tsi watharihwaseráko. “Ók tó꞉sa kíʼ né tenithá꞉rak.”

⁴ Ethòne ne Elijah wahawénhase ne Elisha, “Ónen kíʼ kénʼen shiterónhtak; ne Roiá꞉ner rakeríhonte ne Jericho nónhwe niáke.” Ók kíʼ ne Elisha watarihwaseráko, “Kerihwanírats tsi niwakerihwató꞉ken rahonháke ne ronhnhehónhwe Roiá꞉ner tánon ní꞉se tsi kwáh iáh thakonhiatewénhtheʼte.” Káti tenitsáron Jericho niahá꞉ne.

⁵ Rothitsiókwaien ne rotitókense né nónhwe nikanakeraseráien tsítres ne Elisha niahónhne tánon wahonwarihwanónhtonhse, “Sateriéntareke nètho Roiá꞉ner tsi ón꞉wa wenhniseráte ne tiʼtsathenróhon tsi é꞉ren enhohiathenháwithe nisèke?” “Hen, wakatheriéntare,” ne Elisha tsi watharihwaseráko. “Ók tó꞉sa kíʼ né thenítharak.”

⁶ Ethòne ne Elijah wahawénhase ne Elisha, “Ónenh kíʼ kénʼen shiterónhtak; né Roiá꞉ner rakeríhonte ne Jordan kaniataratátse nón꞉we niá꞉ke.” Ók né Elisha wataʼrihwaserá꞉ko, “Kerihwanírats tsi niwakerihwató꞉ken rahonháke ne ronnhehónwe Roiá꞉ner tánon ní꞉se tsi kwáh iáh thaʼkonhiatewénhtheʼte.” Káti thóh nónh꞉we niahá꞉ne,

⁷ tánon wísk-niwásen niháti ne rotitókense wahonwatíseʼre Jordan niahónhne. Né Elijah tánon ne Elisha kaniatarákta watníthaʼne, tánon ne wísk-niwásen niháti rotitókense kwáh nenhʼné꞉e kenhnióre natsatákʼta thonhtahatítaʼne.

⁸ Ethòne ónen ne Elijah waharíhsi ne rahotsáthawi wakóses, wahawenónhni, tánon kaniataráke wahanonhwá꞉reke; ne tsi kaniá꞉taro watewatʼnekakʼkháʼsi, tánon raónha ó꞉ni ne Elisha iathihiáhiake kwáh iahonwentsiatʼthenkówa.

⁹ Thóh nónhwe ne Elijah wahawénhase ne Elisha, “Takró꞉ri nahó꞉ten tesathonhontsóni tsi nakonhiatiéraʼse nohénton é꞉ren eniontiathenháʼwiʼte.” “Takeríhon natiéna takaiaseráke tsi nisáien ne shashastsʼténsera nètho né enwakónhniaʼthe tsi thenskonhnakʼthákwen,” tsi watharihwaseráko ne Elisha.

¹⁰ “Nètho kwáh í꞉ken tsi waterihwenhtó꞉re ne karihwanonhthónhtsera ne nahiontháton,” ne Elijah watarihwaseráko. “Ók kíʼ enshé꞉na tó꞉ka ensékʼken tsi é꞉ren enhionhtiatenháwiʼthe nisèke; tó꞉ka iáh thaʼsékʼken, iáh kíʼ thaʼshéna.”

¹¹ Iehothikonhthákwen tsi tehothitharátse tsi íh꞉ne; thonthaiawénhstsi otsónhkwah ótsire í꞉ken koshá꞉tens iothihiathénhton ótsire nònhne í꞉ken thóh wahothikéthothe tsi natehiátere, tánon ne Elijah karonhiáke niahonwahiathénhawe thóh tsi iotsiskahiónhni.

¹² Né Elisha wahatkátho tánon iathohénrethe rahonháke ne Elijah, “Rákeni, rákeni! Roʼshastsʼtenserowánen tsi teshakónes Nisraerʼró꞉nons! Washathénhti!” Tánon iáh kíʼ nonhwénhton shé꞉kon theshó꞉ken ne Elijah. Tsi nahonikonhrákʼsen ne Elisha watʼró꞉ren ne rahotsáthawi wakóses tsi waharátsion.

¹³ Ethòne ónenh né tahonsárakwe ne Elijah rahotsáthawi wakóses né rahiatáke tsosénhen, tánon thóh nionhsáre kaniatarákta ne Jordan iathonhsaháthaʼne.

