2 Corinthians 8 - Ohiatonhseratokénti

Tsi Thothiriwaié꞉ri Ne Corinthians

¹ Tewatenroʼshón꞉ʼa, teionkwatonhontsó꞉ni naiesewaterién꞉taraʼne tsi nikaná꞉non ne Rawenni꞉io raotén꞉rat ne raotitióhkwakon ne thonehtáhkwen ne Macedonia nón꞉we.

² Ehthó꞉saʼne wentorátie tsi ní꞉ioht tsi ronatenhniseraténion, ó꞉ni kwáh í꞉ken tsi rotí꞉ten, nok kiʼ kwáh ronatonhnháhere tsi niiaweʼtowá꞉nen thatiiéstha.

³ Kwáh ísi nón: nithatiiestháhkwe tsi nihotikwénion, ne tsi kwáh eh nithonskanékskwe.

⁴ Kwáh ó꞉ni waʼonkhiriʼwanón꞉tonhse, ó꞉ni waʼonkhiʼné꞉ken ne aiakhiríhon, tsi kwáh raonatshennonniahtsherà꞉kon tsi ahshakotihwíston ne Rawenni꞉io raotióhkwa.

⁵ Kwáh iáh thé꞉nen teionkwahrhárehkwe ne ísi nón: tsi nahatí꞉iere. Tahontierénhte wahonwahrharátsten ne Roiá꞉ner tànon tho nì꞉ʼi saionkhihrharásten tsi eh tho nenhatí꞉iere tsi nihoʼnikonhrò꞉ten ne Rawenni꞉io.

⁶ Titus eh tho ní꞉ioht tsi tetshisewatahsawén꞉ni ne eh naiesewaiéhrhake tsi aontesewatkaʼwá꞉sheke ne kaienawaséhtshera, raónha káti waʼshakwaʼné꞉ken ne ahtshisewaié꞉nawase ne aiesewáhsa tsi nahò꞉ten tisewatáhsawe.

⁷ Tsi nisewakwáhtshe tsi nahoʼténhshons sewá꞉ien, né꞉ʼe ne teweʼtáhkwen, sewaronkhaʼtsherí꞉io, ó꞉ni attokháhtshera, tsi natesewasteríhens naiesewatasnié꞉nen, ó꞉ni tsi niskwanorónhkwa. Tánon káti ó꞉ni teionkwatonhontsó꞉ni naontisewariʼwaié꞉rike tsi nonkwá꞉ti kí꞉ken kaioʼténhsera ne kanoronhkhwáhtshera.

⁸ Iáh tekwatoktahkwén꞉ni ne tho naiesewá꞉iere, kwáh nek tsi kwateʼniéntha tó: niiorihwató꞉ken ne sewanoronhkhwáhtshera ne tákeren notiaʼkéhshon tsi nihotiié꞉ren.

⁹ Akwé꞉kon sewaterién꞉tare ne Shonkwaiá꞉ner Iésos Kerístos tsi iaʼtekaié꞉ri tsi nithorihwaié꞉ri tánon tsi nihshonkwanorónhkhwa, akwé꞉kon rohtsakwaríhsion ne raohtshokowáhtshera ó꞉ni wahotén꞉taʼne, eh naontá꞉we ní꞉se aiesewakwáhtsheʼne.

¹⁰ Tiohseratéhkwe í꞉se tisewatierénhton ne aietshiiaʼtakéhnha, ó꞉ni waʼehtshí꞉ion ne tsi eh tho nisewaʼnikonhrò꞉tenʼne. Ó꞉nen kiʼ takwatahónhsatat tsi nenkwatenʼnikòn꞉ron.

¹¹ Ne ní꞉ʼi akì꞉ron iaʼsewáhsa tsi nahó꞉ten tisewatáhsawe. Tóka ne entioianénhawe tsi nahoʼténhshon sewá꞉ien, ensewarihwahní꞉rate á꞉re tsi kwáh tesewasteríhens ne aontesewá꞉ieste, tsi ni sewanonhtonniónskwe ne aiehtshí꞉ion.

¹² Iáh tewatsterístha tó: naiesakwahtshéhake. Ne tewanónhtons tó: ní꞉kon enhshé꞉ion tsi nisá꞉ien.

