2 Corinthians 11 - Ohiatonhseratokénti

Kó꞉r Tánon Ne Iáh Tehonteriʼwahnothahtsherí꞉ios

¹ Kaská꞉neks naió꞉tonʼon ne ahskwateʼnikonhriióste, shé꞉kon ó꞉ni nó꞉nen kwáh ostónha tewakatenonhwarorí꞉tonte. Naisewathontátsheke!

² Kwáh í꞉ken tsi teiohnó꞉tes tsi ní꞉ioht tsi tewakaʼnikónhrare ní꞉se sewarihwà꞉ke. Nakenoronhkhwátshera tho nitiótte tsi kiʼ nihianorónhkhwa ne Rawenni꞉io. Tewakatonhontsó꞉ni ne iaisewatahsón꞉teren, kwáh ne khók ne aisewarihwatokénhake tsi nonkwa ne Ié꞉sos Kerístos. Kwáh tsi ní꞉ioht ne iakón꞉kwe tsi iakorihwató꞉ken tsi nonkwá ne rón꞉kwe ronwaraʼsestén꞉ni tsi enhotí꞉niake, tánon ó꞉ni shé꞉kon iáh teienahkwaienté꞉ri tsi niió꞉re iaiakó꞉niake.

³ Wákterons tsi niioiá꞉tawenʼen ne Eve nontié꞉renk tho ní꞉ioht tsi teniehtshiʼnikonhrakén꞉ni. Ne ó꞉niare kaʼnikonhrá꞉tha, tánon waharihwakwé꞉ni ne Eve nakarihwanerá꞉ke. Ne nen ne shá꞉ka ne sewanonhtonniónhtshera nontié꞉renk eniehtshiʼnikonhrotá꞉ko, tánon ne enkarihón꞉ni iáh thieskaié꞉ri tsi naonsesewarihwatokénhake tsi nonkwa ne Kerístos.

⁴ Kwahronkaʼtén꞉ni tsi nonkwa ne Ié꞉sos, tánon wesewaié꞉na ne Oʼnikonhratokénhti, ó꞉ni tesewehtáhkwe nonkwaterihwahnotáhtshera. Nok wesewathón꞉tate ne ónhkak akó꞉ren aonsaiehtshiiaterihwahnóthahse thiká꞉te tsi ní꞉ioht tsi ionkwaterihwà꞉note tsi nonkwa ne Ié꞉sos. Ó꞉nen kiʼ wesewatateweiennén꞉taʼne thikaʼnikòn꞉rate aonsesewaié꞉na, ó꞉ni ne aontesewé꞉taʼwe thiká꞉te ne aterihwahnotáhtshera.

⁵ Í꞉kehre kwáh ónhte eh tho niwakkwénion tsi ní꞉ioht thí꞉ken ne kwáh ronterihwahnotaʼtsheráksens ne shakonathaharakwá꞉tha.

⁶ Tóka nón꞉wa iáh eh tho teioiá꞉nere tsi tekatá꞉tis tsi ní꞉ioht ne ronnónha, nok kwáh kiʼ eh tho niwakaterién꞉tare. Tánon kiʼ ó꞉ni ó꞉nen kwáh teioswáthe tsi sewateʼnestén꞉ni ne tsonhà꞉ke.

⁷ Tewakaterienʼtawénrieʼon ónhte kenʼ tsi ehtà꞉ke wakatatón꞉ni tánon tsi naʼkwakwénienste tsi waʼkaterihwahnó꞉ten ne Rawenni꞉io raoterihwahnotáhtshera? Ne kwáh iáh thé꞉nen teiokáraien!

⁸ Tsi náhe sewentióhkwakon nón꞉we niwatióʼtehkwe, ne aktéhshon nonwéhshon tkentiohkwakè꞉ron, ne thonehtáhkwens neh ionkkáriaʼkse, aiaié꞉ron tsi ní꞉ioht ne tekheiatoktahkwaniháhkwe, ne naón꞉ton ní꞉se akwasnié꞉nen.

⁹ Shé꞉kon ó꞉ni thé꞉nen tewakatonhontsó꞉ni, iáh tewahkeron tahwaʼnikonhrá꞉ren. Kwa orihwí꞉io, tóhkara nihá꞉ti ne Roiá꞉ner ronwaióʼtenhse ne Macedonia nón꞉we nithoné꞉non taionkhawíhten tsi nahò꞉ten taonkwatonhontsóʼni. Kwáh iáh thahò꞉ten tekwatsteʼtén꞉ni tsi nitiawé꞉non, tánon iáh ó꞉ni nowén꞉ton thakwatstè꞉ten.

