1 Samuel 31 - Ohiatonhseratokénti

Tsi Warénhé꞉ie Ne Saul ó꞉ni Ne Raonekenteronhtseraʼshón꞉ahs

¹ Nón꞉wa ne Philistines ronaterí꞉iokwe ne Israerʼró꞉nons tánon ne ronhnón꞉kwe wahontèko raotihén꞉ton ne Philistines, tánon ronatsiokowánen wahatiʼiátsenenhne tánon wahonwatinonwarhiákhon thóh tsi ionón꞉te ne Gilboa.

² Ne Philistines iahonwannónterane ne Saul tánon ne raonekenterontseraʼshón꞉ʼahs; tánon ne Philistines wahonwanonwarhiákhon ne Jonathan ó꞉ni ne Abinadab ó꞉ni ne Malchishua, ne raonekenterontseraʼshón꞉á ne Saul.

³ Naterihiósera kateronkwáhtsera wahó꞉rane ne Saul; ne ronhenhnénhawe wahonwahiatatʼtsénhri, tánon kwáh í꞉ken tsi wahonwakarewathánion.

⁴ Ehʼthóhʼne Saul wahawénhase rateriʼiostáhkwa ráhas, “Shió꞉tion ne shá꞉sare tánon testiaʼtáwehest nètho, ne káti nètho ne iáh tehonatewarakwátahron ne tó꞉sa ahón꞉ton nahontahón꞉ne tánon ne tahiontiatáweheste, tánon ne ahionkatswátahkwe.” Ók ne ráhas ne rateriʼiostákwa iáh tehothontháton; asèken sótsi roteronhienténhni. Káti Saul wahathá꞉wa ne raoʼsarehkó꞉wa tánon thóh iahathatsá꞉tsenenhte neh wahaiatohárahne.

⁵ Nó꞉nen ne rateriʼiostáhkwa ráhas sahatkátho nètho Saul tsi rawenhé꞉ion, rahón꞉ha ó꞉ni wahatáwa ne raosarehkó꞉wa tánon thóh iahatatiá꞉tsenenhte tánon skát꞉ne tsi waní꞉heie.

⁶ Káti ne Saul ó꞉ni ne áhsen niháti sakoiohokón꞉ʼahs ó꞉ni ne ráhas rateriʼiostáhkwa ó꞉ni ratikwé꞉kon ne raonkwetaʼshón꞉ahs ne ronhnón꞉kwe wahonníheie skát꞉ne ne sahennísera.

⁷ Nó꞉nen ne ronhnón꞉kwe ne Israerʼró꞉nons ne thóh thón꞉nes ní꞉se nokwáti nahonrákwahkon ó꞉ni tsi niiá꞉kon ne iehiotohétston ne Jordan sahatiriwáronke nètho ronón꞉kwe NʼIsraerʼró꞉nons tsi ronatékwen tánon nètho Saul ó꞉ni ne raoʼnekenteronhtseraʼshón꞉ʼahs tsi ronenhé꞉ion, watkonkénrate ne raotinátakon tánon wahontèko; tánon ne Philistines tahón꞉ne tánon thóh wahonthatíteron.

⁸ Nó꞉ia sisewenhniseráte, nó꞉nen ne Philistines tahón꞉ne nasakotiseronniási ne ronenhé꞉ion, wahonwahiatatʼtsénhri ne Saul ó꞉ni náhsen niháti raoʼnekenterontseraʼshón꞉ahs rotiiatsenénhen thóh tsi ionón꞉te Gilboa.

⁹ Wahonwanontsistsá꞉ke, wahonwashonrehniási ne rateriiostáhkwa, tánon iasakonatóri ratiriwakarénies tsi nihononhóntsas ne Philistines niahatíhawe ne kariwí꞉ios tsi rotinonshótons ne raotiʼiatónhnis ó꞉ni rononháke nonkweʼshón꞉ahs.

¹⁰ Thóh iahatí꞉ien ne rateriʼiostáhkwa thóh tsi raoʼnonsatokentiʼkowánen ne Astarte; tánon thóh wahatiwanérenhke ne raoierónhta tsi tewashóntote ne Beth-shan.

¹¹ Ók nó꞉nen ne ratinákeres ne Jabesh-gilead wahatiriʼwáronhke nahó꞉ten ne Philistines tsi nihonwaiérase ne Saul,

¹² ratikwé꞉kon ne rotinikonraʼtsá꞉nis ronón꞉kwe iahón꞉ne, wathonthá꞉hakwe asontahkwékon, tánon iahatíko ne Saul raoierónhta ó꞉ni ne raotiʼierontaʼsónhas ne raoʼnekenteronhtserashón꞉ahs ne tsi tewasóntote ne Beth-shan. Iahón꞉newe ne Jabesh tánon wahonwatiʼiatáta neh thóh nón꞉we.

¹³ Ehʼthóhʼne iahatíhawe ne raotistienshón꞉ʼahs tánon wakonwatiʼiatáhta karontókon ne Tamarisk thóh nón꞉we Jabesh, tánon wahonentóntsete tsá꞉ta nón꞉ta nikaríwes.