1 Samuel 14 - Ohiatonhseratokénti

Jonathan Iasakotsiatónti ne Philistines

¹ Énska tewenhniseráteʼkwe Jonathan ne ne Saul roién꞉ha wahawénhase ne kén niʼthoiónha rónkwe ne rahawíne ne rateriʼiostákwa, “Káts, áhnion èhʼtho iéteʼne tsi tatíteron ne Philistines ronterí꞉ios ne ní꞉si nonwéha nokwáti.” Ók ne Jonathan iáh kiʼ tehoróri ne roní꞉ha Saul.

² Ne Saul thóh néh nón꞉we nihenterón꞉takwe natstéson nokwatísons ne Gibeah thóh karontókon ne wé꞉so iotenénha káhik ne ne thóh nón꞉we Migron; ne ronterí꞉ios ne ratikwekónhne kák꞉non ne ia-iáh tehonhnenhniá꞉we nihátikwe ronhnón꞉kwe,

³ neh roʼnaterosenhtátiene ne Ahijah ne ne Ahitub roién꞉ha, Ichabodʼs iathatekénʼa, ne nenhné꞉e ne Phinehas roiénh꞉ha ne Eli ne nènhne roién꞉ha ne Phinehas, ne raotsihénstatsi kènʼne ne Roiá꞉ner thóh nón꞉we Shiloh, raón꞉ha rahá꞉wine ne waniataríio í꞉ken atení꞉ionta. Nón꞉wa nonkweʼókons iáh teiakoteriéntarahkwe nètho Jonathan tsi kakʼniehawé꞉non.

⁴ Thóh nón꞉we ne Michmash tsi iohatátie, ne ne tsi natetsiatʼtahátere thóh nón꞉we ne Jonathan wahateniénten ne tashakotawénhrate Philistine ronterí꞉ios, nehthóh nón꞉we tetsarónhkwen nokwáti tsi tehionitstenró꞉rens;

⁵ Énskat tsi nateionitstenró꞉ren tsi niwé꞉ne notó꞉rehke nokwáti ne nohénton ne Michmash, tánon nó꞉ia entiéne ne nokwáti thóh ohénton ne Geba.

⁶ Ne Jonathan wahawénhase ne kén nithoiónha rón꞉kwe ne rahawinón꞉tse rateriʼiostákwas, “Káts, áhnion thóh niehé꞉tene tsi kentió꞉kwaien ne ronterí꞉ios ne ronónha tsi iáh tehonwatiʼwarakwétaron; tó꞉ka nón꞉wa ne Roiá꞉ner teshonkwariwáhwá꞉se; asèken ne Roiá꞉ner iáh thaónton tahoiótatʼtse nasakonónsthate aiakotiokówanenke khéhs kénk naiakónha.”

⁷ Ne ráʼhas rateriʼiostákwas wahawénhase, “Akwé꞉kon thóh nátie꞉re tsi nenhtisanikonrá꞉wen. I꞉i í꞉se tenikwé꞉kon; tsi kiʼ nisanikonró꞉ten, tánon ní꞉i.”

⁸ Eʼthó꞉ne ne Jonathan wahén꞉ron, “Ó꞉nenh iatentehniʼiáiaʼke tsi nón꞉we tí꞉ken ronhnón꞉kwe thónhnes tánon entiaʼtaténeste roʼnón꞉hake.

⁹ Tó꞉ka enhionkiʼién꞉hase, ‘Tsiateráhrat tsík í꞉i thóh ienʼiákwe tsi thiʼsènes,’ eʼthó꞉ne kiʼ kwáh tentení꞉take thaʼtentiatótaʼte tsi nón꞉we níteneʼte, tánon kwáh kiʼ iáh thóh tiahítene tsi thón꞉nes.

