2 Corinthians 5 - Ohiatonhseratokénti

¹ Kí꞉ken tewaieròn꞉ke ne teskaierón꞉tare tsi ní꞉ioht ne waʼtohseró꞉ton tsi kén꞉ʼen tewanákere tsi ionhontsá꞉te. Nok kí꞉ken ne aʼtóhsera nó꞉nen enkarihwahtón꞉ton, ionkwaterién꞉tare ne Rawenni꞉io kwáh tsi tewaiáʼtátson ó꞉ia ensehshonkwanákton tsi nón꞉we ientsitiónhnheke. Tho iontientáhkhwa iáh tho tekanonhsò꞉tens tsi shí꞉ken ní꞉ioht ne ónhkak aiakononhsisonʼónhake, nok karonhià꞉ke nón꞉we tkakè꞉ron iáh nen né꞉ʼe nonwén꞉ton thiakarihwén꞉taʼne.

² Tsi shé꞉kon kén꞉tho ítewes tsi ionhontsá꞉te, kwáh tionkwaonnseratihén꞉thos tsi naʼteionkwatonhontsó꞉ni karonhià꞉ke nón꞉we iaonsetiónhnheke.

³ Tewaská꞉neks nonkwatónhnhets akaié꞉na á꞉se oierón꞉ta.

⁴ Kí꞉ken tsi aʼtohserakónhshon tewenʼterón꞉ton kwáh iakaonhshená꞉ne tsi niiakohwíshens kí꞉ken nonkwaierón꞉ta tsi ní꞉ioht nahióksteke. Nok iáh ki ne teiorì꞉wa tsi eh niionkwaià꞉tawens, tókaʼ kenʼ ne tsi ítewehre ne aitewatewén꞉teʼte nonkwaierón꞉ta tsi nienkén꞉heie. Ne aorì꞉wa ne ítewehre taitewatatawistáhkwe nonkwaierón꞉ta ne ionhnheʼón꞉we.

⁵ Rawenni꞉io se akwé꞉kon niehokwénion ne tahshonkwaté꞉ni. Shonkweʼnestén꞉ni ne Raoʼnikón꞉ra tsi eh nenhá꞉iere.

⁶ Tiókonte sewaʼnikonhrahnirónhak! Tsi náhe shé꞉kon tewakwé꞉kon nonkwaierón꞉ta iáh tewá꞉tons naitewakwekónhake ne Roiá꞉ner, tsi nentewaié꞉na ne karonhiaʼkéhkha oierón꞉ta thó꞉ne enwá꞉ton entewakweʼkháhne ne Roiá꞉ner.

⁷ Nok tewehtákwen nón꞉we nitionhnhétie, iáh neh tsi nahò꞉ten ne tetewaká꞉nere.

⁸ Teiotonhontsó꞉hon naionkwaʼnikonhrahnirónhake, aséʼken sénha ne tewarákwas ne taitewatekháhsi nonkwaierón꞉ta tánon Roiá꞉ner skátne iaonsetewenʼteróntake.

⁹ Ók ó꞉ni tóka skátne aitewenʼterón꞉take ne Roiá꞉ner, tóka ó꞉ni, í꞉non niió꞉re naʼtaietewátereke, shé꞉kon kiʼ nen né꞉ʼe tewateʼnién꞉tha naontatshitewaʼnikonhraié꞉rite.

¹⁰ Akwé꞉kon ne Kerístos tsi tewaiaʼtátson tenshonkwaiaʼtó꞉rehte naioianeréhake tóka ó꞉ni tó: naontakahetkén꞉take tsi naionkwatié꞉ren ne tewaieròn꞉ke tsi náhe tionhnhétie.

Niióhne Nieiontatiaʼténhas Ne Ón꞉kwe

¹¹ Ionkwaterién꞉tare nahò꞉ten kén꞉ton nahonwakweniénste ne Roiá꞉ner, ó꞉ni kwáh ieiakhiʼnikonhrhá꞉reks ne niaʼteionkwé꞉take raonhà꞉ke niá꞉ien. Rawenni꞉io raonhá꞉ʼa khók roterién꞉tare tsi nitewaweiennò꞉ten, nok aiá꞉wens aisewaterién꞉tarake tsi nitionkweʼtò꞉tens.

