1 Samuel 20 - Ohiatonhseratokénti

¹ Ne Táwit sahatèko ne Naioth ne ne Ramah nón꞉we. Iahárawe raohén꞉ton ne Jonathan tánon wahén꞉ron, “Ónh niwakatiéren? Ónh niwakeniʼtieró꞉ten? Tánon ónh ní꞉ioht nakeriwaneraháktshera tsi nòkwah ne ianí꞉ha nètho tsi rateniénta niahá꞉hawe tsi kónnhe?”

² Ne raónha wahawénhase nenenhʼné꞉eh, “Ahí꞉non ít꞉ken! Ní꞉se kwáh iáh thasíheie. Ne rakení꞉ha iáh othènon tahá꞉iere neh nahiorihowanénhke khéhs nahioriwáskha neh iáh í꞉i ohén꞉ton tehatróriaʼne; tánon ónhʼnontiéren ne rakení꞉ha naharihwáshete kí꞉ken? Iáh nonwénhton thóh tahá꞉iere!”

³ Ók kiʼ ne Táwit kwáh ó꞉ni waharihwanírate, “Ne ianí꞉ha roteriéntare ioiá꞉nere tsi roterién꞉tare ní꞉se tsi takenón꞉wes; tánon tsi nihanontónhnions, ‘Tó꞉sa rotókens ne Jonathan kíʼ, khéhs kwáh í꞉ken tsi enonikonrahkaréhwate.’ Ók oriwiʼiohónwe, tsi nihioʼriwí꞉io ne Roiá꞉ner tsi nirón꞉nhe tánon ní꞉se tsi nishón꞉nhe, thóh nón꞉we ók tsokháhak khók natehiatiátere tánon ne kenhé꞉ion.”

⁴ Eʼthóhʼne ne Jonathan wahawénhase ne Táwit, “Kwáh tsi nahó꞉ten ensí꞉ron, kwáh thóh nénhtiere ne sarihwá꞉ke.”

⁵ Ne Táwit wahawénhase ne Jonathan, “Nenhió꞉renhne áse enskarakwárahne, tánon iáh tahonkeriwanóron ne skátne ahiatiá꞉tièn ne ronnontí꞉io tsi nateiontská꞉ons; ók saskát꞉kaf, ne káti nahón꞉ton atatásehte thóh kahentáhke tsi niʼió꞉re nasenhá꞉ton nenhiokaratseráteke.

⁶ Tó꞉ka ne ianí꞉ha ratiatanikónrens iehiokontákwen, eʼthóhʼne kiʼtsíron, ‘Ne Táwit kwáh í꞉ken tsi thoʼnikonrakontáhkwen tsi waharihwanónton nahonsahihiátkawe ne ne thóh niahatáke Bethlehem ne ne raónha raonhá꞉ta í꞉ken; asèken thóh nón꞉we iaʼteioseráke ronteskóntʼtha ne nón꞉we ne kawatsirakwékon.’

⁷ Tó꞉ka enhén꞉ron, ‘Ioiá꞉nereh!’ kwáh kí꞉ken enkenónhweʼne; ók tó꞉ka ronakwénʼen, eʼthóhʼne kiʼ ensaterentará꞉ne nètho karihwahetkénhsera ne iateiorihwaién꞉tahse ne raorihwàke.

⁸ Ne kiʼ aorí꞉wa ne sateriwaténtsiát ne kanoronkwáhtshera nakonhà꞉ke, asèken í꞉se tánon ní꞉i iontisteriwaserónhni rohohénton ne Roiá꞉ner. Ók tó꞉ka wakatewehiaténhni ne kanítshera, takenonwarhiá꞉kon ne kwáh iateshiá꞉ti; ónh nontiéren tsi thóh niatsiaʼténhawe raohén꞉ton ne ianí꞉ha?”

⁹ Ne Jonathan wahén꞉ron, “Ahí꞉non í꞉ken ne sarí꞉wake! Tó꞉ka aonhkaterièn꞉tarake nètho tsi iatehó꞉rihwaién꞉tase ne rakeníha nètho kariwahetkénhsera aówenk nahontáhwe ahisárahne, iáh onhtèken takonró꞉rihke?”

