1 Tiér 1 - Ohiatonhseratokénti

¹ Tiér kí꞉ken nón tiohawiton, roteriwanothánis ne Ié꞉sos Kerístos— Né꞉ne Rawenni꞉io rahonkwetashón꞉ʼa rotinatenháwis tsi ní꞉ioht tsi rahtiná꞉kere tsiatehonarénion nahotonwentsiákes ne Pontus, Galatia, Cappadocia, Asia, ó꞉ni Bithynia.

² Ietsiʼiaʼtará꞉kwen ne tsi nithonikonriʼióʼon ne Rawenni꞉io ne Kanísera ó꞉ni Rawenni꞉io Raonikonratokénti wakarihonni tsi wesewahiatatokentíne, né꞉ne ahtsisewawénnarakwe ne Ié꞉sos Kerístos tánon ne ahonsehsewatonnakanónniathe ne rahonekwénsa. Aiáwens kenténrat ó꞉ni ne skénnen aisewawenhkónweke ó꞉ni aiawetowénhnenke.

Ne Ionheʼónwe Narahrátsera

³ Ánion tetsitewanonweráton ne Rawenni꞉io ó꞉ni rahónha Roiénha ne Sonkwaiáner Ié꞉sos Kerístos! Tsioríhwa tsi nikowánen ne rahoténrat thesonkwáwi náse atón꞉nhets neh tsi shokʼhétskwen ne Ié꞉sos Kerístos ne kenheiátne. Neh kí꞉ken kananónk꞉tha ne tewaiéronke ne ionnheʼónwe ahraráhtsera,

⁴ Neh káti kí꞉ken ionkwárare naitewaiéna natsokowátsera kaiataterítsera ne Rawenni꞉io sakotheweientónnis ne rahonkwetaʼsónhas. Karonhiáke nónwe iehiateweientónnis, tsi nónwe ne iáh tahonhétʼkenne iáh ó꞉ni tahiótʼken iáh ó꞉ni tahonkáhionne.

⁵ Í꞉se sáwenk, tsioríhwa tsi tieniahésen ne Kerístos rahónha ne raosatsʼténsera ne Rawenni꞉io kanikónrare tsi nióre iensèna kí꞉ken kaiatakeʼnhátsera. Kwáh enhiotáshionke nonàken tewenniserónthe nakwékon enhiontʼkátho.

⁶ Satonnárak kí꞉ken nahorihóten, iawerohátsien tóhka nónwa tehiotonwentióʼon nostónha ahontesanikonrén꞉en ne kénk nikaríwes tsioríhwa tsi niʼiawetowánen tekonkʼtihánions tsi ní꞉ioht tsi tesanikónrare.

⁷ Kíʼ nahorihoténsons nehne akariwaniráton tsi thetsetákwen ne Kerístos tsi kwáh oriwí꞉io íken. Ieʼióhe nowistanóron, nónkwe eniekwéni taieríthe, neh nótsire wátston tsi watʼkénse; neh káti nahonkátsʼteke. Ehʼthó꞉ne enshèna ne karensaróntshera ó꞉ni ne kahiathaterítsera ó꞉ni ne kakweniensthátsera nentewenniseráteke nónen ne Ié꞉sos Kerístos enhathotáshion.

⁸ Níse tsi sewanorónkwa, ehʼthoʼsáne iáh nonwénton thetsisewáken, tánon níse tatsisewéthakwe, ehʼthoʼsáne níse iáh nonwénton thetsisewáken. Káti níse kowánen wesewathonnáren ó꞉ni tsi niʼioriwanerákwat natʼtsennonniátsera, iáh tekawénnaien náionste nakanikonraiénthaʼte,

⁹ tsioríhwa sewaienahonhátie nahohiatakenhátsera ne sewatón꞉nhets, neh kí꞉ken aoríhwa thoʼnaháwenne ne tsi thetsisewetákwen ne Kerístos.

¹⁰ Neh aoriwá꞉ke kí꞉ken kahiatakeʼnhátsera nètho iehatiriwákenskwe kwá tahonteweiénton wahonnésake ó꞉ni wahatiriwísake, tánon iahatiriwá꞉ken tsi nòkwa kí꞉ken atathawítsera nètho Rawenni꞉io éntʼhion.

¹¹ Ne Rahonikónra ne Kerístos tsi neh ronatsiénni ohénton tontʼróri ne rahoronhiakénsera ne Kerístos tánon ne kahiatanerakwátseras enhiononterátie.

