1 Samuel 15 - Ohiatonhseratokénti

¹ Samuel wahawenhá꞉se ne Saul, “Ne Roiá꞉ner tahakaténiete nakoniená꞉ro naiesaʼnontí꞉ioste ne raonkweʼtashón꞉ʼahs Israerʼronónke; ó꞉nen ká꞉ti satahónsatat ne raowennaókons ne Roiá꞉ner.

² Ne aoríhwa ratónhnions ne Sakoiá꞉ner ne ratironhiakeró꞉nons, ‘Í꞉i kwáh enkheré꞉wate ne Amalekró꞉nons ne sakotishotʼtokonkénʼen ne tsi nihonahtiéren tsi iashakonahtiatónhti ne Israerʼró꞉nons nó꞉nen sathontahatiʼiákenʼne ne Egypt.

³ Ó꞉nen wáhs tánon iasheiatiatónhti ne Amalekró꞉nons, tánon kwáh tokénʼen serihwá꞉tont tsi nahó꞉ten ahotiʼientahtseraiéntahke; tó꞉sa othènen teshenonhiánik, ók senonwarhiá꞉kon tetsá꞉ron rón꞉kwe tánon ne konnón꞉kwe, ratiksaʼokónhas ó꞉ni nowiráhas, teotinákares tionónskwarons ó꞉ni teiotinakarontón꞉ʼahs, iotiniakwáhere ó꞉ni tewahóntes.’”

⁴ Káti ne Saul iasakonónk꞉kons nonkweʼó꞉kons, tánon iasakotsiokonhniánion tho nón꞉we Telaim, tékeni tewenniawehetserásen ní꞉hati ne takhésons tsi ronterí꞉ios, tánon oié꞉ri tewenniawehetserásen ní꞉hati ronterí꞉ios ne Judahronónke.

⁵ Ne Saul wáhrawe ne raotinatowahnénke ne Amalekró꞉nons tánon wahá꞉tiatahkwenhtaro tsi wahaterá꞉rahte tho nón꞉we tsi niehiostehon ne kaniataratátiene ne nashakonenhrénhten.

⁶ Ne Saul wasakawénhaʼse ne Kenites, “Wáhs, sewaténti! Éhren í꞉sewet tsi ratíteron ne Amalekró꞉nons, khéhs í꞉i kwáh kíʼenkwáhtonʼte skát꞉ne ne ronónha; asèken ní꞉se sewenéstʼton tsi tisewarihwaiérihkwe ratikwé꞉kon ne onkweʼó꞉kons NʼIsraerʼronónke nó꞉nen sathontahatiʼiákenʼne ne Egypt.” Káti ne Kenítes éhren wahónhnete tsi ratíteron ne Amalekró꞉nons.

⁷ Ne Saul washakosénhni ne Amalekró꞉nons, thóh tontáhsawen Havilah kwáh tsi niʼió꞉re ne Shur, ne ne tsík kará꞉kwinekens nòkwahti ne Egypt.

⁸ Rahón꞉ha iahohiaténhawe ne Agag ne ne Amalekró꞉non tserón꞉nhe, ók kwáh tohʼkénʼen tsi wasakótonʼte ratikwé꞉kon nonkweʼó꞉kons ne wárastste ne iosarothí꞉ie asarehkó꞉wa.

⁹ Ne Saul tánon nonkweʼó꞉kons wahonwanónstate ne Agag, tánon ne kwáh tkanaskwí꞉ios teiotinakarontón꞉ʼa ó꞉ni ne tionhnónskwarons ó꞉ni ne konwanarehsénstonhkwe, ó꞉ni ne teotinakarontón꞉ʼahs owirasón꞉ʼahs, tánon akwé꞉kons ne kanorón꞉sons, tánon kwáh ne iáh tahóton꞉te; akwé꞉kon ne iáh othènon tekarihwásthas ó꞉ni ne iáh othenènon tehiorihónte kwáh ne wahatirihwáhtonhte.

¹⁰ Ne raowennaʼó꞉kons ne Roiá꞉ner wahohiatórenhne ne Samuel:

¹¹ “Skaʼtateriwástahni tsi rinontiʼióston ne Saul, asèken tonsahatkarahténi tsi ratʼnonteráhtieskwe, tánon iáh tehorihwaieríton nakatiawenhráseras.” Ne Samuel tsi nahonhákwen; tánon iathaséntʼtho rahonháke ne Roia꞉ner asontahkwé꞉kon.

