1 Samuel 21 - Ohiatonhseratokénti

¹ Ne Táwit iahá꞉rawe ne Nob nón꞉we tsi ténhteron ne ratihénstatsi Ahimelech. Ne Ahimelech tahaiákenhne rohiatisónhkwahne tsi wathiatátʼken ne Táwit, tánon wahawénhase, “Onhnontiéren tsi shonwáʼahkhok í꞉ken, tánon iáh ónhka tetsatenrosenhtátie?”

² Ne Táwit wahawénhase ne ratsihénstatsi Ahimelech, “Ne ronnontí꞉io rakeriwanietonhátie, tánon wahakénhase, ‘Iáh ón꞉ka tehió꞉wenk nahiakoteriéntarane ne thé꞉nenh kíʼoríhwa tsi iakoniaténieʼte, tánon ne tsi nakonrihónten.’ Wakerihwasherónhni tahitsatátʼken kenhnithaʼhonkwetaʼhiónha ne ne aorihwáke tánon tsi nón꞉we akén꞉hake.

³ Ó꞉nenh káti, nahoténhson sawinónhtie? Táskon wísk nikanatará꞉ke, khéhs tsi nahó꞉ten ne kén káien.”

⁴ Ne ratsihénstatsi watorihwaserákwahse ne Táwit, “Iáh ní꞉i tewakenatahrá꞉ien ne thiʼkániont kanáhtaro akénhake nón꞉wa, nék khók ne ionahtaraʼtokénti—káh niónhki ne kenʼnithotiʼión꞉a iáh teotinhawiʼon tsi nòkwah ne konhnón꞉kwe.”

⁵ Ne Táwit watorihwaʼserákwahse ne ratsihénstahtsi, “Oriwiʼiohónwe ne konhnón꞉kwe tsi éhren ioné꞉ton ne iakwahiatákʼta tsi tió꞉konte thóh ní꞉ioht ne nó꞉nenh tenkatsʼtikafásera; ne tsi ronón꞉nhe ne kén nithotiʼiónhas kwáh iotokénti í꞉ken iekaní꞉hare ne thiʼkániont tsi tahonstiʼkafásera; ónh ní꞉ioht tsi sén꞉ha nón꞉wa wenhniseráte ne kwáh ratiʼiatáhkes tsi ahiotokentíke?”

⁶ Káti ne ratsihénstatsi tahá꞉wenh ne ionatahratokénti; asèken iáh ó꞉ia tekanataraién꞉takwe nek khók tsi nikáien ronhwatáti ne Ní꞉io, ne ne kanahtarará꞉kwen thóh tsi iotekwahrahʼtsheraʼtokentíke tánon ne nonatarase skahere.

⁷ Nón꞉wa ronkwetatóken ne ne raonhá꞉tshera Saul thóh í꞉reskwe ne thóh shiʼwenhniserátekwe, ne ne éhren ronwaiatenhawíton raohénton ne Roiá꞉ner, Doeg ronwáiats ne ne Edomró꞉non, ne ohénton iehátahkwe ne Saul raonkwetaʼshón꞉ahs ne teiotinakaronhtón꞉ʼa sakotinhikonráhrakwe.

⁸ Táwit wahawénhase ne Ahimelech, “Iáh kén thènen ne ohshí꞉kwara khéhs nasarekó꞉wah ken teká꞉ien nasawá꞉ke? Iáh thetewáhkha nakasá꞉reh khéhs kateriʼiostáhkwahs natkawá꞉ke, tsioríhwa ne ronnontí꞉io raorihwashón꞉ahs wakarihwanón꞉ton naiostó꞉renhne.”

⁹ Ne ratsihénstatsi wahén꞉ron, “Ne raosarehkó꞉wa ne Goliath ne Philistiaró꞉non, tsi niká꞉ièn ne tsenonwarhiákhon nahonrákwahkon ne Elah, kénʼen káien oná꞉ken ne iontenskwenorokthákwa tsi káien ohniatará꞉ha kawenonniáton; tó꞉ka shí꞉ken iasá꞉we nètho, iahá꞉saf kíʼ, asèken iáh nó꞉ia kénʼen tekáien nek khók thí꞉ken.” Ne Táwit wahén꞉ron, “Iáh nó꞉iah tewasaráhien nètho naiotón꞉hake; táskon.”

¹⁰ Ne Táwit tonsahátane tánon wahatèko nètho wenhniserátekwe tsi nón꞉we níreskwe ne Saul; thóh niaʼháreh tsi thénhteron ne Ronnontí꞉io Achish ne ne Gath nón꞉we.

¹¹ Ne raonhatsheraókons ne Achish wahawénhase, “Iáh kén kí꞉ken ne ne Táwit ne ronnontí꞉io tsi ionhontsáien? Iáh kén thaʼteotirihwákwen tsi natehón꞉tereh ne raónha raorihwá꞉ke tsi wathaʼtinónhniaʼkwe, ‘Ne Saul sakononwarhiaʼkhónhnion tewahniawehetseráhsen nihá꞉ti, tánon ne Táwit raón꞉ha nénhne sakonʼnonwariákhon noié꞉ri tehonnenhwenʼniaweʼehtserásen ní꞉hati’?”

¹² Ne Táwit kí꞉ken owenhnasón꞉ʼahs kwáh í꞉ken tsi iahonikonrenháwite tánon kwáh í꞉ken tsi wahotsánike ne Ronnontí꞉io Achish ne Gath nón꞉we.

¹³ Káti ne Táwit tonsahatáhton tsi nihaweiennóten ne raotihén꞉ton; tánon ne ratatón꞉nis nahonakwenhénhake ne raotihén꞉ton. Waʼtahnákons ne tsi iotenhenrakaróntons, tánon ne raotskéris watewatʼnawénhte tsi teokonstón꞉ronhte.

¹⁴ Ne Achish wasakawénhase ne raonhatserashón꞉ʼahs, “Sewatkátho, tsi sewákens ne rón꞉kwe tsi ronhakwénʼen; ónh káti nontiéren tsi akonhá꞉ke nontatsisewaiaténhaʼwe?

¹⁵ Tekatkárias kén ne tehanonwahrawénhrie, nètho ní꞉se tsi tatsisewahiaténhawe kí꞉ken rón꞉kwe ne ne ahátswaʼte ne tsitʼtsahaieránion nakkénton? Kwáh káti kén kí꞉ken rón꞉kwe iahatáhwehiaʼte nakenónskon?”