¹⁰ Eʼthóhʼne ne Táwit wahawénhase ne Jonathan, “Ónhka enhiont꞉ró꞉ri tó꞉ka ken ne ianí꞉ha rahorihwaserakwáhsera kaniakátste?”

¹¹ Ne Jonathan wathorihwaserákwahse ne Táwit, “Káts, Áhnion thóh niehétene kahén꞉tahne.” Káti tenitsá꞉ron thóh niahá꞉ne kahentáhke.

¹² Jonathan wahawénhase Táwit, “Ne ne Roiá꞉ner, ne sakoʼNí꞉io ne Israerʼronónke! Nó꞉nenh enkeriwatsénhri tsi nironnóten ne rakení꞉ha, kák nón꞉we thóh kíʼnenhiowistahéhake nenhió꞉renhne, khéhs ne nasenhá꞉ton nenhwénhtake niió꞉re, tó꞉ka enhioianeréhake tsi niatehorihwaién꞉tase tsi nòkwah ne Táwit, kwáh onhtèken iáh ní꞉i tahontahkonhiaterihwaniéten tánon akonró꞉ri?

¹³ Ók tó꞉ka ne rakení꞉ha thóh nihonikonró꞉ten nahiakarónhni, ne Roiá꞉ner thóh kiʼ nón꞉ne eh nenhoiérase ne Jonathan, tánon kwáh ó꞉ni isiʼnónwe sén꞉ha, tó꞉ka ní꞉i iáh thakonrohrhiá꞉ne, Aiá꞉wenhs ne Roiá꞉ner ahiʼsenikwekónhake ní꞉se, tsi kiʼ ne nihniʼkwékon ne rakení꞉ha.

¹⁴ Tó꞉ka ní꞉i shé꞉kon akón꞉nheke, takenatón꞉has ne iorihwatóken raonoronkwáhtshera ne Roiá꞉ner; ók tó꞉ka akíheʼie,

¹⁵ tó꞉sa nonwénhton tahshón꞉nek ne sáwenk iorihwatóken kanoronkwáhtshera ne tsi wakenón꞉shote, shé꞉kon ó꞉ni tó꞉ka ne Roiá꞉ner nasakoiákʼse ne satihiaʼtátʼtshons ne ronwásons ne Táwit ne tsi kanonsho꞉te tsi ionhwenhtsá꞉te.”

¹⁶ Kíʼne Jonathan warónhni nateriwaseronniátshera skátne tsi ronón꞉shote ne Táwit, tsi nikawenhnó꞉tens, “Aiá꞉wenhs ne Roiá꞉ner iahsakó꞉nonke ne Táwit ronwásons nahatinikonraién꞉thate.”

¹⁷ Ne Jonathan wahahónhnien ne Táwit nahariwanírate shé꞉kon ne raonoronkwáhtshera tsi nòkwah ne raón꞉ha; asèken ronorón꞉kwah tsi kiʼ ne nihanorón꞉kwah tsi nirónnhe.

¹⁸ Ne Jonathan wahawénhase, “Nenʼiórenhne á꞉se entsiorahkwárake; ní꞉se kwáh kiʼ enhiesahiatísake, tsioríhwa tsi nón꞉we nisatsientáhkwah kwáh kiʼ anitskwaratserókskon í꞉ken.

¹⁹ Neh thóh enwenhniseráteke nó꞉ia nenhtsió꞉renhne, ní꞉se kwáh thóh nón꞉we nienhén꞉se ne ne kwáh í꞉ken iohá꞉hes; thóh nienhén꞉se tsi nón꞉we nisathaʼséhtonhne tsiotierénhton, tánon thóh sathásek oná꞉ken tsi ionenhiátstókote ne thóh nón꞉we.

²⁰ Ní꞉i kwáh ienkarónthate áhsen ni kaiénkwirake thóh ákta, tsi shí꞉ken ní꞉ioht thóh iakarónthate tsi tsió꞉hare ne iontesennahienstáhkwah.

