2 Kings 12 - Ohiatonhseratokénti

Né Ronnontí꞉io Joash Né Judah Nón꞉we

¹ Né tsatákhaton niʼioserakehátie shiʼonontí꞉iokwe ne Jehu Nisraeʼró꞉nonke, ne Joash rahónha wahonontí꞉ione ne Judah nón꞉we, tánon rahónha wahatkóraste ne Jerusalem né꞉ne kaiéri-niwásen niioseraké꞉kwe. Né ronisténha né꞉ne Zibiah né꞉ne tsit kanatowanénke ne Beersheba nón꞉we nitsawénon.

² Tsi nirón꞉nheskwe né ronontí꞉iokwe ne roiothénskwe nahontahonikonhraiérihte ne Roiá꞉ner, tsioríhwa ne Jehoiada né꞉ne ratsihénstatsi rorihonhniénhni.

³ Ethosàne, tsi nón꞉we nonówenhs í꞉ken tsi ionterenhnaientákwahs iáh nenhnéʼe tekarihwatónhtons, tánon nonkweʼshón꞉ʼas iahontasónhteren tsi iehatítats ne karihwiiosehokónhas tánon ronhtsenkwaronniátha né nonnónwe.

⁴ Né Joash iashakonónkʼkons ne ratitsihénstatsis tánon wasakónaʼne nahontʼwistateweiénton tsi niʼieká꞉rhiaskwe tsi natekenínerenkwe ne karihwiʼiosehokónhaskwe nononsatokentiʼkówane, tetsáron tsi nihiokaraiénthakwe tsi niwatkárhiaskwe ne karihwiʼiosehokónhaskwe tánon nowístas né tsakokʼkawánionkwe tsi kwáh thóh niʼiakonikonhróhtenhne.

⁵ Saʼtiʼiatátʼtsons ne ratitsihénstatsis ronaterihwaiénhni nahontenhnikonráren nowísta né tséhaskwe tsi niʼiákon ne sakoiotenhséhakwe, tánon nowísta né ahónstonhke nahonshakakwahthákwenhke nononsatokentiʼkó꞉wa, tsi naʼtenhwatonhóntsoʼwe.

⁶ Ók kíʼ ne tewasénhasenhaton siʼioserathátse ne Joash shiʼonontí꞉iokwe ne ratsihénstatsi shé꞉kon iáh thahóten teshó꞉sehronhni nó꞉nonsatokentikowane.

⁷ Káti iahó꞉nonke ne Jehoiada tánon nó꞉ia ratitsihénsthatsis tánon washakorihwanóntonhse, “Onh niʼiohtʼtséren tsi iáh thetsisewanonshaserónhnis nononsatokentiʼkówa? Kén ienwatásawen iáh ó꞉nen í꞉se tahonsehsewatenhnikonhráren nowísta né sewaiénas; ó꞉nenk tsi entsóhenste, né ká꞉ti nahónton nahonshakakwahthákwenhke.”

⁸ Né ratitsihénstatsis wahatirihwanónhwene kí꞉ken tánon kíʼ ó꞉ni wahatirihwanónweʼne tsi iáh tahonsahatinonshasehrónhni Nononsatokentiʼkówa.

⁹ Ethòne ne Jehoiada iathanerókwahkwe, wahakarónhten nahoʼtenonték꞉ta, tánon ákta ne tsi ientsenharákwahke wahanerókwahien, né꞉ne skaweienthetákwen nòkwahti né tsi nitiontawehiátha nononsatokentiʼkówane. Né ratitsihénstatsis ne ronwatiríhonte tsi nitsonthaweiátha onerókwahkon akwékon eniaké꞉tha nowísta tsi nenhtióntkaʼwe ne ionterénhnaienhnes.

¹⁰ Né nó꞉nen sóh꞉tsi wé꞉so enwatwistháta nonerókwahkon, né kanontiʼiótsera rahiatónhni tánon ne ratihenstowánen éntʼne, enhniwistaná꞉wenhte ne kawistaráken, tánon enhnikontseriháren; eniásehte nowísta, tánon kaiará꞉kon enhnètha enhninokwahnerénhkon.

