2 Kings 10 - Ohiatonhseratokénti

Tsi Nitotʼwatsirínon Ne Ahab Ronwatinonwariákon

¹ Tsáta niwásen-nihátikwe tsi nitotʼwatsirínon ne Ronnontí꞉iokwe Ahab thóh ranákerekwe ne tsi kanatowánen ne Samaria. Jehu kaiatonseráke wahaiáton tánon iashakoteniétase ne ratikorásons tsi kanatatowánen, ó꞉ni ne sakotihéntense ne ienakerénions, tánon ne sakotinikónhrares ne Ahab tsi nitotwatsirínons. Né kaiatónsera tsi enwatewenhnanó꞉ten:

² “Í꞉se senikónrare ne tsi nitotwatsirínon ne ronnontí꞉io, tánon í꞉se iesathakweniaiénhni notsónkwas, ne kosahtensʼokónhas, ne ionterihiosthákwas, tánon ne tsi watenhenró꞉tons ne kanatowánens. Éhthoh ká꞉ti, kwáh kíʼ tsi niiostó꞉re ensèna kí꞉ken kaiatónsera,

³ ehʼtshiataʼráko ne kwáh thariwaientéri ne ronnontí꞉io raowátsire, tienontí꞉iost, tánon saterí꞉io tsi nenhthé꞉tiene.”

⁴ Né ratikorásons ne Samaria tsi nióre tsi wahonateroniénthen. “Onh ní꞉ioht tsi aitewakwéni ne tatsitewátaste ne Jehu,” wahonʼníron, “nék khók nènhne ne teniʼiáse Rontínontí꞉io Joram khés ne Ronnontí꞉io Ahaziah enhnikwéni?”

⁵ Sók kíʼ ne roteríhonte ne tsi kanontiʼiotseráien tánon ne ranatanón꞉ne, skát꞉ke ne sakotihéntense ne tsi iekánere tánon ne ronwatinikónrare ne ronnontí꞉io sakohioʼokónhas, iahonwateriwaniétase ne Jehu: “Í꞉i ne kwahiótenhse, tánon kwáh ionkwahthateweienhnentáhon thóh nenhiakwáhiere tsi nenhsíron. Ók iáh kíʼ nènhneʼe nónhka asháakwahnontí꞉iosʼte: thóh nátiere tsi nahó꞉ten í꞉sere tkarihwaiéri í꞉ken.”

⁶ Né Jehu shé꞉kon óia ionsahsakoiátonhse: “Tóh꞉ka tewakwékon í꞉ken tánon sewatateweienhnentáhon naisewásere tsi nahó꞉ten enkaténhnaʼne, tasewahá꞉seron ne rahotinónhtsis ne Ronnontí꞉io Ahab sakohiohoʼkónhas ne tsi kíʼteron né꞉ne Jezreel nón꞉we né꞉ne thóh nenhiowistáheʼke nenhiórenhne tsi nón꞉wa nikaháwi.” Ne Ahab tsáta niwasenhnihá꞉tikwe ronekenteronhtseraiéntakwe. Ne ensakawehiá꞉ron ne ronkwetowáne ne kanatowanénhke.

⁷ Né shiahatiʼiéna ne Jehu rahoiatónsera, ne sakotihéntense ne Samaria ratikwékon wasakotinonwariakónhnion ne tsáta niwásen niháti ne Ahab rahowátsires, atherákons wahonnétharon ne raotinóntsis, tánon iahonwateniétase ne Jehu ne Jezreel nónhwe.

⁸ Nó꞉nen saʼonwaró꞉ri ne Jehu nètho raʼotinón꞉tsis ne Ahab raʼowá꞉tsires tsi thoʼtíha, wasakoʼró꞉ri tekentonwá꞉ke tsi ronní꞉tonʼionʼni ákta tsi iotenʼenrakáronte ne kanatowá꞉nenʼke tánon thó kakéʼrón꞉tak tsi nió꞉re nó꞉ia ientsórenʼne.

