2 Kings 17 - Ohiatonhseratokénti

Né Hoshea Né꞉ne Ronnontí꞉ioʼkwe Nisraeʼró꞉nonke

¹ Né tékeni-iawénre siʼioserakehátie shiʼhonontí꞉ioʼkwe ne Ahaz ne Judah nón꞉we, Hoshea né꞉ne ronikénhen ne Elah né wahonontí꞉ione Nisraeró꞉nonke, tánon rahónha wahatkóraste ne Samaria né꞉ne tióton niʼioseráke nikaríhweskwe.

² Waharihwánerake tsi nòkwah ne Roiá꞉ner, ók iáh kíʼ éhthoh tewahetkéntakwe tsi ne niʼiohthónʼne ne thotinontí꞉iosʼkwe ne ronatkorástonhne Nisraeʼró꞉nonke nohénton ne rahónha saʼonon꞉tiione.

³ Né Rakó꞉rakwe Shalmaneser ne Assyria wahateriʼioserónhni tsi nòkwah ne rahónha; Hoshea wahatiakwahrísi rahonháke ne Shalmaneser tánon iaʼteioseráke thóh iesténhniskwe.

⁴ O kíʼ ne ronnontí꞉io ne Assyria wahariwatsénhri ne Hoshea tsi wahanikónrahte. Asèken ratirihwakaʼré꞉nies ieshakoteniétonhne tsi ténhteron ne So, né꞉ne tonnontí꞉io ne Egypt nón꞉we, rorihwanontónhnis nahoiénawaʼse, né nahát꞉kawe tsi iatehioseráke shakokáriase ne Assyriaró꞉nons. Nó꞉nen ne Shalmaneser saharihwáronhke kí꞉ken, wahonwaiéna ne Hoshea tánon wahonwanóton.

Tsi Nontakaʼiátenhne Ne Samaria

⁵ Ethó꞉ne ne Shalmaneser washakonenhrénhten ne Israerʼró꞉nons tánon wathawánaʼke ne Samaria. Nasénhaton siʼioserakehátse tsi konwaʼiéhnen,

⁶ né꞉ne tiotónhaton siʼioserakehátie shiʼhonontí꞉ioʼkwe ne Hoshea, né꞉ne Assyriaró꞉non ronhnontí꞉io wahaiéna ne Samaria, Assyria niashakoiaténhawe Nisraeʼró꞉nons nahonwatinó꞉ton, tánon ótiakes tsi kanatowanénhke ne Halah nón꞉we nashakóteron, ótiakes ó꞉ni tsi Konrarós꞉tha Kaniataratátie né tsi watonhontsáien ne Gozan tánon ótiakes tsi kanatowánens ne Media.

⁷ Né Samaria né aoríhwa takaʼiátenhne né Israerʼró꞉nons tsi wahatirihwánerake tsi nòkwah ne Roiá꞉ner Raʼotiní꞉io, tsi rahónha né sesakohiatotaríhshion tsi nòkwah ne ronnontí꞉ioʼkwe ne Egypt nón꞉we tánon washakosárihne tsi thontasakoiatínekenhwe ne Egypt. Thih kaʼniʼioseráte konwasénhnaienskwe,

⁸ né ratísereʼne tsi nihiakorihoténsons nonkweʼshón꞉as né꞉ne ronónha ne Roiá꞉ner shakoiatinekénʼen tsi niahónhne ne rahonkweʼtashón꞉as, tánon né wahontiénawaste tsi nihotihiótens ne Israerʼró꞉non rotinontí꞉ios.

⁹ Nisraeʼró꞉nons thóh nahatiʼieráhnion tsi nahoténsons ne Roiá꞉ner iáh tehawerenhtí꞉ios. Wahonnonhniánions ne onkwetahét꞉kens tsi nón꞉we nahonterennaienthákwahke kwáh tsitʼnonwésons ne rahotinátakons, né꞉ne kenʼnakanatáske akénhake khés nakanatowanénhake.

