2 Kings 11 - Ohiatonhseratokénti

Né Athaliah Né꞉ne Ionhnontí꞉iokwe Ne Judah Nón꞉we

¹ Kwáh tsi niʼiostóre ne Ronnontí꞉io Ahaziah ronisténha Athaliah waʼkarihwáronhke né roʼiénha tsi ronwaséhton, onhtènhnane kwáh ratikwé꞉kon ne rontinontí꞉ios rahotiwátsires tsi ahonwatinonwariakónhnion.

² Né khók ne Ahaziah roiénha Joash wahaniákenʼne. Kwáh ó꞉nen thó꞉wa saonwanonwaʼriákon skát꞉ke ne ronátsakes, ók raʼomátenn Jehosheba né sahoniá꞉kente, naʼónha né nènhʼne ne Ronnontí꞉iokwe Jehoram sakoienkénʼen tánon né꞉ne Ahaziah asén꞉non iaʼtenosenhkénʼen kènʼne. Iahohiaténhawe tánon tsi tionákthaien Nononsatokentiʼkówaʼne iahohiatínionte skát꞉ke nahonatiéra ne tewátsʼnie né watósnieʼne tsi wahoiatásehte né꞉ne tó꞉sa ahohiatatʼtsénhri ne Athaliah, et nonhtáʼwe tsi iáh teonwanonwariá꞉kon.

³ Né꞉ne iá-iak niʼioseráke ne Jehosheba wáʼthós꞉niehne ne raksáʼa tánon roiataʼsehtonháties Nononsatokentiʼkó꞉waʼne, tsi nikaríhwes ne Athaliah ontʼkó꞉raste tsi ionhnontí꞉iokwe.

⁴ Ók kíʼ ne tsatakhá꞉ton shiʼioserakehátie né Jehoiada né꞉ne ratsihénstatsi í꞉ken iashakoterihwaniéthase ne raʼtisenhnowánens ne ronateríhonte ne tsi kaʼnontiʼiotseráien ratinikónraʼre ó꞉ni ne ratinikónrare tsi ronónshoʼte ne ronnontí꞉io, tánon shakoróhris Ononsatokentikó꞉wane nahontaʼónhne, thóh nón꞉we nasahkahónhnien nahatirihwanónhweʼne kwáh ahaʼtirihwanírate tsi niʼotenikonrón꞉ni tsi nahoténsons tsi nenhaieránion. Tánon waʼshakoríhon nahonwáʼken ne Ahaziah roʼiénha Joash

⁵ tánon kén ní꞉ioht tsi wasahkorihontónhnion: “Nó꞉nen entí꞉sewe naʼisewaióten nawenhthatokentíke, saiáta nasénhaton niéraʼte ne tsi ní꞉tion né enhontenhnikonhrá꞉ren tsi kanón꞉shoʼte ne kanontiʼiotserákon;

⁶ tánon nó꞉ia nasénhaton niesrá꞉te thóh né nón꞉we natenhatítaʼne nahontenhnikonrá꞉ren ne tsi iotenhenrakáronhte ne Sur, tánon nó꞉ia nasénhaton niesará꞉te thóh nònhne nón꞉we natenhatítaʼne tsi iotenhenrakáronhte ratíshonhne ne ronátsakes ne ratinikónhrare.

⁷ Né thekentsiókwahkes nó꞉nen enhonhnenniseraiérihte Nawenhthatokentíke thóh nón꞉we natenshatítaʼne nahontenhnikonhrá꞉ren Nononsatokentiʼkó꞉wa né nahonthahónwaʼne ne ronnontí꞉io.

⁸ Né natsisewatenhnikonhráren ne Ronnontí꞉io Joash sewahá꞉wak ne sewasarekóʼwáhs tánon skát꞉ke sewéh꞉sek kwáh tsík nonwéʼsons nienhénre. Ónhka ne sewaiatátʼta niahónhne tsi sewanonwariákon.”

⁹ Ne ratisenhnowánens waʼonwawénhnarakwe ne Jehoiada tsi nahaténhnaʼne tánon tahonwatiʼiaténhawe ne rahononkweʼtasónhas ne rahohénton—né ó꞉ni tsi nihá꞉ti nenhonʼnenhniseraiérihte Nawentatokentíke tánon tsi nihá꞉ti nón꞉wak khók enthontásawen nahotiʼióten.

¹⁰ Thaʼsakoʼwíhon ne ratisenhnowánens nashí꞉kwahras ó꞉ni ne tekaniaʼtástha né꞉ne Ronnontí꞉iokwe Táwit rahowenhkenén né꞉ne Ononsatokentiʼkówaʼne nón꞉we niwateweʼiéntonhkwe,

¹¹ tánon thóh nón꞉we nasakóʼteron ne ronhnonkwé꞉s ratihawáʼnions ne rahonasarekówas tehotinonsathaséhton nohénton Ononsatokentikóʼwa, né nahontahonwá꞉ne ne ronnontí꞉io.