⁹ Tsi sahó꞉renʼne tsi tsotenʼhenraká꞉ronte niaháre tánon wasaʼkawénhase nonkweʼshón꞉ʼas né rónhneskwe, “Í꞉i ne riʼiateristhá꞉ientakwe ne Ronnontí꞉io Joram tánon waʼí꞉nonwariaʼkon; iáh ní꞉se thá꞉oten tesewaterihwaiénhni né nikaʼrihóten. Ók ónhka kí꞉ken ratikwé꞉kon ronʼwatinonwariákon?

¹⁰ Né kí꞉ken kaʼrihwanírats orihwakwéʼkon nètho tsi niháwen ne Roiá꞉ner tsi nòkwah tsi tahawaʼtsiratháʼtie ne Ahab tsi kwáh thó neniáʼwenhne. Né Roiá꞉ner etʼniʼoiéren tsi nihoraʼrátston rahonháke ne roʼthó꞉kense Elijah.”

¹¹ Éhthoh né ó꞉nen ne Jehu wasakoʼnonwarhiakónhnion ratikwéʼkon ne iateʼonathaténron ne Ahab raʼowátsires né Jezreel nón꞉we nihatiná꞉kere, tánon ratikwéʼkon ne raʼonatieraʼshón꞉ʼas, ó꞉ni né kwáh ákta rontenrosónhas, tánon ne ratiʼtsihénstaʼtsis; iáh né saiáta tsateshotaʼthénron.

Né Rontáʼtenonkwes Ne Ronnontí꞉io Ahaziah Waʼonwatinonwariákon

¹² Né Jehu éhʼren wàʼrete ne Jezreel Samaria niaháre. Né tsi niʼioháʼhes, éhʼtho nón꞉we né konwaʼnathón꞉kwah “Né Raʼtinón꞉ne Tsi nón꞉we niʼonthaʼtoserothá꞉kwa,”

¹³ Thóh nón꞉we natontát꞉ken ótiakhes ne Ronnontiʼiokénʼen Ahaziah rontátenonkwes né Judah nón꞉we tánon wasakorihwanóntonse, “Ónhka ní꞉se?” “Ahazeiah iakwathátenonkwe,” tsi wathaterihwaseráko. “Jezreel niahonkwenonhátie nahiakinikonranírate nakoiohokónhas ne Ionʼnontí꞉io Jezebel tánon ne roná꞉tiakes ne kanontiʼiótsera kawátsires.”

¹⁴ Né Jehu washakónane ne raonkwetaʼshón꞉ʼas, “Tseʼonón꞉nhek tsi iahetsiʼiaténhaf!” Waʼonwatiʼiéna ká꞉ti, tánon washakononwariakónhnion ákta ne tsi iosónwaien né nón꞉we. Né꞉ne kaiéri-niwásen-tékeni nihátikwe norihwakwéʼkon, tánon iáh né saiáta tsiateshotaʼténron.

Raʼtikwé꞉kon Ne Iatehonathaténronʼkwe Ne Rontáʼtenonkwe Ne Ahab Ronwatiʼnonwariákon

¹⁵ Né Jehu shé꞉kon sahatʼthaíʼtha, tánon ne tsi nihiohá꞉hes Jonadab watʼiáterane né꞉ne roʼníha ne Rechab. Né Jehu wathonónweron tánon wahénron, “Ní꞉se tánon ní꞉i kwáh né sáka tsi nitianontónhnions. Enteskatswanónhnaʼken?” “Hen,” ne Jonadab tsi watharihwaseráko. “Thonʼthasanéntsiest, ká꞉ti,” ne Jehu watharihwaseráko. Wathiathatenéntsa, tánon ne Jehu sahosniénon sahoiatítha notsonkwáhkon,

¹⁶ ratón꞉nions, “Káts tsíteʼne tánon kwáh í꞉se ensatʼká꞉tho tsi niʼwakerihwatóken tsi nòkwah ne Roiá꞉ner.” Tánon wathatíta tsi niahotihonwísere ne Samaria niaháne.