¹² Ne Samuel oronkéstsi wahatkétsko ne tahiatát꞉ken Saul, tánon ne Saumel tsi nahonwaró꞉ri, “Ne Saul thóh niehawénon Carmel, tsi nón꞉we iehonenhió꞉te ne raorihwá꞉ke, tánon tsi naténtreh thóh iensatóhetste Gilgal.”

¹³ Nó꞉nenh ne Samuel shiahárawe tsítres ne Saul, Saul wahawénhase, “Aiá꞉wens ní꞉se aiaiathateríston ne Roiá꞉ner; Í꞉i wakerihwaieríhton ne raotiawenhrátshera ne Roiá꞉ner.”

¹⁴ Ók kíʼne Samuel wahén꞉ron, “Nahó꞉ten káti kí꞉ken tsi natekonsént꞉thos ne teiotinakarontón꞉ʼa kahóntahkons, tánon tsi nikontewenhnó꞉tons ne tionhnónskwahrons nètho wakakʼthónhte?”

¹⁵ Ne Saul wahén꞉ron, “Thóh nitkonwatiʼiaténha Amalekronónke; asèken nonkweʼó꞉kons ne konwatinónsthaʼton ne kwáh tkanaskwí꞉ios ne teiotinakarontón꞉ʼahs ó꞉ni ne tionhnónskwarons, neh nahkonwahtsatatʼtsaháhte rahohénton ne Roiá꞉ner Saní꞉io; ók nonátiakes kwáh kiʼ nenhné꞉e iakhiʼiathónhton.”

¹⁶ Eʼthó꞉ne ne Samuel wahawénhaʼse ne Saul, “Sát꞉kaf! Í꞉i kwáh enkonró꞉ri nahó꞉ten ne Roiá꞉ner wahakénhase tsiokarása.” Watharihwaseráko ne Saul, “Satá꞉ti.”

¹⁷ Samuel wahén꞉ron, “Thohʼsáne kénk ní꞉sa tsi nateskánereh, kwáh kén í꞉se ohén꞉ton iésheʼte ne raotiʼtsiokwáhkon ne Israeronónhke? Ne ne Roiá꞉ner í꞉se iahiatarákwen nahisanontí꞉ioke Israeronónke.

¹⁸ Tánon ne Roiá꞉ner iehiatenié꞉ton ne nasaterihwaténtiate, tánon ráwen, ‘Wáhs, kwáh sheiátont ne iakorihwánerens, ne ne Amalekró꞉nons, tánon sewaterí꞉io iahetsiʼiatsatónhti kwáh tsi niʼió꞉re ienietsisá꞉hate.’

¹⁹ Onhnontiéren káti ní꞉se tsi iáh tesatewenhnarákwen ne raowennaó꞉kons ne Roiá꞉ner? Onhniʼiohtiéren tsi iatesatʼtsianakwe thóh tsi nikanenskwenhá꞉ton, tánon thóh nashiéh꞉re ne karihwahét꞉kens raohén꞉ton ne Roiá꞉ner?”

²⁰ Saul wahawénhase ne Samuel, “Wakatewenhnaráhkwen ne raowennaókons ne Roiá꞉ner, Thóh niewakénon wakaterihwathentiá꞉ton tsi kiʼ niehakateniéton ne Roiá꞉ner, Thiʼiaténha ne Agag ne ne sakonontí꞉io ne Amalekró꞉nons, tánon kwáh thóh kénʼen tsi keiatónhton ne Amalekró꞉nons.

²¹ Ók tsi nó꞉kwah ne kanenskwenhátons ne onkweʼó꞉kons iekonwatiiá꞉thenhaseron ne teiotinakarontón꞉ʼahs ó꞉ni ne tionhnónskwarons, ó꞉ni ne kwáh tsoiáneres ne ne aowenkénʼen ne karihwaiesátshera, ne nahonwahtsahaténhni ne Roiá꞉ner Saní꞉io thóh nón꞉we Gilgal.”

²² Tánon ne Samuel wahén꞉ron, “Ne Roiá꞉ner tóh kénh nihatsennonniátha ne watʼtsaháhtons iaiéthate ó꞉ni ne watéskonte, tsi naiontewennará꞉kwe ne raowennaó꞉kons ne Roiá꞉ner? Oriwiʼiohónwe, naiontewennará꞉kwe sénha ne ioiá꞉nere tsi ní꞉ioht ne kariwiʼiosehokónhas, tánon ahiontahón꞉sathaʼte tsi ní꞉ioht ne ronarésens teotinakarontón꞉ʼahs owirasón꞉ʼahs.

