2 Kings 13 - Ohiatonhseratokénti

Ne Ronnontí꞉io Jehoahaz Nisraeʼró꞉nonke Nón꞉we

¹ Né tewáʼsenhaton siʼioserakehátie siʼhonontí꞉ioʼkwe ne Joash né꞉ne roʼníha ne Ahaziah tsi ronontí꞉ioʼne ne Judah nón꞉we, ne Jehoahaz né꞉ne roʼníha ne Jehu rahónha wahonontí꞉ioʼne Israerʼró꞉nonke, tánon rahónha wahatkóraste ne Samaria né꞉ne tsáta-iawénhre niʼioserákeskwe.

² Tsi kíʼ niʼiohtʼtónhne ne Ronnontí꞉iokwe Jeroboam nohénton tkènʼne tsi ní꞉ioht ne rahónha, waharihwánerake tsi nòkwah ne Roiá꞉ner tánon iashakosárihne Nisraeʼró꞉nons ne karihwanerahaktserákon; iáh kíʼ nonwénhton tehotsakwahríhsons tsi nihaweienʼnák꞉senhne.

³ Káti ne Roiá꞉ner waʼsakonákwahse Israerʼró꞉nons, tánon waʼhoríhon ne Ronnontí꞉io Hazael ne Syriaró꞉non tánon ne roʼiénha Benhadad né kwáh tiókonte tsi ashakosénhniensehke Israerʼró꞉nons.

⁴ Ethòne ne Jehoahaz iahaterénhnaien rahonháke ne Roiá꞉ner, tánon ne Roiá꞉ner, rokʼkhatonhátie tsi nihaniakátste ne ronnontí꞉io Syriaró꞉non tsi nisakoronhiakénton Nisraeʼró꞉nons, wathorihwaserákwahse ne raʼoterénhnaient.

⁵ Né Roiá꞉ner tashakoteniéthase nashakohéntenhse Nisraeʼró꞉nons, rahónha shasakoiathotaríhsi tsi nòkwah ne Syriaró꞉nons, tánon ká꞉ti Nisraeʼró꞉nons kwáh kíʼ skénhnonk tsi sonhnón꞉nhekwe, kwáh kíʼ tsi nitiotónhne ne tiotserénhton.

⁶ Ók iáh kíʼ teonatsakwahríhshion ne karihwanerahák꞉tsheras tsi ní꞉ioht ne Ronnontí꞉iokwe Jeroboam tsi nieshakosarínon Nisraeʼró꞉nons, ók iahatikóntaʼkwe; thó nihatiʼiérahkwe; tánon ne kaiatón꞉ni ne Asherah thóh kíʼ kaiénthakwe ne Samaria.

⁷ Né Jehoahaz iáh kíʼ othènen tesahonkwetaʼiénthakwe ne ronterí꞉ioskwe nek khók ne wísk-niwásen niháti ne rotisátens ronterí꞉ios iateshonathaténhron, oiéri nikaserétakes otsónkwahs, tánon oiéri tewenhniawehetsherásen niháti ne také꞉sons nienhónhne tsi ní꞉ioht tsi ronhterí꞉ioskwe, tsoríhwa ne Syriaró꞉non ronontí꞉iokwe tsi ratikwékon sakotónhton ne ronátiakes, tánon tesakoskwáhseron tsi ní꞉ioht nokénhra.

⁸ Orihwakwéʼkons nohiásons tsi nihotieránions ne Jehoahaz ó꞉ni akwékon tsi nihotenikonratʼtsaníton thóh nón꞉we nikaiatónhnions Tsi Nihonwatikáratons ne Ronhtinontí꞉ios ne Israerʼronónke.

⁹ Warénheie tánon Samaria nón꞉we nihonwaiatháten, tánon né kíʼ ne roʼiénha Jehoash tonhsahonakʼthákwen tsi sahatenontí꞉ioste.

Né Ronnontí꞉io Jehoash Né Nisraeʼró꞉nonke Nón꞉we

¹⁰ Né ásenh-niwásen tsáta shiʼioserakehátie shiʼhonontí꞉ioʼkwe ne Joash né Judah nón꞉we, né Jehoash né꞉ne ronikén꞉en ne Jehoahaz né sahatenontí꞉ioste ne Israerʼró꞉nonke, tánon rahónha rakó꞉rah kènʼne ne Samaria né꞉ne iá-iak iawénhre niʼioseráke nikaríhweskwe.

¹¹ Rahónha ó꞉ni waharihwánerake tsi nòkwah ne Roiá꞉ner tánon né wahá꞉sere né karihwahetkénseraras tsi tonhtahateniéntenste ne Ronnontí꞉iokwe Jeroboam rahoweiénhna, tsi rahónha iesakosahríhnon Nisraeʼró꞉nons ne karihwanerenhaktsherákon.

¹² Orihwakwékons nohiásons nètho tsi nihotieráhnions ne Jehoash, thóh í꞉kare tsi nihonikonhratʼtsanítonhne tsi wahiaterí꞉io ne Ronnontí꞉iokwe Amaziah né Judah nón꞉we, thóh nón꞉we nikahiatónhnions Tsi Nihonwatikáratons ne Ronhtinontí꞉ios ne Israerʼronónke

¹³ Né Jehoash warénheie tánon thóh nón꞉we nihonwahiatháten ne kanontiʼió꞉tshera tsi ronwatiʼhiathatahástha né Samaria nón꞉we, tánon né꞉ne roiénha Jeroboam II tonsahonaktákwen tsi sahatenontí꞉ioste.

