2 Corinthians 4 - Ohiatonhseratokénti

Tsi Í꞉wa Natsokowátsheras Ne Katsétakons Nok Oʼtá꞉ra Ioniá꞉ton

¹ Sótsi thorihwaié꞉ri ne Rawenni꞉io neh waʼkarihón꞉ni waʼshonkwaniá꞉hese naionkwaióʼten ne raoʼioténhsera. Ne aorì꞉wa tóhsa kiʼ tewaʼnikonhrókten.

² Iáh theʼtewatsterístha ne ioterihwatehaʼshón꞉as nothé꞉nen aitewariʼwáhsehte. Iáh ó꞉ni tetewateʼnién꞉tha nónhka aiethinonhwaroriʼtón꞉ni tóka ó꞉ni aontetewatoktáhkwe ne Rawenni꞉io raowennaʼshón꞉ʼa. Rawenni꞉io tetehshonkwaká꞉nere, ne khók ne orihwí꞉io tsi nahò꞉ten entewèn꞉ron, sók ne ronatiaʼkéhshon enhonaterihwahní꞉ratshe naontaionkhiiéhtahkwe.

³ Tóka thé꞉nen ioteriʼwahséhton nonkwaterihwahnotáhtshera, ne khók kiʼ ronwatiriʼwahsehtén꞉ni tsi niká꞉ien ne rotiiaʼtaʼtón꞉ʼon.

⁴ Ne ranehsonhró꞉non ne tsi ionhontsiá꞉te shakoʼnikonhrharó꞉ron tsi nihá꞉ti ne iáh tethonehtáhkwen. Iáh tehatikwénies nahontkáhtho ne kaswathéhtshera, ne wathró꞉ris ne karihwí꞉ios tsi nahoʼténhshon ne raoiaʼtanehrakwáhtshera ne Kerístos, ne shonkweʼnestén꞉nis tsi nihaweiennò꞉tens ne Rawenni꞉io.

⁵ Iáh í꞉ʼi teiakwataterihwahnotá꞉nis. Nonkwaterihwahnotáhtshera ne tho Ié꞉sos Kerístos, raónha ne Roiá꞉ner. Raónha ó꞉ni iahshonkwató꞉ri nakwaioʼténhse.

⁶ Ne Orihwatokénhti wá꞉ton, “Rawenni꞉io tahanónhton tsi waʼtioswá꞉theʼne tsi nón꞉we tetiokaráskwe.” Nón꞉wa ne Rawenni꞉io tehoswathé꞉ton ne onkwerià꞉ne nakwahronká꞉ten ne raoiaʼtanehrakwáhtshera tho weʼnéston raonhà꞉ke ne Ié꞉sos Kerístos.

⁷ Ne tetsitewatié꞉ren tsi ní꞉ioht ne oʼtá꞉ra katsheʼshón꞉ʼa tsi nón꞉we niwateweién꞉ton ne ahtshokowáhtshera. Ne kwáh kahsatstenhserowà꞉nen Niiò꞉ne nón꞉we nitewé꞉tha, iáh ne ontionhà꞉ke.

⁸ Sewatié꞉rens entewaronhiá꞉ken, nok iáh kiʼ nowén꞉ton tehionhkhi꞉iaʼtsó꞉ron. Shé꞉kon kiʼ nen né꞉ʼe nó꞉nen iáh teionkwaterién꞉tare oh nakaié꞉ren, iáh nowén꞉ton thaitewaʼnikonhró꞉ten.

⁹ Nó꞉nen thé꞉nen tekaʼnikónhrhare, Rawenni꞉io shonkwahriskó꞉ton, ne káti nó꞉nen tenhionhkhiʼniotá꞉ko, shé꞉kon kiʼ tentsitewá꞉taʼne.

^10-11 Kwáh tsi niaʼtewenhniserá꞉ke tsi iotteronhón꞉we naitewénheie ne ne Ié꞉sos raorihónniat. Tewaieròn꞉ke teskaierón꞉tare tsi niiá꞉wenʼen tsi rawenhé꞉ion, ne káti ne raotónhnhets naiotón꞉on naweʼnéston nontionhà꞉ke.

¹² Ne káti kí꞉ken kén꞉tons ne kenhé꞉ion tsi tiótkon ionkwahnhonteráties, nok natónhnhets isè꞉ke nón꞉we niioioʼtáties.

¹³ Wá꞉ton norihwatokénhti, “Tewakatá꞉ti ne tsi tewaketáhkwen.” Kwáh káti ne shá꞉ka tsi entewath꞉róri tsi nitionkwehtáhkwen.

¹⁴ Ne tsi ionkwaterién꞉tare ne Rawenni꞉io tsi shokétskwen ne Ié꞉sos, tethó꞉wi natónhnhets. Ó꞉ni kwáh tsi ní꞉ioht ne Rawenni꞉io tsi shokétskwen ne Ié꞉sos, eh tho ní꞉ioht tsi ensehshontiónhnhete. Eh thó꞉ne tewakwé꞉kon raiaʼtákta ienionkwatá꞉tere.

¹⁵ Orihwakwé꞉kon í꞉se sewarihwà꞉ke tsi niiá꞉wenʼen, eh naontá꞉we sénha iakotiohkowá꞉nen aiakoterién꞉taraʼne tsi nithorihwaié꞉ri ne Rawenni꞉io, ne káti nahonwahsén꞉naien tánon ó꞉ni ahonwakweniénste.

Thonwehtahkwénhak Ne Roiá꞉ner

¹⁶ Iáh nowén꞉ton teionkwaʼnikonhróktaʼon. Kwáh skenenʼahshón꞉ʼa ne tewaieròn꞉ke tsi iawenheionhátie, nok kiʼ ne ontionhaʼkéshon kwáh nen né꞉ʼe niaʼtewenhniserá꞉ke tsi iohsatstenhátie.

¹⁷ Kí꞉ken niiorihwá꞉sas kwáh ionkwaweiennén꞉taʼs ne ionhnheʼón꞉we kaiaʼtaterihtshera knaʼ nenʼne akwé꞉kon nonkwaronhiakénhshera iáh thé꞉nen thaʼtaonsakaierontá꞉rake ne raoiaʼtateríhtshera.

¹⁸ Tsi nahoʼténhshon ne taieká꞉nerake iáh nen꞉ne thaʼtekahwíhsatste, nok tsi nahoʼténhshon ne iáh tetewatkáhthos ionhnheʼón꞉we nen né꞉ʼe. Ne káti aorì꞉wa tho nón꞉we niionkwaʼnikonhranentá꞉kon tsi nahoʼténhshon ne iáh tetewatkáhtos.