1 Samuel 18 - Ohiatonhseratokénti

¹ Nó꞉nen ne Táwit saharihókten tsi tehothitháhrakwe ne Saul, ne tsi rónnhe ne Jonathan watʼtsiátʼnerenhke ne tsi rónnhe ne Táwit, tánon ne Jonathan wahonóronhkwe kwáh tsi ní꞉ioht ne rahón꞉ha tsi nirónnhe.

² Ne Saul iahohiaténhawe nètho siwenhniserátekwe tánon kwáh iáh tehorihwáwi ne roní꞉ha tsi thohʼnón꞉shote niahonsáhre.

³ Eʼthóhʼne ne Jonathan wahiatsaʼnerenhserónhni ne Táwit, tsioríhwa tsi nihonorónhkwah kwáh tsi ní꞉ioht tsi rónnhe ne raónha.

⁴ Ne Jonathan wahatiatawitáhsi ne wakó꞉ses rótstonʼne, tánon ne tahá꞉wenh Táwit, ó꞉ni ne raotserón꞉nia rateriʼiosthákwa, iekaní꞉hare ne rahosarehkówa ó꞉ni ne raohén꞉na ó꞉ni ne raotiathána.

⁵ Ne Táwit ionsahahiákenhne tánon kwáh í꞉ken tsi wahoianerásten ne kwáh tsitnón꞉we ne Saul ienhoténieʼte; tsi nahá꞉wenhne, ne Saul thóh wahorihónten rahotitsiókwahkon ne ronterí꞉ios. Tanon ratikwé꞉kon ne ronterí꞉ios, iekaníhareh ne raonhá꞉tsheras ne Saul, wahatirihwahnírate.

⁶ Tsi natontahonaʼtonhtsonhátie, nó꞉ne ne Táwit shonsaráhwen tsi iahononhwarhiákhon ne Philistiaró꞉non, ne konhnón꞉kwe takontiʼiakénseron akwé꞉kon tsi nonwésons kahnataién꞉tons Nisraerʼronónke, tehiotirihwákwen tánon tehiotinonhniá꞉kwen, ne ne tahontátken ne Saul, kontihawáhnion ne kén nikanakwáhas, neh tehiotirihwákwen natsenhnonniatsheráras, tánon ne kontihawáhnions ne ionterenhnhotahkwahsónhas, ne náhsen tekarenhshotáros.

⁷ Tánon ne konnón꞉kwe watʼkonthateriwákwahse tsi nakontenikonró꞉ri, “Ne Saul sakononwarhiaʼkhónhnion tewahniawehetseráhsen nihá꞉ti, tánon ne Táwit raón꞉ha nènhne sakonʼnonwariákhon noié꞉ri tehonnenhwenʼniaweʼehtserásen ní꞉hati.”

⁸ Ne Saul kwáh í꞉ken tsi wahonhákwen, ne kí꞉ken tsi nihiontón꞉nions wahonikonrák꞉sate. Wahén꞉ron, “Tsi nahonwahiátonhse ne Táwit oié꞉ri tewenniawehetsherásen, tánon ní꞉i tsi nahontʼiátonhse twenniawehetsherásen khók; ónh ní꞉ioht tsi sénha wé꞉so ahotónhnien nek khók ne kanakerásera?”

⁹ Káti ne Saul kwáh í꞉ken tsi wathokarénhawe ne Táwit ne ne thóh wenniseráte tonhtásawen.

¹⁰ Nó꞉ia saiórenhne kanikonrahetʼkénhsera tahaténieʼte ne Ní꞉io wahostó꞉renhne wahó꞉rahne ne Saul, tánon tiaʼtahonhnaríhen thóh raonónskon, ne tsi nikaríwes ne Táwit roterenhnó꞉thakwe nonhowakówa, tsi thóh nihaiérahkwe niaʼtewenniseráke. Ne Saul rahá꞉we ne raoshí꞉kwara;

¹¹ tánon ne Saul iahó꞉ti noshí꞉kwahra, asèken tsi wahanontónhnionwe, “Kwáh ne enhiʼhiatanénhtatʼte ne Táwit nasontáhke.” Ók ne Táwit tahaninhówaien tékeni iahónteratste.

¹² Ne Saul rotsániskwe ne Táwit tsioríhwa ne Roiá꞉ner tsi raónha nikwekonhátieskwe ók rotsatontakwénhni nenhʼné꞉eh ne Saul.

¹³ Káti ne Saul éhren wahohiatenhawí꞉ten ne Táwit tsi nón꞉we níres, tánon ne wahorihónten nasakohéntenhse ne tehonwennawehetserásen; tánon ne Táwit iehanenhrínekenskwe tánon tetonhnéthakwe, sakohentenhsehá꞉tie ne ronterí꞉ios.

¹⁴ Ne Táwit kwáh roterihwathentiénhniskwe akwé꞉kon tsi nenhaterihwathéntsiá꞉te; asèken nikwekonháties ne Roiá꞉ner.

¹⁵ Nó꞉nen ne Saul sahatkátho nètho tsi nikowánenh roianerastenihá꞉tie, tánon ó꞉nenh sén꞉ha wahotsánike.

¹⁶ Ók ratikwé꞉kon Nisraerʼrononke ó꞉ni ne Judah ronwanorónhkwah ne Táwit; asèken raón꞉ha kiʼ ne iehanenhrínekenskwe tánon tsi natetonhnètha tenhthesakohéntenhse.