¹¹ Né tsi ó꞉nen sahatiʼiatónhnion né kwáh tkaiéri tsi níkon í꞉ken, nowistanó꞉ron né entʼthónhnion ne roióhtens né roteríhonte ne kaioténhsehras Nononsatokentiʼkówane, tánon né kíʼ enwátsʼtonke nahonwatiká꞉riakse ne ratiswenhkaraké꞉tas, né ratinonsónhnis,

¹² né tehatitstenhrót꞉tas, tánon ne ratinenhiakwétarons, enhatiswenhkaraʼní꞉non ó꞉ni nonénias nahónstonhke tsi enshatikwahtakwaniónko, tánon nahatikáriake nohiásons nahoténsons ne tehiotonhontsóʼon nakakariáktonke.

¹³ Iáh thahótens nowístas, tsi iáh, né꞉ne tewáston tsi akakariákons tsi nikasahaʼnions ne tehiotʼnekonthákwas kátshes ne kawistarákens nahó꞉ten ionhniáton, ó꞉ni nakerasónhas, iehonrawátsʼtas, khés ne tsi niʼionsthasónhas né꞉ne ionsthá꞉kwáh tsi ratihaserónhnis, khés ó꞉ni nohiásons nahoténsons ne kawistarákens khés ne owistanó꞉rons akénhake.

¹⁴ Akwé꞉kons né wátston nowístas nahonwatikárhiase ne rotiʼiótens ó꞉ni nakaninónton noswénhkares né꞉ne ahónstonhke tsi ahonshakasheʼrónhnike.

¹⁵ Né ronhnónkwes né ronateríhonte ne kahioténseras kwáh í꞉ken tsi ioterihwatóken í꞉ken, ká꞉ti iáh tatehiothoʼhontsóhonhne nahonwatirihwanóntonhse naiotenikonraiéntʼtate nowístas.

¹⁶ Nowístas ne tewatʼkáʼwens nahonsakaʼkariátonke tsi nòkwah ne tkaiesthánions ó꞉ni ne karihwánerens aorihwá꞉kes iáh né kaʼnerókwahkon tseiakosénhton; ratitsihénstatsis né rahonawenhkhónʼwe í꞉ken.

¹⁷ Eh shiʼkaʼháwi ne Ronnontí꞉iokwe Hazael né Syriahne nón꞉we iahatsatónhti ne kanatowanénhke ne Gath tánon wahasénhni; ethòne ó꞉nen iathorihwaiéntase niahatsatónhti ne Jerusalem.

¹⁸ Né Ronnontí꞉iokwe Joash né Judah nón꞉we akwéʼkon iahaʼá꞉we ne thotiʼiesthánionkwe ne teshesakonatʼthakwénhni né꞉ne Jehoshaphat, Jehoram, tánon ne Ahaziah né꞉ne Roiá꞉ner ronwawenhniʼióstonʼne, thóh wahá꞉ren ne rahónha tsi nahoténsons ahonthahoiéstonhke akwéʼkon nowistanórons né tsi iewistaienthákwas nononsatokentiʼkówaʼne kaiénthakwe ó꞉ni ne kanontiʼiotserákon, tánon akwéʼkon iahaténieʼte nahá꞉wen ne Ronnontí꞉io Hazael, ethòne ne Hazael éhren né shaʼsakoiatenháwite ne rahonkweʼtasónhas ronterí꞉ios ne Jerusalem nón꞉we.

¹⁹ Oʼrihwakwéʼkons né Ronnontí꞉iokwe Joash tsi nahotiérenhke akwéʼkon thóh nón꞉we nikaiatónhnion Tsi Nihonwatikáratons ne Ronhtinontí꞉ios ne Judah Nónhwe.

^20-21 Né Ronnontí꞉iokwe Joash rahonkweʼtashón꞉as wahonwateristhaiénhase, tánon teniiáse, né꞉ne Jozacar né꞉ne ronikénhen ne Shimeath tánon ne Jehozabad né꞉ne ronikénhen ne Shomer, wahonwanonwarhiákon né tsitkanonshó꞉thakwe ne tsi iohontsáien ne nàkon nòkwah ne Jerusalem, né꞉ne tsi wahohathátse tsi nieʼiawénon ne Silla. Né Joash kanontiʼiotserákon tsi ronwatiʼiathatahásta nón꞉we nihonwahiatháten né꞉ne Táwit raʼonátakon, tánon né꞉ne roiénha Amaziah tonsahonakʼthákwen tsi sahatenontí꞉iosʼte.