1 Samuel 8 - Ohiatonhseratokénti

Israerʼró꞉non Wahatiriwanónton Naoʼtinontiʼiotseraién꞉taʼne

¹ Nó꞉nenh ne Samuel sahosténhaʼne, waʼsakaónʼnien ne raoʼnekenterontsherashón꞉ʼahs naʼniriwénhtake ne Israerró꞉nonhke.

² Tsi nihoʼsenhnó꞉ten ne thakowáhnen roʼiénha ne ne Joel, tánon ne tekeníhaton, Abijah; tsi niriwénhtaʼkwe Beer-sheba nón꞉we.

³ Nék ne raoʼnekenterontserashón꞉ʼahs tsi iáh teotíseron ne raoʼteweién꞉na, kwáh nek khók thotiʼnikonratihénthos nahiatʼwistónhni; káti ne waʼniʼienáhseron tsi nathonwatiʼtsikhetá꞉rohse tánon waʼnisakéte ne kariwenhtá꞉tshera.

⁴ Eʼthóhʼne ne ronhnón꞉kwe NÍsraerʼronónke wahontiataróroʼke tánon Samuel wahonwatʼkenséra tsi thénteron ne Ramah nónwe,

⁵ tánon wahonwénhaʼse, “Ní꞉se ónen skakʼsténha tánon ne sanekenteronhtserashón꞉ʼahs iáh ne tehnísé꞉re tsi nisarihó꞉tens. Káti takwaiatará꞉kwas ne ne ronontí꞉io akénʼhake nashonkwaʼkó꞉rake, tsi ní꞉iot nakʼtéshons nonwésons ronnonhontsakerónons.”

⁶ Ók kí꞉ken niʼkarihó꞉ten kwáh í꞉ken tsi tahotiérase ne Samuel nó꞉nen sahonní꞉ron, “Takwanontiʼiótseron nashonkwatʼkó꞉rasʼte.” Samuel iahaterénnaien rahonháke ne Roiá꞉ner,

⁷ tánon ne Roiá꞉ner wahawénhase ne Samuel, “Sheʼiatahónsatat tsi nihón꞉ton nonkweʼókons oriwaʼkwé꞉kon tsi niʼhontónhnions ne shonháke; aséken iáh ní꞉se teiesakenronhníhon, ók roʼnón꞉ha wahonkʼkénron ne tsi kenontí꞉io í꞉ken.

⁸ Kwáh tsi niʼiontiéraʼse ne thóh tewenniseráteʼkwe shaʼthontakheiaʼtínekenʼwe ne Egypt tsi ní꞉iore nón꞉wa wenhniseráte, ionkatewentéton tánon ne waʼkonwatiʼiótense ne tikaniʼioseraténions, káti kwáh ó꞉ni éhʼtho niʼiesaierasehátie.

⁹ Ó꞉nenh káti, satahónsatat ne raotiwennaókons; ne khók—ní꞉se kwáh ioriwaníronk tsi shehiaronká꞉ten, tánon senikonraién꞉tat tsi nenhiotónhake ne raoʼtinontí꞉io tsi nenhsakótseraʼse.”

¹⁰ Káti ne Samuel wathateriwaréniaʼte ne raoʼwenhnaókons ne Roiá꞉ner roʼnonháke nonkweʼókons tsi ronón꞉ha ronwariwanontón꞉nisʼkwe ne kanontiʼiótsera.