¹⁷ Eʼthóhʼne ne Saul wahawénhase ne Táwit, “Kénʼen í꞉iens ne tiekowánen kheién꞉a Merab; kwáh enkatʼtónhthate nakahónha ne seksténha ahiónton; nék khók tsi sanikonratiaʼnitónhak nakeriwáke tánon saterí꞉ios ne Roiá꞉ner raoteriʼióseras.” Asèken ne Saul wárehʼre, “Kwáh ní꞉i iáh tiaʼtahiʼianisnónhsaren; áhnion ne ne Philistiaró꞉non kén niehó꞉ier.”

¹⁸ Ne Táwit wahawénhase ne Saul, “Ónhka ónhte ní꞉i tánon ónhka nakwátsireh í꞉ken, ne rakení꞉ha raowátsireh Israerʼronónke ne eh thatíteron, nètho ní꞉i ronontí꞉io rakwenón꞉sa aká꞉ton?”

¹⁹ Ók kwáh thóh nikaháwi nó꞉nenh ne Saul sakoién꞉a Merab ahowenkhéʼen né꞉eh tahonwanaterosehráwi ne Táwit, nahón꞉ʼa ne ne watʼkonwateró꞉sehron ne Adriel ne ne Meholathró꞉non ne ró꞉ne ahón꞉te.

²⁰ Nón꞉wa ne Saul sakoién꞉ʼa Michal ronwanorón꞉kwa ne Táwit. Ne Saul wahonwaró꞉ri, tánon ne thóh nikarihóten tahonikonraiérite.

²¹ Ne Saul wahanontónhnionwe, “Áhnion ní꞉i ne tekhehiateró꞉sehron nètho nahón꞉ʼa neh ahoteristaiéntaʼkwe tánon nètho ratshanáke ne Philistiaró꞉non ne ahokʼkónten ne rahón꞉ʼa.” Ne káti aoríhwa ne Saul wahawénhase ne Táwit ne ne tekení꞉haton ionshón꞉teratste, “Ní꞉se ó꞉nenh kiʼ konhienón꞉sa ensáton.”

²² Ne Saul wasakónhane ne raonhatsheraókons, “Tesewathá꞉ren ne Táwit raonháhak khók kénhak tánon sewénhron, ‘Satkátho, ne ronnontí꞉io tsi niʼiatʼtsenhnón꞉niaʼse ní꞉se, ó꞉ni ratiʼkwé꞉kon ne raonhatserashón꞉ʼahs iesanorónkwah; ó꞉nenh káti, ronnontí꞉io ienón꞉sa shá꞉ton.’”

²³ Káti ne Saul raonhatsherashón꞉ʼahs wahonwaró꞉ri kíʼnikawenhnó꞉tons ne Táwit kwáh rahonhatsíwah khók kènhne. Tánon ne Táwit wahén꞉ron, “Iáh kén ní꞉se kénk nihioríhwa tèken ne ronnontí꞉io ienón꞉sa ashá꞉ton, tsewé꞉ne nètho ní꞉i tsi niwakí꞉ten tánon iáh othènon satehianéka tèken?”

²⁴ Ne raonhatsherashón꞉ʼahs ne Saul sahonwaró꞉ri, “Kén nahó꞉ten wahén꞉ron ne Táwit.”

²⁵ Eʼthóhʼne ne Saul wahén꞉ron, “Kwáh kén nahó꞉ten kiʼ enshetsisewaró꞉ri ne Táwit, ‘Ne ronnontí꞉io kwáh iáh othèon tehaská꞉neks nahotʼkárhiakse tsi nòkwah ne kaniák꞉tshera nékʼkhók ne énskaʼtewenhniáwe ní꞉kons ne ronwatiwahrakwétarons ne Philistiaró꞉nons, ne nètho nahón꞉ton nahonsashakokáriakʼse ne ronnontí꞉io ronwásons.’” Nón꞉wa ne Saul ne rotenikonrón꞉ni nahahónhnien ne Táwit nahahiatiénenhne thóh ronhtsanákes ne Philistiaró꞉nons.

²⁶ Nó꞉nen ne raonhatsheraʼókonʼs wahonwaró꞉ri ne Táwit kí꞉ken owenhnahʼókons, ne Táwit kwáh í꞉ken tsi wahawerientí꞉io ne ronnontí꞉io rawenónhsa ahá꞉ton. Nohénton tsi nikawistáheks iahontók꞉ten,

²⁷ Ne Táwit wathá꞉tahne tánon iahá꞉re, wahón꞉ne ne rahonkweʼtahshón꞉ʼahs, tánon washakotinonwarhiakhónhnion enskatewenhniáwe niháti ne Philistiaró꞉nons; tánon ne Táwit tahá꞉hawe ne raotiné꞉ons ne ronwatiʼwahrakwétarons, tsi tahóntkawe kwáh kiʼ iekahiatonkwahiéri tahón꞉nion ne ronnontí꞉io, ne káti nahón꞉ton ronnontí꞉io rawenónhsa ahá꞉ton. Ne Saul watesakoteró꞉sheron ne sakoién꞉ha Michal ró꞉ne ahiónton.

²⁸ Ók nó꞉nenh ne Saul sahát꞉toke nètho Roiá꞉ner tsi ne nikwekonháties ne Táwit, tánon ne sakoién꞉a Michal tsi nihonwanorónkwah,

²⁹ Ne Saul kwáh kiʼ shé꞉kon rotsá꞉niskwe ne Táwit. Káti ne Saul wathiatátʼtion ne Táwit thóh nontonhtáhsawen.

³⁰ Eʼthóhʼne ne ratisenhnowáhnens ne Philistiaró꞉nons éhren tontahónhnete nateriʼioseráke; tánon kwáh tsi nihiorihwáke thenthón꞉ne, ne Táwit onenhsénha enhoianerásten tsi ní꞉ioht ne raonhatsheraʼókons ne Saul, káti ne Táwit tsi nahtewatenonhianíte wahasenhnowáhna.