¹² Iáh shé꞉kon teiakwateʼnién꞉tha ne énska khók shé꞉kon iaonsaká꞉ienhte ne taiakwataterénhsaron. Nok teionkwatonhontsó꞉ni ní꞉se askwakweniénsthake, ne nó꞉nen skátne ísewes ne iáh tehotirihwató꞉ken, ó꞉ni tehonataterénhsaron onʼnaiohtónhake tsi ahonwananonhtonnión꞉sheke ne otiaʼkéhshon.

¹³ Tóka tho naióhton iáh teiakwaʼnikonhrakwé꞉kon, ne kiʼ nen né꞉ʼe tsi naʼteiakwátere ne Rawenni꞉io. Nok kiʼ tóka kwáh iakwaʼnikonhrakwé꞉kon í꞉se nen né꞉ʼe ensewaianerásten.

¹⁴ Neh꞉ne Kerístos raonoronhkhwáhtshera ionkwahá꞉wi. Kwáh seʼ orihwí꞉io iontión꞉ni tóka shaià꞉ta shakawenheiá꞉se nakotiaʼkéhshon, tho káti ní꞉ʼi tewaià꞉tare.

¹⁵ Kwáh kiʼ kanenhrakwé꞉kon tsi shonkwenheiá꞉se ne Kerístos. Ne iorihón꞉ni rawenhé꞉ion neh ne tóhsa iaʼtaonsaionkwaiaʼtíston tsi aonsetiónhnheke, tóhsa í꞉ʼi khók aitewatatehiá꞉rake, nok aitewaskéhnha ne raónha aontahtshitewaʼnikonhraié꞉rite. Nok tsi niká꞉ien ne rawenhé꞉ion káti shotonhnhé꞉ton ní꞉ʼi onkwarihwà꞉ke.

¹⁶ Kwáh í꞉ken tsi iakwatateʼnikòn꞉rare ne tóhsa taiakhiiaʼtó꞉rehte nonkweʼshón꞉ʼa onʼnhahonnon꞉notenhake, thosane ieioteratston thoʼní꞉ioht tsi tetshitewaiaʼtoré꞉ton ne Kerístos.

¹⁷ Ónhka ne Kerístos raonkwé꞉ta í꞉ken kwáh á꞉se shotón꞉ʼon. Nahò꞉ten ne iotohétston akwé꞉kon kaʼnikónhrenʼen, orihwakwé꞉kon á꞉se tsón꞉ni.

¹⁸ Rawenni꞉io akwé꞉kon eh nihóhson! Thotórion ne Kerístos skén꞉nen ahrón꞉ni tsi naʼtetewátere, nok kiʼ shonkwaioʼtenhserá꞉wi ne skén꞉nen aitión꞉ni tsi naʼtehónteron nakohrénhshon tánon ne raónha.

¹⁹ Tsi nahò꞉ten iakwén꞉tons ne Rawenni꞉io nikwékon ne Kerístos shakowískwe ne skén꞉nen ó꞉ni naonsahshakoʼnikónhrenʼse ne kén꞉ʼen ronnonhontsaʼkehró꞉non. Nok í꞉ʼi shonkwaioʼtenhserá꞉wi ne aiehthiiohetstháhse ne raoterihwahnotáhtshera tsi nonkwá ne skén꞉nen.

²⁰ Tionkhiiatenniéhton ne ahshakwatatiá꞉se ne Kerístos, ó꞉ni ne Rawenni꞉io tshisewanitén꞉taʼse ne ahskwatahónhsatate nonkwaterihwahnotáhtshera. Kerístos shakwatatiá꞉se, ó꞉ni kwáh tionkwaʼnikonhrahsaʼáhton tsi kwariʼwanontón꞉nis sasewarihwahserón꞉ni tsi naʼtesewátere ne Rawenni꞉io.

²¹ Kerístos iáh nowén꞉ton tehorihwanéren! Nok ne Rawenni꞉io eh nontahó꞉tate tsi shí꞉ken ní꞉ioht ne ahorihwanéren, eh naontá꞉we ne Kerístos ahshonkwariʼwawá꞉se ne Rawenni꞉io ahshonkwaié꞉na.