2 Kings 16 - Ohiatonhseratokénti

Né Ahaz Rahónha Né Ronnontí꞉ioʼkwe Ne Judah Nón꞉we

¹ Né tsatákhaton siʼioserakéhaton siʼhonontí꞉ioʼkwe ne Pekah né꞉ne ronikénhen ne Remaliah tsi né ronnontí꞉ioʼkwe ne Israerʼró꞉nonke, ne Ahaz né꞉ne ronikénhen ne Jotham né ronnontí꞉ioʼkwe ne Judah nón꞉we

² tewásen satehahoserihiákon, tánon rahónha rakóraʼkwe kènʼne ne Jerusalem né꞉ne iá-iak iawénre niʼioserákekwe. Iáh ne tehóseron ne ioiánere tsi tahontahotenienténstonke ne rosotʼkénʼen Táwit; khèkhok, ne thóh naháiere tsi nahóten ne Roiá꞉ner iáh tehawerientí꞉ios ne Raoní꞉io

³ tánon ne wahá꞉sere tsi tontahotenákerasʼte ne ronnontí꞉io Nisraeʼró꞉nonke. Kwáh ó꞉ni wahotsatátʼtsahate ne roiénha notsiráhke né nashakoteskóntʼthase ne kaiatonhnisónhas, tontahatenákerahte ne ioterihwatéhas tsi nihatiʼiéra nonkweʼshón꞉ʼas tsi nikáien ne Roiá꞉ner sakoiatinekénʼen ne tsi iohontsáien ne Nisraeʼró꞉nons tsi niahónhne.

⁴ Né ionkweʼtahét꞉kens tsi nonwé꞉sonhs nihonterenhnaienhthákwahs, né tsi ionontáheres, tánon ne karonhthokónhsons noronhtáses, ne Ahaz tahá꞉ieste nakonwanateskónten ne kaʼtshénens ó꞉ni nahontsienkwahrónhniate.

⁵ Ne Ronnontí꞉io Rezin ne Syriaró꞉non ó꞉ni ne Ronnontí꞉io Pekah Nisraeʼró꞉non iakonwatsatónhti ne Jerusalem tánon wahatiʼiéna, ók iáh kíʼ tehiotónhon nahonwasénhnion ne Ahaz. (

⁶ Kwáh thó꞉ne ne ronnontí꞉io ne Edomró꞉non sahaiéna thontahaniaró꞉tarohke ne kanatowá꞉nenhke ne Elath tánon waʼshakoiatínekenhwe ne Judahró꞉nons né thóh nón꞉we nihatinákerekwe. Ne Edomró꞉nons thóh nón꞉we nahonnátaien ne Elath tánon shé꞉kon kíʼ thóh nón꞉we nihatinákere.)

⁷ Ne Ahaz ronónkwe iashakotóri tsítres ne Tiglath Pileser, ne rakó꞉ra í꞉ken ne Assyria, né kí꞉ken naterihwanothátsera: “Í꞉i ne wakerihwató꞉ten sanhátsera. Tá꞉se tánon saskeniákenk rahonháke ne ronnontí꞉io ne Syriaró꞉non tánon ne Israerʼró꞉non, tsi ronónha tionkatiatónhties.”

⁸ Né Ahaz kawistaráken tánon owistanó꞉ron iahá꞉ko Nononsatokentiʼkówaʼne tánon ne tsi ratiwistaienthákwah ne kanontiʼiótsera, tánon né꞉ne rakó꞉ra iahoteniéthase tsi wahá꞉wen.

⁹ Né Tiglath Pileser, tsi watorihwaserákwahse ne Ahaz; iahanénhrihne ne raoʼtsiókwah ne ronterí꞉ios niasakotiatónhti ne Damascus, wahaiéna kíʼ, wahononwariákon ne Ronnontí꞉io Rezin, tánon nonkweʼshón꞉as Kir nón꞉we niashaʼkoiaténhawe tsi washakonóton.