¹² Ethóhʼne ó꞉nen ne Jehoiada saʼohén꞉tense ionsaʼhaiákenʼne, tánon wahononhwaʼró꞉rohke, tánon tahá꞉wen ne kaianerénseras tsi nihotiʼianerenseró꞉tens ne rontinontí꞉ios. Ethóh꞉ne kíʼ ó꞉nen wahonwenʼiená꞉ro ne Joash tánon wahatirihóʼwanate tsi wahonontí꞉ioʼne. Nonkweʼshónʼas wationshá꞉roʼke tánon waʼtsakohénrete, “Ká꞉riwes rónnhek ne ronnontí꞉io!”

¹³ Ne Ionontí꞉io Athaliah wahotónteʼne tsi niʼiotsaró꞉kwen né꞉ne ratinón꞉ne thóh nihatiʼiéra ó꞉ni nonkweʼshón꞉ás, ká꞉ti Ononsatokentiʼkó꞉waʼne iatewatskénhni, thóh nón꞉we nonkweʼshón꞉ʼas niʼiakotsataróhronne.

¹⁴ Thóh nón꞉we nahó꞉ken nonontiʼiotseráse kanawahatátʼtha í꞉rate né tsi ieiontaweiathá꞉kwa Nononsatokentiʼkówane, tsi thóh nikaianerenseró꞉tenhne. Né tehonwaʼtsathá꞉tonhkwe ne ratisenhnowánens tánon ne ratihonráwats, tánon nonkweʼshón꞉as teiakohenréta tsi niʼiakotsenhnónhni tánon iakohonrawáton. Né Athaliah wáʼkarátion nahotserón꞉niat né tsi nontakanikónrenhne tánon watsohénrete, “Kanikonráton! Kanikonráʼton!”

¹⁵ Né Jehoiada iáh né teréraʼkwe ne Athaliah Ononsatokentiʼkówaʼne ahotenáthake nón꞉we nakonwanonwariákhon, sók kíʼ washakónane ne ronterí꞉ios ratisenhnowánens: “Niaʼkonwaʼiatínekenwe tsi natehónteres tsi ronʼné꞉ton ne ratinikónrare, tánon nasakotinonwariákon nón꞉ka aioteniénthen nakowaniá꞉kente.”

¹⁶ Wakonwaiéna ká꞉ti, tánon tsitʼkanónshoʼte ne kanontiʼiotserákon niakonwaʼiaténhawe, tánon thóh nón꞉we tsi iotenhenraká꞉ronte ne koshá꞉tens konwanatónkwa nakonwanonwaʼriákon.

Né Jehoiada Sahanitsiokwaserónhni

¹⁷ Né ratsihénstatsi Jehoiada wahaónhnien ne Ronnontí꞉io Joash tánon nonkweʼshón꞉as nahontsanerenserónhni skát꞉ke ne Roiá꞉ner né ká꞉ti ne Roiá꞉ner raʼonkwetashón꞉as akénhake; kwáh kí ó꞉ni waʼhaianerenhserónhni tsi nateʼónteres ne ronnontí꞉io tánon nonkweʼshón꞉as.

¹⁸ Ethòne ó꞉nen nonkweʼshón꞉as ononsatokentiʼkówaʼne ne Baal niaʼónhne tánon waʼhatiratiónhko ne rahonatʼtserónhniat; wathaʼtirihtánion ne ietsenharákwahs tánon ne kahiatonhnisónhas, tánon waʼonwanonwarhiákon ne Mattan, thóh ohénton ne ietsenharákwahke, né raʼotsihénstatsi kènhne ne Baal. Jehoiada ratinikòn꞉rare wasakóteron nononhsatokentí꞉ke,

¹⁹ tánon ethòne ne rahón꞉a, ne ratisenhnowánens, ne tsi kanontiʼiotseráien ratinón꞉ne, tánon ne tsi kaʼnón꞉shote ne kanontiʼiotserákon ratinónhne wahonwaʼiathanónhna ne ronnontí꞉io tsi tahatiʼiákenhne Nononsatokentiʼkówaʼne tánon tsit kanónhshote ne kanontiʼiotserákon niahonwaʼiaténhawe, ronhwaʼtinónhteratse nonkweʼshón꞉as. Né Joash tsi Iotenhenraká꞉ronte ne Ratinónhne konwaʼnatónhkwa nón꞉we nahatóhetste tánon iahá꞉tsien nanitskwáhraʼne.

²⁰ Kwáh onʼkwetakwéʼkon kaná꞉non tsi iakotonhnáhere, tánon ne tsi kanatowanénhke kwáh sakʼtí꞉ken, né tsi ó꞉nen ne Athaliah tsi konwanonwariákon thóh tsi kanontiʼiotserákon.

²¹ Né Joash waʼonontí꞉ione ne Judah nón꞉we né꞉ne tsáta satehaoserihiákon.