2 Corinthians 13 - Ohiatonhseratokénti

Ohnakénhkha Ne Karehsarónhtshera Tánon Kakwenienstáhtshera.

¹ Ó꞉nen ne kí꞉ken nahsénhaton nienwaterátste ienskwanatahré꞉nahse. Ne káti tsi niwá꞉ton ne Kahiatonhseratokénhti, “Ne kwáh nitkónha tehniʼiáse tehiotonhontsóha nanirihwaní꞉rate tsi iakohní꞉kon.”

² Tewakatonhontsó꞉ni nakwahronká꞉ten tsi nítson ne sewarihwáneren tsi nitiawé꞉non, ó꞉ni ne ronatiaʼkéhshon. Ó꞉nen né꞉ʼe wá꞉ken ne tekeníhaton shaʼkwanatahré꞉nahse, nok shé꞉kon kiʼ né꞉ʼe enskì꞉ron tsi ó꞉nen iáh tho thaʼtétkes. Ne ó꞉ia tho iénske kwáh í꞉ken tsi enkwateʼniakátsten.

³ Kenʼ kiʼ néntiere, ne tsi tesewatonhontsó꞉ni nakarihwahnirá꞉ton tsi Kerístos seʼ riiatatiá꞉se. Nó꞉nen kenʼ nienhtshisewá꞉iere, iáh thahotsiʼióhake. Khé꞉kenk enhtshisewanatónhahse ne raohsatsténhsera.

⁴ Tokénske, ne Kerístos shathonwaʼientenʼnahà꞉ren kwáh í꞉ken tsi rotsiʼioháhkwe, nok kiʼ nón꞉wa eh tho nón꞉we nisrónhnhe ne Rawenni꞉io raohsatstenhserà꞉kon. Í꞉ʼi kiʼ ó꞉ni, tsi raónha teionkwaterihwahsón꞉tere, ionkwatsiʼióha. Nok kiʼ nó꞉nen Corinth nieniá꞉kwe tánon tsi nenkwatié꞉raʼse, kwáh iatentewátieste tsi nonkwa ne sronhnheʼón꞉we Kerístos, tánon ó꞉ni entewaié꞉na ne Rawenni꞉io raohsatsténhsera ne aitewátste.

⁵ Kwáh tokénʼen sewatatkaʼén꞉ion sók eh néntewe ensewarihwatshén꞉ri tóka kenʼ kwáh sewarihwató꞉ken tsi Kerístos ehtshisewaioʼténhse. Orihwiioʼón꞉we sewaterién꞉tare tsi tsonhà꞉ke nón꞉we nihèn꞉teron! Kwáh seh tho rèn꞉teron, nek kiʼ tóka kenʼ iáh thaisewarihwanorón꞉se tsi ní꞉ioht tsi tensewatatiaʼtó꞉rehte.

⁶ Tewakehtáhkwen tsi sewaterién꞉tare tsi iáh seʼ teionkwarihwanorón꞉se.

⁷ Nonkwaterénnaient ne Rawenní꞉ioʼke neh꞉ne tóhsa thé꞉nen taisewaterientawén꞉rie. Ne khók teionkwatateʼnikòn꞉rare ne í꞉se tkariwaié꞉ri tsi naisewátiere, iawerohátien tsi ne iokéntas tsi ionkwarihwanóronʼse.

⁸ Ne khók entewakwé꞉ni naitewáhsere ne tkariwaié꞉ri, tóhsa tetewarihó꞉rok.

⁹ Ionkwatshennón꞉nihak nó꞉nen ionkwatsiʼióha, nok ní꞉se sewahsátste. Tánon kiʼ ó꞉ni ionkwaterénnaien ne í꞉se iaisewatahsónteren ne aisewatehiá꞉ron tsi nonkwa ne tewehtáhkwen.

¹⁰ Ne aorihwà꞉ke wakhiá꞉ton kí꞉ken tsi iáh skátne tetewakwé꞉kon. Ne akarihón꞉ni nó꞉nen ién꞉kewe iáh eh tho niió꞉re tsi thakwatéʼniakátsthahse. Ne énkatste tsi nithatianerenhseráwi ne Roiá꞉ner, neh꞉ne aisewaʼnikonhkhétsko, iáh kiʼ tóka ken neh꞉ne taisewenhná꞉rihte.

¹¹ Nón꞉wa, tewataté꞉ken, ó꞉nen kiʼ wáhi! Sewatshennonníhak, tesewatá꞉ton tsi nisewaweiennò꞉tens. Tesewatateʼnikonhraní꞉rat. Shaʼkarì꞉wa kénhak, skén꞉nen tsi tsónhnhek. Tánon ne Rawenni꞉io, tsi niká꞉ien thatká꞉was ne kanoronhkhwáhtshera tánon ne skén꞉nen, ensewakwekónhake.

¹² Tesewatatahrhó꞉ton tsi naʼtesewátere, wenéhaʼk ne kanoronkwáhtshera. Ratikwé꞉kon ne Rawenni꞉io raotióhkwa iaʼehtshiiatenniéhten ne raotinoronhkhwáhtshera.

¹³ Ne raotén꞉rat ne Roiá꞉ner Ié꞉sos Kerístos, raonoronhkhwáhtshera ne Rawenni꞉io, ó꞉ni ne raotiohkwatokénhti ne Roʼnikonhriióston ratikwé꞉kon aiesewakwekónhake.