¹⁰ Ók tó꞉ka enthonníron, ‘Kénʼen nontásene tsi nón꞉we niiá꞉kwes,’ eʼthó꞉ne kiʼ ien꞉tene; asèken ne Roiá꞉ner wahathónttate naitewatkwé꞉ni. Nètho kwáh kiʼ neh enteniʼienterésthaʼkwe.”

¹¹ Káti tenitsá꞉ron iahiatotási rononháke ne Philistiaró꞉nons ronterí꞉ios; tánon ne Philistines wahonníron, “Sewatʼkátho, ne Hebrews thontahotiʼiakenhenhátie ne tsi ioshonwakaróntons tsi nón꞉we nihonatasehtánionkwe.”

¹² Ne ronhnón꞉kwe ne ronterí꞉ios tahonwatináton ne Jonathan tánon ne raonkwé꞉ta ne ráhas rateriʼiostákwas, rontón꞉nions, “Kénʼen nontásene tsi iá꞉kwes, tánon entiaʼteriwatʼkátho.” Jonathan wahawénhase ne ráhas rateriʼiosthákwas, “Káts ták꞉sehr; asèken ne Roiá꞉ner wahathóntate ne Israel nahontkwé꞉ni.”

¹³ Eʼthóhʼne ne Jonathan ratshaʼnáke tánon rashitáke tsi ratésere tsi sahatawénhrate ne tsi iohatátie, nikwekonhátie ne raonkwé꞉ta ne raháse rateriʼiostákwah rononterátie. Ne Philistine wahatihiaʼtiénenhne rahohénton ne Jonathan, tánon ne rahonkwéta ne ráhase rateriʼiostákwas, onàken rononterátie, washakononwarhiá꞉khon.

¹⁴ Neh sontontiérente sahontawéntʼtho Jonathan tánon ne raonkwé꞉ta ne ráhas rateriʼiostákwas wasakotinonwarhiakhónhnion kákʼnon neh tewáhsen niháti, neh nó꞉hen nénskat tewenhniá꞉we niwasítake shiehonénon ne tsi ionwénhtsaʼien.

¹⁵ Wathonʼnonhnaríkkon ne tsi ronatenataiéntakwe, thóh nón꞉we kehentáke, tánon ratikwé꞉kon nonkweʼshón꞉ahs; ne ronterí꞉ios tánon iekaníhare ne ratinataká꞉rhias wahotiʼiatíshonʼkwe; watsaʼhonhontsisónkwe; tánon ne iahón꞉ton kwáh í꞉ken tsi watsakahonhnarikʼkhon.

¹⁶ Ne Saul tsi nón꞉we natehanenhraientákwa thóh nón꞉we Gibeah ne ne Benjamin tsi nishakotinikónraʼre nonkweʼshón꞉áhs tsi nihatiʼtatʼkenónties tsi natehonaniʼtonhniénhni.

¹⁷ Eʼthóhʼne ne Saul washakawénhase ne ronterí꞉ios ne raónha ratiʼkwekonháties, “Ietsiʼiáset tánon sewát꞉kens ónka ionkhiʼiatiaʼtonhtakwénhni.” Nó꞉nen sahonsehtá꞉ko, Jonathan tánon ne raonkwéta ne ráhas rateriʼiostákwas iáh thóh tères.

¹⁸ Ne Saul wahaʼwénhaʼse ne Ahijah, “Tásaf thí꞉ken ateriwaseronniátshera ne raoneró꞉kwa Ní꞉io kénʼen.” Asèken neh thóh shiʼkaháwi nateriwaseronniátshera raoneró꞉kwa ne Ní꞉io ne ratiʼháwiskwe NʼIsraerʼró꞉nons.

¹⁹ Tsi nikarí꞉wes ne Saul teothítaʼre ne ratsihénstatsi, tsi nihiotsarókwen tsi ronaná꞉taien ne Philistines sén꞉ha wahoseráreste; tánon ne Saul wahawénnhase ne ratsihénstatsi, “Tó꞉sa othènen saterihwaststérist.”