^13-14 Iáh ne té꞉kehre tóka kenʼ akheiatehshenniiósten ne akohrénhshon nok ní꞉se akwateʼniakatstháhse. Nok shaʼté꞉ioht kiʼ. Shaʼtaiesewatatiaʼkhonháhse tsi niiaweʼtowá꞉nen ní꞉se sá꞉ien nok ne ronnónha kenʼk ne ní꞉kon rotí꞉ien, ísi nonwéha, nó꞉nen ísi nón: enhshotiién꞉take nok ní꞉se tehsatkárias, eh thó꞉ne entsesaié꞉nawaʼse. Eh thó꞉ne akwé꞉kon shaʼteniá꞉wenʼne.

¹⁵ Kwáh tsi niwá꞉ton ne owennatokénhti: “Ónhka ne wé꞉so iakotateroʼró꞉ki iáh thé꞉nen thiaʼtetsotatén꞉ron. Ónhka ne kenʼ nikónha iakorò꞉ron kwáh né꞉ʼe iatehotiieríhse.”

Titus Tánon Ne Rontenroʼshón꞉ʼa

¹⁶ Kwahʼ í꞉ken tsi tekatenonhwerá꞉tons ne Rawenni꞉io tsi iahó꞉reke ne Titus ne tho ní꞉ioht tsi tatshisewarihwasniéhse tsi ní꞉ʼi ní꞉ioht.

¹⁷ Sahshakwaʼné꞉ken ne Titus ne iatshisewanatahré꞉naʼse, taharihwásnieʼne. Kwáh í꞉ken tsi raskanékskwe sótsi ehtshisewakwenienstháhkwe.

¹⁸ Shaià꞉ta ó꞉ni iashakwatenniéhte ne atateʼkén꞉sera, né꞉ʼe ne kwáh è꞉neken tsi ronʼwariwakweniénstha ne tiakaweʼtáhkwen ó꞉ni ronwaienté꞉ri tsi nihoioʼtenhserò꞉ten tsi rateriwahnó꞉tha ne karihwí꞉ios.

¹⁹ Thiká꞉te ó꞉ni, kí꞉ken rón꞉kwe né꞉ʼe ne tsi niiá꞉kon tiakawehtáhkwen né: ronwaiaʼtarákwen ne aiakwatenró꞉shen tsi nieniakwáhawe ne kahwistanó꞉ron, ne aorihwà꞉ke ne Roiá꞉ner raoiaʼtateríhtshera ne ó꞉ni aonteʼnéste tsi niiakwaská꞉neks ne aiakwatasnié꞉nen.

²⁰ Iáh thaʼteionkwatonhontsó꞉ni nónhka aierihwaká꞉tate tsi ní꞉ioht tsi iakwátstha ne sewakweniáhtshera.

²¹ Ne teionkwatonhontsó꞉ni ne Roiá꞉ner aontahshakwaʼnikonhraié꞉rite, ó꞉ni nahò꞉ten ne tionkweʼtaié꞉ris í꞉ienhre tkarihwaié꞉ri.

²² Shé꞉kon ó꞉ni thihá꞉te ienhshakwatenniéhten ne Titus ahontenró꞉shon ne ronatén꞉ro. Shakwaniahé꞉sen kí꞉ken rón꞉kwe. Aséʼken ó꞉nen wé꞉so iorì꞉wake raweʼnéston tsi tehotonhontsó꞉ni ne ahatasnié꞉nen. Ó꞉nen kiʼ kwáh sénha ísi nón tsi nikaská꞉neks, ne karihón꞉nis sótsi raónha sénha ehtshisewaniahéh꞉shon.

²³ Titus seʼ teionkeniienawá꞉kon, ne ionkeniióʼte ne takwarihwásnieʼse. Ne ó꞉ia tehniiáhse atateʼkén꞉sera ne skátne wahón꞉ne, ne nen né꞉ʼe ne tiakawehtáhkwen ronwanatatiá꞉se, ne ahonwahsennakará꞉tate ne Kerístos.

²⁴ Taiehtshiiateweienʼtónhas ne tiakawehtáhkwen ne tsi ahontkáhtho ne sewanoronhkhwáhtshera, ó꞉ni enhonaterién꞉taraʼne oh nontié꞉ren tsi tiókonte í꞉se kwathroriá꞉ton.