1 Timothy 6 - Ohiatonhseratokénti

¹ Tsi nihiákon ne ienáskwa ónenk tsi kwáh iehiokontákwen enhonwatirihwahkweʼniénstake ne ronwahtínas, neh꞉ne tóhsa ónhka thènen wahétken ahiontátiaʼthe ne Rawenni꞉io raosénna ó꞉ni tsi ní꞉ioht tsi iethirihonniénnis.

² Neh rohtiriwiʼióstons neh ronnonkwetaʼiénton ne rathináskwas iáh thatehiothonwentióʼon nahonwahtikénron, asèken thonnhetákwen sehnónnehe. Khék, sénha aioianeréhake tsi nahonwahnatiérase, tioríhwa tsi niháti neh꞉ne rohtihiatakénas tsi nihotihiótens ne rathináskwa kwáh nònʼne thoʼnhetákwen ó꞉ni sakotinorónkwa. Ónenk tsi enserihónnien tánon saterihwanóten kíʼ nahorihoténsons

Onówen Karihonniennítsera Tánon Noriwí꞉io Aktiokowáhtseras

³ Ónhka nóia ní꞉ioht tsi ensakotirihónnien naʼteriwahnothátsera tánon iáh thènen oríhwah tarónni ne kwáh tóhʼkenske neh꞉ne Sonkwaianer Ié꞉sos Kerístos rahowennahókons tánon ó꞉ni ne karihonniennítsera nón kwariwiʼiosthóntsera

⁴ neh rothateweraʼten kanaiésera tánon kwáh iáh thènen tehotheriéntareh. Kwáh nek raskanéktha ne tahariwahkéna ó꞉ni tahariwahwénron tsi nókwa ne owennasónhas, tánon neh kí꞉ken tkáhas ne kanosástsera, aterihotarótʼtseras, ahiontatenikonráksaʼte, karihwáksen tsi tetsiakonikónrake,

⁵ tánon tiókonte tehotirihwakénen tsi nikáien ne iáh tiehatinikonraiéri tánon iáh tesathíhawe ne karihwakwarishióntsera. Rónnereh ne kariwiʼiostóntsera thóh néntewe tsi enhotikwátseʼne.

⁶ Teioswátʼthe, ne kariwiʼiosthóntsera tsi kwáh ionkwahkwatsesténhnis, tó꞉ka hionkwerientí꞉ios tsi nahoténson hionkwáien.

⁷ Nahóten tsionkwáha ne tsi ionwentsiáte? Iáh thènen! Nahóten ahitewahkwéni naitewaiákenweh ne tsi ionwentsiáte? Iáh thènen!

⁸ Éhthoh káti, tó꞉ka hionkhwákhwaien tánon hionkwatakweʼniá꞉ien, ahówenk ne iatakaiérike nonkwariwáhke.

⁹ Onk tsi nihiákon ne꞉ne íʼienreh nahiakokwátse꞉ne iehiehiátens nahiakonikonrotáko tánon iehiathótares tsi wahterístaien ne wéso nononwahroríta tánon ne iakokaronniátha naskanéktseras, ne tiakohiathéntha nahiakokarónni ó꞉ni kariwaiesáhtsera.

¹⁰ Ne iewistanorónkwa ne kaiatakweʼní꞉io ne iatehioriwáhke ne kariwáksen. Ótiakes thóh nióre tsi tehotisteríhens nahatiʼiéna kwáh ahéren ronéhthon ne tewetákwen tánon iawehthowánen ne kanikonrakséntseras né tehonerhiasharíhton.

Kwáh Tehiakoiatathokénton Ne Karihonniennítsera

¹¹ Onk kíʼ níse, Rawenni꞉io rahonkwéta, satsiatatískwak akwékon kíʼ nahorihoténsons. Sewaskènha ne karihwakwarihshióntsera, karihwiʼióston, tewetákwen, kanoronkwátsera, taiewisátstheke, tánon weriasí꞉io.

¹² Iatesatátʼtsahak tsi skát꞉ke tsi nathesaréron ne tewetákwen, tánon ne teshaténtsa ne ionnheʼónwe atónnhets ne iateshiá꞉ti; Asèken ne kí꞉ken ne iónnhe nètho Rawenni꞉io iahianáthon nónen kwáh thóh kén꞉en sahserihwanírathe tsi tisetákwen tsi nihiakotsiokowánen iakotahónsathekwe.

¹³ Rahohénton ne Rawenni꞉io, tsi nikáien ne rónhnhets noriwakwékons, ó꞉ni rahohénton ne Ié꞉sos Kerístos, tsi roriwatóken roriwaniráton tsi tawethákwen rahohénton ne Pontius Pilate, wakonrórih

¹⁴ nasatewénnaraʼkwe tsi niʼieshanáʼon ó꞉ni kwáh iorihwatokénhak tsi sateweiénton tsi nióre entewenniseráteke nónen ne Sonkwaianer Ié꞉sos Kerístos téntre.

¹⁵ Tsi nensokétote ne entkáhawe tsi nenhiowistáheke ne Rawenni꞉io iatenhorihwaiéntaʼse, ne rohiatanerákwak ó꞉ni rahónhak khók ne Rosastenserowánen Rawenni꞉io, ne Sakonontí꞉io ne Rontinontí꞉ios ó꞉ni né Sakoiáner ne Rotiʼiáners.

¹⁶ Kwáh rahonhatsíwa khók ne ronnhehónwe; kaskwatʼthetserákon nónwe nihénteron ne꞉ne iáh ónhka taiekwéni ne aktahaiénthe; Kwáh iáh nonwénton ónhka tehonwáken; tánon iáh ó꞉ni nonwénton tahónton nónka ahonwáken. Rahónha tahonwarénsaron ó꞉ni tsi ionnheʼónwe ne kashatsʼténsera! Éhʼtho naiáwenʼne.

¹⁷ Sherórih kí꞉ken nahorihoténsons tsi niháti ne rotikwátses ne kén꞉en ionwentsiáte tó꞉sa rotatonníhak, tó꞉sa ne rathiniahesénhak nahóten ne iáh tehioriwatóken tsi ní꞉ioht ne aktiokowátseras, ók Rawenní꞉ioke nónwe nihatiniahesénhak, kwáh rahotsennonniatserákon tesonkwáwis tsi nahoténsons tahionkwatonwentió꞉nike naitewatʼtsennonniátaʼkwe.

¹⁸ Ietʼtsiretiáron nahotihiánerehke, ahiokwátston tsi ahotihióten ne kahiotenserí꞉ios, thotirihwaiérik ó꞉ni ahonatateweiennentahónhake tahontatsniénon nakorénsons.

¹⁹ Ne nen꞉ne ne kwáh enhioriwahníronke tenkenstenrótake tsi enhontateweientónhase natiokowátsera tsi niahawenonhátie. Tánon etʼthóhʼne enhatikwéni tahonténtia natónnhets ne kwáh oriwí꞉io iónnhe.

²⁰ Timothy, senónstat tsi nahóten iesathakweniaiénni. Satiatatískwak ne kariwaiesátsera tsi nahiontáti ó꞉ni ne tehiotenonwaroríhtonte takariwakénen tsi nahóten ne iáh tetkaiéri nótsakes nónkwe ienáthonkwe “Atʼthokhátsera.”

²¹ Asèken ótiakes rónton ratíʼien, tánon neh iorihonníʼon rotihiatatónʼon tsi nòkwa ne tewetákwen. Ne Rawenni꞉io rahoténrat sewakwékon sewakweʼkónhak.