¹⁷ Né shiahánewe né nón꞉we, ne Jehu ratikwé꞉kon wasakononwariakónhnion ne Ahab ronthá꞉tenonkwes, iáh ne saiáta teʼoniakénʼen. Né kí꞉ken tsi nahó꞉ten ne Roiá꞉ner roʼró꞉ri ne Elijah tsi neniáwenhne.

Né Konwasén꞉naiens Ne Baal Wahonwatiʼnonwariakónhnion

¹⁸ Né Jehu washakoiataróhroʼke nonkweʼshón꞉as ne Samaria tánon wasakawénhaʼse, “Né Ronnontí꞉io Ahab ostónʼa teharihwasnieséhaʼkwe ne kaní꞉io Baal, ók kíʼ Ní꞉i ó꞉nen sénha tenkerihwásnieʼse.

¹⁹ Ietsiʼiataʼróhrok ratikwékon ne rotitókense ne Baal nón꞉we, tánon ratikwékon ne ronwasén꞉iaiens, tánon ratikwékon ne ratitsihénstaʼtsis. Iáh ónka naʼontahiakotiatók꞉thake; Kwáh í꞉ken tsi kowánen enhʼiateskóntʼthase ne Baal, tánon nón꞉ka iáh thóh taiésheʼke kwáh kíʼ enhionthatenonwariákon.” (Né kí꞉ken né tashakonikonrakénhni ne Jehu né tsi nahéntonʼwe ratikwékon enhonwatinonwariákon ne ronwasénhnaiens ne Baal.)

²⁰ Éhthohʼne ó꞉nen ne Jehu wahathénʼnaʼne, “Wenhniserarahkwénhak nahonwasénhnaien ó꞉ni nahonwakwéniensʼte ne Baal!” Né kaianerénsera tsi onthé꞉sa,

²¹ tánon kíʼ ne Jehu iaʼhaterihwaniéthe kwáh tsi nikanakerásera ne Israerró꞉nonhke. Ratikwékon kíʼ ne ronwasénhnaiens ne Baal tá꞉honʼne; iáh ne saiáta né iáh thaháweron ne tó꞉sa aontahawénon. Ratikwékon kíʼ ononsatokentiʼkówaʼne iahontáweiate, kwáh watsononsawénhro.

²² Éhthohʼne ó꞉nen ne Jehu washakónaʼne ne ratitsihénstatsis ne ratinón꞉ne ne iotokéntis wakosés꞉sons nahontahatíhawe nètho wakosés꞉sons tánon né thonwénhnon ne ronterénʼnaiens.

²³ Ehthóhʼne ó꞉nen, ne Jehu rahónha ó꞉ni iahatáweiate nononsatokentiʼkówaʼne skát꞉ke ne Jonadab né꞉ne roʼníha ne Rechab tánon wasakawénhaʼse nonkweʼshón꞉ʼas né thóh ieterónhthakwe, “Orihwí꞉io tsiónhni nek khók ne Baal ronwasénhnaiens kénʼen ratíteron tánon iáh ónhka ne Roiá꞉ner ronwasénhnaiens kénʼen tethonataweiáton.”

²⁴ Ethòne ó꞉nen rahónha tánon ne Jonadab iahiatáweiaʼte naníthate ne karihwiiosehokónhas tánon wahonwateskóntʼthase ne Baal. Shatékon niwásen niháti ronónkwe ástste teshakotáston tánon shakoríhonte: “Ratikwékon kí꞉ken onkweʼshón꞉ʼas ietsinonwariakónhnion; nón꞉ka enshakoríhon nahonsahatiniákenʼne tsi rónhnhe kíʼ enhaká꞉riakʼthe!”

²⁵ Kwáh tsi niʼiostó꞉re ne Jehu wahateriwatsʼtériste né tewatkaʼwánions, washakawénhase ne tehotinénraien ó꞉ni ne ronaterihóntons, “Wáhs iasewathá꞉weiat tánon ratikwékon ietsinonwariskónhnion; tó꞉sa ónhka ietsiríhon nahonsahatiniákenʼne!” Iahontáweiate kíʼ tánon wahonsharótions ne rahonasarekówas, ratikwékon wasakotinonwariakónhnion, tánon ástste niasakotiʼiatísere. Ethóhʼne ó꞉nen iahontáweiate ne kwáh kanónskon nononsatokentiʼkówane,

²⁶ tahatiʼiákenwe ne iotokénti kanawahá꞉te né thóh nón꞉we nikaiéntakwe, tánon wahóntshaʼhate.

