1 Samuel 3 - Ohiatonhseratokénti

¹ Nón꞉wa ne raksá꞉a Samuel ne roteriwatsteristénhnisʼkwe ne Roiá꞉ner raohén꞉ton ne Eli. Ne raowénhna ne Roiá꞉ner kwáh wakén꞉rekwe nètho shiʼwenhniseraténionsʼkwe; neh iekariʼwá꞉ken iáh íhnón tsi thatewahreniáton.

² Nètho shiʼkaháwi Eli, ne raká꞉rake thontáshawen nahakarák꞉senhne neká꞉ti iáh tesewátonsʼkwe ne thènen ahonsahakʼkátho, thóh rahiatiónhnikwe tsi ranonwètstha;

³ ne raotʼthaserotákwah ne Ní꞉io iáh arèhko shiʼioswàhon, tánon ne Samuel thóh raiatiónhnekwe raononsatokentíke ne Roiá꞉ner, thóh nón꞉we nikaién꞉taʼkwe ne raonorókwah ne Ní꞉io.

⁴ Ethóhʼne ne Roiá꞉ner iahonáton, “Samuel! Samuel!” tánon wahén꞉ron, “Kén꞉en í꞉kes!”

⁵ tánon iatorátʼthaʼte Eli, tánon wahén꞉ron, “Kén í꞉kes, asèken í꞉se iaskenáton.” Ók ne rahón꞉ha wahén꞉ron, “Iáh tiekonnáton; sahá꞉rate shé꞉kon.” Sók kiʼ thóh nionsá꞉re tánon sahá꞉rate.

⁶ Ne Roiá꞉ner ionsahonáton shé꞉kon, “Samuel!” Samuel thontahaksʼkétskwahte tánon thóh niahá꞉re tsítres ne Eli, tánon wahén꞉ron, “Kén꞉thon í꞉kes, sé꞉ken í꞉se iaskenáton.” Ók ne raónha wahén꞉ron, “Iáh tiekonhnáton, konʼién꞉a; shaʼsárat shé꞉kon.”

⁷ Nón꞉wa ne Samuel arèko shiʼhoientéri ne Roiá꞉ner, tánon ne raowénhna ne Roiá꞉ner iáh arèko shiʼhonwarihotashiénhni ne raonháke.

⁸ Ne Roiá꞉ner ionsahonáton ne Samuel shé꞉kon, ó꞉nenh ne ne asénhaton shiaʼhonáton. Tánon tahakétsko tánon thóh niahá꞉re tsítres ne Eli, tánon wahén꞉ron, “Kén꞉en í꞉kes, asèken í꞉se iaʼskenáton.” Ethó꞉ne ne Eli wahariwaientérehne nètho Roiá꞉ner ne ieonatón꞉nionskwe ne rák꞉sa.

⁹ Ne káti aoríhwa Eli wahawénhase ne Samuel, “Wáhs, iashá꞉rak; tánon tó꞉ka ienhianáton, ní꞉se kwáh enshí꞉ron, ‘Satá꞉ti, ne Roiá꞉ner, asé꞉ken ne sanhá꞉tshera tsi rotahón꞉sate.’” Sók kiʼ ne Samuel iahá꞉re tánon wahá꞉rate ne raonák꞉take.

¹⁰ Nón꞉wa ne Roiá꞉ner tá꞉reh tánon wathá꞉tane neh thóh nón꞉we, iesakó꞉natonhnions tsi nitió꞉tonhne, “Samuel! Samuel!” Tánon ne Samuel wahén꞉ron, “Sathá꞉ti ne sanhá꞉tsera rotahón꞉sate.”

¹¹ Eʼthó꞉ne ne Roiá꞉ner wahawénhase ne Samuel, “Satkátho, ó꞉nenh tóh꞉wa thóh nátieʼre knahótenk thóh nón꞉we Nisraerʼró꞉nonhke neh enhionhniá꞉te tetsá꞉ron ne ohónhta neh tsikʼónka ahiakothónhtene tsi enhiowistákaʼre ne iehontákon.

¹² Ne éhʼthoh enwenhniserá꞉teke kwáh enkenáh꞉ne nahiʼiatkónten ne Eli akwé꞉kon tsi niwakathatí꞉hon ne aorihwáke ne tsi ronón꞉shote, kwáh tsi nitsiotásaʼwe tsi nió꞉re ne tsi iehió꞉tokʼte.

¹³ Asèken í꞉i riʼró꞉ri nètho í꞉i tsi ó꞉nenh thó꞉wa akréwaʼte ne tsi ronónshoʼte ne ne tsi nénhwe enkén꞉hake, asèken ne kariwahetkénhsera tsi roteriéntaraʼkwe, tsioríwa ne raoʼnekenterashón꞉ʼahs tsi ronwariwaiesaténhnis ne Ní꞉io, tánon iáh teshakoríston.

¹⁴ Ne káti aoríhwa wakerihwanírate thóh tsi ronónshoʼte ne Eli nètho raoʼriwahetkénhsera ne Eli tsi ronónshoʼte kwáh iáh ne éhʼren tahonsakaháwiʼte tsi akonwateskónten katshénenh khéhs nahontahatí꞉iestake ne tsi nénhwe akénhake.”

¹⁵ Samuel thóh raiatiónhni tsi nió꞉re iahiórenhne; ehʼthóhne ónenh wahthononhónti ne tsi ronónhshoʼte ne Roiá꞉ner. Samuel roteronhienténhni nahoró꞉ri natsianerón꞉sera ne Eli.

¹⁶ Ók Eli iahonáton Samuel tánon wahén꞉ron, “Samuel konién꞉ha.” Tahénron, “Kénʼen íhkes.”

¹⁷ Eli wahén꞉ron, “Onhnahó꞉ten nètho wahiaró꞉ri? Tó꞉sa takatashéten. Aiá꞉wenhs ne Ní꞉io kwáh thóken꞉en ahiawéwate tó꞉ka ní꞉se asheriwásehte knahótenk tsi nó꞉kwa ní꞉i akwé꞉kon nètho iaró꞉ri.”

¹⁸ Káti ne Samuel wahoró꞉ri orihwaʼkwékon tánon iáh othènen teorihwasheténhni. Eʼthóhʼne wahén꞉ron, “Kwáhʼse raónha Roiá꞉ner; Tserí꞉on thó꞉nihaier nahó꞉ten ahioianeréhake ne raónha.”

¹⁹ Tsi nontahateiéron ne Samuel, ne Roiá꞉ner tsi nikwekonháties tánon iáh tehawéron ne skawénhna nonhontsá꞉ke iakaién꞉tane.

²⁰ Tánon onkweʼtakwé꞉kon NʼIsraerʼró꞉nonke thóh thontásawenh Dan tsi nió꞉re ne Beer-sheba iakoteriéntaraʼkwe nètho Samuel tsi roriwatóken tsi roteriwanhotánis ne Roiá꞉ner.

²¹ Ne Roiá꞉ner iehokontákwen tsi ratotáshionsʼkwe ne Shiloh nón꞉we, asèken ne Roiá꞉ner kwáh raónha wahothotáshien ne Samuel ne Shiloh nón꞉we thóh raoʼwénhnake ne Roiá꞉ner.