2 Kings 14 - Ohiatonhseratokénti

Né Amaziah Né Ronnontí꞉io Ne Judah Nón꞉we

¹ Né tekeníhaton siʼioseratátse siʼhonontí꞉ioʼkwe ne Jehoash né roʼníha né꞉ne Jehoahaz né꞉ne ronnontí꞉iokwe Nisraeʼró꞉nonke, né Amaziah né꞉ne ronikénhen ne Joash rahón꞉ha wahonontí꞉ioʼne ne Judah

² né꞉ne tewásen-wísk satehaoʼseriʼiákon, tánon rahón꞉ha wahatkóraste ne Jerusalem né꞉ne tewasén-tioton niioseraké꞉kwe. Né ronistenkenʼen né꞉ne Jehoaddin Jerusalem nón꞉we nikanákerekwe.

³ Né Amaziah akwé꞉kon thóh nahá꞉iere tsi nahó꞉ten nahontahonikonhraiérihte ne Roiá꞉ner, iáh né thóh teronkweʼthó꞉tenhne tsi né niʼiohʼtónhne ne roʼsotʼkénen Ronnontí꞉ioʼkwe Táwit; khèkhok nenʼné꞉ʼe, thóh nahá꞉iere tsi nihaiérahkwe ne ronikénhen Joash.

⁴ Iáh tehorihshón꞉kwen tsi nón꞉we nihonterennaienthákwahkwe ne iónkweʼtahét꞉kens, tánon nonkweʼshón꞉as iahontasónhteren tsi thaʼtiiésthaʼkwe nakonwanateskónten ne katʼtshénens tánon nahontsienkwahrónhniaʼte né nón꞉we.

⁵ Kwáh tsi niʼiostó꞉re ne Amaziah wahorihwaníra tsi roshaststenseráien, washakononwariakónhnions ne ronaterihóntons tsi nihá꞉ti ne roʼníha ronhwanonwariákon, né꞉ne ronnontí꞉iokwe.

⁶ Ók kíʼ, iáh né tesahkononwariakónhnion ne ronwatiʼiohokónhas ók né kíʼ wahá꞉sere tsi nahoténsons ne Roiá꞉ner rotsathátons ne Mahís raoianerenserákons: “Né iatatʼròna iáh teiówenk nahonwatinonwariákon tsi nahó꞉ten ne shakotiʼiohokónhas shonaterihwatewá꞉tons, tánon ne ratiksahokónhas iáh tehiówenk nahonwatinonwariákon tsi nahó꞉ten ne ronwatiʼiohokónhas shonaterihwateʼwá꞉tons; nonkweʼshón꞉as nek né iaʼtehatiʼiáti enhonwatinonwariákon tsi nahó꞉ten né rononhákʼkhok shonaterihwateʼwá꞉ton.”

⁷ Né Amaziah oiéri tewenhniawehetsherásen nihá꞉ti ne Edomite ahonkweʼtashón꞉as ne ronhterí꞉ios washakononwariakónhnion thóh ne Tehioʼiótsis Ahonrákwahkon tánon wahatié꞉nawatste ne Sela tánon né sahanátonhkwe ne Joktheel, tánon shé꞉kon né konwanatónhkwah.

⁸ Ethó꞉ne né Amaziah iashakoténiete ne ratirihwakarénies tsiʼthénʼteron ne Ronnontí꞉io Jehoash Nisraeʼró꞉nonke, ronenróhtanis nahiatarí꞉io.

⁹ Ók kíʼ ne Ronnontí꞉io Jehoash ionsahaterihwánieʼte: “Énska nènhneʼe oniónwara ó꞉kwire né tsi ionón꞉te ne Lebanon iahoterihwaniéthase nonenhthakwénhte: ‘Sehiátʼkaf ne sehiénha nahotiniake ne riʼiénha.’ Kário etʼhontó꞉hetsʼte tánon watewaskwáhsehron nó꞉kwire.

¹⁰ Ó꞉nen Amaziah, sehsén꞉nion ne Edomites, tánon kwáh tsataná꞉non ne kanaiésera. Serientí꞉iosek tsi nitsenhnowánen tánon sanónskon tsi teróntak. Nontiéren tsi astsirón꞉ni nek khók nen né꞉e entkáhaʼwe ne kakaronhniátsera né shonháke tánon ne shonkwetashón꞉ás?”

¹¹ Ók né Amaziah iáh tehothontáton nahothahonsathátonhke, sók kíʼ ne Ronnontí꞉io Jehoash iahanenhrínekenʼkwe ne rahonkweʼtaʼshón꞉as tánon wahonterí꞉io ne rahónha né꞉ne Beth Shemesh né꞉ne Judah nón꞉we.

¹² Né Amaziah rahonkweʼtashón꞉as ronterí꞉ios wahonwatisénhni, tánon ratikwékon ne rahonkweʼtashón꞉as ronterí꞉ios shahontèko tsi thotiʼnonshóʼtons nionsahónhne.

¹³ Né Jehoash iahoiaténhawe ne Amaziah tánon wahonóʼton, Jerusalem nòkwahti nionsahónhne, tánon wahatirishiónko ne watenhénraien ne tekanathanákʼtons ne kanatowanénke Ephraim tsiotenhenrakáronte tahonthásawen tsi nióre ne tsi Tsiotenhenrakáronte ne tsiʼTekaiósaien, né꞉ne kákʼnonh né tekenitewenhniáwe niwathatseráke níhions.

¹⁴ Akwékon iaháhaʼwe ne kawistaráʼkens ó꞉ni nowistanórons ne ónton wahatʼtsénri, akwékons Nononsatokentiʼkówaʼne tsi niwatstashónhas tánon akwékons ne kanontiʼiotserákons kaiéntons ne kanorónhsons, tánon Samaria nionsahá꞉haʼwe. Tánon kíʼ ó꞉ni iashakoiatenháseron ne washakoiéna.

