2 Corinthians 9 - Ohiatonhseratokénti

Nahonwatiié꞉nawase Ne Rotí꞉ten Thonehtáhkwen

¹ Iáh thateiotonhontsó꞉hon ne ohwísta aorihwà꞉ke tsi iakwahiá꞉tonse ó꞉nen seʼ eh nisewaʼnikonhrò꞉ten ne aontaiehtshí꞉ion ne Rawenni꞉io raotióhkwa.

² Wakaterién꞉tare seʼ tsi naʼtesewasteríhens ne aontaiehtshí꞉ion. Ó꞉ni kwáh seʼ kenʼ kená꞉ie tsi nikhehró꞉ri ne Roiá꞉ner raotióhkwa ne Macedonia, í꞉se ne tsón꞉kwe tho nón: ne Achaia ó꞉nen tsóhsera shisewatateweiennén꞉taʼon. Wesewaská꞉neke ne aontaiehtshí꞉ion tánon tho nontá꞉we ne ronnónha ó꞉ni tsi wahonská꞉neke ne ronnónha ó꞉ni aontahshakó꞉non.

³ Ne aorì꞉wa Titus iahiiató꞉ri ó꞉ni ahontenróhshen ó꞉ia tehniiáhse. Tewakatonhontsó꞉ni naiesewatateweiennén꞉taʼon, kwáh tsi nikhehró꞉ri ne Macedonia. Ne kiʼ enkarihwahní꞉rate tsi iáh seʼ thaʼteionkwaterienʼtawénrie tsi ní꞉ioht tsi kwathará꞉ni.

⁴ Tóka nón꞉wa tóhkara nihá꞉ti ne Macedoniaró꞉non enkhehón꞉karon naiakwatenróhshen, í꞉kehre ahontkáhtho tsi ó꞉nen sewaweiennén꞉taʼon ne ohwísta. Tóka iáh, kwáh í꞉ken tsi enkatéhen ne tsi sótsi kwaniahé꞉senʼne. Nok kiʼ kwáh sénha í꞉se ensewatéhen.

⁵ Ne káti iaʼtewakerihwaién꞉taʼse wahiriʼwanón꞉tonhse ne Titus tánon ne tehniiáhse aiesewakwekónhake tsi niió꞉re ién꞉kewe. Sók ná꞉ʼa ne ronnónha enhatihwistarò꞉roke tsi nisewahrharátston. Tho ní꞉ioht tsi entisewá꞉ieste tsi nitisewaská꞉neks. Iáh kiʼ tóka kenʼ kwáh kiʼ aiehtshiiónnien.

⁶ Sewehiá꞉rak kí꞉ken owén꞉na: “Ne tóhkara nikanénhake kenʼk ní꞉kon kaienthókwas, nok kiʼ tóka iaweʼtowá꞉nen ne kanenhaʼshón꞉ʼa wé꞉so kiʼ ienká꞉ko.”

⁷ Tsi sewaiaʼtátshon ó꞉nenk tsi iatensewarihwaién꞉taʼse tó: ní꞉kon aontesewaiéste. Nok tóhsa kiʼ sasewatateriʼwásten tó: naontesewá꞉ieste, tóhsa ó꞉ni sewéhrhek sewaterihwaién꞉ni kenʼ. Shakonorónhkhwa ne Rawenni꞉io nónhka akotshennonniahtsherà꞉kon tsi entióntkaʼwe.

⁸ Rawenni꞉io seʼ enhiaiaʼtaté꞉riste, ó꞉ni énthion tsi naʼtesatonhontsó꞉ni. Ó꞉ni tiótkon iaʼtekaié꞉ri tsi nensaién꞉take ne otiaʼkéhshon ahsheié꞉nawase.

⁹ Ne Owennatokénhti tsi niwá꞉ton, “Iáh thaʼtehshakononhianí꞉eki ne iakó꞉ten, ne raotennitenráhtshera tsi nén꞉we tsi enká꞉take.”

¹⁰ Rawenni꞉io tehshakó꞉wis ratiiénthos ne kanenhaʼshónʼa. Ó꞉ni akwé꞉kon niehshakonón꞉tens. Tenhaiá꞉seren tsi nisá꞉ien, né꞉ʼe ne iaonsahshé꞉ion ónhka teiontkárias.

¹¹ Kwáh tsik nitiotierá꞉ton tsi ensaiá꞉nerahse, sók sénha ensatehsenní꞉iohse ne aonsahsheié꞉nawase. Thó꞉ne nonkweʼshón꞉a tenhonwanonhwerá꞉ton ne Rawenni꞉io tsi teniakhiiareniá꞉ten ne sakweniáhtshera.

¹² Tsi nisewaierenhátie iáh nek té꞉ken tsi tesewatkawenhátie ne kaienawaʼséhtshera tsi nonkwá꞉ti ne Rawenni꞉io raotióhkwa tsi naʼtehonatonhontsó꞉ni. Ne enkarihón꞉ni iakotiohkowá꞉nen ne onkweʼshón꞉a tenhonwanonhwerá꞉ton ne Rawenni꞉io.

¹³ Tsi ní꞉ioht tsi weseweʼnéste kí꞉ken kaiaʼtakehnháhtshera ne enkarihón꞉ni enhonwakweniénste, ó꞉ni tenhonwanonhwerá꞉ton ne Rawenni꞉io. Tisewehtáhkwen ne Kerístos raoterihwahnotáhtshera, ó꞉ni wesewatewén꞉narahkwe tsi ní꞉ioht tsi waʼehtshiié꞉nawase ne Rawenni꞉io raotióhkwa, tánon ó꞉ni ne akohrénhshon.

¹⁴ Ó꞉nen kiʼ ne ronnónha iehtshiiaterennaién꞉nis, ó꞉ni ronská꞉neks ne taiesewatátken, aséʼken wahontkáhtho ne Rawenni꞉io raotenniteráhtshera nisè꞉ke nok tsi niiaweʼtowá꞉nen ne ronnónha wahotiianerásten.

¹⁵ Tetshitewanonhwerá꞉ton ne Rawenni꞉io tsi niiorihwanehrákwat ne kaienawaʼséhtshera tehshonkwá꞉wi.