¹⁴ Nonékake né wahanonwárehekʼsthe ne Elijah rahotsáthawi wakóses tánon wahénron, “Kaʼníres ne Roiá꞉ner, né Raoní꞉io ne Elijah?” Ethòne shé꞉kon sahanonhwáreke noné꞉kake, tánon watewatʼnekakhási, tánon káti iathahiáiaʼke.

¹⁵ Né wísk-niwásen niháti rothitó꞉kense ne Jericho nithonénon wahonwáken tánon wahonhníron, “Né rahoshastsʼténsera ne Elijah rahonháke ne Elisha sakará꞉ne!” Thóh niahónhne iathonwáterathe, rahohénton wathontsákete,

¹⁶ tánon wahonhníron, “Wísk-niwahsenh nihiátion kénʼen iákwens, iakwahkwekon iakwashástsʼte. Thaʼkwahríhon nasakwahiatisákha ne thitsateró꞉hon. Thokáʼnon ne raoʼshaststénsera ne Roiá꞉ner iohohiathénha tánon thóh nónh꞉we iehotʼkháwen tsi ionónhte khés ne ahonrákwahkon.” “Iáh, iatehiówenhk niahí꞉sewe,” né Elisha watharihwaseráko.

¹⁷ Ók tahatirihwáreke tsi kíʼ nióre iahoterihonkóthen tánon wasakoríhonh niahónhne. Né wísk-niwásen nihatihiathásen wahonhthénhti iathontkathónhnionwe nononhthakenhiátions ó꞉ni nononhthakónhsons kwáh tsík nonhwésons akénhake tsi wahonwahiatísake ne Elijah né náhsen nónhta nikaríhwes, ók iáh kíʼ tehonwahiatatʼtsénhrion.

¹⁸ Ethòne kíʼ tsítres ne Elisha nionhsahónhne, ne rahónha Jericho né nónhwe thóh ráreʼkwe, tánon kíʼ wasakawénhaʼse, “Iáh kén tekwahró꞉rine ne tó꞉sa iahí꞉sewe?”

Né Iorihwanerakwahthénions Tsi Nihoieránion Ne Elisha

¹⁹ Ótsiakes ne ronhnónhkwe ne Jericho nónhwe tsítres ne Elisha niahónhne tánon wahonhníron, “Tsi nisateriénhthare, sénhʼshien, né kénʼen kwáh í꞉ken tsi kanatí꞉io í꞉ken, ók kíʼ tsi nikanekáksen tánon né karihónhnis nahonsahiothiwirónhti ne konhnónhkwe nó꞉nen kotíhawe.”

²⁰ Wahénron, “Iashiotsístof náse akerát꞉ke tánon í꞉i táskon,” tsi wahaʼthénhnaʼne. Káti tahonwaksenhawíthen,

²¹ tánon tsi tsonáweroʼthe niaháre, awènhke iahó꞉ti ne tsoiótsis, tánon wahénron, “Kén kíʼ nahó꞉ten ne Roiá꞉ner ráton: ‘Wakhekíhiosthe kií꞉ken, tánon iáh shé꞉kon né thènen thaʼhonsakarihónhni ne kenhé꞉ion khés ne ahionhsahiothiwirónhti ne konhnón꞉kwe ne hiotirá꞉re nahiotiwiraiénthaʼne.’”

²² Tánon nètho oné꞉kanos thó꞉ne tsonekihióhon shé꞉kon nónhwa nikaháwi, kwáh kíʼ tsi niháwen ne Elisha tsi thóh nenhiáwenhne.

²³ Né Elisha thonhtahathénhti ne Jericho Bethel nionhsáre, tánon ne tsi nihiohá꞉hes tó꞉ka nikakʼsáthake kaná꞉thakon nonhtahónhne tánon thaʼhonwaiéron. “Éh꞉ren shá꞉set né kénhʼen, onahónstha!” tsi wathotihénreʼthe.

²⁴ Né Elisha waʼtatkarathéni, waʼthesakotʼkáneren, tánon washakoréwaʼthe raohsénhnakon ne Roiá꞉ner. Ethòne tekeniʼiáse okwári otiné꞉tsien kará꞉kon nonhthákene tánon wahakotiʼhiatharatiónhko kaiéri niwásen-tékeni niháti ne ratiksaohkónhas.

²⁵ Né Elisha tsi tsonónhte ne Carmel niahá꞉re tánon isiʼnonhwéha Samaria niahá꞉re.