¹⁵ Oriwakwékons nohiásons niiorihoténsons nètho Jehoash tsi nihotseránions, thóh í꞉kare tsi nihotenikonratʼtsanítonʼne saiaterí꞉io ne Ronnontí꞉iokwe Amaziah ne Judah nón꞉we, thóh nón꞉we nikaiatónnions Tsi Nihonwatikáratons ne Ronhtinontí꞉ios ne Israerʼronónke.

¹⁶ Né Jehoash warénheʼie tánon thóh nón꞉we iehonwahiathá꞉ten tsi ronwatiʼiathatahástha ne kanontiʼiótseras né Samaria nón꞉we, tánon né꞉ne roiénha Jeroboam II tonsahonakʼthákwen tsi sahatenontí꞉ioste.

Sarénheʼie Ne Ronnontí꞉iokwe Amaziah Né Judahró꞉non

¹⁷ Né Ronnontí꞉iokwe Amaziah né Judahró꞉non wísk-iawénhre niʼioseráke nikaríhwes srónnhekwe nó꞉nen sihawenhé꞉ion ne Ronnontí꞉iokwe Jehoash né Nisraeʼró꞉non.

¹⁸ Orihwakwékons nohiásons nikarihoténsons tsi nihotseránion ne Amaziah thóh nón꞉we nikaiatónhnions Tsi Nihonwatikáratons ne Ronhtinontí꞉ios ne Judah Nónhwe.

¹⁹ Waʼteristaʼienthá꞉kwen ne Jerusalem nahonwarónthate ne Amaziah, sók kíʼ wahaʼthèko tsitkanatowáʼnen ne Lachish niá꞉hare, ók kíʼ ne ronwáʼsons wahonwáʼsehre tánon thóh nón꞉we iahonwanonwaʼriákon.

²⁰ Né rahoierónta Jerusalem nionsahatíhaʼwe kosá꞉tens kaiatháke kará꞉tse tánon tsi ronwatiʼiathatahástha ne rontinontí꞉ios nón꞉we nahonwahiatháta né꞉ne Táwit raoʼnátakon.

²¹ Tánon onkweʼtakwékon ne Judah ethó꞉ne ó꞉nen ne sahonwanontí꞉ioste ne iá-iak iawénre tehahoserihiákon roienhkénʼen né꞉ne Uzziah.

²² Sarénheʼie ne roʼníha ne Uzziah sahatenatasheʼrónhni ne Elath tánon né sahakwahthákwahse ne Judah.

Né Jeroboam II Né꞉ne Ronnontí꞉iokwe Ne Israerʼró꞉nonke

²³ Né wísk-niwásen siʼioserakehátse sioʼnontí꞉iokwe ne Amaziah né꞉ne ronikénhen ne Joash tsi né꞉ne ronnontí꞉iokwe ne Judah, né Jeroboam né꞉ne ronikénhen ne Jehoash né sahonontí꞉ione Nisraeʼró꞉nonke, tánon rahónha wahatkóraste ne Samaria né꞉ne kaiéri-niwásen-énska niʼioseráke nikaríweskwe.

²⁴ Wahariwánerake tsi nòkwah ne Roiá꞉ner, né wahá꞉sere né kariwahetkénsera tsi thontahateniéntenste né thonʼnontí꞉iokwe Jeroboam né꞉ne ronikénhen ne Nebat, rahónha né iesakosarínon Nisraeʼró꞉nons ne karihwanerenhaktserákon.

²⁵ Akwékon niashakosénhni tsi nikanakerasehráien ne Israerró꞉nonhke ahó꞉wenk, Hamath Pass thontásawen né nothoréke nòkwahti tsi nióre ne entiéne nòkwahti ne Dead Sea. Thóh kíʼ ní꞉ioht ne Roiá꞉ner, ne Sakoní꞉io Nisraeʼró꞉nonke, tsi rorarátston rahonháke ne rahonkwetaʼkénʼen ne rotokenséhaʼkwe Jonah né꞉ne ronikénhen ne Amittai né Gath Hepher nón꞉we nihanákerekwe.

²⁶ Né Roiá꞉ner wahatkáto tsi nateiotenonhianíton tsi nihotironhiáken Nisraeʼró꞉nons; kwáh kíʼ iáh ónhka tewatetʼtsénhrieskwe nahonwatiʼiénawaʼse.

²⁷ Ók iáh kíʼ Roiá꞉ner thóh tehonikonró꞉thenhne nahonwaná꞉thonte Nisraeʼró꞉nons né kwáh iahonwatíshaʼhate tsi nénhwe, sók kíʼ rahonháke ne Ronnontí꞉io Jeroboam II nón꞉we nonsaʼshakoniákente.

²⁸ Orihwakwékons nohiásons nahorihoténsons ne Jeroboam II tsi nihotieráhnion, tsi nihonikonratʼtsáni tsi nihoteriʼióʼon, tánon tsi ní꞉ioht tsi shokwahtákwen ne Damascus ó꞉ni ne Hamath Nisraeʼró꞉non ahorihwáke, akwékon thóh nón꞉we nikahiatónhnions Tsi Nihonwatikáratons ne Ronhtinontí꞉ios ne Israerʼronónke

²⁹ Né Jeroboam waʼrénheʼie tánon thóh nón꞉we nihonwaiatháten tsi ronwatiʼiathatahástha ne kanontiʼiótseras, tánon né꞉ne roiénha Zechariah thonsahonatʼthákwen tsi sahatenontí꞉ioste.