1 Samuel 29 - Ohiatonhseratokénti

Ne Philistiaró꞉nons Wahonwakénron Ne Táwit

¹ Ó꞉nen ne Philistines washakotiʼiataró꞉roke ratikwé꞉kon ne raotitsió꞉kwas ne ronterí꞉ios thóh nón꞉we Aphek, tsi ne ná꞉he NʼIsraerʼró꞉nons thóh ronathatoseróhtonkwe ákta tsi ionáhwerote ne Jezreel.

² Ne wísk nihatinontiʼioseráke iahatiʼnenhrínekenkwe skát꞉ne ne skentsiokwátions ne raotitsió꞉kwas ne ne tewenhniawehét꞉kons tánon tewenhniawehetserásens nihá꞉ti, tánon ne Táwit ó꞉ni ne raotsió꞉kwas thóh neh nonnahóntoheste onáhken nokwáhti skát꞉ne ne Ronnontí꞉io Achish,

³ ne ronteriʼioserakweʼní꞉io ne Philistines wahonníron, “Ónh nihontiéra kí꞉ken Hebrews ne kénʼen?” Achish washakawénhase ne ronteriʼioserakweʼní꞉ios ne Philistines, “Iáh kén kí꞉ken Táwit tèken, ne raonhá꞉tsera ne Ronnontí꞉io Saul ne Israeronónke, ne raónha ó꞉nenh kwáh thóh tsi nikaríwes siʼiakenikwékon? Tsi ná꞉he akonhá꞉ke thoʼniakénʼen iáh othènon tehiriwatsénhrhiase tsi niió꞉re nón꞉wa wenhniseráte.”

⁴ Ók ne ronteriʼioserakweʼní꞉ios ne Philistines ronwaná꞉kwase; tánon ne ronteriʼioserakweʼní꞉ios ne Philistines wahonwénhase, “Ionsatsiatóri ne rónkwe, káti ne nahónton thóh niahonsáre tsi nón꞉we nitsenakʼtatseronhniénhni; ne raón꞉ha kwáh iáh tahiá꞉taiakwakweni naiakwateriʼiósera, nontiérek ó꞉ni aktenokwáhti entharihwaʼrákwen nateriʼioseráke. Asèken onhní꞉ioht kí꞉ken rón꞉kwe tsi ahonsahathateriwiʼiósten rahonháke ne rowenní꞉io? Ne kén tsi enshonkwatkónten ó꞉ni enshonkwanonwarhiá꞉khon?

⁵ Iáh kén ne kí꞉ken ne Táwit tèken, ne ne ronónha wathontaterihwákwase thóh kanonhniatserákon, ‘Ne Saul sakononwarhiaʼkhónhnion tewahniawehetseráhsen nihá꞉ti, tánon ne Táwit raón꞉ha nènhne sakonʼnonwariákhon noié꞉ri tehonnenhwenʼniaweʼehtserásen ní꞉hati’?”

⁶ Ehʼthóhʼne ne Achish iahó꞉nonhke ne Táwit tánon wahawénhase, “Tsi nironnhétie ne Roiá꞉ner, ní꞉se tsi sarihwatóken, tánon ní꞉i ne tkarihwaié꞉ri nètho ní꞉se ahó꞉wenk naskatiá꞉tahrase nakitsió꞉kwakon ronterí꞉ios; asèken iáh othènon tewahketsénrion ne tasaterientahweriésehke tsi ná꞉he tsíso nakonháke tsi niió꞉re nón꞉wa wenhniseráte. Nek kiʼ sá꞉ka ne rotinontí꞉ios iáh kiʼ teiesariwanirátʼtse.

⁷ Káti wáhs kiʼ ó꞉nen shasaténhti; tánon skénnok tsi nionsáse; tó꞉sa othènon sehnikonrák꞉sat ne rotinontí꞉ios ne Philistines.”

⁸ Ne Táwit wahawénhase ne Achish, “Ók onhniwakatiéren? Onhnahóten sariwatsénrion tsi nokwáh ní꞉i ne sontonʼtenhniseraʼtsiérenhte tewakatahweʼiáton ne sentsioʼkwáhkon tsi niió꞉re nón꞉wa wenhniseráte, nètho tsi iáh thaʼteiotonhontsóhon niáke tánon naiakwaterí꞉io ne ronwáhshons natiá꞉ner ronnontí꞉io?”

⁹ Ne Achish wathorihwaserákwahse ne Táwit, “Wakateriéntare tsi iáh othènon tesaní꞉kon nakʼkénton tsi ní꞉ioht ne raoronhiakeró꞉non ne Ní꞉io; nék kiʼ sá꞉ka ne ronteriʼioserakwení꞉ios ne Philistines wahonníron, ‘Ne raón꞉ha kwáh iáh skát꞉ne tiaiákwe nateriʼioseráke.’

¹⁰ Ó꞉nenh káti satʼkétsko iostó꞉rek noronkéne, í꞉se tánon ne raonhatserasónhas ne Saul tsi raón꞉ha skát꞉ne tisewé꞉non, tánon tashatásawen oronkéstsi, tánon éhren sáset kwáh tsi niiostó꞉re teniostʼwáthene.”

¹¹ Káti ne Táwit tahatásawen skát꞉ne ne raonkwetashón꞉ʼahs ne shiʼioronkéstsi, ne thóh niahonsáre tsi thóh nonhontsáien ne Philistiaró꞉nons. Ók ne Philistines thóh nenhʼné꞉eh nón꞉we niahónhne Jezreel.