2 Kings 15 - Ohiatonhseratokénti

Né Uzziah Rahónha Nenʼné꞉e Ronnontí꞉iokwe Ne Judah Nón꞉we

¹ Né tewasentsáta siʼioserakéhaton né siʼhonontí꞉iokwe ne Jeroboam II Nisraeʼró꞉nonke, ne Uzziah né nenʼné꞉e ronikénhen ne Amaziah né sahonontí꞉ione ne Judah nón꞉we

² iá-iak iawénre satehahosehríhiakon, tánon rahónha wahatkóraste ne Jerusalem né꞉ne kaiéri niwásen-tekeni niʼioseráke nikaríhwesʼkwe. Né ronistenkénʼen né꞉ne Jecoliah Jerusalem nón꞉we nikanákerekwe.

³ Né rásehrene thontahotenientenstonhátie ne roʼníha, thóh nihaiérakwe tsi nahó꞉ten ahawerientí꞉io ne Roiá꞉ner.

⁴ Ók kíʼ tsi nonwésons ne ionkweʼtahétkens tsi ronterenhnaienthá꞉kwahs iáh né tekarihwathóntons, tánon nonkweʼshón꞉as iahontasónhteren tsi konwanateskóntʼtha ne katʼtshénens tánon ronhtsienkwahronhniátha né nón꞉we.

⁵ Né Roiá꞉ner né wahohráhro ne Uzziah ne iáh tetieiewénhtas kannratarihné꞉tsera né kíʼ rohkráhrekwe kwáh tsi nirónhʼneskwe. Thiʼkanónsate nón꞉we nihenteróntakwe, sonhwanashiónkwen akwékon ne kaioténhseras, thóh náhe ne roiénha Jotham rotkoráston ne tsi kanakeraseráien.

⁶ Orihwakwékons nohiásons nètho Uzziah tsi nahotieráhnionke thóh nón꞉we nikaiatónhnions Tsi Nihonwatikáratons ne Ronhtinontí꞉ios ne Judah Nónhwe.

⁷ Né Uzziah warénheie tánon thóh nón꞉we nihonwahiatháten ne rontinontí꞉ios tsi ronwatiʼiathatahástha né꞉ne Táwit raonátakon, tánon né kíʼ né roiénha Jotham thonsahonakʼthákwen tsi sahonontí꞉ione.

Zechariah Né꞉ne Ronnontí꞉iokwe Ne Israerʼró꞉nonke

⁸ Né asenhniwáhsen-satékon siʼioserakehátse né siʼhonontí꞉iokwe ne Uzziah né Judah nón꞉we, né Zechariah né꞉ne ronikénhen ne Jeroboam II rahónha sahonontí꞉ioʼne Israerʼró꞉nonke, tánon rahónha wahatkóraste ne Samaria né꞉ne iá-iak niwenhnítake nikaríhweskwe.

⁹ Né Rahónha, kwáh kíʼ tsi nihiotónhne ne teshonakʼthakwénhni, waharihwánerake tsi nòkwah ne Roiá꞉ner. Né wahá꞉sere né karihwahetkénsra tsi thontahotheniéntenste ne Ronnontí꞉io Jeroboam né꞉ne ronikénhen ne Nebat, rahónha né iesakosaríhnon Nisraeʼró꞉nons ne karihwanerenhakʼtserákon.

¹⁰ Shallum né꞉ne ronikénhen ne Jabesh wahoteristhaiénhase ne Ronnontí꞉io Zechariah, wahorónhthate ne Ibleam nón꞉we; akohénton nón꞉kwe. Tánon tonsahonakʼthákwen tsi wahatenontí꞉ioste.

¹¹ Orihwakweʼkons nohiásons nikarihoténsons tsi nahotieránionke ne Zechariah thóh nón꞉we nikahiatónhnions Tsi Nihonwatikáratons ne Ronhtinontí꞉ios ne Israerʼronónke.

¹² Ká꞉ti ne warahrátston kwáh waká꞉nane ne Roiá꞉ner tsi nihosenhénhni ne Ronnontí꞉iokwe Jehu: “Tsi iensatwatsírihne tsi nióre ne kaieríhaton niaʼteiotereseráhne tsi enhotinontí꞉ioke Nisraeʼró꞉nonke nón꞉we.”

Ne Shallum Né꞉ne Ronnontí꞉iokwe Ne Israerʼró꞉nonke

¹³ Né áhsen-niwásen tióton siʼioserakehátie sihonontí꞉iokwe ne Uzziah ne Judah nón꞉we, ne Shallum né꞉ne ronikénhen ne Jabesh rahónha ne wahonontí꞉ioʼne Israerʼró꞉nonke, tánon rahónha wahatkórasʼte ne Samaria nón꞉we né꞉ne sewenhníta nikaríhwesʼkwe.

