1 Samuel 24 - Ohiatonhseratokénti

Ne Táwit Wahanónstate Ne Saul Tsi Rón꞉nhe

¹ Nó꞉nen ne Saul shonsáraʼwe tsi sakó꞉serehne ne Philistiaró꞉nons, wahonwaró꞉ri, “Ne Táwit thóh iéhres tsi tsahonwenhtsatʼténhake ne En-Gedi.”

² Eʼthóhʼne ne Saul iasakohiatén꞉hawe áhsen tewenhniawehetseráhsen ne kwáh kaiatarákwen ronnón꞉kwe ne Israerʼronónke, tánon iahón꞉ne wahonwaiatiʼsákha ne Táwit tánon ne raonkweʼtashón꞉ahs tsi nieiawénon ne Iotsténrá꞉re ne Karakonrónon Kaiatákeras konwanatónkwah ne En-Gedi nón꞉we.

³ Iahá꞉rahwe tsi konwathiterontáhkwah teiotinakarontónha owahák꞉ta í꞉ken, thóh nón꞉we niʼiotstenrahkáronte; tánon ne Saul thóh iahatáhwehiaʼte náste iáreh. Nón꞉wa ne Táwit tánon ne raonkwetashón꞉ahs thóh tatitskó꞉ton neh kwáh í꞉non iéhke nosón꞉wakon.

⁴ Ne raonkweʼtashón꞉ʼahs ne Táwit wahonwénhase, “Kénʼen wenhniseráte ne ne tsi nihién꞉ni ne Roiá꞉ner, ‘Enhihiatiakwarísi ne iá꞉sons thóh shasanáke, tánon ní꞉se thóh nahtié꞉ras tsi nenhtesenón꞉wehne.’” Ethó꞉hʼne ne Táwit iahá꞉re atahséhtonke tahroharáhko ne tsi iatekaiósaien ne Saul tehatewehiaráhkwah.

⁵ Onakènke ne Táwit wathó꞉kwahte rawerhiáne tsioríhwa tsi tahoharáhkwen ne tsi iatekaiósaien ne Saul tehatewehiaráhkwah.

⁶ Ne raónha wasakawénhase ne raonkwetaʼshón꞉ʼahs, “Ne Roiá꞉ner roriwáston neh thóh kí꞉ken nahiʼiéhrase Natiá꞉ner, ne ne Roiá꞉ner roiatahrákwen, neh niaʼtahkanénhtseste nahiʼiatkónten; asèken ne ne Roiá꞉ner rohiatahrá꞉kwen.”

⁷ Káti ne Táwit kwáh í꞉ken tsi wahsakotewenhnaién꞉tonhwe ne raonkweʼtashón꞉ʼahs tánon iáh tesakorihwá꞉wi niaʼhonwatiatónhti ne Saul. Eʼthóhʼne ne Saul wathá꞉tahne tánon tontahaiákenʼne nosón꞉wahkon, tánon tahatásawen wahathahítha.

⁸ Onahkènʼke ó꞉ni ne Táwit tonthahaiá꞉kenʼne nosón꞉wakon tánon iahonáhton ne Saul, “Atiá꞉ner sanontí꞉io!” Nó꞉nenh ne Saul raonáhken ionsahatkátho, Ne Táwit watatʼtsá꞉kete ohontsá꞉ke niahatsérate, tánon tsi nahá꞉iere ne naokwé꞉nienste.

⁹ Ne Táwit wahawenhá꞉se ne Saul, “Onhnontiéren tsi satahón꞉satats ne raotiwenhnashón꞉has ne tsi nihá꞉ti ne rón꞉ton, ‘Ne Táwit iahiatísaks nahiakaréwate’?

¹⁰ Kwáh kénʼen wenhniserá꞉te í꞉se skará꞉ke ontká꞉tho tsi ní꞉ioht ne Roiá꞉ner tsi tahiatsakwahrísi ne kesnonsáke thóh osón꞉wahkon; tánon ó꞉tiakes wahónt꞉rehke nakonhnonwaʼrhiákon, ók thonsakonnonhiánike. Wakíron, ‘Iáh tsatakanénhtsieste nahiʼiatkónten Natiá꞉ner; asèken raónha ne Roiá꞉ner roiatahrá꞉kwen.’