²⁰ Eʼthó꞉ne ne Saul tánon ratikwé꞉kon nonkweʼó꞉kons ne rahón꞉ha ratikwekonhátieʼne iathontatinóntʼkhon tánon ateriʼioseráke niahón꞉ne; tánon ne Philistines wathontaterí꞉io, káti kwáh í꞉ken tsi kowá꞉nen watewanitónhni.

²¹ Nón꞉wa ne Hebrews ne roʼnón꞉ha nohén꞉ton ratikweʼkonhá꞉tieskwe ne Philistines skát꞉ne niehonénon tsi tonatená꞉taièn wathonwanatʼkaraténien tánon ne sahonwanatsatáraʼse NʼIsraerʼró꞉nons tsi nikáien ronwanonterátieskwe Saul tánon ne Jonathan.

²² Kwáh ne sahtèiot, nó꞉nen raʼtikwé꞉kon NʼIsraerʼró꞉nons ne iehonatasehtánions tsi tsionhniaʼrónhnion tsi nikakaneraseráien ne Ephraimke wahatiriwáronhke nètho Philistines tsi ronatekwenhá꞉ties, roʼnón꞉ha ó꞉ni kwáh ákta tsi nahonwatísheʼre tsi niwaterí꞉io.

²³ Káti ne Roiá꞉ner atesenhniétshera tashaʼkáwen NʼIsraerʼró꞉nons nètho wenhniserátekwe. Nateriʼiósera kwáh iehiotohétston ne Beth-aven, tánon ne ronterí꞉ios ne ratikweʼkonhá꞉tiene ne Saul ne khaʼkwékʼton kakʼnònhne oiéri tewenhniaʼwehetsherásen nihátikwe. Nateriʼiósera iatewaré꞉ni ne tsi ionhniaʼrónhnion tsi kanakeraserá꞉ien ne Ephraimke.

²⁴ Nón꞉wa ne Saul tsi nahateriwaténtsate kwáh í꞉ken tsi tsiaʼtosteríhen ne thóh wenhniserá꞉tekwe. Ne Israerʼró꞉nons ronanikonrokʼtáhon ne thóh shiʼwenhniserátekwe tsi washaʼkohriwaién꞉hase ne karihwaniráʼtshera ne ronterí꞉ios, ratónnions, “Enhaʼtatʼkarónhni nón꞉ka kíʼiok tehaská꞉on nohén꞉ton noʼkarasné꞉ha tánon kwáh satahonsatʼkheiérase ne iónksʼwens.” Káti iáh kiʼ ónka ne ronterí꞉ios thaʼtehonátskaon.

²⁵ Ratikwé꞉kon ne ronterí꞉ios iathonhnón꞉ko ne otsinakontakwáne tsi ratiʼtsikhetataʼhástha; tánon thóh tekatsikhetotárons ohontsá꞉kes.

²⁶ Nónen ne ronterí꞉ios satonhnón꞉ko ne otsinakontakwáhne ratiʼtsikhetatahástha, ne óshes iotsá꞉non; ók iáh kiʼ ónka thateoné꞉kwen nahonèkon, asèken wahotíteronhne ne tsi nikariwanirá꞉ton.

²⁷ Ók ne Jonathan iáh tehotontéhon ne roní꞉ha tsi ne sakorihontseténhni ne ronterí꞉ios ne kariwanirátʼtshera; káti iahá꞉tate ne aténhnits ne raháwahkwe, tánon iahaʼró꞉we ne tsi ieiót꞉te thóh tsi ratiʼtsikhethatahástha notsinakontakwáhne, tánon ne ratsaná꞉ke iahaiéna tsi rashakáronhte; tánon wathokaraswátʼthene.