¹⁰ Nó꞉nen ne Ronnontí꞉io Ahaz Damascus niaʼháre ne tahiatátʼken ne rakó꞉ra Tiglath Pileser, thóh nón꞉we nahatkátho ne ientienharákwah tánon né ionsahoteniéten ne Uriah ratsihénstatsi kwáh ne thontahatenákeraste, tsi nióre ne kenk niahónske.

¹¹ Ká꞉ti ne Uriah warónhni ne ientienharákwah né kwáh thóh ní꞉ioht tánon wahá꞉sa nohénton ne Ahaz thóh ahonsáraʼwe.

¹² Tsi natonhtá꞉re ne Damascus, Ne Ahaz wahatkáto nètho ietienharákwah tsi ká꞉son,

¹³ sók kíʼ waʼshakoteskónten ne katʼtshénens ó꞉ni nonátsias né tkaiesthánion tánon né tahonekónti notsítsas tkaiestánion ó꞉ni thóh é꞉neken waʼtatstarokwahthánion nonekwénhsa né skaríhkwah í꞉ken tsi tkaiesthánion.

¹⁴ Ethó꞉ne ne Ronnontí꞉io Ahaz é꞉ren wahaháwite ne aká꞉ion teiotwístaron notsínekwar ietienharákwah nohénton kaʼniótakwe ne Roiá꞉ner Rahononsatokentiʼkówaʼne, tánon othoréke nòkwahti wahanióten ne tsi ká꞉hiote náse ietienharákwa.

¹⁵ Ethó꞉ne wahó꞉nane ne Uriah: “Né í꞉satst kí꞉ken kowánen aká꞉wenk ietienharákwa noronhkéne konwanateskóntha tánon nokarasné꞉ha nonátsias tkaiesthánion, né꞉ne ronnontí꞉io shakoteskonthákwa ó꞉ni nonátsias ahoriwáke, tánon nonkweʼshón꞉as tsakoiesthánions, thóh kaʼrák né ienikirá꞉tha tkaiesthánion. Nonekwénhsa tsi nenhkanekwensínekenhne tsi watéskonte tánon ne kariwihiosehokónhas né tehiotonhontsóhon tahonstarokwáhtonke náseh ietienharákwahke. Nakáʼhion ietienharákwah ne teiotʼwístaron notsínekwar ìknenhne enkáts꞉thake.”

¹⁶ Né ratsihénstatsi Uriah akwékon kíʼ thóh naháiere tsi kíʼ nihonáhon ne ronnontí꞉io.

¹⁷ Né Ronnontí꞉io Ahaz waʼthakhashónko notsínekwar káʼseres né rónsthaʼkwe Nononsatokentiʼkówaʼne tánon é꞉ren wahahawithánion ne watnekaʼrákwahs né thóh ioienawakónhnionkwe. Kwáh ó꞉ni iahaháseron ne teiotʼwístarons nontaksónhas né rathisónhnes kaʼrónhnionkwe ne tèro tánon tsi kenstenhrakwéntaron nonénhia nón꞉we nonsaháʼien.

¹⁸ Tánon kíʼ né nahónton nahontahonikonraiériʼte ne Assyriaró꞉non rakó꞉ra, ne Ahaz kwáh ó꞉ni waharihsónko ne é꞉neken iónhni né tsi nón꞉we niwanitswaratseró꞉te Nononsatokentiʼkówaʼne tánon waʼhanóton ne tsi iehatewehiathákwahkwe ne ronnontí꞉io Nononsatokentiʼkówaʼne.

¹⁹ Oriwakwékon tsi nihotieránions ne Ronnontí꞉io Ahaz thóh nón꞉we nikaiatónhnions Tsi Nihonwatikáratons ne Ronhtinontí꞉ios ne Judah Nónhwe.

²⁰ Né Ahaz warénheʼie tánon thóh nón꞉we iehonwahiatháten tsi ronhwatiʼiathatahástha ne Rontinontí꞉ios né꞉ne Táwit raonátakon, tánon né꞉ne roiénha Hezekiah thonsahonakʼthákwen tsi sahatenontí꞉ioste.