1 Tiér 4 - Ohiatonhseratokénti

Teiakontonnathénion

¹ Tsi sénhak ne Kerístos rohronhiakén꞉en ne raieróntake, í꞉se ó꞉ni kwáh ahówenk naisewatatesatsʼténseron ne kwáh neh sáka akénhake nanontonnióntsera tsi neh niʼoiéntakwe ne rahónwa; tioríwa nónka ne ieiéronke non nihiakoronhiakén꞉en iáh ne ónen tetiontsterístha ne kariwáneren.

² Kwáh kén꞉en ienwatásawen, ne káti, kwáh tehiotonwentióʼon tsi nikaríwes sékon ne kén꞉en ohontsiáke ensónnheke nehne Rawenni꞉io rahonikónra ahontesaniarhótarohke tánon iáh neh tsi nahoténsons nonkwesónhas tehiakotonwentiónni.

³ Iatekaiéri tsi nikaríwes tsi nitsawénon thóh nishérakwe tsi nithatinónwes ehʼnahatí꞉iere ne iáh tehotiriwiʼióston. Tsi tiónnhe thóh nónwe niʼioiesahonhátieskwe ne iáh teiotkwéniens, kentétsera, ratinekakástha, ononwarorítha, ahienenrónni naienekí꞉ra, tánon tsi naʼtehiothenonwarorítonte nakonwasénnaien ne kaiatónni.

⁴ Tánon nónwah ne iáh tehotiriwiʼióston tsi nenhotineráko nónen níse iáh taseiatiátarase skátne tsi nihotinonwaróri tsi tseiawén꞉en tsi rohnònnhe, tánon sók kíʼ entsesakenrenserónni.

⁵ Nók kíʼ ónenk tsi Rawenni꞉io tenhonwariwaserákwaʼse tsi nihatiweiennótens, tsi nikáien ne rotateweiennentáʼon ne tasakohiatórete ne iakónnhe ó꞉ni ne iakawenhéion.

⁶ Neh aoríwa ne kariwí꞉io iontateriwanótani nónne ne iakawenhéion, tsi nikáien ne tehonwatihiatoréton tsi nihonónnhekwe kwáh tsi ní꞉ioht nakorénson tsi tehiontatiatoréton; tsi ronwanateriwanótani nekáti nahónton séhkon onikónrake nónwe nahonnónnheke tsi ní꞉ioht tsi rónnhe ne Rawenni꞉io.

Ioiánere Tsi Ronsárine Ne Rawenni꞉io Rahotathawítseras

⁷ Tsi ieʼiotókʼte noriwakwékon ákta íwes. Ónenk tsi í꞉se entisewatatheniarótaroke ó꞉ni sewatateweiennentahónhak, naisewakwéni aisewaterénnaien.

⁸ Ne kwáh éneken iothohetstákwen, tasewanikonrakontakwénhak tsi tesewatatenorónkwak, tioríwa kanoronkwátsera karorótstha ne wéso kariwánerens.

⁹ Tesewatatenonhóntsiens ne tsi sewanonshótons tóhsa thènen sewariwakátat.

¹⁰ Tsi sewahiatátʼtsions, tsi niʼioiánere tsi sewateriwathentiátons tsi natekontʼtihánions ne Rawenni꞉io rahotathawítseras, ónenk tsi neh enwáston nakorénson ahiakoianerásten neh tsi nikathokénston natathawítsera tesakówi ne Rawenni꞉io.

¹¹ Nónka ionteriwahnótʼtha ónenk tsi ne enhionteriwahnóhten ne Rawenni꞉io rahotheriwanohtátseras; ónhka ne iakohióte ónenk tsi ne énhionste ne kasatsʼténsera ne Rawenni꞉io tesakówis, nekáti kwáh oriwakwékons nahónton rahonháke ne Ié꞉sos Kerístos tsi tahonwanonweráton ne Rawenni꞉io, rahonhatsíwak rahówenk ne kahiatanerakwátsera ó꞉ni kasatsʼténsera tsi nienʼhénwe ó꞉ni tsi nénwe. Éhʼtho naiáwen꞉ne.

Ieronhiákens Tsi Iakoriwiʼióston

¹² Tekanórons tewatenrosónhas, tóhsa kiʼsewaneráko tsi nihiononwakthetseratʼtsáni tensewathóhetste tsi nisewaronhiáken, kwáh thóh nahiothónhake tsi síken ní꞉ioht ne kwáh knahótenk ó꞉ia ní꞉ioht tsi nisewahiátawens.

¹³ Kek sahtsennonníhak tsi kwáh thóʼwa thóh ní꞉ioht tsi aisaronhiaken꞉énhake tsi nihoronhiakén꞉en ne Kerístos, nekáti nahiontónʼon kwáh asiatanánonke natʼtsenonniátsera nónen enwenéstonke ne rahohiatanerakwátsera.

¹⁴ Satáskat tóhkaʼ iesanikonrakarewáta tioríwa tsi Kerístos tetietákwen; neh kí꞉ken kéntons nètho watʼtsennonniatserowánen atónnhets, neh nonikónra tsi nitewétha ne Rawenní꞉ioke, tsi senikwékonse.

¹⁵ Tóhkaʼ enseronhiáken, tóhsaʼ kíʼ ne kénhak ne tsi sehiasétha tóhkaʼ ó꞉ni senénskwas tóhkaʼ ó꞉ni sonkwetatsénskwa tóhkaʼ ó꞉ni sehiaterihoriénʼnis nakorénson ahkoriwasónha.

¹⁶ Tóhkaʼ kíʼ enseronhiáken neh tsi sariwiʼióston, tóhsaʼ thénen satéhen, nók tetsenonweráton ne Rawenni꞉io tsi Kerístos rahosénna ísawe.

¹⁷ Ónen iakáhewe ne kaiatoretátsera nahonthontasáwake, tánon nehne Rawenni꞉io rahonkwetaʼsónha entatihénte ne tahonwatihiatórete. Tóhkaʼ I꞉i entitewatiérente onhní꞉ioht tsi ienwatókten tsi niʼiákon ne iáh tetiakawetákwen ne kariwí꞉ios tsi Rawenni꞉ióke nonwe tiohawiton?

¹⁸ Tsi niwáton ne oriwatokénti, “Kwáh íken tsi wateriwentóre ne tiakoriwaiéri naieniákenne; onh káti, neh ónen, nenhotihiátawen ne iáh tehonwaientéri ne Ní꞉io, neh꞉ne rotiriwánerens?”

¹⁹ Nekáti, tsi niháti ne rotironhiáken neh tsi Rawenni꞉io thóh nisakoriwisenʼénni, iehontasónteren ne rohtihióten ne tkariwaiéri iehiokontakwénhak ronwaniahesénhak ne Sakohiatíson, rahónha tiotkonhónwe rariwaiérits tsi nihorahrátston.