1 Samuel 9 - Ohiatonhseratokénti

¹ Eʼthóh nón꞉we rónkwe nihaʼiá꞉taraʼkwe ne Benjamin raotiʼtsió꞉kwakon Kish ronwá꞉iats ne ne Abiel roién꞉ʼa, tánon ne ne Zeror roteré꞉ʼa neh ieshosókʼta ne ne Becorath, ne Becorath ne ne roʼiénha ne Aphiah, Benjaminite nahotaró꞉ten, ne ne rón꞉kwe roʼkwá꞉tshe.

² Ne Kish roʼiénha Saul ronwá꞉iats, ranekénteron nithoiónha. Iáh ónhka tsi niháti NʼIsraerʼró꞉nons neh sénha ahatinekenterón꞉take tsi ní꞉iot ne raónha; ratiʼkwé꞉kon nieʼshakonenhiaʼkénhnion.

³ Nón꞉wa ne tekonʼhón꞉tes ne raoʼtsenenhó꞉kons Kish, Kish wahawénhase ne roʼiénha Saul, Iaʼtiaʼténhaf saiá꞉ta thí꞉ken ratiʼnhatiéras ne tiaʼterósen; wáhs tánon saʼietsihiatisákʼkha ne tekonhón꞉tes.

⁴ Thóh nón꞉we naiatóhetste tsi ionhniarónhnions tsi kanakeraseráiens ne Ephraim tánon iakʼthonhontsí꞉iake ne Shalishah, ók iáh kiʼ tekonwatiʼiatatsén꞉rion. Tánon iathonsahonnontsí꞉iake ne Shaalim, ók iáh kiʼ thóh tehkonhʼnes. Eʼthóhʼne iathonsanonhontsí꞉iake ne Benjamin, ók iáh kiʼ tehkonwatiʼiatatʼtsénhrion.

⁵ Shaháneʼwe tsi tsiohontsá꞉ien ne Zuph, ne Saul wahawénhaʼse ne raksá꞉ʼa ne ronaterosenhtátsene, “Háh꞉nion tsiʼtiáket, nontiérenk ne rakeʼníha enhák꞉kaʼwe tsi teotatenikónraʼre tsi nòkwah ne tekonhóntes, tánon onkeʼnón꞉hake tsi tenshonikonhráren.”

⁶ Ók ne ranhá꞉tshera tsi watoriwaserákwaʼse, “Kén nón꞉we nikanátaien Rawenni꞉io raʼonkwé꞉ta nihenténron; ne ne rón꞉kwe ronwaʼriwakweniénstha. Tsi nahó꞉ten enhén꞉ron tiókonte èhʼtho nenhiá꞉wenne. Áhnion ó꞉nenk éhtho niehé꞉tene; tó꞉ka nón꞉wa enshonkeniró꞉ri tsi nón꞉we iènhietiʼhiatatʼtsénri ne tekonhón꞉tes.”

⁷ Eʼthó꞉ne ne Saul watoriwaʼserákwaʼse nètho raksá꞉ʼa, “Ók tó꞉ka thóh iénteʼne, nahó꞉ten ientsiʼteniʼhawíthase nètho rón꞉kwe? Aséken ne kanátaro nonkeniʼiarákon ieiotʼtsaháhton, tánon iáh othènon teionhkení꞉ien natsiʼténon nètho Rawenni꞉io raonkwé꞉ta. Nahó꞉ten ionkeʼní꞉ien?”

⁸ Ne rakʼsá꞉ʼa thonsahoriwaserákwaʼse á꞉re ne Saul, “Kénʼen khá꞉wi niwá꞉ha kahwistará꞉ken owísta; kwáh neh enthí꞉ion ne Rawenni꞉io raonkwé꞉ta, ne nashonkeniró꞉ri tsi niaʼonkeʼnehnonhátie.”

⁹ (Nohén꞉ton tkènʼne ne Israerró꞉nonhke, ón꞉ka ién꞉hien neh thé꞉nen ahieriwísake tsi nó꞉kwah ne Ní꞉io enhiaʼiéron, “Káts, áhnion thóh nienhé꞉tene tsi thénteron ne iehariwákenhs”; asèken raón꞉ha ó꞉nenh ne shonhwanatón꞉kwa rotokén꞉se nohén꞉tonn tkènʼne ne ronwanatón꞉kwakwe iehariwáʼkenskwe.)