¹⁴ Né Menahem né꞉ne ronikénhen ne Gadi Tirzah nón꞉we tahaténhti tánon Samaria niaháre, wahorónhthate ne Shallum, tánon rahónha tonhsahonaktákwen tsi sahatenontí꞉ioste.

¹⁵ Orihwakwékons nohiásons tsi nihotieránions ne Shallum thóh nón꞉we nikahiatónhnions Tsi Nihonwatikáratons ne Ronhtinontí꞉ios ne Israerʼronónke.

¹⁶ Né Menahem tsi nontahatʼthahíne ne Tirzah, kwáh wahanaténtʼtho ne Tiphsah, ó꞉ni ne ienákere, tánon nakʼtónhtses kanakeraseraiéntons, tsioríhwa ne kanatowanénhke tsi iáh tehionentʼtsakétskwen ne rahonháke. Kwáh ó꞉ni washakoiataratiónhko kontikwékon ne iotiwiraienthá꞉sere.

Né Menahem Rahónha Ne Ronnontí꞉iokwe Nisraeʼró꞉nonke

¹⁷ Né áhsen-niwásen tióton siʼioserakehátie siʼhonontí꞉ioʼkwe ne Uzziah ne Judah nón꞉we, ne Menahem né꞉ne ronikénhen ne Gadi rahónha wahonontí꞉ioʼne Israerʼró꞉nonke, tanon rahónha wahatkóraste ne Samaria nón꞉we né꞉ne oiéri niʼioseráke nikaríhweskwe.

¹⁸ Waharihwánerake tsi nòkwah ne Roiá꞉ner, Asèken kwáh tsiarénheie tsi né wahá꞉sere ne karihwahetkénsera ne thontahateniénhtenste ne Ronnontí꞉iokwe Jeroboam né꞉ne ronikénhen ne Nebat, rahónha né iesakosaríhnon Nisraeʼró꞉nons ne kariwanerahaktserákon.

¹⁹ Né Tiglath Pileser, né rononti꞉iokwe ne Assyria nón꞉we, waʼshakonenhrénhten Nisraeʼró꞉nons, tánon ne Menahem tsáta-niwásen iá-iak nikakontseráke kawistaráken wahá꞉wen né nahónton nahontahó꞉ne ahosastenhseraiénthaʼne ne Menahem akwékon ne tsi kanakeraseráien.

²⁰ Né Menahem tsi wahowistaiéntaʼne thóh nón꞉we nonhtáwe né꞉ne rotikwahtsénions Nisraeʼró꞉nonke shatiʼiatátʼtsions tsi washakahónhnien wískson niwá꞉sens nikawístakes kawistaráken enthatiʼiesthánion. Sók kíʼ ne Tiglath Pileser sahaténhti tsi thóh nakeraseráien nionshá꞉re.

²¹ Orihwakwékons nètho Menahem tsi nihotieránion akwékons thóh nón꞉we nikahiatónhnions Tsi Nihonwatikáratons ne Ronhtinontí꞉ios ne Israerʼronónke.

²² Waʼrenhé꞉ie tánon wahonwaiatháta, né꞉ne roiénha Pekahiah thonsahonaktákwen tsi sahatenontí꞉ioste.

Né Pekahiah Rahónha Né Ronnontí꞉iokwe Nisraeʼró꞉nonke

²³ Né wiskniwáhsen-siʼioserakehátie siʼhonontí꞉ioʼkwe ne Uzziah ne Judah, ne Pekahiah né꞉ne ronikénhen ne Menahem né꞉ne wahonontí꞉ioʼne Nisraeʼró꞉nonke, tánon rahónha wahatkóraste ne Samaria né꞉ne teioseráke nikaríhweskwe.

²⁴ Waharihwánerake tsi nòkwah ne Roiá꞉ner, ne wahá꞉sere ne karihwahetkénsera né thontahatenienténste ne Ronnontí꞉iokwe Jeroboam né꞉ne ronikénhen ne Nebat, rahónha ne iesakosaríhnon Nisraeʼró꞉nons ne karihwanerenhaktserákon.

²⁵ Saiáta ne rasenhnowánen ne Pekahiah rahotsiokwáhkon, né꞉ne Pekah né꞉ne ronikénhen ne Remaliah, wahatenikonrónhni skát꞉ke ne wísk-niwásen niháti né Gilead nithonénon, wahonwanonhwahrihákon ne Pekahiah skátne ne Argob ò꞉ni Arieh thóh kanontiʼiotserákon atenhénrakon ne Samaria nón꞉we, tánon rahónha thonsahonakthákwen tsi sahatenontí꞉ioste.