¹⁰ Akwékons ne tsi ionniarónhnions ó꞉ni ne tsi iorahkwahwerósherons tsi keríhtons wahatinawahathontónhnions nonénias niʼiohʼthánion ó꞉ni ne tsi kaiatarónhnions ne kaní꞉io Asherah,

¹¹ tánon wahontsahathánion ne rontsienkwahronhniathákwahs akwékon nontahónhnete ne tsi ratiʼtienharáhkwahs, né ratísere tsi nihatiweienó꞉tens nonkweʼshón꞉as tsi nikáien ne Roiá꞉ner sakoiatinekénʼen ne tsi ionhontsáien. Wahonwénrahte ne Roiá꞉ner rahonakwáhtsera né takákwekte tsi nihatiweienáksens

¹² tánon iáh tehonatewenhnarákwen tsi nihorihwatháton ne Roiá꞉ner né꞉ne tó꞉sa akonwasénhnaien ne kaiatónhni.

¹³ Né Roiá꞉ner iehoteniéton ne rahonkwéʼta rarihwakaré꞉nies ó꞉ni ne rotó꞉kense nashakoronhkáten Nisraeʼró꞉nons tánon ne Judah: “Sewatsakwahríhsi tsi nisewaweienhnáksens tánon takwahwénhnarak, tsi thóh nón꞉we niwatá꞉rons ne kaianerenhserákons ne tekheiáwi ne sewasókʼtseras tánon tsi nitkwahwíʼons rahonháke nakenáhtseras ne rotiʼtó꞉kense.”

¹⁴ Ók iáh kíʼ tehonatewenhnaráhkwen; rotinontsistaníkon kwáh kíʼ tsi niʼiohtónʼne ne sakotisokʼthonkonhkénʼen, né ronónha tsi iáh tethonwethákwenhne ne Roiá꞉ner Raotiní꞉io.

¹⁵ Iáh tehonatʼthontháton nahonatewenhnaráhkwen ne rahorihonhnienhnítseras, iáh tehonatsenawáston ne kaianerénhsera tsi nihó꞉son skát꞉ke ne sakotisokʼthonkonhkénʼen, iáh karíhwa tehonnónhni tsi nishakoronhkaténhniskwe. Né wakonwasénhnaien ne iáh othènen tekariwásthas kaiatonhnisónhas tánon ronón꞉ha ó꞉ni iáh othènen teshatirihwásthakwe, tánon ne rahtísere tsi nihotiʼianerenserótens né aktóntses ratinakerénion, iáh tehonwawenhnarahkwenhátse ne Roiá꞉ner tsi nisakoróri ne tó꞉sa tahontahonwatinákeren.

¹⁶ Akwéʼkon tehotiʼiákons ne Roiá꞉ner rahoianerénhseras ne Raotiní꞉io tánon tèkeni wahontsatonhniserónhni tèro ne karístatsi nahó꞉ten í꞉ken ne nakonwasénhnaien; kwáh ó꞉ni wakonwaiatónhni ne kaní꞉io Asherah, ó꞉ni otsístho wakonwasénhnaien, tánon ne wakonwaiótenhse ne rahní꞉io Baal.

¹⁷ Kwáh ó꞉ni wahonwanateskónten ne rahotinekenhteronhtserasónhas ó꞉ni ne rahotiʼiatasetserasónhas tsi né tahatí꞉ieste, tánon ne wáhonste ne tahóntkonste tánon natenhenʼnaráhtseras, tanon wahontatenhninónhnion né꞉ne karihwahekénsera tsi nahóntsere rahohénton ne Roiá꞉ner, né nahonwanakónhni.

¹⁸ Ne Roiá꞉ner sakonákwahse ne Israerʼró꞉nons tánon éhren wasakoiatenháwite ne rahohénton, ne khók iateshonataténhron ne Judah.

¹⁹ Shé꞉kon kíʼ nón꞉ne ne Judahró꞉nons iáh tehonatewenhnaráhkwen ne Roiá꞉ner rahoianerénhseras ne Raotiní꞉io; né thontahontenienténste tsi nikarihó꞉tens tehonékwen nonkweʼshón꞉ʼas Nisraeʼró꞉nonke.

