1 Sawátis 3 - Ohiatonhseratokénti

Rawenni꞉io Sakoienʼokónha

¹ Satkátho tsi niʼiawetatsáni ne Kanísera sonkwanoronkwáʼon! Tohʼnióre tsi tehiotenonnianíton ne rahononronkwátsera thóh ní꞉ioht tsi ionkihientéri Rawenni꞉io sonkwaienhokónha—tánon kíʼ kwá tóhʼkenske thoʼ ní꞉ioht. Neh kíʼ aoríwa ne ronnonwentsiakerónon iáh tehionkiʼientéri: iáh tehonwaientheráʼon ne Rawenni꞉io.

² Tewatenrosónhas, ónen kíʼ Rawenni꞉io sonkwaienʼokónha ionkwatónʼon, nók iáh kíʼ arókʼke teiawenéʼon onhnahóten ientewáton. Nók kíʼ ionkwateriéntare nónen ne Kerístos enshokétote, kwá tonentewahiatótenne tsi ní꞉ioht ne rahónha, Asèken kwá tsi nihaʼiatóten thóh ní꞉ioht tsi entsitewáken.

³ Kwá tsi nihiákon neh thóh ní꞉ioht tsi ronwárahre ne Kerístos iontatenikónrare ne kwá aiehiatanánon, kwá kíʼ tsi ní꞉ioht ne Kerístos tsi rahiatanánon.

⁴ Ónhkaki ók enieriwánerake iakonhitseráien tsi watieiáke ne Rawenni꞉io rahoianerénsera, Asèken ne kariwáneren ne tekáias ne kaianerénsera.

⁵ Sahteriéntare ne Kerístos neh aoríwa roketóthon neh꞉ne ahéren ahonsahaháwite ne kariwáneren, tánon ne rahonháke kwá iáh thènen tekáien ne kariwáneren.

⁶ Neh káti tsi nihiákon ne iakónnhe ne tehonateriwahsóntere ne Kerístos iáh tiehontasóntera nahathiriwánerake; nók kíʼ tsi nihiákon ienhiontasónteren naieriwánerake iáh kíʼ nonwénton tehonwáken iáh ó꞉ni tehonwaientéri.

⁷ Kwá tóhsa ónka ietʼtsiríʼon naietʼtsinikonráten, kwaienʼokónha! Ónhka kíʼ ne toneniéhiere ne tkariwaiéri ne tsi iakoiánere, kwá kíʼ ne sáka tsi ní꞉ioht ne Kerístos tsi tronkwetaiéri.

⁸ Ónka ieniontasónteren naieriwánerake ranesonrónon rahonkwéta, asèken ne ranesonrónon kwá tsitiotásawe thoriwáneren. Ne neh kwá ne aoriwáke tsi tawénon ne Rawenni꞉io Roiénha, ne nahariwáthonte tsi nihoiéren ne ranesonrónon.

⁹ Tsi niʼiákon ne Rawenni꞉io sakohiohokónha iáh tiesontasóntera nahonsahatiriwánerake, ne Rawenni꞉io kwá sahoiérat tsi ratikwékon; tánon neh tsi Rawenni꞉io ronwaníha, iáh tahatikwéni niahontasónteren nahonsahatiriwánerake.

¹⁰ Kén nónwe kwá teioswátʼte tsi natetsiatʼtíhen tsi natehóntere ne Rawenni꞉io sakoienokónha tánon ne ranesonrónon sakoienʼokónha: tsi niʼiákon ne iáh thóh teiehiéra nahóten ne ioiánere tóhka ó꞉ni iáh tesakotinorónkwa nakorénsons iáh Rawenni꞉io tesakoienʼokónha.

Tesewatatenorónkwak

¹¹ Nateriwanothátsera sewarónken ne kwá tsi tiotásawe neh kí꞉ken: ónenk tsi taihtewathatenorónkwake.