¹² Rawenni꞉io wasakorihotáshiase kí꞉ken rothitókense nètho rahothihioténsera tsi iáh ronónha tehotihiatakenhátsera, nók í꞉se sewáwenk, tsi nihonatáti kí꞉ken nahorihoténsons ne tsi ónen ietʼtsiwennarónken ne ronteriwanótʼthas rononhá꞉a rothirihowanáton ne kariwí꞉ios thóh rahosatsʼtenserákon ne Ronikonratokénti tsi nitohtheniéton ne karonhiáke. Neh kíʼ nahorihothénsons séhkon ne kwá ratironhiakerónons enhatinónwene nahothinikonraiéntane.

Ionkwateriwaiénni Iotokénti Tsi Aitiónnheke

¹³ Kwáh káti, ioianeréhak tsi sewanontonniónko tsi nensewátiere. Sewatateweiennentaónhak tánon ieiokontakwénhak thoʼnónwe nasewarárek neh kaiataterítsera tsi nentietsíʼion nónen ne Ié꞉sos Kerístos enʼonwéneste.

¹⁴ Tsi sewawennarákwak ne Rawenni꞉io, tánon tóhsa sewatʼthóntat ne tsi tiónnhe ne aióhawe tsi nahoténsons sewaskánekskwe ne sékon iáh sisewateriéntarakwe.

¹⁵ Khék, iotokentíhak tsi nahoténsons ensewateriwathéntiate, kwáh tsi ní꞉ioht ne Rawenni꞉io tsi rahónha ietsisewanáton kwáh nènʼne rotokénti.

¹⁶ Noriwatokénti wáton, “Sewahiathatokentíhak tsioríhwa Ní꞉i tsi watiatatokénti íken.”

¹⁷ Kanísera tsi sewanathónkwa, nónen rahonháke ne Rawenni꞉io ensaterénnaien, rahónha kwáh sahtetiótʼte nonkwetakwékon tsi tesakoiatorétha, entioianénhawe tsi naiakotiéren ne tieiatát꞉tion; kwáh káti, tsi nikaríwes shékon enshónnheke ne kén꞉en onwentsiáke tsi tseriwakweniénstak.

¹⁸ Asèken sateriéntare tsi nahóten kahkariák꞉ton tsi tsiʼsatatewenniʼió꞉on tsi ní꞉iáh thènen tekásthakwe tsi niʼiotónne tsi iakónnhekwe ne tsi nitiesáwi ne sehsotʼtonhonkonkén꞉en. Iáh neh tèken nahónton akariwathónton, kwáh neh satetionátʼthe ne kawistaráken tánon ne owistanóron;

¹⁹ neʼne iokaratʼtsáni roronhiakénton ne Kerístos, kwáh neh teskaieróntarakwe ne teotinakarontóna owíra kwáh iáh thènen tehoníkon iáh ó꞉ni thèʼnen tatehotherientawénrieh.

²⁰ Rawenni꞉io roiatarákwen ne neh ohénton sontontonwentsiónni tánon onterihotashiónko kí꞉ken nonàken wenniseraténions níse sewariwá꞉ke.

²¹ Rahonháke nónwe nitiawénon tsi tatsisewétakwe ne Rawenni꞉io, tsi nikáien shokétskwen ne kenheiát꞉ne tánon taháwen ne kaiatanerakwátsera; tánon káti ne sewetakwéntsera ó꞉ni ne sewaskanéktsera thóʼnon nikahkwatákwen rahonháke ne Rawenni꞉io.

²² Nónwa ne tsi sewatewennarákwen ne oriwiʼioʼónwe níse iatesewaiáti tsi sehsewatonnakanónni ó꞉ni ne iahátkene naisewaháwake ne naioriwatokénhake tsi aietʼtsinorónkwake ne ronatiakhésons ne thoʼnetákwen, tesewatatenorónkwak tasewanikonrakontakwénhak kwáh seweriasakwékon.

²³ Asèken kwáh áseh tsi satónʼon rahonhake ne Rawenni꞉io rahowénna, neh sonkwaienokónha ne ronnheʼónwe, iáh tarénheie. Tsi nénwe enkátake ne rahowénna ó꞉ni ionhnehónwe.

²⁴ Tsi niwáton ne noriwatokénti, “Onkwetaʼkwékon seh óhonte nahatiʼiatótens, tánon akwékon ne rahotiʼiatanerakwátsera tsi ní꞉ioht tsi iotsítsionte ne kahentàke. Nóhonte wastátʼthens, notsítsa watashó꞉kwas,

²⁵ nók ne Roiá꞉ner rahowénna tsi nénwe enkátake.” Kíʼ owénna nehne kariwí꞉io nètho iesaronkaténni.