¹⁰ Tsi niiorihwiioʼón꞉we tsi Kerístos ritharáhkwen, kwáh iáh ónhka ne Achaia thaiekwé꞉ni ne taiónktaʼste, ne tsi iáh tekwakaraién꞉ni tsi kwaióʼtenhse.

¹¹ Nok iáh kiʼ nek té꞉ken tóka ken iáh takwanorónhkhwa꞉ke? Rawenni꞉io roterién꞉tare tsi kwanorónhkhwa!

¹² Ienkatahsónteren tho nenwatierenhátie tsi nón꞉wa nikatiéhrha, ne akakwé꞉ni ne ronatiaʼkéhshon ne iáh tehonterihwahnotahtsherí꞉ios ne tóhsa ahonatehsennaién꞉taʼne ne tahontaterénhsaron tánon ahontónheke neh shaʼonkwaioʼténhsera.

¹³ Thí꞉ken ronnón꞉kwe iáh tokénske té꞉ken tsi ronterihwahnó꞉tha, iáh ronnónha tehshakoiaʼtarákwen ne Rawenni꞉io. Iáh thiehatiiaʼtaié꞉ri ne ahonterihwahnó꞉thake tsi nihonnowén꞉tha ne raotiiohténhsere, tánon tsi nihontiéhrha onʼnaiá꞉wenʼne tho nihatiiaʼtò꞉ten tsi shí꞉ken ní꞉ioht ne kwáh Rawenni꞉io aontahshakotenniéhton ne ahonwaterihwahnóthahse ne Kerístos.

¹⁴ Kwáh iáh kiʼ teionehkhé꞉rent! Shé꞉kon kiʼ ne ranehsonhró꞉non enhakwé꞉ni ne raronhiaʼkehró꞉non ahatatón꞉ni ó꞉ni kaswathéhtshera akénhake.

¹⁵ Kwáh káti iáh thé꞉nen teiorihowá꞉nen tóka ne raonkweʼtaʼshón꞉ʼa ne ranehsonhró꞉non neh ronatkonwarò꞉rokston ne karihwiióston akonwaioʼtén꞉shehke. Nok kiʼ tsi ieiótoʼkte tenhonateriʼwaserakwáhse tsi nihatiioʼtenhserò꞉ten.

Kó꞉r Raronhiá꞉kens Tsi Rateriwanóhtha

¹⁶ Iáh thaʼtewakatonhontsó꞉ni ónhka tsi nítson aionnonhtonniónhwe kwáh tewakatónhnhoʼkte, á꞉ʼnion kiʼ tewakatónhnhoʼktak tánon ostónha akenaié꞉hake.

¹⁷ Kí꞉ken tsi nahoʼténshon katónnions nón꞉wa iáh eh tho té꞉ioht tsi nihakhró꞉ri ne Roiá꞉ner tsi nahò꞉ten akì꞉ron kí꞉ken naʼorihò꞉ten taiontaterénhsaron, ne kiʼ ne kwáh eh tho ní꞉ioht tsi wákthare tsi ní꞉ioht ne thotónhnhoʼkte.

¹⁸ Nok tsi náhe ronatiohkowá꞉nen tehonataterénhsaron, tsi neh nihatiiéhrha ne ronnonhontsaʼkehró꞉non, tho kiʼ ó꞉ni ní꞉ʼi néntiere.

¹⁹ Í꞉sewehre kwáh í꞉ken tsi sewattókhas, kwáh ká꞉ti thisewaʼnikonhrí꞉io tsi thiiehtshiién꞉nis ne tiakotónhnhoʼkte.

²⁰ Thiiehtshiién꞉nis akò꞉ren aiehtshiianerenhserónnien, ók ó꞉ni taiehtshiieʼtáhkwe, ók ó꞉ni thiaiehtshiionhnharíkhon, tánon ó꞉ni aiehtshiʼnikonhrakaré꞉wahte.

²¹ Katéhens nakì꞉ron tsi niionkwahtsheiaróntahkwe ne tho naionkwaié꞉ren! Tóka rotikwénion ne tahontaterénhsaron, tho ó꞉ni ní꞉ʼi niwakkonhsahní꞉ron ne takataterénhsaron.