²⁰ Né Roiá꞉ner waʼshakokénron ratikwéʼkons Nisraeʼró꞉nons, sakorewathonhátie tánon thóh niesakohiaténhas tsi rónhnes ne ratiniakátste tehontátʼtions kwáh tsi nióre éhren waʼsakohiatenháwite ne rahohénton.

²¹ Nó꞉nen ne Roiá꞉ner sateshakokʼkháshion Nisraeʼró꞉nons tánon ne Judahró꞉nons, Nisraeʼró꞉nons né꞉ne Jeroboam waʼhonwanontiʼiotserónhni né꞉ne roʼníha ne Nebat.

²² Rahónha wahonwásehre ne Jeroboam tánon iahontashón꞉teren thóh nihatiʼiéra akwékons ne kariwanerahátʼtseras tsi nihotieránions,

²³ kwáh tsi nióre ne Roiá꞉ner éhren washakoiatenháwite ne rahohénton, kwáh kíʼ tsi nihorarátston rahonháke ne rahonkwéʼta rotó꞉kense tsi kwáh thóh nenháiere. Ká꞉ti nonkweʼshón꞉ʼas Nisraeʼró꞉nonke Assyria nón꞉we iahonwananahkerákwahte, tánon shé꞉kon thóh nón꞉we thatinákere.

Né Assyriaró꞉nons Israerʼró꞉nonke Nón꞉we Nahontatíteron

²⁴ Né rakóra ne Assyria nón꞉we tashakoiatínekenhwe nonkweʼshón꞉as ne Babylon, Cuth, Ivvah, Hamath, tánon ne Sepharvaim tánon tsi kanatowanénke ne Samaria nón꞉we niahonwaʼtiʼiaténhawe tsi nón꞉we iehonwananakerakwáhton Nisraeʼró꞉nons tánon thóh nón꞉we nahonwatíteron.

²⁵ Ne sonhtontsérenhte ne thóh nón꞉we sahontenátaien, iáh tehonwasénhnaienskwe ne Roiá꞉ner, káti sók kénreks iasakoténiete, né kíʼ ótsiakes wahonwatinonwariakon.

²⁶ Né rakorakwe ne Assyria tsi wahonwaró꞉ri nètho onhkweshón꞉as tsi kanatowanénhke ne Samaria nón꞉we nihonanátaiens iáh tehonateriéntatre tsi nihoianerenhseró꞉ten ne raní꞉io ne tsi ionhontsáien, ká꞉ti kénreks tesakoteniéton, tsi ronónha ne kénreks sakotinonwariakónhnions.

²⁷ Sók kíʼ ne rakóra wahaténhnane: “Saiáta ne ratsihénstatsi ionshatsisewaténiet né tetsitewaiaténha natsitewanó꞉ton: tsisewaríhon thóh iésreh tánon thóh nón꞉we nihanákeʼrek, né nahónton nashakorihónhnien nonkweʼshón꞉as ne raʼoianerénsera ne raní꞉io ne tsi ionwénhtsaien.”

²⁸ Sók kíʼ ne Israerʼró꞉non ratsihénstatsi ne sonwanakerakwáhton ne Samaria nón꞉we Bethel niahá꞉re thóh nón꞉we ionsahatatíteron, thóh nón꞉we nasakorihónhnien nonkweʼshón꞉ʼas tsi ní꞉ioht nahonwasénhnaien ne Roiá꞉ner.

