2 Corinthians 10 - Ohiatonhseratokénti

Kó꞉r Taháhne Raoʼioténhsera Tsi Nonkwá꞉ti ne Kerístos

¹ Káton ken íhsehre wakátshen nó꞉nen skátne í꞉tewes nok kwáh wakeʼnikonhráhsatste nó꞉nen í꞉non niió꞉re ítkes? Ánio kiʼ satahónhsatat, nek í꞉ʼi ó꞉ni tho niwatianerenserí꞉io, ó꞉ni keriasí꞉io tsi ní꞉ioht ne Kerístos.

² Ótiaʼke ión꞉ton kwáh eh tho nitewaweiennò꞉ten tsi ní꞉ioht ne ronnonhontsaʼkehró꞉non. Ne káti nó꞉nen ién꞉kewe, í꞉kehre tóka ó꞉nenk tsi enwakhní꞉ronke, ó꞉ni eniohsátsteke tsi nahò꞉ten enkhehró꞉ri. Ahsathontátsheke káti tóhsa ní꞉se eh tho nakoniatié꞉raʼse.

³ Tsi kenʼ nón꞉we nitewanákere ne kén꞉tho ionhontsá꞉te, nok iáh kiʼ né꞉ʼe shetiónhnha ne ronnonhontsaʼkehró꞉non.

⁴ Tókas ó꞉ni entewaterí꞉io, iáh kiʼ né꞉ʼe tetewátstha ne onhontsaʼkéhkha ionteriiostáhkhwa. Ne khók tewátstha ne Rawenni꞉io raohsatsténhsera, ne khók kakwénies tekahrí꞉tha ne iorihwahní꞉rons. Tewarihwahtón꞉tha ne aterihotahrhóktshera.

⁵ Ne nen né꞉ʼe shá꞉ka kenʼ norihwakwé꞉kon ne kanaiéhtshera tsi aʼé꞉ren akahawí꞉ton tóhsa ne akarihón꞉ni ne iáh thahonwaientéhrhaʼne ne Rawenni꞉io. Ieiakhiʼnikonhrénhas nonkweʼshón꞉ʼa nahonwawennaráhkwe ne Kerístos.

⁶ Ne nó꞉nen eniakwatkáhtho kwáh ní꞉se ieiokontáhkwen tsi ehtshisewawennaráhkhwa ne Kerístos, enionkwatateweiennentá꞉ʼon ne ahiakhiréwahte ónhka ne iáh thahonwawennaráhkwe.

⁷ Kwáh ioianeréhak tsi tesewatatiaʼtó꞉ret. Tóka ísewehre tsonhá꞉ak sewakwé꞉kon ne Kerístos, shé꞉kon sasewanonhtonnión꞉ko. A꞉seʼken ó꞉ni ní꞉ʼi iakwakwé꞉kon ne Kerístos tsi kiʼ ní꞉se ní꞉ioht.

⁸ Tóka nón꞉wa sótsi ísi nón꞉we tsi nikatá꞉tis tsi ní꞉ioht tsi thakehsatstenhserá꞉wi ne Roiá꞉ner ne né꞉ʼe akwah iakeʼnéste tsi ní꞉ioht nakwakarón꞉ni. Iáh kiʼ nen né꞉ʼe tekatéhens ne takataterénhsaron.

⁹ Nok iáh kiʼ ne tewakonniá꞉ton tsi iaʼkwahiá꞉tonse tóka ken akwaʼterónhkwen.

¹⁰ Sewatiaʼkéhshon sewá꞉ton, “Ne Kó꞉r raohiatonhseraʼshón꞉ʼa kwáh í꞉ken tsi karihwahʼsáhts꞉te. Nok kiʼ nó꞉nen tetshitewakánere, iáh thé꞉nen teháhsta ó꞉ni iáh thé꞉nen shaʼtékena nahò꞉ten enthatá꞉ti.”

¹¹ Nonkweʼshón꞉ʼa kwáh ioiá꞉nere tsi ahotiʼnikonhraién꞉taʼne nó꞉nen skátne entewé꞉sheke, kwáh eh tho ní꞉ioht tsi enkaterihwahtentiá꞉te tsi niwakhiatónnion.

¹² Kwáh iáh othé꞉nen ne téiakwehre ne ronnónha né꞉ʼe taontaiakwatateʼniéntenste tsi nihá꞉ti ne sótsi tiótte tsi ní꞉ioht tsi rontatanonhtonnión꞉se! Nok kwáh í꞉ken tsi teiotenonhwarorí꞉tonte ne ní꞉ioht tsi ahontatkaʼén꞉ion!

¹³ Iáh thé꞉nen nahò꞉ten thataiakwataterénhsaron tóka iáh thé꞉nen teió꞉ien ne aiakwathróriaʼte. Né꞉ʼe khók iakwathroriá꞉tha tsi nikaioʼtenhserò꞉tens ne Rawenni꞉io tehshonkwatenniehtén꞉ni, eh tho ó꞉ni ní꞉se sewaià꞉tare.

¹⁴ Iáh kiʼ ísi nón: teiakwathroriá꞉tha tsi naʼteiotonhontsó꞉hon. Ne seʼ tkwahawihtén꞉ni ne Kerístos raoterihwahnotáhtshera.

¹⁵ Iáh ne teionkwatharáhkwen oh naiakotié꞉ren notiaʼkéhshon, tsi ní꞉ioht ne tho ó꞉ni naionkwatié꞉ren. Nok ne kiʼ nakwaskanéktshera ne aiesewahsátsteke tsi tisewehtáhkwen, ne kiʼ ne sénha taskwarénhsaron tsi niionkwaióʼtenʼen ne tionhaʼkéhshon.

¹⁶ Eh thó꞉ne enwá꞉ton ieniehthiiaterihwahnóthahse ne karihwí꞉ios ne akté꞉shon nón꞉we thatinakerénion tsi nón꞉we ne aréhkho thieiakoteriʼwà꞉note, nok iáh kiʼ í꞉ʼi thaionkwatahshé꞉taʼse ne akó꞉ren raotiioʼténhsera.

¹⁷ Ne Orihwatokénhti wá꞉ton, “Ónhka í꞉ienhre thé꞉nen taierénhsaron né꞉ʼe teierénhsaron tsi nahò꞉ten roióʼtenʼen ne Roiá꞉ner.”

¹⁸ Enwá꞉ton ne í꞉se tenhsataterénhsaron, nok né꞉ʼe khók watahsé꞉tas tsi nahò꞉ten Roiá꞉ner enharihwahní꞉rate.