¹⁰ Ne Saul wahawénhase ne raksá꞉a, “Kaʼnikonrí꞉io; káts, hào thóh nienhéteʼne,” Sók kiʼ iahá꞉ne tsík kanátaien tsi nón꞉we thohʼnón꞉shote ne Ní꞉io raonkwéta.

¹¹ Tsi iahninontáraʼne tsi niahá꞉ne tsi tkanatá꞉nen, watontéraʼne nitsothiʼiónsas wakontinekótsenhe, tánon waʼkonwatiriwanóntonse, “Ne iehariwákens kaná꞉takon kén ít꞉res?”

¹² Tontakontiriwaserá꞉ko, “Hen, í꞉se wá꞉re kwáh thotʼ senihénton. Óksa; kwáh ón꞉wak khók wahanahtáraʼne, ne tsi ón꞉wa wenhniseráte nonkweshón꞉ʼahs enkonwanateskónten kontitshénenhs tsi ratitsenharákwa.

¹³ Kwáh tsi niʼiostóre ienseniʼnátarane, entsiseniʼiatatʼtsénri, nohén꞉ton iaharátʼthen tsi ietsenharákwa ne tahatská꞉hon. Asèken nonkweʼshón꞉ʼahs kwáh iáh thataʼiontská꞉hon tsík énraʼwe, tsi raónha aówenk tsi enhahiataʼtériste ne watéskonʼte; eʼthóhʼne ó꞉nen thenionská꞉on ne iontatʼtonkará꞉wi. Ó꞉nenh kiʼ iaseninontárahn, asèken kwáh ók꞉sak tensewatátken.”

¹⁴ Sók kiʼ kaná꞉takon niahá꞉ne. Tsi ó꞉nenh tó꞉wa iaʼninatá꞉rane, wahonwáken Samuel thóh nontahawenonhátie tsi nón꞉we níh꞉ne thóh niaʼhawenonhátie tsi tsetsenharákwah.

¹⁵ Nón꞉wa sewenʼnísera ohénton ne Saul áraʼwe, ne Roiá꞉ner waʼorihotáshien ne Samuel:

¹⁶ “Nenʼióhrhenʼne tó꞉kaʼ kiʼ tonenkaʼhá꞉wiʼke kwáh entiʼiatéʼnié꞉te shonháke rón꞉kwe thóh nèntʼre tsi tionhontsá꞉ien ne Benjamin, tánon kwáh í꞉se entiaʼtaráko naʼsakokʼkóraste nakonkwetaʼshón꞉ʼa Israerʼró꞉nons. Kwáh Rahón꞉ʼa ensakonónsthaʼte tsi nòkwah ne raoʼtishastsʼténsera ne Philistines; asèken kwáh í꞉i wakatká꞉thon ne raoʼtironiakénhsera nakonkwetaʼshón꞉ʼahs, tsioríwa tsi naʼteotihenrétha ontiaʼtórenhne.”

¹⁷ Nó꞉nen ne Samuel sahó꞉ken ne Saul, ne Roiá꞉ner wahoró꞉ri, “Ne kí꞉nen ne rón꞉kwe ritón꞉hon ne shonha꞉ke. Raónha entesakoniaʼrótaroʼke nakonkweʼtashón꞉ʼahs.”

¹⁸ Eʼthóhʼne ne Saul tsítʼres ne Samuel niahá꞉re kanónskon nòkwahti tsi iotenhenrén꞉ton, tánon wahén꞉ron, “Tatró꞉ri, asatʼthóntaʼte, kaʼnón꞉we nihonónshoʼte ne rotokénhse?”

¹⁹ Samuel waʼthoriwaserá꞉kwaʼse ne Saul, “Í꞉i ne watʼtókenhse; wáhs satakʼtenhté꞉st tsi nón꞉we tionhterenhnaientákwa. Asèken ón꞉wa wennhniseráte tesenitsáron tentewá꞉tonhte, tánon tsi ientsió꞉renhne kwáh ienskonhiát꞉kaʼwe tánon kwáh enkonró꞉ri akwé꞉kon tsi nisatenikonraiéntons.