Né Sarénheie Ne Elisha

¹⁴ Né rotokenséhaʼkwe Elisha wahononwákten né꞉ne iáh tetieiewénhtas, tánon shiʼrenhéionsʼkwe, ne Ronnontí꞉io Jehoash Nisraeʼró꞉nonke wahonatenrénhsera. “Rá꞉keni, Rá꞉keni!” ratónnions tsi naʼtehasénthos. “Kwáh í꞉ken tsi teshé꞉neskwe Nisraeʼró꞉nons!”

¹⁵ “Iahásko ahénhna tánon kaiénkwires,” ne Elisha wahó꞉nhane. Né Jehoash iahokwahséki,

¹⁶ tánon ne Elisha wahathateweienénhtaʼne naharónhthaʼte. Né nòn꞉ne sáʼka ne ronnontí꞉io, tánon ne Elisha ronnontí꞉io ratshaná꞉ke iathatsanáren.

¹⁷ Ethó꞉ne, thóh naháieʼre tsi nahó꞉nane ne rotó꞉kenʼse, ne ronnontí꞉io wahanenstonkwahnontónhko tsi nòkwah ne Syriahne kanenhstonhkwahthákwen. “Iasharóntak ne kaiénkwire!” Elisha wahathénhnane. Kwáh kíʼ tsi niiostó꞉re ne ronnontí꞉io iaharónthate ne kaiénkwire, ne rotó꞉kense wahénron, “Í꞉se ne Roiá꞉ner raʼoiénkwire í꞉ken, né enhiakokwéni ne Syriaró꞉nons. Í꞉se ensewaterí꞉io ne Syriaró꞉nons né Aphek nón꞉we kwáh tsi nióre iensehsénhni.”

¹⁸ Ethó꞉ne ne Elisha wahoróri ne ronnontí꞉io iehá꞉haf ne ó꞉tiakes kaiénkwires tánon ohontsàke ranonwárek. Né ronnontí꞉io ohontsàke kíʼ wahanonwáreke áhsen niahónteraste, tánon ethóhʼne wahák꞉kawe.

¹⁹ Né kí꞉ken waʼkarihón꞉ni kwáh í꞉ken tsi waʼhonákwen ne Elisha, tánon waʼhawénhase ne ronnontí꞉io, “Aowenhkénʼen wísk khés ne iá-iak niaʼioteráston aʼisaiénton nonwentsàke, tánon ethó꞉ne kíʼ kwáh tohkénʼen tsi aʼisatkwénionhke tsi nòkwah ne Syriaró꞉nons; ók ó꞉nen áhsen khók nienwáʼterasthe tsi ensesénhni.”

²⁰ Né Elisha waʼrénheʼie tánon waʼhonwaiatháta. Kwáh niaʼteioseráke ne raoʼtitsókwahs ne Moabites tsi shakotinenhrénhthakwe ne Israerʼró꞉nons.

²¹ Énska kíʼ nenʼné꞉e tsi nikaríwes ronwaʼiathátahasʼkwe ne rón꞉kwe, ónhkak waʼhonwatí꞉ken nètho kentsókwah, tánon nonkweʼshón꞉ʼas Elisha rahotsatonkwáhkon iahonáti noierónhta tánon waʼhontèko. Kwáh kíʼ tsi niʼiostó꞉re nètho oierónhta iatsiátseste ne Elisha raostienhsónhas, né rónʼkwe sahatónnhete tánon tonhsahá꞉taʼne.

Onteriʼioseraiéntaʼne Tsi Natehón꞉tere Ne Israerʼró꞉nons Tánon Ne Syriaró꞉nons

²² Né Ronnontí꞉io Hazael ne Syriaʼne waʼshakoronhiákente Israerʼró꞉nons tsi nikaríhwes ne Jehoahaz ronnontí꞉iokwe,

²³ ók kíʼ ne Roiá꞉ner kwáh í꞉ken tsi thorihwaʼiérikwe tánon shakoténhrakwe. Iáh tesahkorihwáʼwi nahonwanáthonte, ók kíʼ washakorihwáʼwase tsioríhwa tsi ronaʼtsanerenhserónhni ne Abraham, Isaac, tánon ne Jacob. Kwáh kíʼ iáh nonwénton teshakoiatanikonrénhʼen ne rahonkweʼtashón꞉as.

²⁴ Né sarénheʼie ne Ronnontí꞉iokwe Hazael ne Syriaʼne né꞉ne roiénha Benhadad sahonontí꞉ioʼne.

²⁵ Ethó꞉ne né Ronnontí꞉io Jehoash Nisraeʼró꞉nonke waʼhosénh꞉ni ne Benhadad né náhsen niahón꞉teraste tánon sahaiéna ne kanatowánen né꞉ne Benhadad roienáhonhne tsi nikaríhwes ronontí꞉iokwe ne Jehoahaz, né roienkénʼen ne Jehoash.