2 Kings 19 - Ohiatonhseratokénti

Ne Ronnontí꞉io Isaiah Waʼhoriwanóntonhse Nahotenikonrasónhterase

¹ Kwáh tsi niʼiostóre ne Ronnontí꞉io Hezekiah wahá꞉ronhke tsi nahonhníron, waharátion ne rahotserónhniat kanikonratʼtsenhtserákon, káiare sahatʼtserónhniaʼte, tánon raʼononsatokentiʼkówaʼne ne Roiá꞉ner iahatáweiaʼte.

² Eliakim iahoténiete, né꞉ne ranikonráhrakwe ne tsi kanontiʼiotseráien, Né Shebna né꞉ne teieiatorethákwah nón꞉we nisakoiatónhni, tánon ne thóh titsténhas ne ratitsihénstatsis káiare nón꞉neʼe ronateró꞉rons tsi thénteron ne Isaiah niahónʼne né꞉ne roienkénʼen ne Amoz

³ Né kí꞉ken naterihwanothátsera né wasakó꞉rori nahontahonhion ne Isaiah: “Kénʼen wenhniseráte né꞉na wenhniseráte ne teionikonrhá꞉rat ó꞉ni naieronhiáken; ne ká꞉ti ionkhirewáton tánon ionkwahtehénʼen. Thóh nitionhnhó꞉ten tsi ní꞉ioht ne iónkwe iowiraientásere, ók sóh꞉tsi kíʼ iotsiʼióha ne thóh naʼiáwenhne.

⁴ Ne Assyriaró꞉non rakó꞉ra iehoteniétonhne nohénton iérate ne raʼonkwéta rasenhnowánen nahonikonrátʼsate ne ronnheónwe Ní꞉io. Aiáwens ne Roiá꞉ner Sewaní꞉io ahothónhteʼne kí꞉ken kasentáʼtseras tánon asakoréwaʼte tsi niʼiákon né꞉ne iakotáʼthiʼon. Ká꞉ti iasewaterénhnaien rahonháke ne Ní꞉io né꞉ne raoʼtirihwáke nontsonkweʼtashón꞉ʼas ne iateʼohnathaténron.”

⁵ Nʼo꞉nen ne Isaiah sahaiéna noríhwa ne Hezekiah thoterihwaniéton,

⁶ ionsahaterihwaniéte: “Né Roiá꞉ner tsisewaró꞉ris tó꞉sa ietsiríhon ne Assyriaró꞉nons naietʼtsiterón꞉kwen tsi nihontónhnions nètho Roiá꞉ner tsi iáh tahakwéni naʼtsisewanónsthate.

⁷ Né Roiá꞉ner enhahón꞉nien ne rakó꞉ra nahothónhteʼne ne karihhontsenónhties né kíʼ enkakwéni nahahónhnien tsi thonakeraseráien niénhsʼre, tánon ne Roiá꞉ner thóh kíʼ nón꞉we ienhononwariákon.”

Né Assyriaró꞉nons Shé꞉kon Óʼia Ionsahonténiete Ne Kateronkwáhtsera

⁸ Né Assyriaró꞉non rasenhnowánen waharihwáronke nètho rakó꞉ra tsi éhren sawéton ne Lachish tánon né ieshonaterí꞉io ne ákta kanataiéntons ne Libnah nón꞉we; sók kíʼ thóh nón꞉we niahá꞉re ne iathahatitháren.

⁹ Iahatirihwáronhke ne Assyriaró꞉nons nètho Egyptró꞉nons ronterí꞉ios, né꞉ne Ronnontí꞉io Tirhakah ronenhríhne Ethiopia nontahónhne, tá꞉re niashakotsatónhti. Nó꞉nen ne rakó꞉ra saharihwáronhke kí꞉ken, iahoʼthiathonseraʼteniéten ne Ronnontí꞉io Hezekiah ne Judah nón꞉we

¹⁰ né nahoróri, “Né raní꞉io ne tetiethákwen iaró꞉ri nètho tsi iáh kíʼ katshaná꞉ke nón꞉we thahonthatsiátenhne, ók tó꞉sa kíʼ sathóntat nètho aiesanikonráhten.

¹¹ Sharihwarónhken ne Assyriaró꞉non rakó꞉ra tsi niʼsakoiéraʼse ne kanakerásera niatenhoriwahiéntase nashakótonhte. Ísewé꞉reken ensewaniáʼkenʼne?

¹² Né khesokʼthonkonkénen rotirihwathónton ne tsi kanatowánens ne Gozan, Haran, tánon ne Rezeph, ó꞉ni sakononwarhiakónhnions nonkweʼshón꞉as ne Betheden né꞉ne Telassar nón꞉we nihatinákerekwe, tánon iáh ón꞉ka tsi níkon rotiniʼioseráiens tehotikwénion nahonwatinonsthátonhke.

