1 Tiér 3 - Ohiatonhseratokénti

Rontatronaʼhasónhas

¹ Kwáh ne sáka í꞉se ne sewaniákon tsisewathonwísen ónenk tsi enietʼtsiwénnaraʼkwe ne sewaniákons, ne káti tóhkaʼ ónhka tsi niháti ne iáh tethonethákwen ne Rawenni꞉io rahowénna, saweiénna kíʼ enkarihónni nahontahonnétakwe. Iáh káti tatehiotonwentióʼon ne tiowénna asíron,

² tsioríhwa tsi enhontkáto tsi kwáh oriwí꞉io íken ne saweiénna.

³ Iáh tesateriwaiénni ne niatekonsónhas ásaste nasatonkweʼtíʼioste, neh tsi ní꞉ioht tsi askwatáko ne sanónkwis, tóhkaʼ ó꞉ni tsi nisásta nowistanórons, tóhkaʼ ó꞉ni tsi ní꞉ioht tsi sastserónnis.

⁴ Kék khók, ne sonkwetihiótsera neh akénhake tsi kwáh nisonkwetóten, ne iáh tatewathatáwis hiontʼkatotserí꞉io ne tiakoriwaiéri saktíken tsi iakónnhe, neh nahonhá꞉a tkanóron ó꞉ni tkhoʼwánen ne rahohénton ne Rawenni꞉io.

⁵ Asèken ne iotiriwiʼióstonne konnónkwe ne tiothohétston nonónha Rawenniʼióke nónwe nikontiniahésenne iotirennáhonne nakontkatotserihióhake ne tsi ronwatiwennarákwakwe ne iotiniátʼkons.

⁶ Sarah thóh niʼiakonnótenne; ronwawennarákwakwe ne Abraham tánon ronwanathónkwaʼkwe rahiatakweʼní꞉io. Tánon nónwa neh nakahónha ietʼtsiʼienokónhas tóhkaʼ tkariwaiénri tsi nensewátiere tánon iáh tahóten taisewatʼtsianíseke.

⁷ Neh nònne sáka ne sewaskenrákete ne sewaniákʼkons ioteriwíson ne taisewaiaséhake ne tesewénterons ne kwáh aisewanikonraiéntane tsi sénha oʼónha iáh tekontisáste tsi nise ní꞉ioht. Taietsihiateweientónhas ó꞉ni ietʼtsikweniénstak, tioríwa onónha ó꞉ni enkontiʼiéna, skátke níse, ne Rawenni꞉io raotathawítsera nahiakónnheke. Thóʼki nasewáier nehne tóhsa thènen aisewaiótatʼtse ne sewaterennaientátseras.

Ieronhiákens Neh Tsi Thóh Niʼiehiéra Nahóten Ne Tkariwaiéri

⁸ Ne iakákwekʼthe: ónenk tsi sewakwékon setiónnha akénhake ó꞉ni sataisewatʼthokát꞉tseke; tesewatatenorónkwak, tánon tasewariwaiérik ó꞉ni tesewatatkweniénstak.

⁹ Tóhsa neh sasewakárhiat ne kariwáksen ne kariwáksen tóhkaʼ ó꞉ni ne karewatátsera ne karewatátsera; kék khók, ne sasewakárhiat ne kahiataterítsera, tioríwa tsi kahiataterítsera nahóten ne Rawenni꞉io iararatsʼténni neh shaianáton.

¹⁰ Tsi niwáton noriwatokénti, “Tóhkaʼ ísere aionwesénhake tsi asónnheke tánon saskáneks nasatʼkáto ne ionwésens, kwáh kíʼ sateriwaiénni tóhsaʼ wahetkénhak tsi ní꞉ioht tsi satátis tánon sátʼkaf tsi sanowéntha.

¹¹ Sateriwaiénni ne tahonsasatkaraténi tsi nòkwa ne kariwáksen tánon ne sahióten ne ioiánere; níse ónenk tsi enshésake ne skénnon ó꞉ni ne kaioténhsera ne nashatsénawaste.

¹² Asèken ne Roiá꞉ner sakonikónrare ne iakoiáneren tánon ratahónsatats ne rahonaterénnaiens; nók akteʼnokwáti tentáthane nónka nehne iakohióte ne kariwáksen.”

¹³ Ónhka aiesakarónni tóhkaʼ ne saskáneks aisaióten ne ioiánere?

¹⁴ Nók kíʼ tóhkaʼ neh satkenrenseronniátha tsi neh sahióte ne ioiánere, thóh nisatáskat! Tóhsa ónhka setianísek, tánon tóhsaʼ tesatatenikonráren.

¹⁵ Nók tsi sewasénnaien ne Kerístos ne seweriáne, tánon tsi sewakwéniens tsi Roiá꞉ner. Kwáh tiókonte tsi sewatateweiennentahónhak ne ónhka taientʼtsiriwaserákwaʼse tánon naietʼtsinikonraientáten tsi rahonháke nónwe nikáien ne sewarahrátʼtsera.

¹⁶ Nók kwáh tasewateweiénton tánon kakwenienstaʼtserákon kénhak. Sewanikonrihióhak, ne káti nónen enietʼtsinikonrák꞉sate, tsi niháti ne wahétken tsi ní꞉ioht tsi rontátis neh tsi nishotenserí꞉io ne tsi Kerístos tsnonteráties kwáh enhontéhen tsi nahóten rónton.

¹⁷ Asèken sénha ne ioiánere naiontatenikonrakaréwate tsi ne iakoióte ne ioiánere, tóhkaʼ kíʼ neh akénhake tsi nitanónwes ne Rawenni꞉io, tsi ní꞉ioht ne kariwáksen ahiakohióteke.

¹⁸ Asèken Kerístos rawenhéion nénskat ieioterástston neh iorihonníʼon nakorénson akoriwaneraháktseras, thoʼriwaiéri rónkwe nehne iakoriwáneren akoriwáke, neh nahónton Niió꞉ne niahiahentése. Tsi iehawenhéion ónhkwe kènne, nók tsi sonionnhéton sronneʼónwe,

¹⁹ tánon tsi sronnheʼónwe iahaténti tánon wasakoteriwanótʼtase ne kontinhótons nonatkónson.

²⁰ Neh kí꞉ken natónnhets tsi niháti ne iáh tehonwawennarákwen ne Rawenni꞉io tsi nioʼnikonkátstekwe wasakoteráhrate tsi wentaténionskwe nètho Noah sihatʼthonionníhakwe ne rahonʼonwéia. Ne tóhkaʼra nihionkwétake ne kahónwakon wahontítha—satékon nihátikwe—shotiniakén꞉en tsi nòkwa ne onéka,

²¹ Neh ioieronnítston iehiótsate naʼtenekwahestátsera, tsi neh ónen tsi sanónstats. Iáh nehne tsi ahonsashenóhare tsi taisahiatationtónhake, nók neh tsi ronwarahratsʼténni ne Rawenni꞉io tsi nihiakonikonrí꞉io. Tsi saniakéntha rahonháke ne Ié꞉sos Kerístos tsi shotonnhéton,

²² karonhiáke niesawénon tánon tsi raweientetákwen ne Rawenni꞉io iesénteron, ratikwékon ne ratironhiakerónons tesakoniarótaron tánon ne karonhiáke tatiriwakweʼní꞉ios ó꞉ni ne kasatsʼténseras.