²⁸ Eʼthó꞉ne saiá꞉ta ne raterí꞉ios wahén꞉ron, “Ne ianí꞉ha kwáh í꞉ken tsi roʼrihwáston tsi nisakorihontseténhni ne ronterí꞉ios ne ne kariwanirát꞉tshera í꞉ken, ratónhnions, enhariwaiésha nón꞉ka kí꞉ok tenhatskáon ne kénʼen wenhniseráte, ‘tánon káti ne ronterí꞉ios kwáh ronahtenkenró꞉kwenhni.’”

²⁹ Eʼthó꞉ne ne Jonathan wahénron, “Ne rakení꞉ha washaʼkotsirónhnien nonkweʼókons ne tsi ionwenhtsá꞉te; sewatká꞉tho ne kʼkahrá꞉ke watioswát꞉thene ne tsioríhwa tsi wakatʼkhonhonhserátʼkense ostón꞉ha kí꞉ken otsinakontakwáhne otsikhéta.

³⁰ Thohón꞉te sénha aioianerénhen tó꞉ka nón꞉wa wenhniseráte ne ronterí꞉ios tahonatskáonke kwáh ahonatatewenhní꞉ioke ne tsi nithotíha ne kákhwa tsi sahonwatisénhni ne ronwatísons; asèken nón꞉wa tsi nihonwatinonwarhiakónhnion ne Philistines iáh só꞉tsi tateiotenonhianítonkwe.”

³¹ Ne nó꞉nenh sahonwatisénhni ne Philistines nètho siwenhniserátekwe thóh tonʼtásawen Michmash tsi ní꞉iore ne Aijalon, ne ronterí꞉ios kwáh í꞉ken tsi ronatakenró꞉kwenhni;

³² Káti kwáh tsiatʼthonskénhni tsi tkaké꞉rons ne kanenskwenhá꞉ton, tánon wasakotiʼiéna ne teiotinakarontón꞉ʼa ó꞉ni ne teotinákares tionhnónskwarons ó꞉ni natenaskonhnihasónhas tionónskwarons, tánon kwáh thók ohontsá꞉ke wasakotinonwarhiaʼkhónhnion; tánon ne ronterí꞉ios wahatiwáraʼke tieotenekwénhsa.

³³ Eʼthó꞉ne ónkak wahonwaró꞉ri ne Saul, “Satkátho, ne ronterí꞉ios kwáh rotiriwanerenhakʼsehátie tsi nòkwah ne Roiá꞉ner tsi nahteonatskáontse tieiotenekwénsa.” Tánon ne raónha wahén꞉ron, “Tsi nesewátiere ioteronhón꞉we; tasewakaʼraténiat ne kwáh kanenhiowá꞉nen kén꞉en akkén꞉ton sewá꞉ien.”

³⁴ Ne Saul wahén꞉ron, “Thatesesewaréni tsi thónʼnes ne ronterí꞉ios, tánon ietsiʼién꞉has, ‘Áhnion ratikwé꞉kon teshakotiʼiaténhaf ne raotitshenenókons teotinákares khéhs ne raotitshenenókons teiotinakaronhtón꞉ʼa, tánon kén꞉en sakonawént꞉tho, tánon neh rón꞉nek; tánon tó꞉sa ratirihwánerak tsi nó꞉kwah ne Roiá꞉ner tsi ne enhón꞉neke ne tieiotenekwénhsa.’” Káti ratikwé꞉kon ne ronterí꞉ios tashakotiʼiaténhawe ne raotitshenenókons teotinákares nètho siwakaratserátekwe, tánon thohnónhwe nasakonawéntʼtho

³⁵ Tánon ne Saul wahahónhnien ietsenhahráhkwa ne Roiá꞉ner; ne ne tontiérenhte wahahónhnien ne ietsenhará꞉kwa ne Roiá꞉ner.

