1 Timothy 5 - Ohiatonhseratokénti

Tsi Nihotiʼhiotenserótens Tsi Nòkwa Ne Thonetákwen

¹ Tóhsa ietʼtsihiatʼthéten ne thotíʼions, nók thóh ní꞉ioht tsi iatiewénnarat tsi shíken ní꞉ioht ne raónha iaʼníha akénhake. Neh kenʼnithotiʼiónsas thóh ní꞉ioht tsi teietʼtsikánerat tsi shíken ní꞉ioht ne sewatatekéna akénhake,

² neh tiotíʼions tsi neh ní꞉ioht ne ieʼtsinisténa akénhake, onh ne kenʼnitiotiʼiónsas tsi ní꞉ioht ne sewahtenoséha akénhake kwáh sewerhiasakwekon akénhake.

³ Ietʼtsiʼienésthe ne kakwenienstátsera ne ionatheréhons tsi kwáh iatehiothihiatíston.

⁴ Onk tóhkaʼ ne iotheréʼons iowíraien tóhkaʼ ó꞉ni iotherésen, neh kwáh tiotserentákwen nakothirihwahiériʼthe tsi naʼtehiothonwentióhon nahothiʼriwiʼiosthóntseras tsi nòkwa ne ahothiwáhtsires tánon neh kí꞉ken enkarihónni nahonsahonwahthikárhiakʼse ne ronwahtiʼienha ó꞉ni ne sakotisótʼtha, tsioríhwa tsi neh kí꞉ken rawerentiʼióstha ne Rawenni꞉io.

⁵ Neh ioteréʼons nahónhak khók íken, iáh ónhka tehióʼien nakonwaterihwatsʼterísthaʼse, Rawenniʼióke nónwe nakáien nahorahrátʼtsera ó꞉ni tiókonthe ioterénnaien tsi nihʼwahsontathénions tsi niwenniserésons ronekénnis ne rahoienawahsétsera.

⁶ Onk ne ioteréhʼons neh iononwahróri ónenk nèn꞉ne iawenhéion iawerohátsien tsi séhkon nihiónnhe.

⁷ Taietʼtsíhion kíken nahorihoténsons, knaʼnèn꞉ne iáh ónhka takonwathiriwatʼtsénriahse.

⁸ Onk tóhkaʼ ónhkak iáh tathesakotirihwásnieʼse ne rontátenons, sénha ne kwáh ronónha rahothiwáhtsireh, wahkonwathonníhase ne tewethákwen ó꞉ni sénha ronónha rathiweniennáksen tsi ní꞉ioht ne iáh tetiakawetákwen.

⁹ Tóhsa ietʼtsisénnaren ne ionaterèʼons tsi nónwe nikontisennarónnion ne ionaterèʼons tsík enhionathohétston ne iáh-iak niwáhsen nahontahiotíhionke. Tánon ó꞉ni énskak khók ahiothiniákonke

¹⁰ tánon konwatiʼientéri tsi kontiweienʼní꞉io: nètho hiónkwe tkariwaiéri tsi iakawehiáron nakohioʼokónha, iakohonkaráwi ne iakoiesahonhátieskwe ne ahonónskon, tánon tehiakhoróhton nótiakes ne iakorihwiʼióstons, iakoiénawaʼse nónka tehiakonikónrare, tánon iathehiotatʼtiaháton iohióthe ne ioiánere.

¹¹ Ónk tóhsa ietʼtsisénnaren ne kenʼnitiotiʼiónsas; tioríwa nónen nahonaskanéktsera enkakwéni nahionónnien nahonsahiotíniake, enhonwahtiathontákwen ne Kerístos,

¹² tánon káti enhiotínike tsi watkontíhiake tsi nitʼthonwahrahratsʼténni nonhénton.

¹³ Tánon ó꞉ni wahkontirén꞉na nakontenniseratiésaʼthe tsík non iehiotinonsokàton; onk sénha wahétken, wahkontirén꞉na nakontsiokentónni ó꞉ni nakontiritsʼtónni, neh iotitarákwen nahóten ne iáh tathehiothonwentióʼon.

¹⁴ Káti neh akeráko nètho nitiotihiónha nahiotíniake, iotiwiraiéntan, ó꞉ni kontirihwatsʼtéris tsi hiotinonsótons, neh꞉ne tóhsa ahonatesennaiéntaʼne ne hionʼkhísons ne thènen wahétken ahionkhiʼiénhase.

¹⁵ Asèken ónenk tóhkaʼrah nikónti ne ionateréʼons tehionakʼkarathénion tánon ótkon ahonwásereh.

¹⁶ Onk tóhkaʼ ónhkak ne iorihwiʼióston nahowatsiráke ionathereʼónskon, ioterihwaiénni ne tahiakorihwásnieʼse tánon tóhsa neh iakorehniakétat ne tiakawetákwen, neh nahónton ahiakoiénawaʼse tsi nikáien ne onónhak khók iathetionatathénron ne ionatheréʼons.

¹⁷ Neh rathiretsiárons ne rathihiotenserí꞉ios tehiotonwentióʼon nahonwathikenʼénhionse tsi tehonaténtion tahontsiáseren ne rahothikarhiáktsera, sénha tsi nikáien ne kwáh ronakwísron tsi ronterihwanót꞉tha ó꞉ni tsi sakotirihonniénnis.

¹⁸ Asèken noriwahtokénti wáton, “Tó꞉sa skwenhtórok ne tehonakáres tionhnónskwaron nó꞉nen tiatanihiónte tsi swáheks nonátsa,” ó꞉ni “Neh Rannhátsera ahówenk nahontahónhion ne rahokarhiákʼtsera.”

¹⁹ Tóhsa sewatahónsatat neh thènen ahonwarihwàro ne rahretiárons nek thokàken ishinónwe ne tehionkwétake aierihwanírathe.

²⁰ Onkwétahke ietʼtsihiatʼthéten tsi niháti ne ratirihwáneraks, ehnahóntawe ne rohnatiakhéson nahothiterónne.

²¹ Rahohénton ne Rawenni꞉io ó꞉ni ne Kerístos Ié꞉sos tánon ne rotithokentísons ratironhiakerónons kwáh tewakenikonrakontákwen iakonʼnáton nasatewénnaraʼkwe kí꞉ken karihonniennítseras neh kwáh tóhsa thènen aisatʼkenronniákskon tóhkaʼ ó꞉ni tsi nashátiere nahontaseriwáhrakwe.

²² Kwáh tóhsa tesasteríhen ne tasehianisnonsahérase nónkwe nasehiataráko nahothihióten ne Roiá꞉ner rahohioténsera. Tóhsa ken nátier nakóren akorihwaneráktseras; kwáh iekénhak tsi satatennikonráhrak.

²³ Tóhsa onékanos khók snekírah, onstónha otsítsia snekírah naisaiénawaʼse niasanékwaʼne ne sákʼkwha, neh tsi nihiotʼkáte sanonwáktani.

²⁴ Nakorihwaneraháktseras nonkwesónha tsi nihióken nahiontʼkátho, tánon ne rahotiriwaneraháktsera ne enkahénthe tsi natenhonwathihiatórethe; onk nakorénsons akoriwaneraháktseras onakènke nen꞉ne enhiontkátho.

²⁵ Kwáh ne sahoríhwa ne kahiotenserí꞉ios hióken nahiontkátho, tánon kíʼ ó꞉ni tsi nikáien ne kwáh iáh tewènhe iáh tahónton nahonséhtonke.