1 Samuel 28 - Ohiatonhseratokénti

Ne Saul tenitárah tsi niká꞉ien ne ronenhé꞉ions tehatitára

¹ Neh thóh siwenhniseraʼténionkwe ne Philistines wahsakotiʼiataróhroke ne raotitsió꞉kwas ronterí꞉ios nahonteriʼiósera, ne nahonterí꞉io NʼIsraerʼró꞉nons. Ne Achish wahawénhase ne Táwit, “Ní꞉se sateriéntahre, kiʼ wá꞉hi, nètho ní꞉se tánon ne shonkwetaʼshónhas tsi í꞉i énh꞉tewe ne ronterí꞉ios.”

² Ne Táwit wahawénhase ne Achish, “Kwáh ioiá꞉nere, ehʼthóhʼne ní꞉se ensaterienhtáhrane tsi niwakkwé꞉nion tsi nátiere.” Ne Achish wahawénhase ne Táwit, “Kwáh ioiá꞉nere, Í꞉se ne enkonhiónhni nastiatanónnahke tsi nikón꞉nhes.”

³ Nón꞉wa ne Samuel ó꞉nenh rawenhé꞉ion, tánon kanenrahkwé꞉kon NʼIsraerʼronónke ronwatiónhnionhse ne raón꞉ha tánon wahonwahiatháta thóh nón꞉we Ramah, ne ne kwáh raón꞉ha raonátakon. Ne Saul shesakoiatinekénʼon ne tehathiʼthára ne ronenhéions ó꞉ni ne niatehotiriwáke ne tsi iohontsáien.

⁴ Ne Philistines wahontkenhní꞉sa, tánon tahón꞉ne ó꞉ni wahonthatoserohtónhnion thóh nón꞉we ne Shunem. Ne Saul washakoiataróhroke kaʼnenrahkwékon NʼIsraerʼronónke, tánon thóh nón꞉we nahonthatoserohtónhnion Gilboa.

⁵ Nó꞉nen ne Saul shasakóken ne raotitsió꞉kwas ronterí꞉ios ne Philistines, kwáh wahoterónhne, tánon kwáh í꞉ken tsi wathawerhiashí꞉shonhkwe.

⁶ Nó꞉nen ne Saul sahoriwanóntonhse ne Roiá꞉ner, nr Roiá꞉ner iáh tahtehoriwaserakwénhni, iáh naʼtetsenhsehrákon, khéhs ne ratsihénstatsi, khéhs ne rotitó꞉kenhse.

⁷ Ehʼthóhʼne ne Saul wasakawénhaʼse ne raonhatserashón꞉ʼahs, “Sewahiatísak ne ní꞉i akeriwáke ionkwéne ne ahón꞉ha tahatitháren ne ronenhé꞉ion, ne káti nahón꞉ton ahonháke niáke tánon akerihwanóntonhse.” Ne raonhatsheraókons wahonwénhase, “Thóh tkénteron ne tehathithára ne ronenhé꞉ions ne Endor nón꞉we.”

⁸ Káti ne Saul wathatahtierónhnion tánon ó꞉ia niwahkweniió꞉ten wahatierónhniate tánon thóh nón꞉we niahá꞉re, rahón꞉ʼa tánon ó꞉ia teniiá꞉se wahón꞉ne. Iahónhnewe tsitkénteron ne ión꞉kwe tsi niwasónhteskwe. Tánon warénhase, “Tesehnhithá꞉ren ne rawenhé꞉ion ní꞉i akerihwáke ne ne tsi niká꞉ien enhináton ne shonháke.”

⁹ Ne ión꞉kwe wahawénhase, “Oriwiʼiohónwe tsi sateriéntahre tsi nihoiéren ne Saul, tsi ní꞉ioht tsi sakoiát꞉se ne ronenhé꞉ions tánon ne niatehotirihwákes ne tsi ionhontsá꞉ièn. Nontiéren káti ní꞉se tsi sateristahién꞉tons ne tsi kónnhe ne ne ahontakáhawe kenhé꞉ion?”

¹⁰ Ók kiʼ ne Saul waharihwaníratʼtse rahonháke ne Roiá꞉ner, “Tsi nirón꞉nhe ne Roiá꞉ner, iáh ne karewathátsera tahontáwe ne shonháke ne kí꞉ken nahorihóten.”

¹¹ Ehʼthóhʼne ne ión꞉kwe wakén꞉ron, “Ón꞉ka ká꞉ti ahontahiiatarát꞉tenste ne sarihwáke?” Watahrihwaseráko, “Tatsiatarátʼtents Samuel nakeriwá꞉ke.”

¹² Nó꞉nen ne ión꞉kwe sahó꞉ken ne Samuel, tiatsohenrehtekówa; tánon ne ión꞉kwe wahawénhase ne Saul, “Nontiéren tsi tastié꞉ron? Í꞉se ne kén ne Saul!”