²⁰ Tsi nòkwah ne shatshenenhó꞉kons tekonhón꞉tes nètho áhsen nón꞉ta tsi ná꞉he tsionatsiaʼtatónʼon tó꞉hsa isiʼnónwe nonsasheʼianontónhnionf, asèken skonwaʼtihiatatʼtsénhrion. Tánon thóh nón꞉we akwé꞉kon NʼIsraerʼró꞉nons raonaskaʼnéktsheras nikakwatákwen, tó꞉ka iáh nisèke ó꞉ni thóh akwé꞉kon ne sashotʼtseraokonkénʼen tsi ratiwatsiratátie?”

²¹ Ne Saul tsi wathariwaserá꞉ko, “Ní꞉i kwáh nek khók tsi Benjaminró꞉non na tiathó꞉ten, ne ne kwáh ken nithotitiokwá꞉ʼa NÍsraerʼronónke, tánon natwátsire ne ne kwáh ehʼtàke rontatónhnis akweʼtsiniʼkawatsirákes ne tsi rotiʼtiókwaiens ne Benjaminró꞉nons. Ón꞉kati nihioʼtiéren tsi èhʼthoh ní꞉iot tsi waʼsekthárhaʼse?”

²² Eʼthóhʼne ne Samuel iahohiaténhawe ne Saul tánon ne raonkwé꞉ta raksá꞉a tánon thóh niaʼsakoʼiaténhaʼwe tsi tetionskaʼhónkhwa, tánon thóh nón꞉we nasakonákton tsi iotekhwaratseráte tsi nón꞉we ne ronwahtiʼhonkará꞉wi ahtekhwaratserák꞉ta nihatitskwarón꞉nions, ne ne kák꞉non ne ahsenniwá꞉sen nihá꞉ti.

²³ Tánon ne Samuel wahawénhaʼse ne rakhón꞉nis, “Tá꞉saf ostón꞉ha nètho owá꞉ron tkhoniá꞉wi, tsi niká꞉ien ne konriwanontónni ákte nón꞉we náhshien.”

²⁴ Ne rahkhón꞉nis iahanitsʼtsáko tánon ne iowenhté꞉nions tánon thóh wahá꞉ren raohén꞉ton ne Saul, ne Samuel wahén꞉ron, “Satkátho, tsi nahó꞉ten ne wateweiénʼtonkwe sahén꞉ton ónt꞉ren. Tehsatská꞉hon: tsioríwa tsi í꞉se ieʼsateweientón꞉ni tsi ní꞉iore ienká꞉hewe naiesaiataráko, ne ní꞉se nahón꞉ton skát꞉ne tahisewatská꞉hon ne iontathonʼkaráwi.” Káti ne Saul wathiaʼtónte ne Samuel nètho shiʼwenhniserá꞉tekwe.

²⁵ Nó꞉nenh satonʼtahianontátsʼnenhte tsi tionterenhnaientákwa kaná꞉takon nionshá꞉ne, wahatiʼtskarakwentáro ne Saul raorihwáke thóh tsi tekaronkwennákwente, tánon wahatsiaʼtiónhnite nahó꞉tawe.

²⁶ Óronkéstsi wahontʼkétsʼko ne shonʼtakarakwí꞉nekenhne ne Samuel iahonáton ne Saul thóh tsiít karonkwenáheʼre, “Sahtkétsʼko, káti ne nahón꞉ton iahonsakonhiaʼténieʼte tsi nienshé꞉se.” Ne Saul wahatkétsʼko, tánon tenitiá꞉ron raón꞉ha ó꞉ni ne Samuel tsi tekanatokenhátie niahá꞉ne.

Samuel Wahohienàro Ne Saul

²⁷ Tsi niahoneʼnonhátie ne tsi iehiotenátokʼte, Ne Samuel wahawénhaʼse ne Saul, “Eʼtsró꞉ri nètho raksá꞉a onkenihénton niehé꞉re, tánon nó꞉nenh sashaʼkotohétsʼten, kénʼen niáʼrekwe téstatʼ ní꞉se, ne nahón꞉ton akonhiaronkáten ne raoʼwénhna ne Ní꞉io.”