²³ Asèken nahiontenontsistát꞉sate kwáh satewahét꞉ken ne karihwanerahák꞉tshera tsi ní꞉ioht ne tahióntʼkonste, tánon nahiontenontsistanírate kwáh ne ne karihwanerahák꞉tshera ó꞉ni ne kahiatón꞉ni konwasénhnaiens. Tsioríhwa ní꞉se tsi waskénron ne raowenhnaó꞉kons ne Roiá꞉ner, ne raónha kwáh nón꞉ne eh wahiakénron ní꞉se nahisanontí꞉ioke.”

²⁴ Ne Saul wathorihwaserákwahse ne Samuel, “Ní꞉i wakeriwanerahákskon; asèken wakerihwaiésate ne raotiawenhrátsheras ne Roiá꞉ner ó꞉ni ní꞉se sawenhnahʼó꞉kons, tsioríhwa tsi wakhetsánike nonkweʼó꞉kons tánon ne wakatewenhnará꞉kwe ne raotiwénhna.

²⁵ Nón꞉wa ne káti aoríhwa, Wakaterén꞉naien, nahonsahonikónren nakerihwaneraháktshera, tánon thóh ietsìtene, ne káti ní꞉i nahón꞉ton ahonsahisénhnaien ne Roiá꞉ner.”

²⁶ Ne Samuel tonsahorihwaserákwahse ne Saul, “Iáh thóh tiaʼhonsáke skát꞉ne ní꞉se; asèken sakenronníhon ne raowénhna ne Roiá꞉ner, tánon ne Roiá꞉ner kwáh iakenronníhon nasheiatenontí꞉ioste NÍsraerʼronónke.”

²⁷ Ne Samuel tsi watatkaraténi nahé꞉ren ahonsárehte, ne Saul tahaiéna tsi tekakwát꞉ton ne raotiátawi wakó꞉ses, tánon onterá꞉tion.

²⁸ Tánon ne Samuel wahawénhaʼse ne Saul, “Ne Roiá꞉ner kwáh waharátion ne sanakerá꞉sera NÍsraerʼronónke nisèke ne kwáh nón꞉wa wenhniseráte, tánon ne tashakáwen ne tesewatonhonsanéken, tsi ronónha sénha rotiʼiánere tsi ní꞉ioht ní꞉se.

²⁹ Sén꞉ha isiʼnónhwe ne Ronnheʼónwe NÍsraerʼronónke kwáh iáh thatahontahákthate khéhs ne tahonsahoterihwaténien; asèken iáh ne ónkwe thahaiatóten, ne thènen tahonsahoteriwaténien.”

³⁰ Eʼthóhne ne Saul wahén꞉ron, “Ní꞉i wakherihwanerahákskon; nék kík sá꞉ka taʼkwénienst nón꞉wa raotihén꞉ton ne tonhnonkweʼtaions ne nakonkwetashón꞉ʼahs tánon raotihénton NʼIsraerʼró꞉nons, tánon ietsitiaterósen, nètho nahón꞉ton ahisénhnaien ne Roiá꞉ner Saní꞉io.”

³¹ Káti ne Samuel sahákete sahiateró꞉sen ne Saul; tánon ne Saul wahosénhnaien ne Roiá꞉ner.

³² Eʼthóhne ne Samuel wahén꞉ron, “Thatiaténhaf kénʼen akʼkénton ne Agag ne ronnontí꞉io ne Amalekró꞉nons.” Tánon ne Agag tahre raohén꞉ton kwáh í꞉ken tsi rotiaʼtakenʼheiáton. Ne Agag wahén꞉ron, “Orihwiʼioʼónwe ne kí꞉ken ne kanikonraronhiakénsera ne kenhé꞉ion.”

³³ Ók kíʼne Samuel wahén꞉ron, “Tsi né꞉eh ne sahsarehkó꞉wa iakahonhniénhni néne konnón꞉kwe tsi iáh tahiotiwiraiéntahne, sanísten kwáh ó꞉ni iáh taiaowiraientane.” Tánon ne Samuel wahó꞉tsowe ne Agag kenkníwas rahohénton ne Roiá꞉ner thóh nón꞉we Gilgal.

³⁴ Eʼthó꞉ne ó꞉nenh ne Samuel thóh niahá꞉re Ramah; tánon ne Saul tsi thóh nón꞉shote neh nionsáreh thóhh nón꞉we Gibeah neʼne Saul.

³⁵ Ne Samuel iáh shé꞉kon teshó꞉ken ne Saul kwáh tsi niʼió꞉re iarenhé꞉ie, ók ne Samuel wahotiónhnionhse ne Saul. Tánon ne Roiá꞉ner tsi sathateriwástani nètho tsi ne rahónhni ne Saul nahonontí꞉ioke NʼIsraerʼronónke.