2 Corinthians 12 - Ohiatonhseratokénti

Kó꞉r Wahotahsatahrháhse Tsi Nikarihotahsiónkwen

¹ Ó꞉nenk tsi tenkataterénhsaron. Iáh kiʼ nen꞉ne thé꞉nen tekáhsta thaón꞉ton, nok ó꞉nenk tsi enkatená꞉ieste tsi nahoʼténhshon onkwatahsatahrháhse tánon tsi nahoʼtenhshon ne Roiá꞉ner rakerihotahshién꞉ni.

² Shaià꞉ta ne rón꞉kwe riienté꞉riʼne neh꞉ne Kerístos nikwékonʼne. Wahathará꞉tate tánon neh꞉ne ahsénhaton tkaronhiá꞉te niahá꞉re. Tóka kaʼk nón꞉we ne kaié꞉ri iawén꞉re niiohserá꞉ke kí꞉ken eh niiá꞉wenʼen. Iáh tewakaterién꞉tare thí꞉ken rón꞉kwe tóka kenʼ raoierón꞉ta tóka niʼ kenʼ raotónhnhets onthará꞉tate. Rawenni꞉io khók nen né꞉ʼe roterién꞉tare.

³ Tsi nahò꞉ten waʼkì꞉ron, kwáh Rawenni꞉io khók roterién꞉tare tóka kenʼ nètho rón꞉kwe raoierón꞉ta tóka kenʼ kiʼ raotónhnhets onthará꞉tate.

⁴ Nok kiʼ tsi rotharatá꞉ton tánon karonhià꞉ke niahá꞉re. Tánon tho nón꞉we niaʼteiorì꞉wake iahothón꞉teʼne, neh꞉ne sótsi iorihwanehrakwahténion ne aiehtharáhkwe.

⁵ Tehirénhsarons thí꞉ken rón꞉kwe. Tsi nahoià꞉tawen nek kiʼ enkathró꞉ri tsi niwaktsí꞉ioha.

⁶ Tóka ákehreke takataterénhsaron, iáh kiʼ tetewakatónhnhoʼkte. Kwáh kiʼ nek iekénha tsi orihwì꞉io nahò꞉ten waktharáhkwen, nok enkateʼnién꞉ten ne tóhsa sótsi é꞉so akì꞉ron. Tho néntewe iáh ónhka tsi nítson sénha è꞉neken thahakohá꞉ren tsi ní꞉ioht tsi sewatkáhthon tsi niwatieránion, ó꞉ni tsi niwá꞉ken.

⁷ Orihwiioʼón꞉we ó꞉nen né꞉ʼe enktharáhkwe ne iorihwanerahkwahténions wakatkáhthon. Ne aorí꞉wa shaiá꞉ta ne ranesonróhnon raonkwé꞉ta tahotó꞉ri nahakeronhiá꞉kenʼte, neh naontá꞉we tóhsa sótsi akatatonníheke.

⁸ Áhsen niaʼkaiénhte wahiianiténhten ne Roiá꞉ner ne é꞉ren ahahá꞉wihte kí꞉ken karonhiakénhsera.

⁹ Nok tontaharihwaserá꞉ko, “Thok ní꞉kon tesatonhontsó꞉ni ahshá꞉wake ne nakitén꞉rat. Tho nikahá꞉wi akkweniáhtshera kwáh ísi nón꞉we nikáhsatste nó꞉nen ní꞉se iáh tesonhnháhsatste.” Tóka káti ne Kerístos tiókonte tahakwawihátie ne raokweniáhtshera, kwáh akwatshennonniahtsherá꞉kon tsi akatahthá꞉rahkwe tsi niwaktsí꞉ioha.

¹⁰ Kwáh wakatshennón꞉ni tsi waktsí꞉ioha, ó꞉ni ne aionkeʼnikonhrakaré꞉wahte, ó꞉ni aionkkèn꞉ron, ó꞉ni aonkwentorasehátie, tánon aonkeronhiakenhátie. Tóka káti Kerístos raorihónniat ne nó꞉nen waktsí꞉ioha konhnháhsatste káti.

Kó꞉r Iatehshakononhtónnions Tsi Nihá꞉ti Ne Roiá꞉ner Ratikwekonháties Ne Corinth

¹¹ Kwáh í꞉ken tsi teiotenonhwarorí꞉tonte tsi nikatiehrháhkwe. Nok í꞉se iahshékreke ne nátiere. Í꞉se aowenʼkén꞉en ne ahskwatatiá꞉se. Tóka ní꞉ʼi iáh ónhka thé꞉nen teionkón꞉ni, shaʼté꞉ioht kiʼ tsi tho niwakkwénion tsi ní꞉ioht ne kwáh thonátte ne ronterihwahnó꞉tha.