¹³ Kaniehonénons ne rontinontí꞉ios ne tsi kanatowánens ne Hamath, Arpad, Sepharvaim, Hena, tánon ne Ivvah?”

¹⁴ Né Ronnontí꞉io Hezekiah wahaiéna ne kahiatónhsera ne ratirihwakarénies ratiháwine tánon wahawenhnanóten. Ethòne Ononsatokentikó꞉waʼne niaháre, tánon thóh iahá꞉ien ne kahiatónhsera rahohénton ne Roiá꞉ner,

¹⁵ tánon waʼhaterénhnaien, “O Saiá꞉ner, ne Sení꞉io Nisraeʼró꞉nons, sanitskwáhraʼne siskwaʼhé꞉re é꞉neken tsi rón꞉nes ne tehatinerahontiónhtons kontí꞉rios, sonhá꞉hak khók ne Saní꞉io í꞉ken, satkorástons akwé꞉kons tsi kanakeraseraké꞉rons tsi ionhwenhtsáte. Í꞉se shasaháʼnion ne tsi ionwenhtsáte ó꞉ni ne tsi karonhiáte.

¹⁶ Ó꞉nen kíʼ Saiá꞉ner, satká꞉tho tsi nón꞉wa niʼionkwahiátawens. Satahónsatat orihwakwékons nètho Sennacherib raʼtónhnions tsi ahianikonrát꞉sate, ne sonnheʼónwe Sewenhní꞉io.

¹⁷ Iakwahkwé꞉kon ionkwahteriéntare, Saiá꞉ner, nètho ne rakó꞉ra ne Assyria tsi iakotsiokowánen sakotónhton, ká꞉iase rahonhniáton ne rahononhóntsas,

¹⁸ tánon akwékon rotʼtsahathánion ne raotiniʼiohokónhas—né꞉ne kwáh iáh othènen tehatiní꞉iokwe tekènhne, ne khók ne oiéntake ratiʼiatarón꞉nionhkwe tánon notstenrákes né onkweʼshón꞉as raʼotitsánas rotisahá꞉nions.

¹⁹ Ó꞉nen kíʼ, Saiá꞉ner nonhkwah Ní꞉io, saskwahniá꞉kent tsi nòkwah ne Assyriaró꞉nons, né ká꞉ti niakahontsakwékons kwáh ahiakoterientátraʼne nètho tsi í꞉sek khók, O Saiá꞉ner, tsi Sewenhní꞉io í꞉ken.”

Né Isaiah Raʼoterihwanothátsera Rahonháke Ne Ronnontí꞉io

²⁰ Ethòne ne Isaiah iahoterihwaniéthase roróhris ne Ronnontí꞉io Hezekiah tsi tekaʼrihwaserákwen ne ronnontí꞉io raʼoterénhnaient

²¹ ne Roiá꞉ner rá꞉wen, “Ne tsi kanatowanénke ne Jerusalem ieshasterístha, Sennacherib, tánon tiʼiesaiéron.

²² Ónhka ónhte sèraʼkwe tsi tienikonratsaʼthakwe tánon thiʼtierónhakwe? Kwáh iáh thaʼhóthen tesetkweʼniénsthaʼkwe, né Watiathatokénti Nisraeʼró꞉nonke.

²³ Tasheiaténiete ne shonkwetaʼshónhas ne ratirihwakarénies ne tahonthaterénhsaron natʼkénton tsi ne shástston ne sasheʼresónhas notsónkwas tsi saienáhon ne kwáh tsotenón꞉tates ne Lebanon. Waʼteshataterénhsaron né thóh nón꞉we tsi sharonhtiakónhnions ne kwáh tkaronhtésons tánon ne kwáh tkaronʼtí꞉ioskwe ne Cypress nikarontótens tánon iateshaterawehéston tsi nón꞉we né kwáh í꞉non iéken ne karhakonkówa.

²⁴ Waʼtesathaterénhsaron tsi satnaweronhniánions tánon sanekíren nonèkanos ne aktéson nón꞉we tionhontsaiéntons tánon ronhsitákes ne sonhkweʼtashón꞉as ne ronterí꞉ios wáhonste tsi wahatistátʼthaʼte ne kaniataratase ne Nile.

²⁵ “Iáh kén nonwénton tesatʼthonté꞉on tsi thóh kíʼ ní꞉ioht tsi tewakatenikonronhníhon ne wahónhnise tkènhne? Tánon kíʼ ó꞉nen éhthoh nátiere. Khonhiáwi ne kashastsʼténsera né꞉ne asónhniaʼte ne tsi tekensthorótatse ne tekanathanátʼtons ne kanatowanénhke né ashanitonhiónhniaʼte nononhwénhsera iotónhon.

