1 Samuel 4 - Ohiatonhseratokénti

¹ Tánon ne raoʼwenhnaókons ne Samuel wahakoiatórenhne ratiʼkwé꞉kon Israerʼró꞉nons. Ne éhʼthohʼnon shiwenhniseraʼténionsʼkwe ne Philistiaró꞉nons waʼhontenenhraʼserón꞉ni ne nateriʼiósera niaʼkonwatsatónhti Israel, wahontaʼthoserotónnion ákta ne Ebenezer, tánon ne Philistine ákta ne Aphek nón꞉we thonatathoseró꞉tons.

Ne Raoʼneró꞉kwa Ne Ní꞉io Waʼkonwaiéna

² Ne Philistine waʼontatʼkwahtáko tsi waʼthatinenhrá꞉taʼte niaʼkonwaʼtsatón꞉ti Israel, tánon nó꞉nen shonteriʼioserowáhna, ne Philistine waʼhonwatisénhni Israel, ne Philistine wasakotinonwarhiákon kákʼnon ne kaiéri niwenniaweʼetsheráhsen niháti ronterí꞉ios thóh kahentáke tsi waʼterí꞉io.

³ Nó꞉nen ne ronterí꞉ios shonsahónhneʼwe tsi watoseróhton, ne rotiʼtstonhonkónhas NʼIsraerʼró꞉nons wahonníron, “Onhnihiotiéren ne Roiá꞉ner tsi waʼshonkwénteron nón꞉wa wenhniserá꞉te ne naionkishén꞉ni raotiʼhén꞉ton ne Philistine? Háo éhʼthoh iéteʼwe Shiloh kén꞉ʼen thiʼtewáhaf noneró꞉kwah ne raoʼteriwaʼseronniátshera ne Roiá꞉ner, káti ne naʼónton ahitewaʼteró꞉sen tánon ashonkwanónsthaʼte tsi nó꞉kwah ne raoʼtishaststén꞉sera ne ionkhíshons.”

⁴ Shók꞉kiʼ ne ronterí꞉ios iahonwanaténieʼte Shiloh, tánon thohʼnónwe nahontahatíhaʼwe ne oneró꞉kwah ne raoʼteriwaseronniátshera ne Sakoiá꞉ner ne ratiʼronhiakeró꞉nons, raónha thóh rénskote tsi natehiátere ne niʼnikonhrare iotokentis. Ne tenihiá꞉se raoʼnekenteróntsheras ne Eli, Hophni tánon Phinehas, ronón꞉ha nihnikonráraʼkwe nonerokwahtokénti skát꞉ne tsi taʼhón꞉ne.

⁵ Nó꞉nenh nonerokwahtokénti ne raoʼteriwasheronhniátshera ne Roiá꞉ner ón꞉we tsi watoseró꞉tons, ratiʼkwé꞉kon NʼIsraerʼró꞉nons teiotenonhianíton tsi wathotihén꞉rete, kwáh kiʼ watsahontsísonkwe.

⁶ Nó꞉nenh ne Philistine saonathónteʼne tsi niʼiotsarókwen teiakohenrétha, wahonní꞉ron, “Nahó꞉ten kí꞉ken tsi niʼiorakaré꞉ni teotihenrétha tsi thonatatoseró꞉ton ne Hebrews kéntons?” Nó꞉nen saotitókenʼse ne raoneró꞉kwah ne Roiá꞉ner tsi wahatíhewe tsi watoseró꞉tons,

⁷ ne Philistines wahotíʼteronhne; asèken wahonníron, “Ní꞉ioʼokónhas wahón꞉newe tsi watoseróhtons.” Kwáh ó꞉ni wahonníron, “Ionkwentenhtá꞉sere! Asèken iáh nonwénhton kí꞉ken thotetsawénhon.

⁸ Ionkwententá꞉sere! Ónka entsonkiniá꞉kenʼte tsi nó꞉kwah ne kí꞉kens raní꞉ios? Ne kí꞉kens ne ratiní꞉ios ronón꞉ha ne sakotiʼién꞉ton ne Egyptró꞉nons ne kwáh niaʼtékon í꞉ken kannratarinétsheras thóh nón꞉we iahonwenhtsiaʼthénhake.

⁹ Sewanikonranirón꞉hak, tánon rón꞉kwe kénhak, Ó Philistines, sewatatʼkwatáko ne tó꞉sa aietsinaskónhni ne Hebrews kwáh tsi niiót ní꞉i tsi ietinaskónhnisʼkwe; rón꞉kwe kénhak tánon sewaterí꞉io.”

¹⁰ Káti ne Philistine wahonterí꞉io; ne Israerʼró꞉nons wahonwatisén꞉ni, tánon wahonté꞉ko, tsi thoʼtinonshó꞉tons nionsahón꞉ne. Watewatenonhiánite tsi nahontawénhtho, asèken thóh nón꞉we nahatiʼiatiénenhne Israerʼró꞉nons; áhsen niwáhsen niwenniaweʼentsheráhsen ne thakésons tsi ní꞉iot tsi ronterí꞉ios.