²⁷ Ká꞉ti wahatirihwéntʼtho ne iotokénti kanawahʼáhte tánon nononsatokentiʼkówa, tánon né koràne wahonʼnónhniate nononsatokentiʼkówa—tánon shé꞉kon éhthoh ní꞉ioht nón꞉wa wenhniseráte.

²⁸ Thóh ká꞉ti ní꞉ioht ne Jehu tsi rorihwathónton tsi nikonwasénhnaienskwe ne Baal Nisraeʼró꞉nonke nónhwe.

²⁹ Ók né Jehu iáh í꞉se tiehó꞉ien ne rahorihwanerahák꞉tseras ne Ronnontí꞉io Jeroboam, né tsi rahónha ieshakosaríhnon Nisraeʼró꞉nons ne karihwanerahák꞉tserakon tsi nikonwasénhnaiensʼkwe ne owistanó꞉ron tèro kaiatónhni né rokétskwenhne ne Bethel tánon ne Dan nónhwe.

³⁰ Né Roiá꞉ner wahawénhase ne Jehu, “Thóh naseiérase ne Ahab raowátsires tsi kíʼ natewakatonhontsóniʼne náshieʼre. Ká꞉ti wakoniararátsten tsi nenhsatʼwatsiríhne, kwáh tsi nió꞉re ne kaieríhaton niaʼtehiotereseráne, ronónha enhotinontí꞉ioke Nisraeʼrononke.”

³¹ Ók kíʼ ne Jehu iáh raweriasakwékon tehotewenhnarákwen ne Roiá꞉ner raʼoianerénseras, né꞉ne Sakoní꞉io Nisraeʼró꞉nonke; khèkok, né wahá꞉sere tsi thontahotenákeraste ne Jeroboam, tsi rahónha iesakosaríhnon Nisraeʼro꞉nons ne karihwanerahakʼtsherákon.

Tsi Warénheʼie Ne Jehu

³² Né shikaháwi ne Roiá꞉ner sonthahatásawen wahatʼhó꞉te tsi níwaskwe ne Israerʼró꞉nonke aonakeʼrá꞉sera. Né Ronnontí꞉io Hazael ne Syriaʼne nón꞉we waʼsakosenhniónko kwáh tsi niwatenáskwa ne Israerʼró꞉nonke kanakeraseráien

³³ nakonnokwáhti ne Jordan, kwáh tsi nióre ne entiéne nòkwahti ne tsi kanátaien ne Aroer né꞉ne Arnon Kaniataratátie—thóh í꞉kare tsi kanakeraseráien ne Gilead ó꞉ni ne Bashan, thóh nón꞉we nihatinákere ne rahothitiókwahs ne Gad, Reuben, tánon ne Manasseh nàkon né nòkwahti nón꞉we nihatinákereʼkwe.

³⁴ Oriwaʼkwé꞉kons nohiásons nahorihoténsons tsi nahotiérenke ne Jehu, thóh íkare tsi nihotenikonratʼtsaníton, thóh nón꞉we nikaʼiatón꞉nions Tsi Nihonwatikáratons ne Ronhtinontí꞉ios ne Israerʼronónke.

³⁵ Saʼrénheʼie Samaria nón꞉we niʼonwaiathá꞉ten, tánon né꞉ne roiénha Jehoahaz tonsahonakthákwen tsi sahatenontí꞉ioste.

³⁶ Né Jehu raónha rakórakwe kènʼne ne Samaria né tsi ronnontí꞉iokwe kènʼne Nisraeʼró꞉nonke né꞉ne tewáhsen-satékon niʼioseráke nikaríhweskwe.