1 Tiér 2 - Ohiatonhseratokénti

Ne Hiónnhe Onénʼia Tánon Ne Otiokwatokénti

¹ Sewatiakwarísi, káti, akwékon ne kariwákʼsen; tóhsa ónen sasewanowénhtak tóhsa ó꞉ni thaseiéron tóhsa ó꞉ni naisatekéfʼfen tóhsa ó꞉ni naisatewennátkonhake.

² Thóh nasewaiatoténhak tsi ní꞉ioht ne owiráha ónkwak khók iakawennakeráton, tiotkonʼónwe iakoniatátʼtens ne kwá aóskon ionnheʼónwe onónta, neh káti tsi ensnekírathe nahónton asateiáron ó꞉ni naseniákenne.

³ Tsi niwáton noriwatokénti, “Kwáh iatesháti waseriwatsénri tsi nithoriwaiéri ne Roiá꞉ner.”

⁴ Rahonháke ne Roiá꞉ner nontáse, neh iónnhe onén꞉ia neh꞉ne iakokenrataníʼon nonkwesónha ne iáh thènen takasthátonke nók Rawenni꞉io rohrákwen ne tsi nikaneniánóron.

⁵ Kásewe tsi ní꞉ioht ne iónnhe onénias, tánon sewathóntat naʼietsiʼiastste tsi akanonsonníhake ne ionnheʼónwe ononsatokénti, thoʼnónwe nensahióten tsi ní꞉ioht ne rotokénti ratsihénstatsi nasétatʼtse kariwiʼiostóntsera tánon ne kaienawasétsera ó꞉ni naontatsenikonraiérite ne Rawenni꞉io rahonháke ne Ié꞉sos Kerístos.

⁶ Asèken noriwatokénti wáton, “Satkátho, wakerákwen ne kanenianóron, watsiéntatse thóh nón꞉we Zion nehne takaiosaiéntakwe; tánon onhkakíʼok nenthonwétakwe iáh tahonsahiontateriwásten.”

⁷ Kí꞉ken onénia kwáh íken tsi iorihowánen ne sewariwáke ne tisewetákwen; nók ónka ne iáh tetiakawetákwen: “Nonénhia ne ratinonsónhnis rotikenronhníhon né kanenhiakwení꞉io iahónton ne tsi tekahiósaien.”

⁸ Tánon nóia noriwatokénti wáton, “Onénhia ne enkakwéni nónkwe entsiakosítiake, tánon nosténra neh enkakwéni tenhiakoniohtáko.” Watiakoniotáko tsioríhwa tsi iáh tethonetákwen nowénna; neh tsi nisakoriwisaháni ne Rawenni꞉io.

⁹ Nók í꞉se ne kentiókwa ne ietʼtsiʼiatarákwen, ne Ronontí꞉io rahotsihénstatsis, ne otiokwatokénti, ne kwáh Rawenni꞉io rahonkwetaʼsónha, kahiatarákwen nahontʼróri ne ionerakwathénion ne Rawenni꞉io rahoweiénnas, ietsisewennónkon tsi tetiókaraskwe tánon thonónwe nonsatsisewátʼkawe ne ioriwanerákwat raoskwatetʼtserákon.

¹⁰ Ieióhene iáh níse Rawenni꞉io rahonkwéta tekènne, nók ónen kíʼ rahónha rahonkwéta sewatónʼon; ieióhene iáh tesewateriéntarakwe ne Rawení꞉io raotaniténrat.

Ronwaiótense Ne Rawenni꞉io

¹¹ Kwanekénnis, tewatenrosónhas, tsi kenkʼthitionkwénon ó꞉ni ionkwanahtenháwis ne kén꞉en ionwentsiáte! Tóhsa sewatiakwarísias tsi nitewaskáneks noierónta, nehʼne tsi tiókonte ionaterí꞉io natónnhets.

¹² Tsi niseweiennóten tsi natesewátere ne iáh tehotiriwiʼióston kwáh ioteriwíson nahioianeréhake ne nónen thènen eniesariwárho tsi seweiennáksen, ónenk tsi enhatiʼiénterene tsi nishotenserí꞉io tánon káti ahonwasénnaien ne Rawenni꞉io nentenwenniseráteke nónen tèntre.