¹² Iáh tateiothonwentióʼon nahonsatsitewaiéren ne Cain; neh꞉ne ranikonráksen rahonkwéta kèn꞉ne tánon wahoséh꞉te ne kwá rahónha iatatekénha Abel. Onʼnihiotiéren ne Cain tsi wahoséh꞉te? Neh tsi nihotieránion tánon tsi natehoterientawénrie, nók ne iatatekénha tkariwaiéri ne tsi nihotiéren.

¹³ Tóhsa káti sewaneráko, tewatenroʼshónʼa, tóhkaʼ ne ronnonwentsiakerónons enietsísʼson.

¹⁴ Ionkwateriéntare tsi ionkwatewentéton ne kenhéion tánon kén nokwáti nathonthétewe tsi nòkwati ne iónnhe; ionkwateriéntare neh tsi tethewatatenorónkwa. Tsi niʼiákon ne iáh teiakóien ne kanoronkwátsera sékon kíʼ nèn꞉ne kenhéion iakoienawákon.

¹⁵ Ónhka ne iontátswens nakorénson ronʼnónha ne sakonashéta, tánon sewateriéntare neh sakonashéta iáh nèn꞉ne tehotíʼien ne hionnheónwe atónnhets.

¹⁶ Kén níʼ ní꞉ioht tsi ionkwateriéntare nahóten nèn꞉ne ne kanoronkwátshera: Kerístos tesonkwáwi tsi rónnhe. Í꞉i kíʼ ó꞉ni ahontaietʼthíʼion ne tsi tiónnhe nakorénson!

¹⁷ Tóhkaʼ ionkwakwátie tánon enhetʼthíken nakorénson rothinoronsténni, sók entewanóthon nonkweriáne ne rohnonhakéson, onh ní꞉ioht tsi aitewariwanírate tsi etʼtsitewanorónkwa ne Rawenni꞉io?

¹⁸ Kwaienʼokónha, nonkwanoronkwátshera tóhsa owénna tánon tsi ionkwátare khók akénhake; kwá aóskon kanoronkwátshera akénhake, tsi eh niʼioianerenseróten.

Aiakonikonratʼtsaníton Rahohénton Ne Rawenni꞉io

¹⁹ Ne káti kíʼ kén, thóh ní꞉ioht tsi enionkwateriéntaraʼne neh noriwí꞉io tsi tewakwékon; thóh ní꞉ioht tsi enionkwariwaníronke rahohénton ne Rawenni꞉io.

²⁰ Tóhkaʼ nonkwanonthonnióntsera enhionkwáthonte, ionkwateriéntare sénha Rawenni꞉io rosastenserowánen tsi ní꞉ioht nonkwanonthonnióntsera tánon ó꞉ni kwá oriwakwékon rotheriéntare.

²¹ Éhʼtho káti, tewatenroʼshónʼa, tóhkaʼ nonkwanonthonnióntshera iáh tahionkwariwénten, hionkwanikonraníron kíʼ rahohénton ne Rawenni꞉io.

²² Entewaiéna kwá tsi nahoténsons entsitewariwanóntonse, ne tsi ehtsitewawennarákwa tánon ne ionkwahióte nahontatsitewanikonraiérite.

²³ Nahóten rariwanóntons neh꞉ne ahontatsitewétakwe ne Roiénha Ié꞉sos Kerístos tánon taihtewatatenorónkwake, kwá tsi nisonkwariwanonthónnis ne Kerístos.

²⁴ Tsi niʼiákon ne iontewennarákwa tsi nihariwanóntons ne Rawenni꞉io thóh non nenʼiakonnhétie tsi tehonateriwasóntere ne Rawenni꞉io tánon ne Rawenni꞉io enhatikwekónhake ne ronnónha ne tsi rahónha tehonateriwasóntere. Tánon neh tsi nitesonkwáwi ne Rawenni꞉io nonikónra ionkwateriéntare ne Rawenni꞉io tsi tehionkwateriwasóntere.