2 Corinthians 7 - Ohiatonhseratokénti

¹ Tewatenró꞉shon, Rawenni꞉io né꞉ʼe shonkwahrharatstén꞉ni. É꞉ren í꞉tewet akwé꞉kon nahò꞉ten tekenʼtsónstha ne onkwaierón꞉ta tánon ne onkwatónhnhets. Atshitewahsennowanáhte Rawenni꞉io, kwáh aietewateʼnién꞉ten aontatshitewanaʼké꞉ren.

Kó꞉r Rotshennón꞉ni Tsi Nihotiioʼtenhserò꞉ten Ne Thonehtáhkwen

² Takwanaktóthas ne sewerià꞉ne! Iáh ónhka teiakhiiesáhton, iáh ni ónhka teiakhikarewáhton. Iáh ó꞉ni teiakhiʼnikonhraʼtén꞉ni.

³ Iáh neteká꞉ton ne akwentoráhsten. Nok tsi nahò꞉ten wá꞉ken ne ohén꞉ton, tiótkon enkwehià꞉rake, tóka entiónhnheke tóka ó꞉ni enionkwenhé꞉ion.

⁴ Kwáh tokén꞉ʼen kwaniahé꞉sen. Tiótkon tekwarénhsarons tánon é꞉so tsi onkeʼnikonhrahníhrha. Aronhátien tsi niaʼté꞉kon teionkwaʼnikónhrhare shé꞉kon é꞉so tsi ionkwatonhnháhere.

⁵ Shaʼakenewe ne Macedonia, iáh teiótonʼon aiontiatorishén꞉take. Niaʼté꞉kon waʼtionkhiʼnikonhrhá꞉ren ne ionkhíhswens tánon ó꞉ni waʼontiateronhiénhten.

⁶ Rawenni꞉io shakoʼnikonhrahní꞉rats nón꞉kwe ionthatkenrón꞉ni, ne ki aorí꞉wa tahotenniéhte ne Titus.

⁷ Orihwí꞉io waʼatiatshennón꞉ni tsi waʼshakení꞉ken ne Titus, ki ó꞉ni nok sénha waʼatiatshennón꞉ni tsi niió꞉re tsi wahonwaʼnikonhrahnír꞉ate ne onkweshón꞉ʼa. Waʼshonkenihró꞉ri tsi nisewaʼnikonhráksens tánon tesewaʼnikónhrhare. Ó꞉nen sénha waʼkatonhnhá꞉ren.

⁸ Iáhten ó꞉nen tesewakeʼnikonhráksens, tsi iekwahiatón꞉ni wakwaʼnikonhrakarewáhte. Shontontierénhte onkeʼnikonhráksen, iáh kiʼ ó꞉nen. Wakaterién꞉tare tsi kenʼ nikarihwésha wesewaʼnikonhráksaʼte ne iekwahiatón꞉ni.

⁹ Ó꞉nen sewakatonhnháhere, iáh né꞉ʼe tetiorì꞉wa tsi waʼtionhnhakarewáhte. Né꞉ʼe tiorí꞉wa ne Rawenni꞉io ne waʼrahtste ne sewaʼnikonhrakséntshera ne raonhà꞉ke niaonsésewe tánon iáh ónhka teiakhinikonhʼrakarewáhton. Iáh kiʼ ónhka teiakhikarón꞉ni.

¹⁰ Ne Rawenni꞉io enwá꞉ton ne kaʼnikonhrakséntshera áratste ne tsi tiónhnhe naionkwaié꞉nawaʼse aitewá꞉tkaʼwe nonkwarihwaneraʼáhtshera, tánon tewé꞉sak ne kaiaʼtakehnahtshera, iáh nonwén꞉ton thaonsetewatateriʼwásten ne tho kaʼnikonhrakséntshera. Nok ne kaʼnikonhrakséntshera ne iáh tesewatathrewá꞉ton ne iewatihénthos ne kenhé꞉ion.

¹¹ Sewatkáhtho Rawenni꞉io tsi wáratste ne aonsesewatateriwáhsten, kwáh í꞉ken tsi tesewatonhontsó꞉ni ne aiesewarihwahnì꞉rate tsi iáh tesewahnì꞉kon. Sewanáhkhwenʼen, tisewatónʼne, tesewasterí꞉hens naiesewatkáhtho ne tkarihwaié꞉ri. Wesewarihwahní꞉rate tsi akwah tisewaieríthon tsi nisewaiéhrha.

¹² Shontakwahiá꞉tonse, iáh né꞉ʼe tetiorì꞉wa ne ónhka aontahkhérahse, ónhka taiakoterienʼtawénrieʼon tóka ó꞉ni ne aontaiakoteráhse, né꞉ʼe aorì꞉wa iakwahiá꞉tonse ne Rawenni꞉io ahtshisewanaʼtonháhse tsi é꞉so tsi teskwariʼwahsnié꞉se.

¹³ Tánon é꞉so tsi waʼonkwaʼnikonhrahníhrha. Waʼatiatshennón꞉ni tsi waʼskeniriʼwawá꞉se tánon tsi waʼshakení꞉ken ne Titus tsi niió꞉re tsi rotonhnháhere ne tsi watshisewanaʼtonháhse tóhsa thé꞉nen tahaʼnikonhrhá꞉ren.

¹⁴ Akwé꞉kon waʼshakwahró꞉ri tsi é꞉so tsi waʼtkwarénhsaron tánon iáh teskwaʼnikonhrhatén꞉ni. Tiotkonhón꞉we orihwí꞉io, akwé꞉kon káti tsi nahò꞉ten waʼshakwahró꞉ri tho kiʼ ní꞉ioht.

¹⁵ Titus é꞉so tsi tshisewanorónhkhwa, kwáh sénha tsi sahrehiá꞉raʼne tsi ní꞉kon tshisewawennaráhkwen tánon wesewaiaʼtishónhkwe tsi niió꞉re tsi tesewatónhneke shá꞉rawe tánon watshisewakweniénste.

¹⁶ Kwáh í꞉ken tsi wakatshennón꞉ni tsi wakaterién꞉tare tsi enwá꞉ton enkwaniáhese.