²⁶ Nonkweʼshón꞉as né nón꞉we niʼienákerekwe kwáh iáh othènen tehotishastsʼtenseraiéntakwe; rotíteronskwe ó꞉ni rotirihwanerakóhon; Thóh nihononhnótens tsi kíʼ ní꞉ioht ne kahentáke iothontónhni khés ne kahontatsens ieʼiohtirát꞉ten ne tsi karonhkweʼnáhere nó꞉nen ne nàkon nentkawerénhawe ne tahiakokthó꞉kwahte.

²⁷ “Ók orihwakwékon waʼkateriéntare tsi nòkwah ní꞉se, tsi nishatiéra tánon tsi nón꞉we ieshé꞉ta. Waʼkateriénhtare nó꞉nen takená꞉kwahse.

²⁸ Waʼtiená꞉hon tsi niwatróris nètho kanakwáhtsera tánon nètho kanaiésera sáwenk, tánon ká꞉ti ó꞉nen kwáh entkonʼiarió꞉tarohke then kó꞉heste ne senionhsáke tánon enkonristanón꞉ta, tánon thóh nón꞉we nienskonhiaténhawe ne tsi nitiotʼthaʼí꞉non ne thisatʼthaʼí꞉ten.”

²⁹ Ethòne ne Isaiah wahawénhase ne Ronnontí꞉io Hezekiah, “Kénʼen weʼnéstha tsi nenhiáwenhne. Né kénʼen ioseráte tánon nó꞉ia ne khók ensaiénhtake ne thitʼká꞉nios onátsia naséhke, ók kíʼ nó꞉ia entsioseráteke enwáton kíʼ nahonsashiéntʼtho né sanátsia tánon nashentʼwáko, tánon nashentʼtho ne watenenharíhseres tánon nasenenhárake.

³⁰ Tsi nihiákon ne Judah né iatenhiakotátere enhiakoianerásten tsi ní꞉ioht ne kaientʼthósehras kwáh tehiahosehrénhen notéras tsi tehiothonhontsawehéston tánon taká꞉hawe ne kahiksónha.

³¹ Kwáh kíʼ nonkweʼshón꞉as ne Jerusalem tánon ne tsi Ionónte ne Zion ótiaʼkes kwáh kíʼ iatenʼonathatére, tsioríhwa ne Roiá꞉ner tsi iatehorihwaiéntaʼse tsi né enrónhniaʼte kí꞉ken né naiáwenhne.

³² “Tánon kén kíʼ nahó꞉ten ne Roiá꞉ner ráwen tsi nòkwah ne rakó꞉ra ne Assyria: ‘Iáh kíʼ tsahanatáraʼne kí꞉ken kanatowanénhke iáh ó꞉ni ne skaiénhkwire tsaharónhthaʼte nétho nón꞉we. Iáh ónhka ne rateriios ne rahá꞉we ne tehioniá꞉tastha nákta aré꞉te ne kanatowanenhke, tánon iáh tahonhnitonhionhniánion nokénras nahonwatiʼiénaste.

³³ Kwáh né enshatʼthaʼí꞉tha tsi nihiohahó꞉ten ne thóh tahí꞉ten tsi nithawénon, né꞉ne kwáh iáh tsahanatáraʼne kí꞉ken kanatowanenʼke. Í꞉i ne Watiá꞉ner, wakatáti.

³⁴ Kwáh enkaterí꞉ioʼse kí꞉ken kanatowanénke tánon entké꞉ne, né꞉ne ahoriwáke ne iaʼtetiáti akerenhsaronhtiéra tánon né tsoríhwa tsi niʼihiararatsʼténhni nakenhátsera Táwit.’”

³⁵ Thóh siʼiokarasnéha ne Roiá꞉ner raʼohronhiakeró꞉non tsi thonanáhtaien ne Assyriaró꞉non niaháre tánon 185,000 niháti ronhterí꞉ios washakononwarhiákon. Sahórenhne thóh ratiʼiatakerónhton, ratikwékon ronenhéion!

³⁶ Ethòne ne Assyriaró꞉non rakó꞉ra Sennacherib éhren wá꞉rehte tánon Nineveh nionsáre

³⁷ Énska kíʼ nènhneʼe wenhniserátekwe, tsi náhe roterenhnaiéntaʼkwe ne raoní꞉io Nisroch raoʼnonsatokentiʼkówaʼne, teniʼiáhse ne sakohiohokónhas, né꞉ne Adrammelech tánon ne Sharezer, wahonwanonwarhiákon rahonasarekó꞉wa wáiaste tánon ethòne wahiatèko tsi tsohontsáien ne Ararat niaháne. Shé꞉kon ó꞉ia ne roiénha, Esarhaddon, thonsahonatʼthákwen tsi sahatkó꞉raste.