¹³ Ne ronnontí꞉io warénhase, “Tó꞉sa shá꞉teron; onhnahóten satkáthos?” Ne ión꞉kwe wahawénhase ne Saul, “Rí꞉kens raní꞉io tahokethotonhátie nohontsá꞉ke.”

¹⁴ Wahrénhase, “Ónh nihahiatóten?” Wakén꞉ron, “Roksténha tahokethotonhátie; ne tehotwáhwenhe ne wakó꞉ses atewehiá꞉ra.” Káti ne Saul shihoteriéntahre tsi Samuel thí꞉ken, tánon ohontsáke iatatʼtsákete, neh wahrón꞉niate ne kakwenienstátsera.

¹⁵ Ehʼthóhʼne ne Samuel wahawénhase ne Saul, “Ónhʼnontsiéren tsi wateskenikonrá꞉ren tsi tontastiatarákʼtenste?” Ne Saul wathariwaserá꞉ko, “Kwáh í꞉ken tsi kowáhnen tewakenikón꞉rare, asèken ne Philistines kwáh ionkaronkaténhnis nahontahionkatiatónhti, tánon ne Ní꞉io éhʼren ne rawé꞉ton nakonháke tánon iáh ó꞉nen thateshakeriwaserakwénhnis, khéhs tsi nòkwah ne rotitó꞉kense khéhs tsi nó꞉kwah natetʼtsenserákons; káti í꞉se iakón꞉nonhke nasekró꞉ri onnátiere.”

¹⁶ Samuel wahén꞉ron, “Ónh nontiéren tsi waskerihwanóntonhse, tsitʼsén꞉hak ne Roiá꞉ner shiaʼtewenhtéton tánon wahiá꞉shon?

¹⁷ Ne Roiá꞉ner thóh nahiaiérase tsi kiʼ nihakróri; asèken ne Roiá꞉ner roráhtion ne kanakerásera ne sahtshanáke, tánon neh teshakówi ne tetiatonhontsanéken, Táwit.

¹⁸ Ne tsioríhwa tsi iáh tesatewenhnará꞉kwen ne Roiá꞉ner raoriwatát꞉tshera tánon iáh tsesahshá꞉haton nasehiathón꞉ton ne Amalekró꞉nons ó꞉ni akwé꞉kon tsi nihotíien. Ne kiʼ aoríhwa ne Roiá꞉ner thóh kí꞉ken nihiaierasehátsie ó꞉nenh.

¹⁹ Sénha í꞉si nón꞉we ne Roiá꞉ner kwáh ní꞉se tánon ne Israel thóh iènsewathátehre rontshanákes ne Philistines; tánon nenhió꞉renhne ní꞉se tánon ne sanekenterontserashón꞉ahs kwáh í꞉i entewakwékahne; ne Roiá꞉ner kwáh ó꞉ni ne Israel raotitsió꞉kwas ne ronterí꞉ios thóh ienhonatátere rontshanákes ne Philistines.”

²⁰ Kwáh ók sá꞉ok ne Saul wahahiatiénenhne kwáh tsi nihanénhies thóh ohontsá꞉ke, kwáh ne rahiatahná꞉non kateronkwáhtsera ne tahkarihón꞉niate ne raowenhnaʼókons ne Samuel; tánon iáh othènon teshasháststekwe ne raonhá꞉ke, asèken kwáh iáh othènon tehawékon kontáhtsie ó꞉ni asontahkwékon.

²¹ Ne iónkwe wahoiatórenhne ne Saul, tánon nó꞉nenh saó꞉ken nètho tsi nioteronhnientén꞉ni, wahawénhase, “Ne sanhá꞉tshera kwáh í꞉se wahiatahónsathate; Ní꞉i tonthakatenikonratsánite, tánon wakatahónsathate tsi nahó꞉ten waskeriwanón꞉tonhse.

²² Nón꞉wa ne kiʼ aoríhwa, ní꞉se tsiatahónsatat ne sanhá꞉tshera; thóh kiʼ ostón꞉ha khonkwaserón꞉nien ne tasaská꞉hon. Nètho nahón꞉ton ashesháststeke nó꞉nen tesheshatháhakwe.”

²³ Iáh tehothontáhton, tánon wahén꞉ron, “Kwáh iáh thatahkatskáon.” Ók ne raonhatserashón꞉ahs, skát꞉ne ne iónkwe, wahonwárehke; tánon washakowénhnarakwe. Káti thontahakʼkétsko nonhontsáke tánon kanakthá꞉ke wahanitskwáhren.

²⁴ Nón꞉wa ne iónkwe ionaskwaiéntakwe ne iorehsénston tionnónskwaron owí꞉ra naohnónskon. Watsiosteríhen wahowènhtho, tánon iahatéwakwe othé꞉sera, watkasehrakwénhteste, tánon ontenatahrón꞉ten ne iáh tewatʼthenkwáhton kanátahro.

²⁵ Thóh waká꞉ren raohénton ne Saul tánon ne raonhatserashón꞉ʼahs, tánon watonská꞉on. Ehʼthóhʼne tonsahatítahne tánon sahonténhti nètho wasonthátekwe.