¹¹ Ne raoʼneró꞉kwah ne Ní꞉io wakonwaiéna; tánon ne teniʼiá꞉se raoʼnekenteronhtseraʼshónʼahs ne Eli, ne ne Hophni tánon ne Phinehas, waní꞉heʼie.

Warénheʼie Ne Eli

¹² Benjaminró꞉non thóh nontahatátke tsi tewaterí꞉io tetkanenhráton, tánon thoʼnón꞉we náʼraʼwe Shiloh ne ne sahwenhní꞉sera, ne raoʼtsherón꞉ia ioteratsónhkwen tánon roʼtakenrá꞉ron ranontsí꞉ne.

¹³ Nó꞉nenh sáraʼwe, Eli renskwáhere raoʼnitshkwáraʼne ohahákta roʼrá꞉re, asèken tehaweriasiʼshón꞉kwa ne aoriwá꞉ke ne raoneró꞉kwa Ní꞉io. Nó꞉nenh ne rón꞉kwe sahanatáraʼne ne kanatowanénhne tánon wahakró꞉ri noríhwase, kanatakwé꞉kon ne kanatowaʼkènke watiaʼkohénrehte.

¹⁴ Nó꞉nenh ne Eli sahothón꞉tene tsi naʼteotihenréta, wahén꞉ron, “Nahó꞉ten kí꞉ken tsi nihiorístare?” Eʼthó꞉ne ne rón꞉kwe tsiaʼtosteríhen tsi waoró꞉ri ne Eli.

¹⁵ Ó꞉nen ne Eli tióhton niwáhsen-shaʼté꞉kon shihahoserákwen tánon iáh teshakarí꞉io, káti iáh tsiaʼtesakaraién꞉tas.

¹⁶ Ne rón꞉kwe waʼhawénhaʼse Eli, “Kwáh ónʼwák thóh natón꞉take tsi tewaʼterí꞉io; Thontaʼkeniá꞉kenʼne ne tsi tewaterí꞉io nón꞉wa wenhniseráte.” Wahén꞉ron, “Onkáti naʼá꞉wenhʼne konién꞉ʼa?”

¹⁷ Ne rariwaʼkaré꞉nies waʼtariwaseráko, “Israerʼró꞉nons wahontèko raotihén꞉ton ne Philistine, tánon kwáh í꞉ken tsi iawetatʼtsáni waʼshakonáwenʼtho nonkweʼó꞉kons ne ronterí꞉ios; sanekenterontsherashón꞉ʼahs ó꞉ni, Hophni tánon ne Phinehas, watʼníheʼie, tánon ne raoʼneró꞉kwa ne Ní꞉io waʼkonwaiéna.”

¹⁸ Nó꞉nenh ne sahaʼthá꞉raʼkwe ne raoneró꞉kwah ne Ní꞉io, ne Eli iahasátaʼne tsi nihenhskwará꞉kwe ákta tsi iotenhenraká꞉ronte; tsi thaʼhonkweʼta꞉ionkwe tanon roʼresen tsi iahasatenhne wahthateniarhiake ó꞉ni warénheie. Raʼón꞉ʼa tesakohiatoretaséhaʼkwe ne Israerʼró꞉nons ne ne kaié꞉ri niʼioseráhsen nikaríweskwe.

¹⁹ Nón꞉wa ne shakosá꞉fa, ne rónekwe ne Phinehas, iakowiraientásere, ó꞉nen thó꞉wa iakáhewe naʼiowí꞉raién꞉tane. Nó꞉nen sakariwá꞉ronke nètho raoneró꞉kwa ne Ní꞉io tsi konwaiénen, tánon ne ronwenónhsa ó꞉ni ne ró꞉ne teonenhé꞉ion, waʼtewatsá꞉kete tánon wahowiraién꞉taʼne; asèken tsi naʼkaronhiáken tsi wahowiraién꞉taʼne.

²⁰ Ó꞉nen skanó꞉rons akénheʼie, ne konnón꞉kwe konwateriwaststerístá꞉se waʼkonwénhase, “Tó꞉sa setsá꞉nik, asèken raksáʼa wesawiraiéntaʼne.” Ók iáh othé꞉nen tetsotáti khéhs taioriwaserákwen.

²¹ Ne raksá꞉ʼa Ichabod waʼhonátonkwe, tsi nikenténtons, “Ne kaiatanerakwátshera éh꞉ren waʼhé꞉te NÍsraerʼronónke,” ne tioriwa ne raoneró꞉kwa ne Ní꞉io tsi konwaiénen tánon ne waʼkariónni ne shakosaʼfaskénʼen ó꞉ni ne ró꞉nekwe.

²² Waʼkénron, “Ne kaiatanerakwáhtshera éh꞉ren iawé꞉ton Nisraeronónke, asèken ne raoneró꞉kwa ne Ní꞉io tsi konwaié꞉nen.”