2 Corinthians 2 - Ohiatonhseratokénti

¹ Eh tho ní꞉ioht tsi iaʼtewakerihwaién꞉taʼse iáh taonsakwanatahrenʼsè꞉ra né ók nakón꞉ni ne aiesewaʼnikonhráksen.

² Aséʼken tóka ensewaʼnikonhráksen. Ónhka ní꞉ʼi entionhkenikonranirate, ne ók wáhi iateʼtsakotatén꞉ron né꞉ne waʼkonhni naiakonikonratsen.

³ Ne aorì꞉wa iaʼkwahiá꞉tonʼse. Iáh tewaké꞉ron aonsakwanatahrenʼsè꞉ra ne ók ne aʼonkonhnien naonkenikonratsen tsi niká꞉ien teiotonhontsó꞉hon naionkatʼtsenhnonhniaten. Aséʼkén tewakehtáhkwen nó꞉nen wakatshennón꞉ni, sewaʼkwé꞉kon ó꞉ni sewatshennón꞉ni.

⁴ Tsi shiakwaiátonhse kwáh í꞉ken tsi oiriowaʼnen tewakanikonrahrakwe, oni wakeriahsanòn꞉wakskwe, wé꞉so waʼtekkáhserenʼne ne tiorì꞉wa tsi iáh té꞉kehre nakonhni naisewanikonratsen, ók í꞉kehre aiesewáttoke tsi niió꞉re tsi kwanorónhkhwa.

Hahonsahontikónhrense Ne Shakotiriwaientatenhni

⁵ Nonwa, Kí꞉ken tsi niká꞉ien wahrón꞉ni ne kaʼnikonhraksénhsera iáh í꞉ʼi khók tehakeʼnikonhrakarewaton, nok sewakwekon waʼtsisewanikonrakarewate, ók iáh akonwakok thóh tehatierase sewakwé꞉kon tsi wesewanikonratsen; khehs tokarat khók nítsion, iawero꞉hatsien, tsiksenhak iáh tekere naʼiʼiateniakatstatʼse.

⁶ Thoʼiaʼtekaieri Kí꞉ken rón꞉kwe tsi ní꞉ioht tsi wahatʼré꞉wahte.

⁷ Ónen, ki aowenk sahtshisewaʼnikónhrhens sahtshisewanikonranirat, oh naiá꞉wen ne tóhsa sótsi ahoʼnikonhráksen tsi niió꞉re ne kwáh ahaʼnikonhrò꞉kten.

⁸ Waʼkwaʼné꞉ken káti ahtshisewahró꞉ri tsi kwáh tókenske ehtshisewanorónhkhwa.

⁹ Ne aorì꞉wa iekwahiatón꞉ni ki aoriwake: ne nakwatenienten oni aonktó꞉kenhse. Sewatewennaráhkwen ken nakerihonnienníhtshera?

¹⁰ Nó꞉nen entsehtshiʼnikónhrhenʼse ónhka nahò꞉ten iehtshiʼnikonhraksà꞉ton í꞉ʼi ki ó꞉ni ensekheʼnikónhrhenʼse. Orihwí꞉io teiotonhontsó꞉hon akwé꞉kon tsi aonsonkeʼnikónhrhen raohén꞉ton ne Kerístos í꞉se sewarihwà꞉ke, í꞉se sewarihónnia.

¹¹ Né: aorihwà꞉ke ne tóhsa ne ótkon né꞉ʼe è꞉neken ahaterihwà꞉rahkwe, ionkwaterién꞉tare wáhi tsi nihaʼnikonhrò꞉ten.

Kór Wathaʼnikonhrhá꞉ren Shiahá꞉rawe Ne Troas

¹² Nó꞉nen shiahá꞉kewe ne Troas ne iaʼkaterihwahnó꞉ton ne karihwí꞉io raorihwaʼshón꞉ʼa ne Kerístos. Ók ná꞉ʼa ne Roiá꞉ner shiaʼtehononhóntion oh naiá꞉wen ne aonterihwahtén꞉ti ne raoʼioténhsera ne tho nón꞉we.

¹³ Nok kwáh í꞉ken tsi waʼtkatateʼnikonhrhá꞉ren aséʼken iáh thiehiiaʼtatshén꞉rion ne onkwatateʼkén꞉ʼa Titus. Ó꞉nenk ki tsi tonsakhenòn꞉weron ne tho nón꞉we thatiná꞉kere tánon Macedonia niahá꞉ke.

Kerístos Tháhas Atehsenniéhtshera

¹⁴ Tenhinonhwerá꞉ton ne Rawenni꞉io, ne se wáhi teionkwateriwashontere oh naiá꞉wen ne aietewakwé꞉ni ahtshitewaioʼténhse ne Kerístos. Rawenni꞉io tehshonkwá꞉wi ne taietewaterihwaré꞉niaʼte ne Kerístos raorihwà꞉ke kwáh ne neh wenhserakon.

¹⁵ Asèken tho nitewaiaʼtò꞉ten tsi ní꞉ioht ne kwáh tewenserákon ne teshonkwahwi Kerístos rahonhà꞉ke ne Ni꞉io, tsitenwaré꞉ni tsi í꞉iens ne onkweʼshón꞉ʼa, ne ne tsi niká꞉ien ne tiakotatrewaton tánon tsi niká꞉ien ne iakoniatatonʼon.

¹⁶ Asèken tsi niiakon ne iakotiaʼtatonʼon, ne ne wenhseratʼsen kenheiat ne nenhneʼe iakoʼnonhwahiakons; Tsi niká꞉ien ne tiontanenonhstaton, ne ne wenserakon tkahas atonhnets. Ónhka káti iakokwénion ne tho nikaioʼtenhserò꞉ten aiakoióʼten?

¹⁷ Iáh wáhi tho tetewaiaʼtò꞉ten tsi nihatiweiennò꞉ten ótiaʼke. Iáh thé꞉nen tekarì꞉wa tsi ní꞉iot tsi ratihá꞉wi ne Rawenni꞉io raowén꞉na tsi shiken niʼiot ne iáh satakenaske atkerontatshera꞉ Ók tsi Rawenni꞉io tehshonkwatenniéhton, oriwi꞉iohonwe tsi nahò꞉ten tewá꞉ton raohenton ne Kerístos, tsi raohnáhtsheras ne Kerístos.