¹¹ Waʼhén꞉ron, “Ken kiʼ ní꞉iot ne sanontí꞉io tsi nenhiatiéraʼse,” Samuel waʼhanikonraiénthaʼte, “Kwáh ensakoshakosotaronhniánion ne sanekenteronhtseraʼshón꞉ʼahs; ótiakes thóh nón꞉we nenhonterihontónhnion ne raoʼserehshón꞉ʼahs konterí꞉ios, ótiakes neh enhotisáten kosáhtens, tánon ótiakes tenhonrá꞉taʼte ohénton notsiónkwas káseres;

¹² tánon kwáh iatehahiáti ensakoiatará꞉ko nasakotiʼhéntense ne tewenhniawehetsherásens ó꞉ni nasakotiʼhéntense ne wiskshonniwasenhátie, tánon ótiakes enhatiʼtarakarhathóseʼke raoʼhontsiá꞉ke tánon enhatiʼientkwáko ne raorihwáke, enhonʼnonnánion ne ionteriʼiostákwas tánon tsi niwatstaʼshón꞉ʼahs ne raoʼserehshón꞉ʼahs otsiónkwas.

¹³ Kwáh ó꞉ni iensakoiaténhawe ne ietsiʼióhʼokónha tsonatʼthonwísens tsi nenhteshakonóntonhse neh eniotiʼióh꞉ten nakonnónhni iontiaʼtakonʼonstákwa tánon nakonʼtikhón꞉ni ó꞉ni nakontinataronníseke.

¹⁴ Kwáh enhaterá꞉ko ne kwáh tishahentí꞉ios ó꞉ni ne iotenenhá꞉raʼre ó꞉ni ne iakeienwénhtha karontaienthóseron tánon ne enshakáwen ne ohén꞉ton iehonéton raonhatsherashón꞉ʼahs.

¹⁵ Kwáh enhateráʼko noieríhaton niʼkaiarake꞉haton ne sanatsiaʼshón꞉ʼahs ó꞉ni ne tsi sanenharaienthóhseron tánon ne ensaká꞉wen ne ratiʼriwakwení꞉ios ó꞉ni ne raonhatseraʼshón꞉ʼahs.

¹⁶ Iensakoiatenhá꞉seron ne rotiskenrakéte ó꞉ni ne tsonatʼthonwísens shaʼnatserashón꞉ʼahs, tánon ne kwáh sanaskwí꞉ios tionhnónskwarons ó꞉ni tewahóntes, tánon ensakoiótensʼte raoʼiotenhserá꞉kes.

¹⁷ Iensakoiatenhá꞉seron ne oierí꞉haton iehonnéton ne teotinakarontónhas ó꞉ni ne kaiatákeras, tánon í꞉se enhiatenaskónhniaʼte.

¹⁸ Tánon ne thóh enwenhniseráteʼke ní꞉se kwáh tenshaséntho neh enhariʼónhni sanontí꞉io, tsi niʼkáien ní꞉se tsiatarákwen ne iatheshiá꞉ti; ók ne Roiá꞉ner kwáh iáh thataʼiariwaserákwahse nètho enwenhniseráteke.”

¹⁹ Ók kiʼ nonkweʼókons iáh teonathontá꞉non nahontahónsatate ne raoʼwénhna ne Samuel; wahonníron, “Iáh! Ók tionkwanikonrakontákwen tsi enhionkwanontiʼiotseraién꞉taʼne nontionháke,

²⁰ káti ní꞉i kwáh thóh nahiotón꞉hake tsi kiʼ ní꞉iot ne ronatiaʼkésons ronhnonhontsaʼkerónons, tánon nètho onkwanontí꞉io ashonkwatkórasʼte tánon iehahiá꞉ken nonkwahénton tánon shonkwaterí꞉ios nonkwateriʼióseras.”

²¹ Nó꞉nenh ne Samuel wahothóntene akwé꞉kon ne raoʼtiwenhnaʼókons nonkweʼókons, tontahatʼnanéta tsi waʼhoróri ne Roiá꞉ner kwáh tsi niʼhonenh.

²² Ne Roiá꞉ner wahawénhase ne Samuel, “Saʼtahónsatat ne raoʼtiwenhnaʼókons tánon shenontiʼiótseron.” Ne Samuel washakawénhase NʼIsraeró꞉nons, “Tsi sewahiaʼtát꞉tshons tsi tisewanonshótons nionʼsáseʼwe.”