²¹ Eʼthóhʼne raksá꞉a ienhiiaténiete, enhkí꞉ron, ‘Wáhs, shasesákʼkha thí꞉ken kaiénkwire.’ Tó꞉ka ahiʼiénhase ne raksá꞉a, ‘Satkáthos, ne kaiénkwire thóh tsatákʼta nokwàhti, shashonhrón꞉ko,’ eʼthó꞉ne kénʼen tathontáhse, asèken, tsi kiʼ nirón꞉nhe ne Roiá꞉ner, kwáh thóh ní꞉ioht tsi ensahiatanónsthate ní꞉se tánon kwáh iáh othènon tehiót꞉teron.

²² Ók tó꞉ka ahiʼiénhase ne kén nithaʼonkwetahiónha, ‘Satkátho, ne kaiénkwires iehiotohétston tsi nón꞉we ní꞉ses,’ eʼthó꞉ne wáhs; asèken ne Roiá꞉ner iatekwáhton.

²³ Ne tsi nahorihoténsons tsi nòkwah ní꞉se tánon ní꞉i waktharáhkwen, ne e Roiá꞉ner rorihwaniráton tsi natetiá꞉tere ní꞉se tánon ní꞉i ne ne tsi nénhwe enkénhake.”

²⁴ Káti ne Táwit wahatahtsatásehte thóh kahentáhke. Nó꞉nenh norákwahse sontahkarakwínekenhne, ne ronnontí꞉io wahá꞉tien ne tsi waténniote ne tahatskáhon.

²⁵ Ne ronnontí꞉io thóh renskwáhere raonitskwahráne, tsi kiʼ nihorenhnáhon, thóh renskwáhereh ahsontákʼtah. Ne Jonathan tehonatekwahrátshera nenhné꞉eh, tsi neh ná꞉he ne Abner thóh renskwáhereh ne Saul rahiatákʼtah; ók ne Táwit tsi ratientáhkwah anitskwaraseróksʼkon ne í꞉ken.

²⁶ Ne Saul kwáh iáh netsiowénhna tehá꞉wenh nètho wenhniserátekwe; asèken ne rahón꞉ha wárehre nenhné꞉ʼeh, “Khahohiátawenh; iáh tehotʼkwéniens, oriwiʼiohónwe tsi iáh tehotkwéniens.”

²⁷ Ók kí ne tewenhniserakéhaton, nó꞉ia wenhniserátekwe ne shiʼtsiorakwaséhon, Ne Táwit raonitskwáhra anitskwaraserókskon í꞉ken. Tánon Ne Saul wahawénhase ne roién꞉ha Jonathan, “Ónh niʼiohtiéren ne Jesse roiénha tsi iáh tethotetkwahráron, ne ne thetènhreh khéhs nón꞉wa wenhniseráte?”

²⁸ Jonathan wathorihwaserákwahse ne Saul, “Ne Táwit kwáh kiʼ thonikonrakontáhkwen waharihwanón꞉ton nahiʼianerénhseron thóh iá꞉re Bethlehem;

²⁹ wahén꞉ron, ‘Tahkeríhon né iá꞉ke; asèken nonkwá꞉watsireh neh thonaterihwahthentsiáton thonatéskonte thóh kanatowahnénhke, tánon ne raktsíha rákró꞉ri ne thóh iakésehke. Káti ó꞉nenh, tó꞉ka waketsénhri nakonhnón꞉wehne tsi tesekkánere, takeríhon kiʼ thóh ié꞉ke, tánon nahkhéken niakwahtatekenokón꞉ʼahs.’ Asèken neh kiʼ kí꞉ken aoríhwa tsi iáh tethawénon ne ronnontí꞉io raotekwáhraʼne.”

³⁰ Eʼthóhʼne ne Saul raonhakwáhtshera tahió꞉teke tsi nó꞉kwah ne Jonathan. Wahawénhase, “Í꞉se saién꞉ʼa ne kanikonrák꞉sen, kariwanón꞉we iónkwe! Iáh tewakateriéntare nètho ní꞉se tsi né sathaterakwénhni ne Jesse roʼiénha nasathatéhate, tánon thóh ahtehenserákon ne sanisténha tsi akoneóskon thí꞉ken?

³¹ Asèken kwáh tsi nikaríwes ne Jesse roʼiénha enrón꞉nheke ne tsi iohontsá꞉te, ó꞉ni ní꞉se khéhs ne sanakerásera tsi iáh takaweiennenhtáʼon. Ó꞉nenh kiʼ iasehiaténiet nahonwenhnónksa tánon tonwahiathénhaf akʼkénton, asèken oriwiʼiohónhwe tsi enrénheʼie.”