Ne Jonathan Wahotʼterónhtane Narénheʼie

³⁶ Eʼthóhʼne ne Saul wahén꞉ron, “Há꞉nio èhʼtho iétehwe iethí꞉ser ne Philistines ne tsi niwashón꞉tes tánon iethiʼnenhskwenháton kwáh tsi ní꞉iore ieniórenhne iatenhioswát꞉thene; Há꞉nio tó꞉sa ne saiá꞉ta iatahonsaotátereh.” Waonníron, “Thóh nátser tsi nahóten akénhake ioiá꞉nere sarihwáke.” Ók ne ratsihénstatsi wahén꞉ron, “Áhnion ákta ítewet ne Ní꞉ioʼne ne kén nón꞉we.”

³⁷ Káti ne Saul wahoriwanóntonʼse Ní꞉io, “Iahiakiʼiaʼtsatónhti kén ne Philistines? Kwáh onhtèken iensehiátʼkawe thóh ronhtshanákes NʼIsraerʼró꞉nons?” Ók ne Ní꞉io iáh kiʼ tatehoriwaserákwenhni nètho siwenhniserátekwe.

³⁸ Ne Saul wahén꞉ron, “Káts kén꞉en nontásewe, Sewakwé꞉kon ne ietsihén꞉tense nonkweʼókons; tánon áhnion tewariwí꞉sak onhní꞉iot kí꞉ken kariwáneren tsi iotkétskwen nón꞉wa wenhniseráte.

³⁹ Asé꞉ken tsi nironnheónhwe ne Roiá꞉ner tsi raónha sakonónstats NIsraeró꞉non, iekaní꞉hare tó꞉ka í꞉i riʼien꞉ʼa Jonathan akén꞉hake, raón꞉ha kiʼ kwáh oriwí꞉io ónhwe tsi enrénheʼie!” Ók iáh kiʼ ne tionhkwé꞉ta tsi nihá꞉ti nonkweʼókons tatehonwariwahserakwénhni.

⁴⁰ Ne Saul washakawénhase ratikwé꞉kon NʼIsraerʼró꞉nons, “Ní꞉se isenokwáhti thentisewátaʼne, tánon ní꞉i ó꞉ni ne riʼien꞉ʼa ákte nokwáhti tenhiakenítane.” Nonkweʼókons wahonwénhase ne Saul, “Thóh nátser tsi nahiotón꞉hake ne tkarihwaiéri ne sariwá꞉ke.”

⁴¹ Eʼthó꞉ne ne Saul wahén꞉ron, “Ó Saiá꞉ner Shé꞉ní꞉io NʼIsraerʼró꞉nons, nontiéren tsi iáh thatetseriwaʼsehrakwénhni ne sanhá꞉tsera nón꞉wa wenhniserátekwe? Tó꞉ka kí꞉ken kanítʼtshera akonhá꞉ke kénteron khéhs ne riʼién꞉ha Jonathan, Ó Saiá꞉ner Sheʼníio NʼIsraerʼró꞉nons, tasát꞉kaf ne kanenhiaʼtóken ierihahthákwah ne Urim; ók tó꞉ka kí꞉ken kaníhtshera thóh kénteron roʼnonháke ne shonkwetaʼshón꞉ʼahs Israerʼró꞉nons ne tasát꞉kaf ne kanenhiaʼtokénston Thummim.” Tánon ne Jonathan tánon ne Saul ne wahonwanátsaton ne tsi wahonwatiʼnenhiaién꞉hase nohontsáke, ók nonkweókons sahiontsiatotarísi.

⁴² Eʼthó꞉ne ne Saul wahén꞉ron, “Kanenhiató꞉ken kiʼ ísewats ne enwatʼróri kák nikáien í꞉i khéhs ne riʼién꞉ha Jonathan tahiontiaʼterientaweriéhon.” Tánon Jonathan nokwáti niahá꞉he.

⁴³ Eʼthó꞉ne ne Saul wahawénhase ne Jonathan, “Takʼró꞉ri onhnishatiéren.” Ne Jonathan wahoró꞉ri kíʼ, “Ostón꞉ha wakatkonhontserát꞉kenhse notsinakontakwáne otsikhéta ne wákatste ne tsi ieiót꞉te naténhnits ne khawá꞉kwe; kén꞉en í꞉kes, kwáh kiʼ enkíheʼie.”