²⁹ Ók nonhkweshón꞉as tsi niháti né Samaria nón꞉we nihonatatíteron iahatikóntaʼwe tsi wahontatsiatonhniserónhnien, tánon ononsatokentíke nón꞉we nahatí꞉ien né꞉ne Israerʼró꞉nons ronatenonshíson. Kwáh shotitsokwátʼtions tsi wahontsiatonhniseronhniánion né tsi nón꞉we nihatinakerénion ne tsi kanatowánens:

³⁰ Né Babyloniaró꞉nons né꞉ne wahontatsatonhniserónhnien ne raní꞉io Sukkoth Benoth ronwáiats; nonkweʼshón꞉ʼas ne Cuth, né꞉ne ne Nergal ronwáiats wahonwaiatonhniserónhni; nonkweʼshón꞉as ne Hamath, né꞉ne ne Ashima raní꞉io ronwáiats wahonwaiatonhniserónhni;

³¹ nonkweʼshón꞉as ne Ivvah nón꞉we, né꞉ne ne Nibhaz ronwáiats wahonwaiatonhniseronhni tánon ne Tartak; ók nonkweʼshón꞉ʼas ne Sepharvaim sakotiʼioʼokónhas ne wahonwanatsatát꞉tsahate tsi wahonwateskóntʼthase ne raotiní꞉ios né꞉ne Adrammelech tánon ne Anammelech.

³² Kí꞉ken onhkweshón꞉as ronwasénhnaienskwe nón꞉ne ne Roiá꞉ner tánon thóh tsi natehónteres wahonwatiʼiatarakwenháton niatehionkweʼtoténhsons né nahonstsihenstónhni tsi nón꞉we ne ionkweʼtátʼsens nihonterenhnaienthákwahs tánon thóh nón꞉we nahontahatiʼiésthake tsi ahonwanateskóntʼthase né nón꞉we.

³³ Ká꞉ti wahonwasénhnaien ne Roiá꞉ner, ók kíʼ ronwatisénhnaienskwe nón꞉ne ne raʼotiní꞉ios né tahiohianénhawe tsi nihotirihótenskwe ne tsi kanakerasehráiens tsi nón꞉we nithonenónhseron.

³⁴ Shé꞉kon kíʼ ne ratísehre tsi nihotirihótens nón꞉wa nikaháwis. Iáh tehonwasénhnaiens ne Roiá꞉ner iáh ó꞉ni tehontewenhnarákwahs ne kaianerénhseras ó꞉ni ne karihwatátʼtseras tsi nitesakowíhon tsi nontahawatsirathátie ne Jacob, tsi rahónha Israel sonwasenhnáwi.

³⁵ Ne Roiá꞉ner skát꞉ke ronatsanerenhseríson ne ronónha tánon sakoróri: “Tó꞉sa nó꞉ia niʼiohokónhas aisewasénhnaien; tó꞉sa tesewatʼtsáket nahotihénton khés naʼietsiʼiótenhse khés naʼitisewáieste nahonteskónhten.

³⁶ Kwáh enskwahwénhnarahkwe, né Watiá꞉ner, tsi í꞉i tetkwahiatínekenʼen ne Egypt né꞉ne wakeshaststenserowánen ó꞉ni keshástste; ónenk tsi Í꞉i tenskwatʼtenhtsótatʼse tánon enskwátatʼtse naskwahteskóntʼthase.

³⁷ Kwáh kíʼ tiókonte tsi ensewatewénhnarakwe ne kaianerénhseras tánon ne karihwatátʼtseras né kwahʼhiatónhni. Kwáh kíʼ iáh tehiówenk naietʼtsiwénhnarakwe nó꞉ia niʼiohokónhas,

³⁸ tánon kíʼ tó꞉sa sewanikónhren ne kaianerénhseras ne ionkwáhson.

³⁹ Ónenk tsi Í꞉i enskwahwénhnarakwe, Í꞉i ne Watiá꞉ner Sewaní꞉io í꞉ken, tánon kwáh kíʼ enskwahniákente tsi nòkwah ne tesewatátʼtsons.”

⁴⁰ Ók kíʼ thí꞉ken onhkweshón꞉as iáh tehontahónsatats, tánon iehothikonthákwen ne ratísehre ne rahotirihwakáions.

⁴¹ Káti thí꞉ken onhkweshón꞉as wahonwasénhnaien ne Roiá꞉ner, ók kíʼ ó꞉ni konwasénhnaienskwe ne raoʼtiʼiatónhnis; tánon shé꞉kon kíʼ nónwa wenhniseráte kwáh shé꞉kon éhthoh nihatiʼiéra.