¹³ Roiá꞉ner rahoriwáke tsi ietʼtsiwénnarak neh kwáh niaʼtehionkwétake ne ronaterihónton: neh Ronnontí꞉io, tsi rahónha rahianerenserakweʼní꞉io íken,

¹⁴ tánon tsi nòkwa ne ratikorásons, tsi rahónha sakohiatarákwen nasakotiréwate ne ronnonkweʼtáksens tánon ne tahonwatirénsaron ne ioiánere tsi nihontiérah.

¹⁵ Asèken ne Rawenni꞉io tehiatonhontió꞉ni nasehiáriste ne ratiwennák꞉sens ne thonatónnokte neh níse tsi niʼioiánere tsi nisatiérah.

¹⁶ Thoʼní꞉ioht tsi sónnhek tsi ní꞉ioht ne rontatewenní꞉io; tóhsa, kíʼ tsikʼtsiahiotónhake, neh ísasts ne satatewennihiótsera naserórhotʼte ne thènen kariwáksen, nók thoʼní꞉ioht tsi sónnhek tsi Rawenni꞉io tiótense.

¹⁷ Kwáh niaʼtehionkwétake sekweniénstak, senorónkwak nakorénsons ne tiaʼkawetákwen, skweniénstak ne Rawenni꞉io, ó꞉ni skwewniénstak ne Ronnontí꞉io.

Tethewatenienténston Ne Kerístos Rahonronhiakénsera

¹⁸ Ne sewanhátseras ioteriwíson naietʼtsiwénnaraʼkwe ne ietʼtsínhas tánon ietʼtsinésten aóskon ne kakweniensthátsera, iáh nekhók tsi niháti ne thoʼtiriwaiéris ó꞉ni neh iatehonnonthónnions, nók kwáh ó꞉ni tsi nikáien ne ratiniakátstes.

¹⁹ Neh kíʼ enkarihónni Rawenni꞉io enhiaiatatériste, tóhkaʼ ensakátstheke ne iáh tehioteriwíson ne karonhiakénsera tsioríhwa tsi sanikonraiéntas tsi nihonikonróten.

²⁰ Nahóten nèn꞉ne kástha nasatakátsthate naʼiesanonwenserário tsi natesaténtion ne tsi natesaterientawenréʼon? Nók tóhkaʼ ensatakátsthate ne karonhiakénsera séhkons ó꞉ni nónen thènen tisaieríton, neh kíʼ enkarihónni Rawenni꞉io enhiaiatatériste.

²¹ Neh kí꞉ken iorihonníʼon iehianáton ne Rawenni꞉io, Asèken hiatehahiáti ne Kerístos iaronhiákense tánon iaiénni neh tahontasathenienténsthe, thóh nahontáwe natsianénhawe.

²² Kwáh iáh thènen tehoriwáneren, tánon iáh ónhka nonwénton teiakhokthontéʼon ne tsi rasakáronte nahonowénton.

²³ Nónen enhonwanikonrakaréwate, iáh nonwénton tathetoriwaserákwen nasakonikonrakaréwate; neh saharonhiáken, iáh thahóten tehoterónkwen, nók Rawenni꞉ióke nónwe naháien ne karharáh꞉tsera, ne tkariwaiéri tsi tehaiatorétha.

²⁴ Rahonhatsíwa ne Kerístos rotketáthon nonkwariwanerahákʼtseras tsi tetkaiásonte, neh nahónton naitewenhéiate ne kariwáneren tánon neh nónwe naisetiónnheke ne tkariwaiéri. Neh tsi nihotʼkarewatánion neh tsiʼsatiénton.

²⁵ Neh thisisewatiérenskwe ne teiotinakarontóna ne ionatiatatónhonne, nók ónen thetsitsihiaténha natsisewásere ne sakonón꞉ne ne teiotinakarontónhas ó꞉ni ne ranónne ne sewatónnhets.