⁴⁴ Ne Saul wahén꞉ron, “Ne Ní꞉io kwáh thóh nihatiéras tánon kwáh í꞉sinonh; ní꞉se kwáh kiʼ oriwiʼiohónwe tsi ensíheʼie!”

⁴⁵ Eʼthó꞉ne nonkweʼókons wahonwénhase ne Saul, “Ó꞉nenk kén tsi enrénheʼie ne Jonathan, ne tsi raón꞉ha roriwakanonhní꞉hon kí꞉ken kowánen atesheniétshera NÍsraerʼronónke? Ahínon ít꞉ken! Ne tsi nironnheʼón꞉we ne Roiá꞉ner, iáh ne skanonkwísera ne ranontsíne tsiakaién꞉taʼne nonwenhtsá꞉ke; asèken ne raónha tsi nahoióten nón꞉wa wenhniseráte Ní꞉io seh wahoiénawaʼse.” Káti nonkweʼókons thonsahonwatentsaháhten tsi rónnhe ne Jonathan, tsi iáh tharénheʼie.

⁴⁶ Eʼthóhʼne ne Saul wahát꞉kaʼwe tsi sakoseré꞉ne ne Philistines; tánon ne Philistines thóh nionsahón꞉ne ne ronónha raonatonhontsáke.

Ne Saul Iehokontá꞉kwen Naterí꞉ioseras

⁴⁷ Nó꞉nen ne Saul sahonontí꞉ione NIsraerʼronónke, wahonteriʼióhaton ratikwé꞉kon ne ronwáshons kwáh tatkaiénh꞉thakwe—tsi washakokʼkónten ne Moab, ó꞉ni ne Ammonró꞉nons, ó꞉ni ne Edom, ó꞉ni ne rotinontí꞉ios ne Zobah, ó꞉ni ne Philistines; tsi nón꞉we nienhatiérate tsi washakósere.

⁴⁸ Tsi nenháiere kwáh thoʼnikonrahkontákwen, tánon washaʼkononwarhiaʼkhónhnion ne Amalekró꞉nons, tánon shaʼsakoniákente NʼIsraerʼró꞉nons tsi tonshaʼsakoshiotarísi tsi nihá꞉ti ne ronwatiʼnénskwasʼkwe.

⁴⁹ Nón꞉wa ne raonekenterontsherashón꞉ʼahs ne Saul ne ne Jonathan, Ishvi, tánon Malchishua; tánon tsi niʼiotisenhnó꞉tens ne tekeniʼiáhse sakoiohʼokónhas neh kiʼ ne: tsi niʼiakosenhnóten ne tsiaʼkotsierénton iakawenhnakerá꞉ton ne ne Merab, tánon tsi niʼiakosenhnóten ne kén nitsiaʼkoiónha ne ne, Michal.

⁵⁰ Tsi niʼiontátsias ne Saul ró꞉ne ne ne Ahinoam ne shaʼkoién꞉ha ne Ahimaaz. Tánon tsi niosenhnóten ne rateriʼioserakweʼní꞉io ne ne Abner ne ne roién꞉ha ne Ner, ne ne Saul rononwáha;

⁵¹ Kish raón꞉ha roní꞉ha ne Saul, tánon Ner raón꞉ha roní꞉ha ne Abner ne roién꞉ha ne Abiel.

⁵² Kwáh í꞉ken tsi ioteriʼioseraníron tsi nahonterí꞉io ne Philistine tsi nihotenhniseraté꞉nionkwe ne Saul; tánon nó꞉nen ne Saul ónkak enhó꞉ken ne rashástste ronikonratʼtsáni raterí꞉ios, ienhoiaténhawe raón꞉ha enhatonhkweʼtará꞉ko.