²² Tsi nihatinekwenhsò꞉tens rón꞉ton kenʼ Hebrew nahatiiaʼtò꞉ten? Í꞉ʼi kiʼ ó꞉ni. Tsi nonkwa ne karihwiióston Sitaeró꞉non kenʼ rón꞉ton? Í꞉ʼi kiʼ ó꞉ni. Abraham ken nón꞉we nithonathwatsirí꞉non? Í꞉ʼi kiʼ ó꞉ni.

²³ Kerístos kenʼ ronwaió꞉tenhse? Tho ní꞉ioht tsi wákthare tsi ní꞉ioht ne thotónhnhoʼkte. Nok sénha í꞉ʼi kehnahtsherí꞉io tsi ní꞉ioht ne ronnónha! Sénha í꞉ʼi é꞉so watióʼtenʼen, sénha í꞉ʼi é꞉so wakatehnhó꞉ton tsi ní꞉ioht ne ronnónha, sénha í꞉ʼi é꞉so ionkenónhware, é꞉so iorì꞉wake seré꞉ka aonkihé꞉ion.

²⁴ Neh shaʼakwaià꞉ta Sitaeró꞉non wísk nieioiénhton ionkenónhware, né ne áhsen niwáhsen tánon tióhton niiorì꞉wake nó꞉nen énska ienkaiénhte.

²⁵ Áhsen nieioterátston káhnia iontiénhton ne Romeʼró꞉nons. Énska ieioterátston ionkenenió꞉ien, neh naonkerióhton. Áhsen nieioterátston waʼonkwathonhwaríhsien, ó꞉ni sewahsón꞉ta tánon sewenhní꞉sera awèn꞉ke wakeskoʼkéhrha.

²⁶ Iotkaʼtátie tsi ní꞉ioht tsi tekatawénries eh konhnháhere kaniataraʼkéhshon, tsi nonkwa ne ratinénskwas, tánon ne neh shaʼakwaià꞉ta, ó꞉ni ne iáh tehatishitaʼehró꞉nons, iotterón꞉tonʼne ne kanatakónhshon, neh shá꞉ka ne kahentakeʼkó꞉wa, ó꞉ni ne kaniataraʼkeʼkó꞉wa, ó꞉ni ne iáh teiakorihwiióston.

²⁷ Ioioʼtenhserahní꞉ron. Iotkaʼtátie ó꞉ni iáh tewakí꞉taʼs, katonhkáriaʼkskwe tánon wakeniaʼtá꞉tens. Iotkaʼtátie iáh thiaʼtekaié꞉ri tsi niwakékhwaien, ó꞉ni tsi nón꞉we nakateʼkwáhsen, ó꞉ni ne akwatserónniat naontiatatharíhen.

²⁸ Ne kén꞉en iotiéhton, kwáh thiaʼtewenhniserá꞉ke tsi tewakatateʼnikónhrare tsi iatekheianonhtónnions nakohrénhshon ne tiakawehtáhkwen.

²⁹ Neh nó꞉nen ónhkak iáh teiéhsatste, thó꞉ne kiʼ tho ní꞉ioht tsi kattókaʼs tsi waktsí꞉ioha. Nó꞉nen ónhkak karihwanerenʼaktsherá꞉kon niaʼontatiaʼténhawe, kwáh tioʼtaríhens ne akwerià꞉ne tsi niwakeʼnikonhráksens tánon wakswá꞉tani.

³⁰ Tóka iáh thiá꞉tiere ne takataterénhsaron, neh kiʼ tenkerénhsaron tsi nahò꞉ten wakeʼnestén꞉nis tsi iáh tekéhsatste.

³¹ Ne Rawenni꞉io raónha ne kaʼníhsera í꞉ken ne Roiá꞉ner Ié꞉sos ronwahsennaiénhshek tsi nén꞉we! Roterién꞉tare tsi iáh tewakanowénhton.

³² Damascus shiehé꞉kes, ne rakó꞉ra roiaʼtanónhnhe Ronontí꞉io Aretas waʼtehshakótaʼste ne ratinónhnhe tsi iotenʼenhrakahrón꞉ton ne kaná꞉takon naiontié꞉na.

³³ Nonkwatenroʼshón꞉ʼa athérakon waʼontiaʼtíta tánon tsi iohsonhtaká꞉ronte nón꞉we naʼtiontiaʼtohétste tsi taionkwatsnenhtáhkwe tánon sahiʼniá꞉kenʼse naiontié꞉na.