²⁶ Orihwakwékons tsi nihotieránions ne Pekahiah thóh nón꞉we nikahiatónnions Tsi Nihonwatikáratons ne Ronhtinontí꞉ios ne Israerʼronónke.

Né Pekah Rahóna Né Ronontí꞉ioʼkwe Nisraeʼró꞉nonke

²⁷ Né wísk-niwásen tèkeni siʼioserakehátie siʼhonontí꞉ioʼkwe ne Uzziah ne Judah nón꞉we, ne Pekah né꞉ne ronikénhen ne Remaliah rahónha sahonontí꞉ioʼne Nisraeʼró꞉nonke, tánon rahónha wahatkóraste ne Samaria né꞉ne tewásen niʼioseráke nikaríhweskwe.

²⁸ Waharihwánerake tsi nòkwah ne Roiá꞉ner, ráhsereʼne ne karihwahetʼkénsera né thoʼtenientenstonhátse ne Ronnontí꞉io Jeroboam né꞉ne ronikénhen ne Nebat, rahónha ne iesakosaríhnon nʼIsraerʼró꞉nons ne karihwanerahaktserákon.

²⁹ Kwáh tsi nikaríhwes ne Pekah ronnontí꞉iokwe nètho Tiglath Pileser, né ronhnonhtí꞉io ne Assyria, wahatiénawaste ne kanatowánens ne Ijon, Abel Beth Maacah, Janoah, Kedesh, tánon ne Hazor, ó꞉ni ne raoʼtinakeráseras ne Gilead, Galilee, tánon ne Naphtali, tánon Assyria niashakoiatenháseron nonkweʼshón꞉as tsi ní꞉ioht ne ratinótons.

³⁰ Né tewasenháton siʼioserakehátie shiʼhonontí꞉ioʼkwe ne Jotham ne roʼní꞉ha ne ne Uzziah ne Judah nón꞉we, Hoshea né꞉ne ronihkénʼen ne Elah wahoteristaiénhaʼse ne Ronnontí꞉ioʼkwe Pekah, wahorónthate, tánon rahónha tonsahonáktaʼkwen tsi sahatenontí꞉ioste.

³¹ Orihwakwékons tsi nihotieránions nohiásons nikarihoténsons ne Pekah thóh nón꞉we nikaiatónhnions Tsi Nihonwatikáratons ne Ronhtinontí꞉ios ne Israerʼronónke.

Né Jotham Rahónha Né Ronnontí꞉ioʼkwe Ne Judah Nón꞉we

³² Né tekeníhaton siʼioseratátieʼne shiʼhonontí꞉ioʼkwe ne Pekah ne nènʼneʼe ronikénhen ne Remaliah tsi ronnontí꞉ioʼkwe ne Israerʼró꞉nonke, ne Jotham né꞉ne ronikénhen ne Uzziah rahónha wahonontí꞉ioʼne ne Judah nón꞉we.

³³ Tewáhsenh-wísk satehahoserihiákon, tánon rahónha wahatkóraste ne Jerusalem né꞉ne iá-iak iawénre niʼioserákeʼkwe. Né ronistenkénʼen né꞉ne Jerusha, né sakoienhkénʼen ne Zadok.

³⁴ Né tethotenietenstonhátieʼne ne roʼníha Uzziah, ne Jotham né꞉ne rohiothátieʼne tsi nahó꞉ten ranónweskwe ne Roiá꞉ner.

³⁵ Ók kíʼ ne ionkweʼtákʼsens tsi nonwé꞉sons ronterenhnaienthákwahkwe iáh ne tekarihwathónton, tánon nonkweʼshón꞉as iahontasónteren tsi konwanateskóntʼthakwe ne kontitshénens tánon rontsienkwahronhniáthakwe ne nón꞉we. Kwáh Jotham néʼe rotenhenrakáronhte nothoréʼke nòkwah Nononsatokentiʼkówaʼne.

³⁶ Orihwaʼkwékons tsi nihotieránions ne Jotham thóh nón꞉we nikahiatónʼnions Tsi Nihonwatikáratons ne Ronhtinontí꞉ios ne Judah Nónhwe.

³⁷ Tsi kíʼ nikaríhweskwe Ronnontí꞉ioʼkwe ne Roiá꞉ner tonhtsérenhte iahoténiete ne Ronnontí꞉io Rezin ne Syrianʼhne tánon ne Ronnontiio Pekah Nisraeʼró꞉nonke iahatsatónhti ne Judah.

³⁸ Né Jotham warénheie tánon wahonwaiatháta tsi ronwatiʼiathatahástha ne rontinontí꞉ios né꞉ne Táwit raonátakon, tánon né꞉ne roiénha Ahaz tonsahonakthákwen tsi sahatenontí꞉ioste.