¹² Ne shitewakwé꞉kon, akwé꞉kon kaʼnikonhriiohtsherà꞉kon tsi nahoʼténhshon watióʼtenʼen, ó꞉ni ne kwáh iorihowá꞉nens ne iorihwanehrakwahténion wakotahsion. Neh tsi niweʼnestánion tsi wakerihwató꞉ken tsi katerihwahnó꞉tha.

¹³ Oh ní꞉ioht tsi sénha í꞉se waʼkwakarenráhtshe tsi ní꞉ioht ne ronatiaʼkéhshon ne thonehtáhkwens, kwáh thok khók ní꞉kon tsi iáh tekwariʼwanontón꞉ni naskwakáriaʼkse? Aisewathontátsheke aonsaskwaʼnikónhrenʼse tsi iáh ní꞉ʼi tetewatierí꞉ton.

¹⁴ Kanonhtonniónkwas shé꞉kon iaonsakwanatahrénahse ne ahsénhaton niaká꞉ienhte. Nok shé꞉kon kiʼ iáh tahontʼrhieniasteke. Kwáh seʼ í꞉se tekwatonhontsó꞉ni, nok iáh neh꞉ne tsi nahò꞉ten aisewaién꞉take. Ne ratiksaʼokón꞉ʼa iáh tehonaterihwaién꞉ni naʼshakonatenʼnikòn꞉raren tsi nonkwa ne ronwatiién꞉ʼa, nok ne rotiksténha ronnónha ronaterihwaién꞉ni ne ahshakonatenʼnikòn꞉raren ne shakotiienʼokón꞉ʼa.

¹⁵ Ne káti karihón꞉ni kwáh akwatshennonniahtsherà꞉kon tsi énttion tsi niwátien, ó꞉ni kwáh akonháhtsiwa. Ká꞉ron káti kenʼ nenskwanorónhkwe tsi ní꞉ʼi niiaweʼtowá꞉nen tsi kwanorónhkhwa.

¹⁶ Sewerienʼtí꞉ios tsi iáh othé꞉nen tekwahrhieniaksté꞉tenni tóka ónhka eniaìe꞉ron wakwaʼnikonhrá꞉ten.

¹⁷ Thé꞉nen kenʼ rotiʼnikonhrá꞉thon tsi nihá꞉ti iekheiatenniéhton ne tsonhà꞉ke.

¹⁸ Wahihretsá꞉ron ne Titus ne iatshisewanatahrénahse. Iahiiató꞉ri ne ronatén꞉ro á꞉ne. Iáh ne Titus tetshisewaʼnikonhrahtén꞉ni, iáh ón꞉i ní꞉ʼi.

¹⁹ Eh tho kenʼ ní꞉ioht tsi sewanonhtónnions tsi kwáh í꞉ken tsi tionkwatatéhnhe ne sewahén꞉ton? Orihwí꞉io tsi teionkwatharáhkwe ne Rawenni꞉io, tsi Kerístos seʼ iakwakwé꞉kon. Nok tewatenroʼokón꞉ʼa í꞉se sewarihwà꞉ke tsi niionkwaié꞉ren.

²⁰ Thiwákterons nó꞉nen téntke tóka iáh shaʼonkwaʼnikòn꞉ra thakénhake. Thiwakteronʼón꞉we sewatiaʼkéhshon tensewarihwatirón꞉take, tensewatateʼnósha, tóka ó꞉ni tensewatatenahkhwá꞉se, tóka ó꞉ni ensewatehtshén꞉hake, tóka ó꞉ni taisewatatenowenhtaniónhahse, tóka ó꞉ni aisewatshokentonníhake tánon taisewatateʼnikonhrakaré꞉wahte. Kwáh ó꞉ni thiwákterons nontié꞉renk aisewanaiéhake sók eh naitsonhnhoténhake tsi ní꞉ioht ne tehatinenhrahrí꞉tha.

²¹ Wákterons ne Rawenni꞉io enhakwatehén꞉seron nó꞉nen shé꞉kon ienskwanatahré꞉nahse. Tentewakkahserá꞉rake ne tsi sewatiohkowá꞉nen shé꞉kon iáh tesewahtsakwaríhsions ne sewarihwaneraʼáktshera. Shé꞉kon né꞉ʼe sewaterihwahtentiatonháties tsi nahoʼténhshon ne kentéhsera, iáh teiotkwénies, atehénhsera.