¹¹ Satkátho, rákeni, satkátho ne tsi iatekaiósaien ne tesateweʼhiarákwah, tánon tsi iáh tekonhnonwaʼrhiákhon, ne ní꞉se nahónton ahisaterenhtáhraʼne ne kwáh oriwí꞉io akénhake nètho tsi iáh nothènen tekarihwahét꞉ken khéhs nakaterihwatsate. Í꞉i iáh tewakeriwáneren tsi nòkwah ní꞉se, eʼthohʼsáne ní꞉se tsi satóratskwe ne tsi kónnhe naskenonwarhiákhon.

¹² Aiá꞉wens ne Roiá꞉ner tahahiató꞉rehte ón꞉ka ne tethenihiáse tetiaterientawénhris! Aiá꞉wenhs í꞉se ahiaré꞉wate asèken tsi nisehweiennóten tsi takát꞉konte, asèken ní꞉i kwáh kiʼ iáh thakonkaré꞉wate ne knahótenk ahontakarihónhni.

¹³ Tsi nihón꞉ton sés ne iethishothonkonkénʼen, ‘Ne kariwahét꞉ken tsi niiá꞉wenhs ne khók ne ionkweʼtahét꞉ken thóh nihatiiéra.’ Ók ní꞉i iáh kiʼ tsiaʼtakonhianisnonsáren.

¹⁴ Ónhniʼiohtsiéren í꞉se ne iesanontí꞉io NÍsraerʼronónke, tsi tá꞉se ón꞉ka shé꞉seres? Ne kén ne rawenhé꞉ion érharh? Ó꞉ni skatsinónhwa katsinonwahkéras?

¹⁵ Aiá꞉wens ne Roiá꞉ner thóh nón꞉we natahaiatórehte tánon ahontahátkaʼwe ne karihwenhtáhtshera tsi natetiá꞉tere ní꞉i tánon ní꞉se. Aiá꞉wens ahakenhénhion, tánon nahontahákene, ó꞉ni nahonsahakeniákente tsi nòkwah ní꞉se.”

¹⁶ Nó꞉nen ne Táwit sahá꞉sa tsi nihotharaníhakwe ne Saul, ne Saul wahén꞉ron, “Í꞉se kén kí꞉ken sawénhna, konkén꞉ʼa Táwit?” Ne Saul wahatewenhnakétsko tánon wathaséntʼtho.

¹⁷ Wahawénhase ne Táwit, “Í꞉se sénha saiá꞉neren tsi ní꞉ioht ní꞉i; asèken ní꞉se ne shasetkarhiátʼten ne ioiá꞉nere, ók ní꞉i ne konkarhiatʼténhni ne karihwahétken.

¹⁸ Ón꞉wa wenhniseráte ní꞉se wasenikonraién꞉thate tsi ní꞉ioht ní꞉se tsi nashé꞉reh ne ioiá꞉nere tsi nòkwah ní꞉i, neh tsi iáh teskenonwaʼriákhon nó꞉nenh ne Roiá꞉ner thóh wahakátkawe satshanáke.

¹⁹ Asèken ón꞉ka nón꞉kwe nonwénhton sakotiʼiatatʼtsénrion ne tehontátʼtions, tánon shaʼsakonatékwahte ne tehontátʼtions kwáh skénnonk tahkén꞉hake? Káti aiá꞉wens ne Roiá꞉ner tahiariwaserákwahse nahioianekéhake asèken tsi nahó꞉ten ní꞉se naskatiérase nón꞉wa wenhniseráte.

²⁰ Ó꞉nenh kiʼ onkateriéntarane ní꞉se kwáh oriwiʼiohónwe tsi ensatenontí꞉ioste, tánon nètho tsi kanakeraseráien ne Israerʼronónke kwáh í꞉se shatshanáke enshiatakwení꞉ioke.

²¹ Takerihwanírats nètho raosén꞉nakon ne Roiá꞉ner tsi iáh ní꞉se tasheiasáʼrhiake tsi wakwatsiratáhtie nó꞉nenh enwakiʼhéionke, tánon nètho ní꞉se tsi iáh tasetsenhnaráko ne tsi ronón꞉shote ne rakení꞉ha.”

²² Káti ne Táwit wahorahrátsten ne Saul. Eʼthóhʼne kiʼ ó꞉nenh ne Saul sahaténhti tsi thóh nón꞉shote nionsáreh; ók ne Táwit tánon ne raonkwetashón꞉ʼahs sahontahsehtáhna tsi nón꞉we thóh natahséhtonhne.