³² Ethóhʼne ne Jonathan watoriwaserákwahse ne roní꞉ha Saul, “Nontiéren tsi kwáh ahonwanonwarhiákhon? Ónhnihotiéren?”

³³ Ók ne Saul iahahóhʼiake ne raotsíkwahra ne warón꞉niaʼte ne tahó꞉kwahte; káti ne Jonathan wahoterién꞉tahrane nètho tsi iatehorihwaién꞉tahse ne Roní꞉ha tsi enhononhwarhiákhon ne Táwit.

³⁴ Jonathan thontahá꞉tahne natekwahraʼtsherák꞉ta kwáh í꞉ken tsi ronhakwénhen tánon kwáh iáh othènen thaʼtehotskáon ne tewenhniserakéhaton ne wenhnitahrá꞉kwe, asèken kwáh í꞉ken tsi ronikonrákshenskwe ne Táwit raorihwáke, tánon ne aorí꞉wa ne roní꞉ha tsi wahosenhnáksate.

³⁵ Ne shiʼioronhkené꞉ha ne Jonathan iahaiákenhne kahentáhke niaháre tsi nón꞉we nihoráhkwen ne Táwit tahiatátʼken, tánon ne raón꞉ʼa ne ne í꞉nehne raksá꞉a.

³⁶ Wahawénhase ne raksá꞉a, “Tesará꞉tat tánon shesáhkha ne kaiénkwires nètho ieʼwakarontháton.” Tsi niaʼhatátʼke ne raksá꞉a, iaharónhthate kaiénkwireh iahohtohétsten tsi wahá꞉tatʼke.

³⁷ Nó꞉nenh ne raksá꞉a iahá꞉rahwe tsi nón꞉we ne Jonathan raoién꞉kwire ieʼioienáhon, ne Jonathan iahonáton ne raksá꞉a tánon wahén꞉ron, “Ne kaién꞉kwire iáh kén tsehiotohétston tsi nón꞉we ní꞉ses?”

³⁸ Ne Jonathan ionsahonáton ne raksá꞉a, “Tesasteríhen, shatsatastórat, tó꞉sa shaʼtiatakenhéiat.” Káti ne Jonathan sahaienkwirarohʼró꞉ke tánon thóh natonthá꞉ra tsi nón꞉we ní꞉res ne raiahtakweʼní꞉io.

³⁹ Ók ne raksá꞉a iáh neh othènon tehoteriéntarare; nek khók ne Jonathan tánon Táwit ronaterién꞉tare tsi nikarihwaserón꞉ni.

⁴⁰ Ne Jonathan tahá꞉wenh ne raterihiosthá꞉kwas nètho raksá꞉a tánon wahawénhase, “Wáhs tánon thóh niahá꞉saf kanatowanénhke.”

⁴¹ Kwáh tsi niʼiostó꞉reh ne raksá꞉a thóh wárehte, ne Táwit thonahátahne ákta tsi ionenhiáts꞉tokote tánon wahathatshiatié꞉nenhte tsehakón꞉shote ohontsáke. Waʼtatʼtiákete áhsen niʼiorihwáke, tánon wahthiaʼtatenoronhkwáhnion, tánon skát꞉ne wathiaʼsénhtho; Táwit kiʼ sén꞉ha wathaséntʼtho.

⁴² Eʼthóhʼne ne Jonathan wahawénhase ne Táwit, “Wáhs skénnonk tionshá꞉se, tsítsénhak tethenitsáron ionkeniriwahniráton thóh raosén꞉nakon ne Roiá꞉ner, tiaʼtónhnions, ‘Ne Roiá꞉ner thóh enréh꞉seke tsi natetiá꞉tere, tánon tsi natenhón꞉tere tsi wakkwahtsiratátie tánon ní꞉se tsi waswahtsiratátie, ne ne tsi nénhwe enkén꞉hake.’” Tonsahátahne tánon éh꞉ren sárehte; tánon ne Jonathan kanatowanénhke nionshá꞉re.