2 Corinthians 6 - Ohiatonhseratokénti

¹ Skátne ionkwaióʼte ne Rawenni꞉io, kwaʼnekén꞉nis káti naisewaniáhese ne raotennitenráhtsera.

² Kahiatonhseratokénhti wathró꞉ris tsi Rawenni꞉io rá꞉ton: “Ó꞉nen iaʼkáhewe waʼkoniatahónhsatate tánon tsi ó꞉nen waʼtisatonhontsóhse aiesaiaʼtakéhnha, tá꞉ke tánon waʼkonniakénhte.” Ó꞉nen iaʼkáhewe ón꞉wa wenhniserá꞉te ne akonniakénhte.

³ Iáh teiá꞉kenehre ne ónhka aionkhirihwáhrho tsi nahò꞉ten ionkeniioʼtátie. Iatiateʼnién꞉tha káti ne tóhsa taiakeninióskenʼne.

⁴ Akwé꞉kon kiʼ wé꞉ne iakenón꞉nis tsi Rawenni꞉io shakeniioʼténhse. Tiótkon thiionkenihrhá꞉re aséʼken niaʼté꞉kon tewé꞉tha ne iáh tetkaié꞉ri, ne ó꞉ni ne aieronhiá꞉ken tánon sewatié꞉rens ionkeniientehrhá꞉ʼon naionkenitén꞉taʼne.

⁵ Ionkeniientehrhá꞉ʼon ó꞉ni naionkhírio tánon tsi iontatehnhotónhkhwa ieionkhì꞉teron tánon ionkhikarewáhton ne ratinatakárias, iontiatatiaʼtakéhnhen ionkeniióʼte sewatié꞉rens iáh teionkenítaʼs tánon iáh thaʼtewatskahóntie.

⁶ Iatiateʼnién꞉tha ne tóhsa taiakeniʼnióskenʼne, ionkeniʼnikonhraién꞉taʼs tánon ionkeniʼnikonhrí꞉io, tionkenirihwaié꞉ri tánon Roʼnikonhratokénhti tiótkon iakwakwé꞉kon, tánon ne onkeninoronhkhwáhtshera ne né꞉ʼe kwáh tokén꞉ʼen iorihwí꞉io.

⁷ Tókenske tsi nahò꞉ten iatiá꞉ton tsi Rawenni꞉io raoioʼténsera ionkenihá꞉wi tsi ionkeniioʼtátie. Iohní꞉ron teiontiatohetstánion, ne ó꞉ni nahò꞉ten tiontiatá꞉ti tánon tsi niiontiatié꞉ren nek ne tkaié꞉ri tsi niiatiatiéhrha.

⁸ Ótiaʼke waonkhikweniénste, ehtà꞉ke enionkhiión꞉ni, enionkhihsennowanáhte, ó꞉ni enionkhiiateháhte, tiótkon nek ne orihwí꞉io nahò꞉ten iatiá꞉ton. Ótiaʼke wahonní꞉ron iáh tókenske té꞉ken.

⁹ Ótiaʼke iáh teionkhiienté꞉ri, ók ní꞉se kwáh tokén꞉ʼen takeniienté꞉ri. Tsi shí꞉ken ne iakenihé꞉ions nok kiʼ iakenónhnhe. Iontiathrewáhton, nok iáh kiʼ nowén꞉ton teionkhiiahséhton.

¹⁰ Iáh teionkwakhwáhtshe nohontsakékhe, nok ionkwakwáhtshe tsi nonkwá꞉ti ne karonhiakékha.

¹¹ Tewatenróhshon ne Corinth tókenske tsi nahò꞉ten iatiá꞉ton nó꞉nen eniakenì꞉ron ionáktote ne onkenerià꞉ne ne í꞉se sewarihwà꞉ke.

¹² Iáh ní꞉ʼi thaʼtekwanonhianí꞉ekhon ne onkeninoronhkhwáhtshera. Kwanorónhkhwa, ók ní꞉se iáh tetisewatká꞉was ne sewanoronhkhwáhtshera ne onkenirihwà꞉ke.

¹³ Tho ní꞉ioht tsi enkwatháhrhahse tsi ní꞉ioht tsi enkhetháhrhahse ne kheienʼokón꞉ʼa. Aiesewathontátsheke aiesewanakto꞉ten ne sewerià꞉ne ne onkenirihwà꞉ke.

Raónonhsatokénhti Rawenni꞉io Ronhnheʼón꞉we

¹⁴ É꞉ren ísewet tsi nón꞉we nihón꞉nes ne iáh tethonehtáhkwen tsi nihaweiennò꞉ten ne Rawenni꞉io! Enwá꞉ton kenʼ ne tiakonkweʼtaié꞉ri skátne ahonné꞉sheke ne ronnonkweʼtáksens? Né꞉ʼe kenʼ shá꞉ka ne teioswáthe tánon tetióʼkaras?

¹⁵ Iatén꞉ro ken ne Kerístos tánon ótkon? Enwá꞉ton kenʼ ne tiakawehtáhkwen tsi nonkwá꞉ti ne Niióhne shakaʼnikòn꞉ra akénhake ne iáh tetiakawehtáhkwen?

¹⁶ Thó: ónhte kenʼ tiónakte ne Rawenni꞉io raononhsatokenhtí꞉ke ne kaiaʼtonniʼshón꞉ʼa? Onnonhsatokénhti ne wáhi tsi tiónhnhe ó꞉ni otionhà꞉ke nón꞉we nihèn꞉teron ne ronhnheʼón꞉we Rawenni꞉io. Ne seʼ aorì꞉wa rá꞉ton: “Eniakwakwekonhatié꞉sheke Iʼi ne raotiní꞉io enkénhake tánon akwé꞉kon I꞉ʼí akonkwé꞉ta enkénhake.”

¹⁷ Roiá꞉ner ó꞉ni rá꞉ton: “Ietshiiátkawh tánon é꞉ren í꞉sewet, tóhsa ken niasewá꞉ier ne nahò꞉ten iáh teiotkwéniens. Thó꞉ne enskwaié꞉na,

¹⁸ tánon kwaienʼokón꞉ʼa enskénhake. Kwáh akwé꞉kon ne ronnón꞉kwe tánon ne konnón꞉kwe kheienʼokón꞉ʼa enskenhá꞉ke tsi I꞉ʼi khók Rawenni꞉io wakeʼshatstenhserowá꞉nen.”