2 Corinthians 3 - Ohiatonhseratokénti

Rawenni꞉io Á꞉se Tsi Nihoriwison

¹ Sók á꞉re ken tentewataterénsaron? Teiotonhontsó꞉honʼne ken ne iakwahiá꞉tonʼse tánon ó꞉ni í꞉se iehtshihró꞉ri ne ronatiaʼké꞉shon ne í꞉ʼi onkwarihwà꞉ke? Sewatié꞉rens nón꞉kwe ó꞉nenk tsi teiotonhontsó꞉hon ne ahotihiatonhseraién꞉take nahonthrorì꞉sheke oh nahatiiaʼtò꞉ten.

² Nok í꞉se akwah né꞉ne onkwahiatónhsera í꞉ken, ó꞉ni tewakwé꞉kon ne onkweriahnéhshon aiá꞉wens onkweʼtakwé꞉kon aiehtshiwennahnó꞉thahse, ó꞉ni akwé꞉kon ahotiʼnikonhraién꞉taʼne.

³ Akwah tho nisewaiaʼtò꞉tens tsi shí꞉ken ní꞉ioht ne Kerístos ahohiá꞉tonke, tánon í꞉ʼi taionkwaterihwareniá꞉ton. Nok iáh né꞉ʼe teiehtshihiatónhkwen ne tókaʼs ó꞉ni otstenhrà꞉ke nón꞉we nakahiá꞉tonke. Onkweriahnéhshon nón꞉we nisewathiatónnion ne rohiá꞉ton ne Roʼnikonhratokénhti ne ronhnheʼón꞉we Rawenni꞉io.

⁴ Kwáh orihwakwé꞉kon tsi ionkwarihwahní꞉ron. Kerístos shonkwarihwahnirá꞉ti tsi tewakwekonháties ne Rawenni꞉io.

⁵ Iáh teionkwaianerenhserá꞉ien ne aietewathró꞉ri oh nahò꞉ten aionkwaióʼten ne iaʼtetewaiá꞉ti. Rawenni꞉io tehshonkwá꞉wis tsi naʼteiotonhontsó꞉hon ne thé꞉nen naietewá꞉iere.

⁶ Shonkwáhnhas ne tsi teionkwaténhtshon ne kahnáhtshera ahshontión꞉ni ne orì꞉wase raoterihwahseronniáhtshera né꞉ʼe ne Oʼnikonhratokénhti nón꞉we nitiawé꞉non tánon iáh nen né꞉ʼe tho nón꞉we tetiawé꞉non tsi ní꞉ioht tsi kahiatónnion ne kaianerénhsera. Ne aorihwà꞉ke, ne kaianerénhsera ne khók tkáhas ne kenhé꞉ion, nok ne Roʼnikonhratokénhti ne né꞉ʼe tkáhas ne atónhnhets.

⁷ Ne Mahís raoianerénhsera ne khók nen né꞉ʼe tkaháskwe, tánon karihwahnirátskwe ne kenhé꞉ion, iaweronhátien tsi otstenhrà꞉ke nón꞉we ni kahiá꞉ton tánon tsi ionkwaiená꞉ʼon kwáh í꞉ken tsi iohnéhrakwat. Shé꞉kon kiʼ nen né꞉ʼe ne kaianerénhsera waʼkakwé꞉ni ne Mahís tahokonhsastarathé꞉te. Sótsi teioswáthe, ne Israerʼró꞉non iáh tehotikwénion ne iahonwatkáhtho, iaweronhátien tsi iahontahsò꞉ko ne kaiaʼtanehrakwáhtshera.

⁸ Iáh káti ónhte ken ne aterihwahseronniáhtshera thí꞉ken ne Roʼnikonhratokénhti tehshonkwatenniehtén꞉nis sénha né꞉ʼe teionéhrakwat?

⁹ Tóka kaianerenhserí꞉io ne oianerenhseraká꞉ion iaweronhátien tsi tkáhas ne kenhé꞉ion nok ne á꞉se aterihwahseronniáhtshera sénha ioiá꞉nere ne tsi sénha watié꞉sen tsi enhshonkwaié꞉na ne Rawenni꞉io.

¹⁰ Tsi niiorihwí꞉io, thí꞉ken á꞉se aterihwahseronniáhtshera tsi niionéhrakwat. Ne tho oianerenhseraká꞉ion iáh nen né꞉ʼe thé꞉nen tetsó꞉ien ne sénha aonsaionehrakwáhton.

¹¹ Tsi tewatká꞉wen ne kaianerénhsera ne kenikwekonhátie ne kaiaʼtanehrakwáhtshera tánon tsi ontasóko. Nok naʼorenhsarónhtshera ne á꞉se aterihwahseronniáhtshera sénha né꞉ʼe iorihowá꞉nen sótsi iáh nowén꞉ton thakaiaʼtáhton.

¹² Tsi niionéhrakwat kí꞉ken ahskanéktshera né꞉ʼe tionkwá꞉wis naionkwaʼnikonhratshaʼníhton tsi ní꞉ioht tsi aietewatá꞉ti.

¹³ Iáh tesehtshitewaié꞉ren ne Mahís, entewanónhton nahò꞉ten entewèn꞉ron. Tehokonhsastarathéhkwe, nok rotehrhorónhkwe ne oniatará꞉ʼa ne ne tóhsa ahontkáhtho ne Israerʼró꞉non kahswathéhtshera tsi niió꞉re ionsónhton.

¹⁴ Nonkweʼshón꞉ʼa kwáh í꞉ken tsi rotinontsistahní꞉rons, tánon shé꞉kon nón꞉wa knahò꞉ten rotiioʼtá꞉tis nahatiién꞉tereʼne ne orihwí꞉io nó꞉nen iotewennà꞉note ne kaianerenhseraká꞉ion. Kerístos khók enhakwé꞉ni ne ahahrhoróksi tsi nahò꞉ten iáh tehontkáhthos.

¹⁵ Nó꞉nen ne Mahís raoianerénhsera iotewennà꞉note, ronateʼnikonhrhó꞉ron.

¹⁶ Ne kahrhorókton, tánon nó꞉nen kahrhorókhsion ne khók raotirihwà꞉ke tsi nihá꞉ti ne Roiá꞉ner nonkwá꞉ti nienhón꞉ne.

¹⁷ Ne Roiá꞉ner tánon ne Roʼnikonhratokénhti, énskaʼk iéken tánon ó꞉ni né꞉ʼe shaʼniià꞉ta, tánon ó꞉ni ne Roiá꞉ner Roʼnikonhratokénhti né꞉ʼe shonkwahnerénhsions.

¹⁸ Káti ne tewakonhsaʼkéhshon iáh teiotehrhó꞉ron. Iaweʼnéston tsi naʼteioswáthe ne Roiá꞉ner raoiaʼtateríhtshera, tsi ní꞉ioht tsi shontión꞉nis ne Roiá꞉ner Roʼnikonhratokénhti ne sénha taonsakaierón꞉tarake ne Shonkwaiá꞉ner raoiaʼtanehrakwáhtshera.